YONA

1 Lembe pa Yehova ubino i bang’ Yona* ma wod Amitai kumae: 2 “Ai malu, cidhi i Nineve m’adhura ma dit, man twong’ pi pokolembe i kume, pilembe racu mi dhanu m’i iye utundo i itha.”

3 Ento Yona uai malu pi niringo bor kud i wang’ Yehova i Tharsis; eloro i Yopa man enwang’u meli m’ubecidho i Tharsis. Pieno eculo sente man eidho i meli pi nicidho karacelo kugi i Tharsis, bor kud i wang’ Yehova.

4 I ng’eye Yehova uketho yamu ma tek mandha utuk iwi nam man avuvu* ma dit ubino koto iwi nam, uketho meline nwang’u udhingo ng’eny. 5 Lworo umaku junam lee, uketho ng’atuman m’i kindgi ucaku kwayu kony i bang’ mungu pare. Man gicaku bayu piny ma n’i meli i nam, kara edok yot. Ento Yona uloro piny i the meli man evuto enindo rut. 6 Jego mi meli ugam ucoro man uwacu ire kumae: “Pirang’o ibenindo? Ai malu, kway mungu peri! Saa moko nyo Mungu mandha binyutho nia ebedieng’ piwa, man wabitho ngo.”

7 I ng’eye giwacu i kindgi kumae: “Wubin, dong’ wagoyu gagi pi ning’eyo nia peko maeni uwok i wiwa pi ng’a.” Pieno gigoyo gagi, e gagi upodho iwi Yona. 8 Gipenje kumae: “Wakweyi, yer iwa, peko maeni uwok i wiwa pi ng’a? Itimo tij ang’o, man iai kani? Itie dhanu mi ng’om ma kani man iai i kind dhanu ma kani?”

9 Edwoko kumae: “An a Jaebrania man alworo* Yehova Mungu m’i polo, Ng’atu m’ucwiyo nam man ng’om.”

10 E lworo nego dhanune dong’ magwei man gipenje kumae: “Itimo ang’o eni?” (Dhanune giwinjo nia ebino ringo bor kud i wang’ Yehova, pilembe eyero lembene igi.) 11 Pieno giwacu ire kumae: “Ukwayu watim ang’o i kumi kara nam ukwii iwa?” Kum nam ubino medere ameda nikoto ma tek. 12 Edwoko kumae: “Wuting’a man wubola i nam, e nam bikwiyo iwu; pilembe ang’eyo nia tie pira re ma yamu ma tek maeni utuk i wiwu.” 13 Ento dhanune gigoyo ngai ma tek* pi nidwoko meline iwi ng’om, re ecopere ngo igi pilembe nam ubino medere ameda nikoto ma tek i ng’etgi.

14 I ng’eye gikwayu Yehova man giwacu kumae: “Aa, kawoni, Ee Yehova, wakweyi, timba kud watho pi ng’atu maeni!* Kud iketh rimo m’udubo ngo i wiwa, pilembe itimo calu ma ii yenyo, Ee Yehova.” 15 E giting’o Yona man gibole i nam; e kwinyo pa nam ukwiyo. 16 Lworo pa Yehova ugam umaku dhanune lee dit man githiero lam ni Yehova man gitimo lembang’ola ma ku kwong’.

17 Yehova ugam uoro rec moko ma dit pi nimwonyo Yona, pieno Yona ubedo i cindi recne pi dieceng’ adek man diewor adek.

2 I ng’eye Yona urwo i bang’ Yehova Mungu pare kud i cindi rec, 2 ewacu kumae:

“Kud i can para, akwayu Yehova man edwoko ira lembe.

Kud i thuc mi* Liel,* akwayu kony.

Iwinjo dwanda.

Angongo pii peri ceke man mujanga peri ceke giumo wiya.

 4 Man awacu kumae: ‘Juriema bor kud i weng’i!

Abineno hekalu peri ma leng’ kendo nenedi?’

Uthwor ugapere i wiya.

 6 Amwony piny i the gudi.

Riu mi ng’om ubino umo wiya mi nja.

Ento iwodho kwo para kud i vur, Ee Yehova Mungu para.

 7 Kinde ma kwo* para ubeweka, Yehova re m’ubino Ng’atu m’apoy pire.

E rwo para utundo i beng’i, i hekalu peri ma leng’.

 8 Ju ma gimiyiri ni ayi gin m’acwiya ma tijgi mbe giweko acaki migi mi mer ma lokere ngo.*

 9 Ento an, abithiero lam iri ku dwal mi dwoko foyofoc.

Gin m’ang’olo, abitime.

Both ai i bang’ Yehova.”

10 I ng’ey kare Yehova ung’olo lembe ni rec, e eng’ogo Yona iwi ng’om.

3 E lembe pa Yehova ubino i bang’ Yona wang’ mir arionde, uwacu kumae: 2 “Ai malu, cidh i Nineve m’adhura ma dit man twong’ ire rwonglembe m’ayero iri.”

3 Pieno, pi niworo lembe pa Yehova, Yona uai malu man ecidho i Nineve. Nwang’u Nineve ubino adhura ma lac mandha.* Juwotho ceng’ adek pi nidaru iye. 4 E Yona umondo i adhurane, man ewotho pi nindo acel m’ebetwong’o kumae: “Edong’ nindo pier ang’wen kende, jubinyotho Nineve.”

5 E dhanu mi Nineve ginyutho yiyoyic i Mungu man gitwong’o pi kwirocam man gikendo kendi mi saki, niai i kum ng’atu ma dit m’i kindgi nitundo i kum ng’atu ma nok. 6 Kinde ma lembene utundo i bang’ ubimo mi Nineve, eai kud iwi komker pare man ewodho bongu mi ker kud i kume man eumere ku kendi mi saki, e ebedo i vuru. 7 M’umedo maeno, eng’olo nia jutwong’ i Nineve zoo kumae:

“Ku ng’ol p’ubimo man ku mi weg yung pare: Ng’atu moko mbe kadi yedi, dhieng’ kadi udul rombe m’ucikere nicamu piny moko. Gicikiri ngo nicamu cam kadi nimadhu pii. 8 Dong’ gium kendi mi saki, dhanu ku yedi bende; man dong’ gikway Mungu kud adundegi ceke man gilokiri kud i yo migi ma reco man kud i rop ma gibetimo. 9 Ng’a m’ung’eyo ka nyo Mungu mandha biloko ngo paru pare* kud i kum lembe m’ekeco nitimo man ebilokere cen kud i kwinyo pare m’uopo kara kud watho?”

10 Kinde ma Mungu mandha uneno gin ma gitimo, kite ma gilokiri ko cen kud i yo migi ma reco, eloko paru pare* kud i kum nyoth ma nwang’u ewacu ekelo i wigi, e ekele ngo.

4 Ento lembe maeni uton lee dit i Yona, e ng’eicwiny umake lee. 2 Pieno erwo i bang’ Yehova kumae: “Aa, Yehova, nyo eni ubino ngo adieng’a para kinde m’abino i ng’om thuwa? Eno re m’uketho ku kwong’a amito aringi i Tharsis; kum ang’eyo nia itie Mungu ma jabero* man jakisa, i yoo ni ng’eicwiny man ipong’ ku mer ma lokere ngo, itie ng’atu ma peko nyayu can i iye. 3 Kawoni, Ee Yehova, akweyi, kab kwo* para cen, kum e ber ira nia atho kakare nikwo.”

4 Yehova upenje kumae: “Nyo ng’eicwiny peri no thelembene nuti andha?”

5 E Yona uwok kud i adhura man ebedo yo nyangu mir adhurane. Ejiyo ire otbak keca man ebedo i the tipone pi nineno gin ma biwok i kum adhurane. 6 I ng’eye Yehova Mungu uketho uboko awal* utwi iwi Yona pi nimiyo tipopiny i wiye man nijwigo lak can pare. E anyong’a unego Yona lee pir uboko awalne.

7 Ento Mungu mandha uoro ukoko i dhu mombwa mi nindo m’ulubo man ecamu uboko awalne, e ener. 8 Kinde ma ceng’ ucaku rieny, Mungu uoro bende yamu ma yo nyangu ma thwoyo piny man ceng’ ucaku wang’u wi Yona, e evoc. Emedere nikwayu nia etho* m’ebeyero kumae: “E ber ira nia atho kakare nikwo.”

9 Mungu upenjo Yona kumae: “Nyo ng’eicwiny m’unegi tho rukeno pir uboko awal e, thelembene nuti andha?”

Edwoko kumae: “Ng’eicwiny unega kakare, enega lee ma dong’ amito atho cen.” 10 Ento Yehova uwacu kumae: “Kisa unegi i kum uboko awal m’itimo de ngo tic pire kadi iketho de ngo edongo; edongo diewor acel man enyothere de diewor acel. 11 Nyo an bende kisa ucikere ngo ninega i kum Nineve m’adhura ma dit, ma tie ku dhanu elufu dak acel ku pier ario (120 000) ma ging’eyo ngo nikoyo kind gin ma ber ku gin ma rac* man bende ley migi ma dupa?”