ZEFANIA
1 Lembe pa Yehova m’ubino i bang’ Zefania* ma wod Kuci, ma wod Gedalia, ma wod Amaria, ma wod Hezekia i nindo pa Yosiya ma wod Amon m’ubimo mi Yuda uwacu kumae:
2 “Abijigo wi piny ceke m’i wang’ ng’om,” Yehova wacu.
3 “Abijigo wi dhanu man wi yedi.
Abijigo wi winyo m’i kor polo man wi rec m’i nam,
Man gin ma redhojo* karacelo ku jutimrac;
Man abikabu dhanu kud i wang’ ng’om,” Yehova wacu.
4 “Abirieyo cinga i kum Yuda
Man i kum dhanu ceke mi Yeruzalem,
Man abiweyo babang’ Baal ceke kud i kabedo maeni,
Nying’ julam mi mungu mi juwirok karacelo ku julam,
5 Man ju m’uberum iwi ot ni udul m’i polo,
Man ju m’uberum man gibekwong’iri nigwoko bedoleng’ migi ni Yehova
Ma ke lundo gibekwong’iri bende nigwoko bedoleng’ migi ni Malkam;
6 Man ju ma giweko nilubo Yehova
Ku ju ma giyenyo ngo Yehova kadi gikwaye de ngo.”
7 Wubed ling’ i wang’ Rwoth Ubimo ma Malu Ngbir Yehova, kum nindo pa Yehova ni ceng’ini.
Yehova uyiko lam; edwoko ju m’elwong’o udoko leng’.
8 “I nindo mi lam pa Yehova, abikwayu wel i bang’ judongo ma wijo,
I bang’ wot ubimo man i bang’ ju ceke ma gikendo kendi mi juwirok.
9 I nindo nica, abikwayu wel i bang’ ng’atu moko ci ma idho iwi bop,*
I bang’ ju ceke m’upong’o ot pa jadit migi ku rop man ndra.
10 I nindo maeca,” Yehova wacu,
“Nduru biwinjere niai kud i Dhugang’ mi rec,
Wak biwinjere niai kud i Theng adhura ma nyen,
Man woy ma dit niai kud iwi ungulu gudi.*
11 Wuwaki, wu ju ma wubedo i Maktec,*
Kum junego* jukuloka ceke;
Junyotho dhanu ceke ma gipimo mola ma tar.
12 I saa nica, abikeyo i Yeruzalem mii ku thala,
Man abikwayu wel i bang’ dhanu ma gidieng’ ungo,* ma giyero i adundegi kumae:
‘Yehova bitimo ngo gin ma ber, kadi ebitimo ngo gin ma rac.’
13 Jubiyaku lonyo migi man jubinyotho udi migi.
Gibigomo udi, ento gibibedo ngo i igi;
Gibipidho podho mir ulok, ento gibimadhu ngo pigulok m’uai i igi.
14 Nindo ma dwong’ pa Yehova ni ceng’ini!
Eni ceng’ini man ebino pio pio mandha!*
Dwand nindo pa Yehova tie kec.
Kuca, jaramony coro wak.
15 Nindo nica tie nindo mi kwinyo,
Nindo mi can man mi ndiri,
Nindo mi yamu ma tek man mi nyoth,
Nindo mi piny ma col man mi mudho,
Nindo mir afuru man mi mudho ma col bii,
16 Nindo mi kudho agwara man mi kok mi lwiny
I kum adhura ma tek man i kum gund udi ma wiw ma malu.
17 Abinyayu can i kum dhanu,
Man gibiwotho calu abinga,
Pilembe gidubo ni Yehova.
Rimbgi bimoyere calu utur,
Man ring’ kumgi* calu uweyo.
18 Kadok mola ma tar migi, kadi mola ma kwar migi de bibodhogi ngo i nindo mi kwinyo pa Yehova;
Kum mac mir amora pare biwang’u ng’om ceke,
Pilembe ebidaru dhanu ceke mi ng’om, eyo, ebidarugi ku rac mandha.”
2 Wucokuru karacelo, eyo, wucokuru,
Ee thek m’umbe ku lewic.
2 Ma fodi cik ucaku timo tic ungo,
Ma fodi nindo ukadhu ngo calu cung cam,
Ma fodi ng’eicwiny ma lake tek pa Yehova ubino ngo i wiwu,
Ma fodi nindo mi ng’eicwiny pa Yehova ubino ngo i wiwu,
3 Wuyeny Yehova, wu ju ma mol* ceke mi ng’om,
Ma wuworo cik pare ma pwe.*
Wuyeny bedopwe, wuyeny molo.*
Saa moko nyo* jubikanuwu i nindo mi ng’eicwiny pa Yehova.
4 Kum Gaza bibedo ni adhura ma juwenjo;
Man Ackelon bidong’ ni uvuru.
Jubiriemo dhanu mir Acdod ku dieceng’ ma ling’,
Man jubidoyo Ekron.
5 “Can iwi dhanu ma bedo i ng’om mi dhu nam, thek mi Jukerethi!
Lembe pa Yehova n’i kumwu.
Ee Kanan, in m’i ng’om mi Jufilisti, abinyothi
Ma ng’atu ma bedo i ii moko mbe ma bidong’.
6 Man ng’om mi dhu nam bidoko ni luba,
Ku pii m’atong’a ni jukwac man dwol mi kidi ni rombe.
7 Ebidoko ni ng’om mi dong dhanu m’udong’ mi ot mi Yuda;
Gibitungiri keca.
Gibivuto i udi mir Ackelon uthieno.
Kum Yehova Mungu migi biloko wang’e i bang’gi,*
Man ebidwoko dhanu migi ma jumaku.”
8 “Awinjo cac pa Moab man ayany mi Juamon,
Ma giroko ko dhanu para man ma giting’iri ko pi nimayu ng’om migi.
9 Pieno calu andha abedo kwo,” Yehova mir udul, Mungu mir Israel uwacu:
“Moab bidoko tap calu Sodoma,
Man Juamon calu Gomora,
Kaka mir ayilayila, vuj kadu man langa ma nja.
Dong dhanu para m’udong’ biyakugi,
Man dong thek para m’udong’ bimaku kakagi.
10 Eno re ma tie gin ma gibinwang’u pi luliri migi,
Pilembe giroko man gidodiri gigi iwi dhanu pa Yehova mir udul.
11 Yehova bibedo igi ni gin ma ng’oyo ndiri;*
Kum ebiketho mungu mi ng’om ceke bidoko ni gin moko ngo,
Man cula ceke mi thek birum ire,*
Culaman kud i kakare.
12 Wu Juethiopia bende jubinegowu ku palamularu para.
13 Ebirieyo cinge yo malu man ebinyotho Asiria,
Ebidwoko Nineve ni uvuru, ni kaka m’uthwo calu langa.
14 Udul lim bivuto i iye, kwond yedi ceke mi lum.*
Ugoro man bende ceu bivuto traka i kind mbegine.
Dwal moko biwer i wang’ madhirisa.
Nyoth bibedo nuti i wang’ dhugola;
Kum ebiketho riu mi yend tido bidong’ njer.
15 Eni tie adhura ma jakuhaya m’ubed ubedo museme,
M’ubed uyero i adundene kumae: ‘Aloyo zoo, ng’atu mange mbe.’
Efodoko ni jamng’iero,
Kaka ma yedi mi lum vuto i iye!
Ng’atu moko ci m’ubekadhu kud i ng’ete bilwiyo man bicime.”
3 Can iwi adhura ma jajai, m’ucido man ma sendojo!
2 Eworo ngo dwal moko acel de; ejolo ngo twiny.
Egeno ngo Yehova; man ecoro ngo ceng’ini i vut Mungu pare.
3 Judongo ma wijo pare ma gin’i iye gi calu umvor m’uberundo.
Jupoklembe pare gi calu urudi ku diewor;
Giweko ngo cogo acel de ma giromo mwodo kugweno.
4 Jubila pare gi jukuhaya, gicibojo.
Julam pare gicido gin ma leng’;
Gituro cik.
5 Yehova tie pwe i die adhurane; etimo ngo gin ma rac.
Kubang’ rupiny kubang’ rupiny, eketho pokolembe pare ng’eyere
I ayi ma lokere ngo calu der mi kugweno.
Ento jatimrac ung’eyo lewic ungo.
6 “Anyotho thek; gund udi ma wiw migi udong’ ni uvuru.
Anyotho gengi migi, uketho ng’atu moko mbe m’ubed ukadhu kud i iye.
Adhura migi udong’ ni uvuru ma ng’atu moko mbe i iye, ma jarabedo moko mbe m’udong’ i iye.
7 Ayero kumae: ‘Andha ibilwora man ibijolo twiny,’*
Kara kud junyoth kabedo pare
Mito akwaye ewodh wel* pi gin maeni ceke.
Ento gibino kud ava ma lee mi timo gin ma rac.
8 ‘Dong’ wumeduru nikura,’* Yehova wacu,
‘Nitundo i nindo m’abiai malu i iye pi niyaku piny,*
Kum telowic para mi pokolembe tie nicoko dhu thek, nicoko dhu ker,
Pi nikonjo kwinyo para i wigi, kwinyo para ma lake tek ceke;
Kum mac mir amora para biwang’u ng’om ceke.
9 Kum i saa maeca, abiloko dhok mi dhanu bidoko ni dhok ma leng’,
Kara gin ceke gilwong’ nying’ Yehova,
Pi nitimo ire gok ku gok.’*
10 Niai kud i ng’om mi kulo mir Ethiopia,’
Ju m’ubekwaya, niwacu nyaku mi dhanu para ma julalu bikelo ira giramiya.
11 I nindo maeca, jubinyayu ngo lewic i wii
Pi timo peri ceke m’ijai ko i kuma,
Kum i saa maeca abikabu ju ma giting’iri ku kuhaya kud i ii;
Man ibibedo jakuhaya kendo ngo iwi got para ma leng’.
12 Abiweko dhanu ma jwigiri man ma kabang’gi mbe re ma gidong’ i ii,
Man gibipondo i nying’ Yehova.
13 Dong Israel m’udong’ bitimo ngo lembe ma rac;
Gibicwayu ngo ndra, kadi leb mi vupo de jubinwang’u ngo i dhoggi;
Gibicamu* man gibivuto man ng’atu moko mbe ma binyayu lworo i igi.”
14 Kok kud anyong’a, Ee Nyasayuni!
Kok ku dwal mir aloci, Ee Israel!
Bed kud anyong’a man mutoro unegi kud adundeni ceke, Ee Nyayeruzalem!
15 Yehova ukabu pokolembe m’ubino i wii.
Eloko jadegi peri cen.
Ubimo mir Israel, Yehova n’i ii.
Ibilworo ngo peko nyanok de.
16 I nindo maeca, jubiyero ni Yeruzalem kumae:
“Ee Sayuni, lworo kud unegi.
Kud iwek cingi konjere jebele.
17 Yehova Mungu peri n’i ii.
Calu Ng’atu ma tek, ebibodhi.
Mutoro binege lee piri kud anyong’a ma dit.
Ebibedo ling’ i mer pare.
Mutoro binege piri ku kok mir anyong’a.
18 Abicoko dhu ju ma can unegogi pilembe gibino mbe i foc peri;
Gibino mbe karacelo kudi pilembe giyeyo cac ma jucayu kogi pire.
19 Nen! i saa maeca abiai i kum dhanu ceke m’ubesendi;
Man abibodho ng’atu m’ubekomo akoma,
Man abicoko dhu ju ma julalu.
Abiketho jubipakugi man pigi* biyik
I ng’om ceke ma junyayu lewic i wigi i iye.
20 I saa maeca abiketho wubimondo,
I saa m’abicoko dhogwu karacelo i iye.
Kum abiketho piwu* biyik man jubipakuwu i kind dhanu ceke mi ng’om,
Kinde m’abiketho ju mwu ma jumaku bidwogo ma wubeneno,” Yehova wacu.
Thelembene tie “Yehova ukanu.”
M’umbe jiji, eno tie piny kunoke tic ma tie ku winjiri ku rwo ni ayi gin m’acwiya.
Copere eno tie bop mi komker p’ubimo.
Kunoke “nyithi gudi.”
Copere nia eno tie ng’et Yeruzalem ma nwang’ere ceng’ini ku Dhugang’ mi rec.
I dhu Juebrania: “jumiyo dhu.”
I dhu Juebrania: “ju ma gibedo dii calu ceth pigulok m’upoto i ther agulu.”
Kunoke “edhulere pio pio.”
I dhu Juebrania: “cindi igi.”
Kunoke “ju ma wujwiguru.”
I dhu Juebrania: “pokolembe pare.”
Kunoke “jwigiri.”
Kunoke “Copere nia.”
Kunoke “bidieng’ pigi.”
Kunoke “bing’oyo ndiri i igi.”
Kunoke “biwore.”
I dhu Juebrania: “yedi ceke mi thek.”
Kunoke “ponji.”
Kunoke “amii ire matira.”
Kunoke “nikura ku twiyocwiny.”
Kunoke nyo “m’abiai malu i iye calu jamulembe.”
Kunoke “nitimo ire thier i acel.”
Kunoke “Gibimvoro lum.”
I dhu Juebrania: “nying’gi.”
I dhu Juebrania: “nyingwu.”