MIKA
1 Lembe pa Yehova m’ubino i bang’ Mika* mi Moreceth i nindo pa Yotham, Ahaz man Hezekia ma gi jubim mi Yuda man m’enwang’u i gin ma wok i wang’ pi Samaria man pi Yeruzalem:
2 “Wuwinji wu dhanu ceke!
Cik ithi, Ee ng’om ku piny m’upong’o ii,
Man dong’ Rwoth Ubimo ma Malu Ngbir Yehova ubed jamulembe i kumwu,
Yehova niai kud i hekalu pare ma leng’.
3 Kum nen! Yehova ubewok kud i kabedo pare;
Ebiloro piny man ebiwotho kaka ma malu m’i wi ng’om.
4 Gudi biloy i the tiende,
Man poga* bing’eny bwa
Calu udok i wang’ mac,
Calu pii ma jukonjo ka ma lung’ mandha.
5 Lembe maeni zoo tie pi jai pa Yakobo,
Pilembe ot mir Israel udubo.
Ang’o m’uketho Yakobo ujai?
Nyo tie Samaria ngo?
Man kosa mi kaka ma malu mi Yuda tie pa ng’a?
Nyo tie pa Yeruzalem ungo?
6 Abiketho Samaria ni udhuru mir uvuru mi podho,
Kaka ma jupidho i iye yend ulok;
Abicoro* kidine piny i poga,
Man abiketho katherene binen kamaleng’.
7 Jubirungo ayi gin m’ang’ika pare ceke
Man jubiwang’u giramiya ceke m’ebed elworere pigi* i mac.
Abinyotho ayi gin m’acwiya pare ceke.
Kum ecokogi niai i sukulia mir asara,
Man gibidoko kendo ni sukulia mi weg asara.”
8 Pi lembe maeni, abigoyo nduru man abiwak;
Abiwotho ma tienda nanu man muneru.
Wak para bibedo calu p’utho.
Man wak para bibedo calu pa udo.
9 Kum rem pare copo key ungo;
Etundo bor cil i Yuda.
Goco unyay i dhugang’ mi dhanu para nitundo i Yeruzalem.
10 “Kud wutwong’ pire i Gath;
Kud wuwak kadok nyanok de.
I Beth-Afra,* wung’ieluru i utur.
11 Wukadh muneru lokaca man ku lewic, Ee jurubedo* mi Cafir.
Jurubedo* mi Zaanan giwok ungo woko.
Jubiwak i Beth-ezel man ebikabu kony pare cen kud i beng’wu.
12 Kum jurubedo* mi Maroth gibino kuro gin ma ber,
Ento gin ma rac re m’uloro niai i bang’ Yehova i dhugang’ mi Yeruzalem.
13 Wutwii magali i kum ungu mi riuni, Ee jurubedo* mi Lakic.
Wubino acaki mi dubo ni Nyasayuni,
Kum junwang’u jai mir Israel i ii.
14 Pieno ibimiyo giramiya mi cikojo* ni Moreceth-gath.
Udi mir Akzib ubino gin mir awondi ni jubim mir Israel.
15 Fodi abikelo won aloci* i beng’wu, Ee jurubedo* mi Mareca.
Dwong’ mir Israel bicidho bor nitundo i Adulam.
16 Wunyar wiwu man wuliel wiwu pir awiya mwu ma wumaru akeca.
Wugob wiwu calu pa acur,
Kum juting’ogi cen kud i beng’wu juterogi i ng’eca.”
2 “Can iwi ju ma gipangu nitimo lembe ma rac,
Ma giparu lembe ma raco iwi kavuto migi!
Kinde ma der mi kugweno utundo, gitime,
Pilembe gitie ku copo mi time.
2 Giketho cwinygi i kum podho man gimayugi;
Bende i kum udi man gimayugi;
Givuro ng’atini ku ot pare,
Givuro ng’atini ku giralaga pare.
3 Pieno Yehova uwacu kumae:
‘Abeyiko can i kum ot maeni ma wubiboth ungo kud i iye.*
Wubiwotho ngo kendo ku ting’iri kum etie saa mi can.
4 I nindo maeca dhanu biyero lembabola piwu,
Man gibiwak ma rac piwu.
Gibiwacu kumae: “Wathum ceke!
Eketho makapiny mi dhanu para udok i cing’ jumange, ekabe kud i bang’a mire maa!
Emiyo podho mwa ni ng’atu m’ugwoko ngo bedoleng’ pare.”
5 Pieno wubibedo mbe ku ng’atu moko acel de ma bitelo thol mi pimo piny,
Pi nipoko ng’om i cokiri pa Yehova.
6 Girweyo kumae: “Wujig nirweyo!
Ukwayu ngo jurwey lembe maeni;
Lewic bitundo ngo i wiwa!”
7 Ee ot pa Yakobo, iwinjo dhanu ubeyero kumae:
“Nyo dong’ tipo pa Yehova ukoso cirociri?
Nyo maeni tie tic pare?
Nyo wec para ngo re m’ubekelo bero ni ju ma gibewotho atira?
8 Ento tokcenne dhanu para gira giai malu calu jadegi.
Wubemayu kamaleng’ jamruko ma dit karacelo ku* bongu
Mi dhanu ma gibekadhu ma cwinygi kwiyo, calu ju m’ubedwogo kud i lwiny.
9 Wuberiemo mon mi dhanu para kud i udi migi ma beco;
Wubekabu dwong’ para cen kud i kum awiya migi mi magwei.
10 Wuai man wucidhi kum maeni tie ngo kayom.
Nikum cilo pare nyoth ubebino, eyo, nyoth ma lith.
11 Tek ng’atu moko uberiemo tok yamu man awondi man ebeyero vupo ma e:
“Abirweyo iwu pi pigulok man pi kong’o ma lake tek,”
Ebibedo tap jarwey m’uromo ni dhanu maeni!
12 Andhandha abicoko dhogwu ceke, Ee Yakobo;
Andhandha abicoko dhu dong ju m’udong’ mir Israel karacelo.
Abikethogi i acel calu rombe i dwol,
Calu udul rombe i luba migi;
Kabedone bipong’ ku dhanu m’ubewoy.’
13 Ng’atu m’ubeyabu yo bikadhu i wang’gi;
Gibiyabu yo man gibikadhu kud i dhugang’ man gibiwok kud i iye.
Ubimo migi bikadhu kud i iye i wang’gi,
Ma nwang’u Yehova ubetelo wigi.”
3 Ayero kumae: “Wuwinji, akwayuwu, wu jutelwic pa Yakobo
Man wu jutela mi ot mir Israel.
Nyo wucikuru ngo ning’eyo gin m’atira?
2 Re wulund wudagu gin ma ber, ento wumaru gin ma rac;
Wubewanyu adila dhanu para man ring’gi kud i kum cogogi.
3 Wubecamu bende ring’ dhanu para
Man wubekabu adilagi,
Wubeturo cogogi, wurungogi nziki nziki
Calu gin ma jutedo i agulu,* calu ring’o i agulu dek.
4 I saa maeca gibikwayu kony i bang’ Yehova,
Ento ebidwoko ngo igi lembe.
Ebikanu wang’e igi i saa maeca,
Nikum timo migi ma reco.
5 Maeni tie gin ma Yehova ubeyero i kum jubila ma gibewingo wi dhanu para,
Ma gitwong’o nia ‘kwiyocwiny!’ kinde ma gitie ku piny moko ma gibekayu* iwi lakgi,
Ento gitugo lwiny* i dhu ng’atu m’uketho ngo gin moko i dhoggi:
6 ‘Piny bibedo iwu diewor; gin ma wok i wang’ bibedo mbe;
Mudho kende re ma bibedo nuti iwu, ewolembe bibedo mbe.
Ceng’ bimwony iwi jubila,
Man dieceng’ bidoko col igi.
7 Lewic bimaku junenlembe,
Man cwiny juewlembe bitur.
Gin ceke gibiumo dhoggi,*
Kum dwokowang’ lembe m’uai i bang’ Mungu bibedo mbe.”’
8 Ento an, apong’ ku tego nikum tipo pa Yehova,
Man ku bedopwe man copo,
Pi ninyutho ni Yakobo jai pare man ni Israel dubo pare.
9 Wuwinj lembe maeni, akwayuwu, wu jutelwic pa Yakobo
Man wu jutela mi ot mir Israel,
Ma wudagu bedopwe man ma wugomo gin moko ci ma tie atira,
10 Wun ma wugiero Sayuni ku cwiro rimo man Yeruzalem ku timo ma reco.
11 Jutela* pare gibepoko lembe pi kanyaka,*
Julam pare pi ninwang’u cul,
Man jubila pare gibeewo lembe pi sente.*
Re asu gibejengiri iwi Yehova,* giwacu kumae:
“Nyo Yehova ni karacelo kudwa ngo?
Lembe ma rac moko mbe ma biwok i wiwa.”
12 Pieno piwu,
Jubifuro Sayuni calu podho,
Yeruzalem bidoko udhuru mir uvuru,
4 I dong nindo mir ajiki,*
Got ma ot pa Yehova n’i wiye
Bicungo ma tek malu iwi usimbru gudi,
Man ebidodere malu iwi ungulu gudi,
E dhanu ceke bicoriri i bang’e.
2 Man thek dupa gibicidho man gibiyero kumae:
“Wubin, waidhu malu iwi got pa Yehova
Man i ot pa Mungu pa Yakobo.
Ebiponjowa ku yo pare,
Man wabiwotho i yo pare.”
Kum cik* biwok kud i Sayuni
Man lembe pa Yehova kud i Yeruzalem.
3 Ebipoko lembe i kind dhanu dupa
Man ebidwoko lembe atira i kind thek ma tek ma gini bor.
E gibifwodo palamularu migi ni kwej dhiang’
Man tong’ migi ni uligu.
Thek biting’o ngo palamularu i kum thek wadi,
Kadi gibiponjo ngo lwiny kendo nyanok de.
4 Gibibedo ng’atuman i the yend ulok pare man i the yend ulam pare,
Man ng’atu moko mbe ma binyayu lworo i igi,
Pilembe dhu Yehova mir udul uyero lembe maeni.
5 Kum dhanu ceke biwotho, ng’atuman i nying’ mungu pare,
Ento wan wabiwotho i nying’ Yehova Mungu mwa rondo ku rondo.
6 “I nindo maeca,” Yehova wacu,
“Abicoko dhu ju* ma gibino komo akoma,
Man abicoko karacelo dhu ju ma julalu,
Karacelo ku ju m’agam atimogi yanga yanga.
7 Abiwodho donge kud i kind ju* ma gibino komo akoma,
Man ju ma juterogi bor gibidoko ni thek ma tek;
Man Yehova bibimo calu ubimo i wigi kud iwi got Sayuni,
Niai kawoni man rondo ku rondo.
8 Ento in, Ee ot ma wiw mir udul lim,
Ungulu got pa Nyasayuni,
Ebibino i beng’i, eyo, bimobim ma kwong’a* bibino,
Ker pa Nyayeruzalem.
9 Kawoni, pirang’o ibekok ma teki?
Nyo imbe ku jabim,
Kadike nyo jamii juk peri utho athoa,
Uketho litho umeki calu dhaku m’ubeoy e?
10 Deng’iri ku remo man cur, Ee Nyasayuni,
Calu dhaku m’ubeoy,
Kum kawoni ibiwok kud i adhura man ibibedo i podho.
Ibicidho bor i Babeli,
Man kuca jubibodhi;
Kuca Yehova biweri kud i cing’ judegi peri.
11 Kawoni jubicoko thek dupa i kumi;
Gibiwacu kumae: ‘Wek jucide,
Man wek wang’wa unen lembe maeno ubetimere i kum Sayuni.’
12 Ento ging’eyo ngo paru pa Yehova,
Ginyang’ ungo i lembakeca* pare;
Kum ebicoko dhoggi i lela mi fwodo cam calu kanga mi nying cam ma nyen ma jukayu.
13 Ai malu man fwod nying cam, Ee Nyasayuni;
Pilembe abiwilo tungi ku cuma,
Man abiwilo ubong’ tiendi ku mola,
Man ibirungo i dhanu dupa.
Ibimiyo lonyo migi ma gikwalu ni Yehova,
Man piny migi ni Rwoth mandha mi ng’om zoo.”
5 “Kawoni ibethumo kumi giri,
Ee nyaku ma jutugo ali i dhoge;
Jutiekowa.
Gigoyo japoklembe mir Israel kud uluth i thenge.
2 Man in, Ee Bethlehem Efratha,
In m’i nyanok mandha pi nibedo i kind elufu* mi Yuda,
Ng’atu ma bibedo jabim i Israel biwok ira kud i beng’i,
Ma thekiri pare utie niai con, niai i nindo ma con mandha.
3 Pieno ebiwenjogi
Nitundo i saa ma dhaku m’ucikere nioy i iye bioy ko.
Man dong umego pare bidok i bang’ dhanu mir Israel.
4 Ebicungo man ebikwayu dhanu pare i tego pa Yehova,
I dwong’ mi nying’ Yehova Mungu pare.
Man gibibedo museme,
Kum dit pare bitundo i gund ng’om ceke.
5 Man ebikelo kwiyocwiny.
Tekene Jaasiria umondo i ng’om mwa man enyono wi ot ma wiw ma tek mwa,
Wabiting’o jukwac abiro i kume, eyo, judongo ma wijo* abora kud i kind dhanu.
6 Gibimiyo matira ni ng’om mir Asiria ku palamularu,
Man ni ng’om pa Nimrod i kamondone.
Man ebibodhowa kud i cing’ Jaasiria
Kinde m’emondo i ng’om mwa man enyono ng’om mwa.
7 Dong ju m’udong’ pa Yakobo gibibedo i diere mi dhanu dupa
Calu thoi m’uai i bang’ Yehova,
Calu koth ma corere iwi uboko,
Ma geno ngo dhanu
Kadi ma kuro ngo wot dhanu.
8 Dong ju m’udong’ pa Yakobo bibedo i kind thek
Man i kind dhanu dupa,
Calu umvor i kind yedi mi luli,
Calu nyathin umvor* i kind udul rombe,
Ma kadhu kud i kindgi, epiey i wigi man eyeco nziki nziki;
Man ng’atu moko mbe ma copo bodhogi.
9 Ibiting’o cingi malu iwi jukwor peri,
Man jubinyotho judegi peri ceke.”
10 “I nindo maeca,” Yehova wacu,
“Abikabu riuni peri cen kud i ii man abinyotho magali peri.
11 Abinyotho adhura mi ng’om peri,
Man abirwombo kabedo peri ma tek ceke.
12 Abiketho lembajoga m’itimo* bijik,
Man ng’atu moko acel de mbe ma timo maji ma bidong’ i ii.
13 Abinyotho ayi gin m’acwiya m’ang’ika peri man mbegi ma n’i ii,
E ibirum kendo ngo i wang’ tic mi cingi.
14 Abifudho mbegi mi thier* peri cen kud i ii
Man abinyotho adhura peri.
15 Abiculo kwor ku kwinyo man ku ng’eicwiny
Iwi thek ma giwora ngo.”
6 Akwayuwu, wuwinj lembe ma Yehova ubeyero.
Wuai malu, man wuketh lemkesi i wang’ gudi,
Man dong’ ungulu gudi giwinj dwendwu.
2 Ee gudi, wuwinj lemkesi pa Yehova,
Wu kathere mi ng’om ma wucungo ma tek,
Kum Yehova utie ku lemkesi ku dhanu pare;
Ebipido i dhu Israel:
3 “Dhanu para, atimo iwu ang’o?
Aolowu nenedi?
Wuketuc lembe i kuma.
4 Awodhowu kud i ng’om mi Misiri,
Awaruwu kud i ot mi ng’eca;
Aoro Musa, Arun man Miriam i weng’wu.
5 Akwayuwu dhanu para, wukepoy i kum lembe m’Ubimo Balak mi Moab upangu,
Man i kum lembe ma Balaam ma wod Beor udwoko ire
I kum lembe m’utimere niai i Cithim nitundo i Gilgal,
Kara wung’ey tic ma pwe pa Yehova.”
6 Abibino i wang’ Yehova kud ang’o?
Abirum i wang’ Mungu ma malu kud ang’o?
Nyo abibino i wang’e ku lam m’awang’a ma boo,
Ku nyithi dhieng’ ma oro migi aceli?
7 Nyo anyong’a binego Yehova i kum nyogi rombe elufu,
I kum kulo mi mo elufu apari (10 000)?
8 Ee dhanu, enyutho iri gin ma ber.
Man Yehova ubekwayu ang’o i beng’i?
9 Dwand Yehova ubelwong’o adhura;
Ju ma gi riek gilworo nyingi.
Wuketh wiwu i kum uluth* man i kum ng’atu m’ukethe.
10 Nyo fodi asu lonyo m’atira ngo unuti i ot pa jatimrac
Man efa* ma boo ngo ma tie gin ma judagu?
11 Nyo acopo bedo leng’* ku kilo ma cuu ngo,
Kud usau kidi mi pimo piny mi kwo?
12 Kum dhanu m’ulony pare gipong’ ku rop,
Man ju ma bedo i iye gicwayu ndra;
Lebgi ubecwayu vupo i dhoggi.
13 “Pieno, abigoyi man abinyayu ret i kumi,
Abiketho ibidong’ ni uvuru pi dubo peri.
14 Ibicamu, ento ibiyeng’ ungo;
Gin moko mbe ma bibedo i ii.
Gin m’igwoko, ibiyeye ngo museme pi nicidho kude,
Man gin m’icidho ko, abimiye ni palamularu.
15 Ibicoyo kodhi, ento ibikayu ngo.
Ibinyono nying oliv, ento ibitiyo ku moje ngo;
Ibiyiko pigulok ma nyen, ento ibimadhu ngo pigulokne.
16 Pilembe wuworo cik pa Omri man timo ceke mi ot pa Ahab,
Man wuwotho nimakere ku juk migi.
Pi thelembe maeno abiketho wubidoko ni gin ma ng’oyo ndiri
Man jurubedo m’i iye ni jamlwiyo;
Man wubiyeyo cac mi dhanu.”
7 Can i wiya! A calu ng’atu ma
I ng’ey ma jucoko dhu nying yen mi cir,
Man ma jubeko kund ulok m’udong’,
Unwang’u ngo njuru nying ulok m’ecopo camu,
Kadi nying ulam ma kwong’a m’avane bino nege lee.*
2 Ng’atu mandha urwinyo kud i ng’om;
Ng’atu m’atira mbe i kind dhanu.
Gin ceke gikanu libo pi nicwiro rimo.
Ng’atuman udwaru umin ma buu ku voi.
3 Cing’gi ung’eyo cuu nitimo gin ma rac;
Jadit ma wijo ubekwayu giramiya,
Japoklembe ubekwayu sukulia,
Ng’atu ma pire yik unyutho yeny pare* kamaleng’,
Man gibepangu nitime karacelo.*
4 Ng’atu ma ber m’i kindgi e calu ukudho,
Ng’atu m’i kindgi m’atira nisagu e rac ma sagu gang’ mir ukudho.
Nindo ma jukur peri gibiweco i iye man m’ibiwodho i iye wel bibino.
E ndiri bimakugi.
5 Kud iyii jawodhi
Kadi kud igen jarimo ma ceng’ini.
Bed ku weng’i i kum lembe m’ibeyero ni ng’atu ma vuto i kori.
6 Kum wod ubecayu won,
Nyaku ubeai i kum min,
Man ci wod i kum wang’umire;
Judegi pa ng’atini gitie dhanu mi ot pare.
7 Ento an, abimedara nineno bang’ Yehova.
Abikuro Mungu mi both para ku cirocir.*
Mungu para biwinja.
8 Anyong’a kud unegi i kuma, Ee jadegi* para.
Kadok nwang’u apodho, abiai malu;
Kadok nwang’u abedo i mudho, Yehova bibedo der para.
9 Abiciro kwinyo pa Yehova
Pilembe adubo ire
Nitundo m’ebicero bang’ lemkesi para man ebikelo ira pokolembe ma pwe.
Ebiwodha woko i der;
Abineno bedopwe pare.
10 Jadegi para de bineno,
Man lewic bimake, en m’ebino wacu ira kumae:
“Yehova Mungu peri ni kani?”
Wang’a binene.
Jubinyone calu usabu i gengi.
11 Ebibedo nindo mi giero gang’kidi peri;
I nindo maeca jubimedo kieu.*
12 I nindo maeca jubibino i beng’i
Niai i Asiria nitundo i adhura mi Misiri,
Niai i Misiri nitundo i bang’ Kulo;*
Niai i bang’ nam nitundo i bang’ nam ma kucelo
Man niai i bang’ got nitundo i bang’ got ma kucelo.
13 Man ng’ombe bidong’ ni uvuru nikum ju ma gibedo i iye,
Nikum adwogi mi gin ma gitimo.*
14 Kway dhanu peri ma gitie dwol mi giralaga peri kud uluth peri,
Ng’atu m’ubino kwo kende i luli, i podho mi yen ma cego nyinggi.
Dong’ gitungiri i Bacan man i Gilead calu m’i nindo ma con.
15 “Calu i nindo m’iwok i iye kud i ng’om mi Misiri,
Abinyutho iri piny ma wang’uijo.
16 Thek bineno man lewic bimakugi kadok nwang’u gitie ku tego lee.
Gibibedo ling’;*
Ithgi bidhing’.
17 Gibinang’u utur calu thwol;
Calu piny ma lak mi ng’om, gibiwok kud i kaka ma tek migi ma kumgi ubemiel.
Gibibino i bang’ Yehova Mungu mwa ma ndiri ubenegogi
Man gibilwori.”
18 Ng’a ma tie Mungu ma calu in,
Ma weko kosa man ma kadhu iwi kier mi dong giralaga pare?
Ebibedo ngo ku ng’eicwiny pi rondo ku rondo,
Kum anyong’a nege i kum mer ma lokere ngo.
19 Ebitimo iwa kisa kendo; ebivoyo* kosa mwa.
Ibibolo dubo migi ceke i the nam.
20 Ibinyutho gwoko bedoleng’ ni Yakobo,
Mer ma lokere ngo ni Abraham,
Calu m’ikwong’o ni kwaruwa niai i nindo ma con.
Eno tie nying’ ma Mikael i adundo, ma thelembene tie “Ng’a ma calu Mungu?” Kunoke “Mikaya” ma thelembene tie “Ng’a ma calu Yehova?”
Kunoke “pambu mi poga.”
I dhu Juebrania: “Abikonjo.”
Kunoke “sukulia ceke mir asara pare.”
Kunoke “I ot mir Afra.”
I dhu Juebrania: “jurubedo ma mon.”
I dhu Juebrania: “Jurubedo ma mon.”
I dhu Juebrania: “jurubedo ma mon.”
I dhu Juebrania: “jurubedo ma mon.”
Kunoke “mi pokiri.”
Kunoke “ng’atu ma mayu piny.”
I dhu Juebrania: “jurubedo ma mon.”
I dhu Juebrania: “wubikabu ngo ng’utwu kud i iye.”
Kunoke nyo “kud i kum.”
Kunoke “aole.”
Kunoke nyo “kinde ma gitie ku piny moko ma giromo nyamu.”
I dhu Juebrania: “gidwoko lwiny leng’.”
Kunoke “yir mi dhu umgi.”
I dhu Juebrania: “Wic.”
Kunoke “akumu.”
Kunoke “mola ma tar.”
Kunoke “gibegoyo korgi nia gibejengiri iwi Yehova.”
Kunoke “got mir hekalu.”
Kunoke “calu got ma yen upong’ i wiye.”
Kunoke “I kajik ceng’.”
Kunoke “ponji.”
I dhu Juebrania: “en.”
I dhu Juebrania: “en.”
Kunoke “ma con.”
Kunoke “juk.”
Kunoke “thepacu.”
Kunoke “jutelwic.”
Kunoke “nyathin umvor ma ng’ute jumuzuga.”
I dhu Juebrania: “mi cingi.”
Nen Thelembe mi wec.
I dhu Juebrania: “Nying ic.”
Kunoke “pi dubo pa ng’eyong’ec para?”
Kunoke “ibed dhanu m’atira.”
Kunoke “nimaru ku bero man ku bedoleng’.” I dhu Juebrania: “maru mer ma lokere ngo.”
Kunoke “matira.”
Nen Thenge ma jumedo B14.
Kunoke “m’umbe kosa.”
Kunoke “m’avane bino nego ng’eyong’ec pare lee.”
Kunoke “yeny pa ng’eyong’ec pare.”
I dhu Juebrania: “gicwiye karacelo.”
Kunoke “Abinyutho pidoic mi cirocir.”
Wec mi dhu Juebrania ma juloko keni nia “jadegi,” nyutho jadegine ma mon.
Kunoke nyo “cik bibedo bor.”
Niwacu Efrath.
I dhu Juebrania: “Nikum nying timo migi.”
I dhu Juebrania: “Gibiketho cing’gi iwi dhoggi.”
Kunoke “ebinyono piny; ebijwigo.”