NAHUM
1 Atwong’a i kum Nineve: Buku mi gin ma wok i wang’ pa Nahum* ma Jaelkoc:
2 Yehova tie Mungu ma mito jutim ire kende man ma culo kwor;
Yehova culo kwor man etie ayika nikelo kwinyo pare.
Yehova culo kwor i kum jukwor pare,
Man egwoko kwinyo pi judegi pare.
3 Yehova tie yoo ni ng’eicwiny man tego pare dit,
Ento Yehova bikoso ngo nimiyo matira m’ukwayere.
Yo pare n’i yamu ma nyotho piny man avuvu,*
Man afuru tie utur m’i the tiende.
4 Ejuko nam man eketho edwono;
Man eketho kulo ceke dwono.
Bacan ku Karmel ner,
Man thiwe mi Lebanon ner.
5 Gudi yengere nikume,
Man ungulu gudi* loy.
Ng’om biyengere i wang’e,
Niwacu ng’om ku piny ceke ma bedo i iye.
6 Ng’a ma copo cungo i wang’ kwinyo pare?
Ng’a ma copo ciro ng’eicwiny pare ma lake teki?
Kwinyo pare bicorere calu mac,
Man i cana bikethere nikume.
7 Yehova tie ber, etie kaka ma tek i nindo mi can.
Edieng’ pi* ju ma giyenyo kapondo i bang’e.
8 Ebinyotho kaka pare* ceke ku pii ma dit ma nyotho piny,
Man mudho biriemo tok judegi pare.
9 Wubicamu gamba mi lembang’o i kum Yehova?
Ebekelo nyoth mi magwei.
Masendi biwok ungo wang’ mir ario.
11 Ng’atu ma camu gamba mi lembe ma rac i kum Yehova biwok kud i ii,
Ng’atu ma miyo juk ma konyne mbe.
12 Yehova uwacu kumae:
“Kadok nwang’u gibino tek lee man wendgi dupa,
Kadok kumeno de, jubijigo wigi cen man gibithum.*
Anyayu can i ii* ento abinyayu can i ii kendo ngo.
13 Man kawoni abituro i mberembere ma n’i ng’uti,
Man abicodo i jamtwic peri ni ario.
14 Yehova ung’olo lembe ma e piri,*
‘Nyikweyi moko mbe ma bimedere nicaku nyingi.
Abinyotho ayi gin m’acwiya m’ang’ika man ayi gin m’acwiya mi cuma* kud i ot* pa mungu peri.
Abiyiko liel piri pilembe tiji mbe.’
15 Nen! tiend ng’atu m’ubekelo lembanyong’a n’i wi gudi,
Ng’atu m’ubetwong’o pi kwiyocwiny.
Tim foc peri, Ee Yuda, pong’ lembang’ola peri ma ku kwong’,
Kum ng’atu ma kony pare mbe bikadhu kendo ki ngo kud i ii.
Jubinyothe ku rac.”
2 Ng’atu ma lalu piny uidho i kumi.*
Wugwok udi ma tek.
Wukur yo.
Wuyikuru* man wucok dhu tego mwu ceke.
2 Kum Yehova bidwoko dwong’ pa Yakobo kakare
Karacelo ku dwong’ pa Israel,
Pilembe junyoth ginyothogi;
Man ginyotho janggi.
3 Juwiro kum ban mi jurukara pare ku rangi ma kwar,
Jurumony pare gikendo kendi ma kwar ngbo.
Cuma mi magali pare mi lwiny ubemil calu mac
Ebeyikere pi lwiny ku dieceng’,
Man gibeyego tong’ mi yend jenevriye.*
4 Juring magali mi lwiny giberingo ma tek mandha i gengi.
Gicoriri kakare ceke i lela ma lac.
Girieny calu ridhro m’ubeliel man gimil calu lukoth.
5 Ebiwaku judongo pare.
Gibikier kinde ma gibecoro.
Gibecoriri i kum gang’kidi pare;
Gibeciko yo.
6 Dhugola mi kulo biyabere,
Man kal birwombere.*
7 Judaru ng’olo:* Edong’ ngbeng’,
Jutere bor man ng’eca pare ma nyir gibewak;
Giberundo calu akuru kinde ma gibedhongo korgi.*
8 Nineve ubino calu kut mi pii i nindo pare ceke,
Ento kawoni giberingo.
“Wucungi! Wucungi!”
Ento ng’atu moko acel de mbe m’uneno ng’eye.
9 Wuyak mola ma tar, wuyak mola ma kwar!
Lonyo pare thum ungo.
Epong’ ku kit piny ceke ma pigi tek.
10 Gin moko mbe m’udong’ i adhurane, edong’ ni uvuru man enyothere!
Adundegi uloy ni lworo, conggi ng’ondere, piergi ubemiel;
Wang’gi ceke doko nyacan can.
11 Odumvor ni kani, kaka ma nyithindh umvor* gitungiri i iye,
Kaka ma min umvor wok kud i iye m’ebetelo wi nyithindhe
Ma ng’atu moko mbe m’ubenyayu lworo i igi?
12 Umvor ubed uyeco cam lee ni nyithindhe
Man ebed edeyo ley ni meg umvor pare.
Ebed epong’o oding’om ku cam,
Man ode ku ley m’eyeco.
13 “Nen! an’i kumi,” Yehova mir udul uwacu,
“Abiwang’u magali peri mi lwiny ceke,
Man palamularu bimvoro nyithindh umvor* peri.
Abinyotho cam peri kud i ng’om,
Man jubiwinjo dwand jukwenda peri kendo ngo.”
3 Can iwi adhura ma cwiro rimo!
En zoo epong’ ku ndra man ayeki.
Piny ma jumaku koso ngo i iye!
2 Badwand del man woy mir ukobre nuti,
Riuni* ubepiey man magali ubepor.
3 Jaring riuni uidho iwi riuni, palamularu ubemil man tong’ uberiang’ini,
Wend dhanu ma junego tie lee man avu udhurere,
Ajiki mir avu umbe.
Man gibemediri nikier iwi avu.
4 Lembe maeni tie pi timo dupa mir asara pa dhaku ma won asara,
En m’etelo nen man m’e leng’, meg lembajoga,
En m’ebemaku thek i uwic ku lembasara pare man juruot ku lembajoga pare.
5 “Nen! an’i kumi,”* Yehova mir udul uwacu,
“Abiting’o dhu kendi peri malu i weng’i;
Abiketho thek bineno muneru peri,
Man ker bineno lewic peri.
6 Abicoro susu i wii
Man abidwoki ni jamcac;
Abiketho ibidoko ni giranena.
7 Ng’atu moko ci m’ubeneni biringi man biyero kumae:
‘Nineve udaru nyothere!
Ng’a ma kisa binege i kume?’
Abinwang’u iri jujukcwiny kani?
8 Nyo i ber ma sagu No-amon* m’ubino i dhu kulo m’ariega mi Nil?
Pii utieke;
Lonyo pare ubino nam man gang’kidi pare de ubino nam.
9 Ethiopia man Misiri gibino ire ni tego m’ajikine mbe.
Put man Julibya gibino jukony pare.*
10 Re kadok kumeno de, edoko ng’eca;
Ecidho i ng’eca.
Awiya pare bende jung’enyo igi nziki nziki i akarayo ceke.*
Jugoyo gagi iwi dhanu pare mir awora,
Man dhanu ma dongo pare ceke jutwiyogi ku kongo.
11 In bende ibimer;
Ibicipondo.
Ibisayu ipond ni jadegi.
12 Udi ma tek peri ceke gi calu yend ulam m’upong’ ku nying ulam m’ular ucek ma kwong’a;
Ma ka juyengogi, gioy i dhu ju m’ucamugi.
13 Nen! udul peri gi calu mon i ii.
Jubiyabu dhugang’ mi ng’om peri ma lac ni judegi peri.
Mac biwang’u riu mi dhugang’ peri.
14 Twom pii pilembe jubebino tieki!
Dwok ka ma tek peri udok tek.
Lor i usabu man nyon ulobo;
Mak mul mi briki.
15 Kadok kuca de mac biweng’i.
Palamularu bideri.
Ebimvori calu ma nyithi bonyo mvoro ko piny.
Keth wendi udok lee calu wend nyithi bonyo!
Eyo, keth wendi udok lee calu wend bonyo!
16 Imedo wend jukuloka peri lee nisagu wend nyikaluku m’i polo.
Nyathi bonyo wok kud i ukorone man etuk.
17 Jukur peri gi calu bonyo,
Man judongo peri gi calu udul bonyo.
Gigonjo i gang’ mi kidi i nindo mi koyo,
Ento kinde ma ceng’ urieny, gituk;
Man ng’atu moko mbe m’ung’eyo kaka ma gin’i iye.
18 Nindo ubenuro jukwac peri, Ee ubimo mir Asiria;
Weg yung peri gibedo i udi migi.
Dhanu peri gilal iwi gudi,
Man ng’atu moko mbe m’ubecoko dhoggi karacelo.
19 Ibinwang’u ngo kony moko pi nyoth peri.
Rem peri copo key ungo.
Dhanu ceke ma gibiwinjo lembe ma jubeyero piri gibipadu cing’gi;
Kum ng’a m’isendo ngo ku timo peri ma reco m’ajikine mbe?”
Thelembene tie “Jajukcwiny.”
Kunoke “wavuvu.”
Kunoke “nyithi gudi.”
Kunoke “Egwoko.” I dhu Juebrania: “Eng’eyo.”
Niwacu kaka Nineve.
Kunoke “kong nganu.”
Kunoke nyo “ebikadhu.”
Niwacu i Yuda.
Niwacu pir Asiria.
Kunoke “ayi gin m’acwiya m’atwaga.”
Kunoke “hekalu.”
Niwacu Nineve.
I dhu Juebrania: “Wudwok pier tek.”
Eno tie yen m’uyenyo rombo ku sipre.
Kunoke “biloy.”
Kunoke “Judaru ketho.”
I dhu Juebrania: “adundegi.”
Kunoke “nyithindh umvor ma ng’utgi jumuzuga.”
Kunoke “nyithindh umvor ma ng’utgi jumuzuga.”
Kunoke “Kana mi lwiny.”
Niwacu i kum Nineve.
Niwacu Thebes.
I dhu Juebrania: “peri.”
I dhu Juebrania: “iwi gengi ceke.”