OBADIA
1 Gin ma wok i wang’ pa Obadia:*
Rwoth Ubimo ma Malu Ngbir Yehova uyero pir Edom kumae:
“Wawinjo rwonglembe moko m’uai i bang’ Yehova,
Juoro jakwenda moko i kind thek:
‘Wuai malu, dong’ wayikara pi nikiedo lwiny i dhoge.’”
2 “Nen! adwoki ni gin ma kabang’e mbe i kind thek;
Juceyi ku rac.
3 Rikini mir adundeni uwondi,
In m’ibedo i odicana,
M’ibedo kaka ma malu, ibeyero i adundeni kumae:
‘Ng’a ma bilora piny i ng’omi?’
4 Kadok nwang’u iyiko kabedo peri malu* calu acur,
Kunoke kadok iketho odi i kind nyikaluku,
Abilori piny ku kuca,” Yehova wacu.
5 “Tek jukwo umondo i wii, tek weg ayeki umondo i wii ku diewor,
(Ibinyothiri ku rac mire maa!)*
Nyo gibikwalu ngo kende kende gin ma igi yenyo?
Kunoke tek ju ma pono nying ulok re ma gibino i wii,
Nyo gibiweko ngo kunde moko ma jucopo beko?
6 Ee jukeyo i Esau mire maa!
Jusayu kaka lonyo pare m’upondo ku rac mire maa!
7 Giriemi nitundo i wang’ mupaka.
Ju ceke ma gidiko cing’gi kudi* giwondi.
Jumaco ma gikwo ku kwiyocwiny kudi giloyi.
Dhanu ma gicamu mukathi karacelo kudi gibiciko voi i the tiendi,
Ento ibinene ngo.
8 I nindo maeca,” Yehova wacu,
“Nyo abinyotho ngo ju ma riek kud i Edom
Man ng’iyo i lembe kud i ng’om gudi pa Esau?
9 E ndiri bimaku jurumony peri, Ee Theman,
Pilembe jubinego dhanu ceke mi ng’om gudi pa Esau i saa mi nek ma dit.
10 Lewic binegi pi rop m’itimo
I kum umeru ma Yakobo,
Man ibinyothiri mi magwei.
11 I nindo m’icungo i iye ibeneno ku bor,
I nindo ma juwirok gitero iye udul mony pare i ng’eca,
Kinde m’umondo gimondo i dhugang’ pare man gigoyo gagi i kum Yeruzalem,
Itimo calu acel m’i kindgi.
12 Nwang’u ukwayu ngo anyong’a unegi pi nindo ma peko uwok i iye iwi umeru,
Nwang’u ukwayu ngo anyong’a unegi i kum dhanu mi Yuda i nindo mi nyoth migi,
Man nwang’u ukwayu ngo iwec ku kuhaya kumeno i nindo mi can migi.
13 Nwang’u ukwayu ngo ibin i dhugang’ mi dhanu para i nindo mi can migi,
Nwang’u ukwayu ngo mutoro unegi i kum nyoth migi i nindo mi can migi,
Man nwang’u ukwayu ngo iriey cingi iwi lonyo migi i nindo mi can migi.
14 Nwang’u ukwayu ngo icung i akarayo pi ninego ju pare ma giberingo,
Man nwang’u ukwayu ngo imii ju m’uboth pare i cing’ judegi migi i nindo mi can.
15 Kum nindo pa Yehova m’ubebino i kum thek ceke ni ceng’ini.
Tap calu m’itimo, in de jubitimo i kumi kumeno.
Jubitimo i kumi tap calu m’itimo i kum jumange.
16 Kum i ayi ma rom m’imadhu ko iwi got para ma leng’,
Thek ceke bimediri nimadhu kumeno.
Gibimadhu man gibimwonye,
Man gibibedo calu ve gilar gibedo mbe.
17 Ento ju m’uboth bibedo nuti iwi got Sayuni,
Man ebibedo leng’;
Man ot pa Yakobo bimaku piny migi.
18 Ot pa Yakobo bidoko ni mac,
Ot pa Yozefu bidoko ni lebmac,
Man ot pa Esau bidoko calu soka;
Gibicwinyo mac i kume man gibiwang’e,
Man ng’atu moko mbe mi ot pa Esau ma biboth,
Kum Yehova en gire uweco.
19 Gibimaku Negeb man ng’om gudi pa Esau,
Cefela man ng’om mi Jufilisti.
Gibimaku podho mir Efraim man podho mi Samaria,
Man Benjamin bimaku Gilead.
20 Ng’om mi Jukanan nicidho bir i Zarefath,
Bibedo ni dhanu ma giai kud i gang’ ma tek maeni gicidho i ng’eca, ni dhanu mir Israel.
Man dhanu ma gicidho i ng’eca kud i Yeruzalem ma gibino i Sefarad, gibimaku adhura mi Negeb.
21 E jular gibiidho iwi got Sayuni
Pi nipoko lembe iwi ng’om gudi pa Esau
Man ker bidoko pa Yehova.”
Thelembene tie “Jatic pa Yehova.”
Kunoke nyo “ituk lir lir.”
Kunoke nyo “Gibinyothi rukani?”
Kunoke “Ju ceke ma gitimo lembariba kudi.”