HABAKUK
1 Atwong’a ma jabila Habakuk* unwang’u i gin ma wok i wang’:
2 Ee Yehova, nitundo awene m’abikwayu kony, ento ibewinjo ngo?
Nitundo awene m’abikwayu ikonywa kud i rop, ento ibetimo ngo?*
3 Pirang’o ibeketho aneno lembe ma reco?
Man pirang’o ibeweko masendi?
Pirang’o nyoth man rop gin’i wang’a?
Man pirang’o rop man ali upong’i?
4 Pieno jubeworo ngo cik,
Man jubetimo ngo pokolembe ma pwe.
Pilembe jutimrac gitieko weg bedopwe;
Eno re m’uketho pokolembe ma pwe unyothere.
5 “Wunen i kind thek man wuketh wiwu cuu!
Wuzungi man iwu uwang’ lii;
Kum gin moko bitimere i nindo mwu
Ma kadok jukor pire iwu de, wubiyiyo ngo.
6 Kum abeting’o Jukaldayo,
Ma tie thek ma kwiny man ma kisa mbe i iye.
Gimondo i ng’om ma lac
Pi nimaku kabedo ma migi ngo.
7 Gimielo kum man ginyayu lworo.
Giketho cik man dito* migi gigi.
8 Riuni* migi giringo pio nisagu ng’uu,
Gikwiny ma sagu urudi ku diewor.
Riuni migi mi lwiny gipiey apieya;
Riuni migi giai bor.
Giringo pio calu acur m’ubeloro iwi cam.
9 Gin ceke gibebino pi ninyayu rop.
Kinde ma gibecidho karacelo, gi calu yamu ma yo nyangu,
Man gibecoko dhu ju ma gimaku calu kwiyo.
10 Gicayu jubim
Ging’iero judongo ma dongo.
Ging’iero kabedo moko ci ma tek;
Gidhuro ng’om i kume man gimake.
11 I ng’eye gimediri ku woth i wang’gi calu yamu man gikadhu kud i ng’om,
Ento kosa bibedo i wigi,
Pilembe giyero nia mungu migi re m’umiyo igi tego.”*
12 Ee Yehova, nyo itie ngo niai rondo ku rondo?
Ee Mungu para, Ng’atu ma leng’ para, itho ngo.*
Ee Yehova, ikethogi pi nitimo pokolembe,
Cana para, ikethogi pi nimiyo matira.*
13 Weng’i tie leng’ dit pi nineno gin ma rac,
Man icopo weko ngo lembe ma rac umedere.
Dong’ pirang’o ibeweko ju ma cibojo
Man ibebedo ling’ kinde ma ng’atu ma rac ubemwonyo ng’atu ma pwe nisage?
14 Pirang’o idwoko dhanu calu rec mi nam,
Calu piny ma mol ku korgi* ma jabim migi mbe?
15 Ebejaku* gin ceke ku gol pare mi jaku rec.
Ebemakugi i ndiya pare,
Man ebecoko dhoggi i voi pare mi maku rec.
Pi thelembe maeno re m’anyong’a ubenege lee.
16 Pieno ebethiero lam ni ndiya pare
Man ewang’u lam* ni voi pare mi maku rec;
Pilembe nikumgi piny pare bik,*
Man etie ku cam m’ang’iya.
17 Dong’ nyo ebimedere niwodho piny kud i ndiya pare?*
Nyo ebimedere ninego thek m’umbe kisa?
2 Abicungo kaka m’abekuro iye kur,
Man abicungo iwi gang’ ma tek.
Abimedara nikiyo pi nineno gin m’ebiyero nikadhu kud i bang’a
Man gin m’abidwoko saa ma jubitwinya.
2 I ng’eye Yehova udwoko ira kumae:
“Kiew gin ma wok i wang’ maeni man kiewe terere iwi ban,
Kara ng’atu m’usome ku dwande ma tek usome yot yot.*
3 Kum gin ma wok i wang’ne utie pi nindo pare m’ukethere,
Man ebedhulere nitundo i ajikine,* ebicwayu ndra ngo.
Kadok ebegalu,* mediri nikure!
Pilembe ebitimere kokoro.
Ebigalu ngo!
4 Nen jakuhaya;*
Etie dhanu m’atira ngo.
Ento won bedopwe bikwo nikum gwoko bedoleng’* pare.
5 Eyo, calu ma pigulok wondo wang’jo,
Jakuhaya bitundo ngo i kum lembakeca pare.
Emedere nicoko dhu thek ceke karacelo
Man nicoko dhanu ceke ire.
6 Ju maeni ceke gibiyero ngo lembabola, lemsosi man koy i kumi?
Gibiwacu kumae:
‘Can iwi ng’atu ma coko dhu piny ma pare ngo
Man ma ketho banja pare doko dit!
Lembe maeni bitimere nitundo awene?
7 Nyo ju ma gimiyo iri banja gibiai ungo reki?
Gibicew man gibiyengi ku rac,
Man ibidoko ni gin mir ayeki igi.
8 Pilembe iyaku thek dupa,
Dong dhanu ceke m’udong’ gibiyeki,
Pilembe icwiro rimb dhanu
Man inyayu rop iwi ng’om,
I adhura man i kum dhanu ma kwo i igi.
9 Can iwi ng’atu m’ukelo bero ni ot pare ku yo m’atira ngo,
Pi niketho ot pare malu
Kara can kud utund i wiye!
10 Gamba m’icamu unyayu lewic iwi ot peri.
Idubo i kumi giri* kinde m’iweyo dhanu dupa.
11 Kum kidi bikok kud i kor ot,
Man yen riu bidwoko ire lembe.
12 Can iwi ng’atu m’ubegiero adhura ku cwiro rimo,
Man m’ubeketho ther adhura ku gondiri!
13 Nen! nyo tie ngo Yehova mir udul re ma ketho dhanu gitimo tic ma tek, re ma lundo thum i mac,
Man ma ketho dhanu gisendiri mi mananu?
14 Kum ng’om bipong’ ku ng’eyong’ec mi dwong’ pa Yehova
Calu ma pii pong’o ko nam.
15 Can iwi ng’atu ma miyo giramadha ni juwodhe,
M’emedo ng’eicwiny man kwinyo i kume, pi niketho gimer
Kara enen muneru migi!
16 Lewic re ma biumi, ento dwong’ ungo.
In de madhi man nyuth kamaleng’ yaa ma jutimo ngo i kumi.*
Kikombe* mi cing’ Yehova mir acwic bibino i beng’i bende,
Man lewic biumo wi dwong’ peri.
17 Kum rop ma jutimo i Lebanon biumi,
Man nyoth m’unyayu lworo i yedi bibino i wii,
Pilembe icwiro rimb dhanu
Man inyayu rop iwi ng’om,
I adhura man i kum dhanu ma kwo i igi.
18 Kony mir ayi gin m’acwiya m’ang’ika utie ang’o
Ka ng’atu m’uyike udaru yike?
Kony mir ayi gin m’acwiya mi cuma* man pa japonji mi ndra utie ang’o,
Kadok nwang’u ng’atu m’uyike ugene,
M’eyiko ko mungu ma tijgi mbe ma giweco ngo?
19 Can iwi ng’atu m’uyero ni dund yen kumae: “Cew!”
Kadi ni kidi ma weco ngo kumae: “Ai malu! Ponjwa!”
Nen! juumo kume ku mola ma kwar man ku mola ma tar,
Re yuyo moko mbe nyanok de i iye.
20 Ento Yehova n’i hekalu pare ma leng’.
Wubed ling’ i wang’e, wu ng’om ceke!’”
3 Rwo pa jabila Habakuk, i wer wak:
2 Ee Yehova, awinjo rwonglembe i wii.
Ee Yehova, tic peri unyayu lworo i iya.
I diere mi oro,* keth etimere!
I diere mi oro, keth pire ng’eyere.
Dong’ tim kisa i saa mi yakini.
3 Mungu ubino kud i Theman,
Ng’atu ma leng’ ubino kud iwi got Paran. (Sela)*
Dwong’ pare uumo polo;
Ng’om upong’ ku pak pare.
4 Der pare ubino calu lero.
Der umil niai kud i cinge,
Kaka ma tego pare upondo i iye.
5 Thong’om utelo yo i wang’e,
Man malaria ma cego kum ubelubo ng’eye.
6 Ecungo man ng’om uyengere.
Eneno thek man eketho kumgi umiel.
Gudi ma yang’ con ging’eny,
Man ungulu gudi* ma yang’ con girum piny.
Ebewotho i gengi ma niai yang’ con.
7 Aneno can i hema mi Kucan.
Bongu mi hema mi ng’om mi Midian uyengere.
8 Nyo tie i kum kulo, Ee Yehova,
Nyo tie i kum kulo re ma ng’eicwiny peri ubelieli?
Kunoke nyo kwinyo peri uopo i kum nami?
9 Iwodho athero peri man etie ayika.
Imiyo tic ni uluth* ku kwong’.* (Sela)
Ikaku i ng’om bwa ku kulo.
10 Gudi ubino ku can ma lee kinde ma gineni.
Koth ma dit ucwii.
Pii ma thuc uwoy.
Eting’o cinge malu.
11 Ceng’ man dwi gicungo i kabedo mi dwong’ migi.
Nying athero peri giringo calu der.
Tong’ peri umil calu lukoth.
12 Iwotho i ng’om ku kwinyo.
Inyono i* thek i ng’eicwiny peri.
13 Iwok pi nibodho dhanu peri, pi nibodho ng’atu peri ma juwiro.
Irungo i jatela* mi ot pa ng’atu ma rac.
Ot urungere niai i kathere nitundo i wiye.* (Sela)
14 Icobo wi jurukara pare ku jamlwiny* pare gire
Kinde ma gicoriri pi nilalu iya.
Gibino kud anyong’a nimvoro ng’atu ma can ubenego i amung’.
15 Ikadhu kud i nam ku riuni* peri,
Kud i kind pii ma dit m’ucorere.
16 Awinjo man kuma caku miel;*
Kinde m’awinjo dwalne, dend dhoga umiel.
Top umondo i cogona;
Tienda ucaku miel yo piny.
Ento abedo yoo pi nikuro nindo mi can,
Pilembe ebibino iwi dhanu m’urokowa.
17 Kadok yend ulam uthiwo ngo,
Man yend ulok ucego ngo nyinge;
Kadok jucoko ngo nying yend oliv,
Man podho ucego ngo cam;
Kadok udul lim uthum kud i dwol,
Man dhieng’ uthum kud i luba;
18 Ento an re, anyong’a binega lee i Yehova;
Mutoro binega i Mungu mi both para.
19 Rwoth Ubimo ma Malu Ngbir Yehova tie tego para;
Ebiketho tienda bibedo rep ve tiend ruda
Man ebiketho abiwotho kaka ma malu.
Ni jatel wi wer; ku jamgoyo wer para ma juthondhgi.
Copere thelembene tie “Gwak ma kii.”
Kunoke “ibebodho ngo?”
Kunoke “dwong’.”
Kunoke “Kana mi lwiny.”
Kunoke nyo “nia mungu migi re ma tie tego migi.”
Kunoke nyo “wabitho ngo.”
Kunoke “pi nijukojo.”
Kunoke “ma lak alaka.”
Niwacu jakwor ma Jakaldayo re m’ubejaku.
Kunoke “eketho yiro mi lam uduny.”
I dhu Juebrania: “mo uromo piny pare ma ber.”
Kunoke nyo “ebimedere niwodho palamularu pare?”
Kunoke “ma foth.”
Kunoke “i pong’one.”
Kunoke “tek ubenen nia ebegalu.”
Kunoke “Nen! ng’eyong’ec pare udhunjo.”
Kunoke nyo “yiyoyic.”
Kunoke “ng’eyong’ec pare.”
Kunoke “Ceol,” niwacu liel mi dhanu ceke. Nen Thelembe mi wec.
Kunoke “i kum ng’eyong’ec peri.”
Kunoke nyo “man woth thamba thamba.”
Kunoke “Kopo; Kalisi.”
Kunoke “ayi gin m’acwiya m’atwaga.”
Kunoke nyo “I nindo mwa.”
Nen Thelembe mi wec.
Kunoke “nyithi gudi.”
Kunoke “kana mi lwiny.”
Kunoke “both.”
Kunoke nyo “nying athero.”
Kunoke nyo “Suru gikwong’o kwong’.”
I dhu Juebrania: “Ifwodo i.”
I dhu Juebrania: “wic.”
I dhu Juebrania: “ng’ute.”
I dhu Juebrania: “uluth.”
Kunoke “kana mi lwiny.”
I dhu Juebrania: “man iya umiel.”