HAGAI

1 I oro mir arionde p’Ubimo Dario, i dwi mir abusiel, i nindo ma kwong’a mi dwije, lembe pa Yehova ubino ni Zerubabel ma wod Cealtiel ma jabim mi Yuda man ni Yocuwa ma wod Yehozadak ma jalam ma dit nikadhu kud i bang’ jabila Hagai,* uwacu kumae:

2 “Yehova mir udul uwacu kumae: ‘Dhanu maeni giwacu kumae: “Saa mi giero* ot* pa Yehova fodi uromo ngo.”’”

3 Man lembe pa Yehova ubino kendo nikadhu kud i bang’ jabila Hagai, uwacu kumae: 4 “Nyo eni tie iwu saa mi bedo i ot mwu ma juruko ku bau ma beco, ma ke lundo ot maeni udong’ ni uvuru? 5 Kawoni Yehova mir udul uwacu kumae: ‘Wupar cuu pi* yo mwu. 6 Wubecoyo kodhi lee, ento wubekayu nyanok. Wubecamu, ento wubeyeng’ ungo. Wubemadhu, ento gin ma wubemadhune uberomowu ngo. Wubekendo bongu, ento ng’atu moko mbe ma kume ubedoko mor. Ng’atu m’ubetimo tic ubeketho cul pare i usau ma there tuc.’”

7 “Yehova mir udul uwacu kumae: ‘Wupar cuu pi* yo mwu.’

8 ‘“Wuidh malu iwi got man wudwog ku yen. Man wugier ot kara anyong’a nega i kume man kara jumii ira dwong’,’ Yehova wacu.”

9 “‘Wubino kuro wunwang’ lee, ento wunwang’u nyanok; man kinde ma wukele i udi mwu, akudhe cen. Pirang’o?’ Yehova mir udul uwacu. ‘Pilembe ot para udong’ ni uvuru, ma ke lundo ng’atuman m’i kindwu uberingo kun ku kun pi nigwoko ot pare gire. 10 Pieno polo ucero thoine man ng’om ucero nyinge. 11 Man amedara niketho ceng’ urieny iwi ng’om, iwi gudi, iwi nying cam, iwi pigulok ma nyen, iwi mo, iwi piny ma twii kud i ng’om, iwi dhanu man iwi lim man iwi tic ceke ma tek m’i cingwu.’”

12 Zerubabel ma wod Cealtiel man Yocuwa ma wod Yehozadak ma jalam ma dit man dong dhanu ceke giwinjo dwand Yehova Mungu migi man lembe pa Hagai ma jabila, pilembe Yehova Mungu migi uore; e dhanu gicaku lworo Yehova.

13 E Hagai ma jakwenda pa Yehova uyero lembe ma e ni dhanu nimakere ku or ma Yehova uore ko: “‘An’i kudwu,’ Yehova wacu.”

14 Pieno Yehova ucwalu* Zerubabel ma wod Cealtiel ma jabim mi Yuda man Yocuwa ma wod Yehozadak ma jalam ma dit man dong dhanu ceke, e gibino man gicaku timo tic mi ot pa Yehova mir udul ma Mungu migi. 15 Lembe maeni utimere i nindo pier ario wi ang’wen mi dwi mir abusiel, i oro mir arionde p’Ubimo Dario.

2 I dwi mir abiro, i nindo pier ario wi acel mi dwije, lembe pa Yehova ubino nikadhu kud i bang’ Hagai ma jabila, uwacu kumae: 2 “Ka copere, penj Zerubabel ma wod Cealtiel ma jabim mi Yuda man Yocuwa ma wod Yehozadak ma jalam ma dit man dong dhanu kumae: 3 ‘Ng’a m’udong’ i kindwu m’uneno ot* maeni i dwong’ pare ma yang’ coni? Kawoni wubenene nenedi? Nyo ebenen ungo ni gin moko ngo ka jupore ku dwong’ pare ma coni?’

4 “‘Ento kawoni bed tek Zerubabel,’ Yehova wacu, ‘man bed tek Yocuwa ma wod Yehozadak, in m’i jalam ma dit.’

“‘Man wubed tek, wu dhanu ceke m’i ng’ombuni,’ Yehova wacu, ‘man wutim tic.’

“‘Kum an’i kudwu,’ Yehova mir udul uwacu. 5 ‘Wupoy i kum lembe m’ang’olo iwu kinde ma wuwok kud i Misiri man tipo para utie asu i kindwu.* Lworo kud unegwu.’”

6 “‘Kum Yehova mir udul uwacu kumae: ‘Wang’ acel kendo, i kare ma nyanok kende, abiyengo polo ku ng’om man nam ku ng’om m’uthwo.’

7 ‘“Man abiyengo thek ceke man piny ma pigi tek* mi thek ceke bimondo i ot maeni; man abipong’e ku dwong’,’ Yehova mir udul uwacu.

8 “‘Mola ma tar tie para man mola ma kwar de tie para,’ Yehova mir udul uwacu.

9 “‘Dwong’ mi nindo m’ubino mi ot maeni bibedo dit nisagu m’i wang’e,’ Yehova mir udul uwacu.

“‘Man abimiyo kwiyocwiny i kabedo maeni,’ Yehova mir udul uwacu.”

10 I nindo mi pier ario wi ang’wende mi dwi mir abung’wen, i oro mir arionde pa Dario, lembe pa Yehova ubino i bang’ Hagai ma jabila, uwacu kumae: 11 “Yehova mir udul uwacu kumae: ‘Ka copere, kepenj julam kumae iwi cik: 12 “Tek ng’atu moko uyeyo ring’o ma leng’ i dhu bongu pare man bongu parene umulo mukathi kunoke dek, kunoke pigulok, kunoke mo, kunoke kit cam moko ci, nyo camne bidoko leng’i?”’”

Julam gidwoko kumae: “Ungo!”

13 Hagai udok upenjo kumae: “Tek ng’atu moko m’ucido nikum avu* umulo kum piny moko ci ma kumeno, nyo pinyne bicido?”

Julam gidwoko kumae: “Ebicido.”

14 Pieno Hagai uwacu kumae: “‘Eno re ma tie kite ma dhanu maeni gitie ko man eno re ma tie kite ma thek maeni gitie ko i wang’a,” Yehova wacu, ‘man eno re ma tie kite ma tic ceke m’i cing’gi utie ko; gin moko ci ma gibethiero ucido.’

15 “‘Ento kawoni, akwayuwu, wupar cuu pi* lembe ma e niai tin: I wang’e ma fodi juketho ngo kidi moko iwi wagi i hekalu pa Yehova, 16 lembe bino wotho nenedi? Ka ng’atu moko ubino i bang’ ungu mi nying cam m’eparu nia ebiwok nwang’u mukero pier ario, enwang’u apar kende; man ka ng’atu moko ubino i bang’ vur mi biyo pigulok pi nitwomo mukero pier abic mi pigulok, enwang’u pier ario kende; 17 agoyowu, niwacu agoyo tic ceke m’i cingwu ku yamu ma thwoyo cam, ku laimo, man pei, ento ng’atu moko acel de mbe m’i kindwu m’ulokere i bang’a,’ Yehova wacu.

18 “‘Akwayuwu, wupar cuu pi* lembe ma e niai tin, niai i nindo pier ario wi ang’wen mi dwi mir abung’wen, niai i nindo ma juketho iye kathere mir hekalu pa Yehova; wupar cuu pi lembe ma e: 19 Nyo fodi asu kodhi moko udong’ i dero?* Yend ulok, yend ulam, yend ulemo man yend oliv fodi gicego ngo nyinggi, kumeno ngo? Niai i nindo maeni, abioro mugisa.’”

20 Lembe pa Yehova ubino wang’ mir arionde i bang’ Hagai i nindo pier ario wi ang’wen mi dwije, uwacu kumae: 21 “Wac ni Zerubabel ma jabim mi Yuda kumae: ‘Abeciyengo polo man ng’om. 22 Abiredho komker mi ker man abinyotho tego mi ker mi thek; man abiredho magali ku ju ma ringo kugi, man riuni* ku ju ma ringo kugi gibipodho, ng’atuman nikum palamularu p’umin.”’

23 ‘“I nindo maeca,’ Yehova mir udul uwacu, ‘Abigemi, in m’i jatic para ma Zerubabel ma wod Cealtiel,’ Yehova wacu, ‘man abiketho ibidoko calu lagith mi ketho ayi, pilembe itie ng’atu m’ang’iyo,’ Yehova mir udul uwacu.”