ZEKARIA

1 I dwi mir abora mi oro mir arionde pa Dario, lembe pa Yehova ubino i bang’ jabila Zekaria* ma wod Berekia ma wod Ido, uwacu kumae: 2 “Kwinyo ugam umaku Yehova lee mandha i kum wegwu.

3 “Yer igi kumae: ‘Yehova mir udul uwacu kumae: “‘Wudwog i bang’a,’ Yehova mir udul uwacu, ‘man abidwogo i beng’wu,’ Yehova mir udul uwacu.”’

4 “‘Kud wudok calu wegwu ma jubila ma con gibed gitwong’o igi kumae: “Yehova mir udul uwacu kumae: ‘Akwayuwu, wulokuru cen kud i yo mwu ma reco man kud i kum timo mwu ma reco.’”’

“‘Ento giwinjo ngo man giciko de ngo ithgi i bang’a,’ Yehova wacu.

5 “‘Wegwu gin’i kani kawoni? Man nyo jubilane gikwo rondo ku rondo? 6 Ento wegwu gineno kite ma lembe para man cik para m’ang’olo ni jutic para ma jubila upong’o ko, kumeno ngo?’ Pieno gidwogo i bang’a man giwacu kumae: ‘Yehova mir udul utimo iwa nimakere ku yo mwa man ku timo mwa tap calu m’elar ekeco nitimo.’”

7 I nindo pier ario wi ang’wen mi dwi mir apar acel, niwacu dwi mi Cebath,* i oro mir arionde pa Dario, lembe pa Yehova ubino i bang’ jabila Zekaria ma wod Berekia ma wod Ido, uwacu kumae: 8 “Aneno gin ma wok i wang’ moko ku diewor. Ng’atu moko ubino ringo ku riuni* ma kwar man ecungo ting’ i kind yend mirthe i poga; man riuni ma kwar, riuni ma kwar ngboo man riuni ma tar ubino i ng’eye.”

9 Pieno awacu kumae: “Rwoth para, eni tie jukani?”

Malaika m’ubino weco kuda udwoko kumae: “Abinyutho iri nia gitie jukani.”

10 I ng’eye ng’atu m’ucungo ting’ i kind yend mirthe uwacu kumae: “Maeni gi ju ma Yehova uorogi giwoth kun ku kun i ng’om.” 11 Man giwacu ni malaika pa Yehova m’ucungo i kind yend mirthe kumae: “Wawotho kun ku kun i ng’om, man nen! ng’om zoo ubedo ling’ man ekwiyo.”

12 Pieno malaika pa Yehova uyero kumae: “Ee Yehova mir udul, nitundo awene m’ibicero kisa peri ni Yeruzalem man ni adhura mi Yuda ma ng’eicwiny umeki pigi pi oro pier abiro maeni?”

13 Yehova udwoko lembe ku wec ma ber man ma juko cwiny ni malaika m’ubino weco kuda. 14 E malaika m’ubino weco kuda uyero ira kumae: “Kok ma tek kumae: ‘Yehova mir udul uwacu kumae: “Atie kud amora pi Yeruzalem man pi Sayuni, eyo, amora ma dit mandha. 15 Ng’eicwiny umaka lee, eyo, ng’eicwiny umaka i kum thek ma gibedo ma cwinygi kwiyo, pilembe ng’eicwiny ugam umaka nyanok, ento gin gimedo lak can ameda.”’

16 “Pieno Yehova uwacu kumae: ‘“Abidwogo i Yeruzalem ku kisa man jubigiero ot para i iye,” Yehova mir udul uwacu, “man jubitelo thol mi pimo piny iwi Yeruzalem.”’

17 “Kok kendo wang’ acel man wac kumae: ‘Yehova mir udul uwacu kumae: “Adhura para bidhir kendo ku piny ma beco; man Yehova bijuko cwiny Sayuni kendo man ebing’iyo Yeruzalem kendo.”’”

18 I ng’eye, ang’ayu wang’a malu man aneno tung’ ang’wen. 19 Pieno apenjo malaika m’ubino weco kuda kumae: “Eni tie ang’o?” Edwoko kumae: “Eni tie tung’ m’ulalu Yuda, Israel man Yeruzalem.”

20 I ng’eye Yehova unyutho ira bafundi ang’wen. 21 Apenjo kumae: “Ju maeni gibino timo ang’o?”

Edwoko kumae: “Maeni gitie tung’ ma gilalu Yuda i kadhiri m’uketho ng’atu moko mbe m’ubino ku copo mi ting’o wiye malu. Ju maeno gibibino pi ninyayu lworo i igi, pi niredho tung’ mi thek piny, gi thek ma giting’o tung’gi i kum ng’om mi Yuda kara gilale.”

2 E agam ating’o wang’a malu man aneno ng’atu moko m’umaku thol mi pimo piny i cinge. 2 Pieno apenje kumae: “Icidho kani?”

Edwoko kumae: “Acidho pimo Yeruzalem pi nineno kalacne man kaborne.”

3 Man nen! malaika m’ubino weco kuda uwok, man malaika mange ubino nirombo kude. 4 I ng’eye ewacu ire kumae: “Ring kuca man yer ni jalawobi ca kumae: ‘“Calu ma dhanu man lim m’i Yeruzalem bidoko lee, jubikwo i iye kendo calu i adhura mi kiaru ma gang’ umbe i ng’ete. 5 Man abidoko ire ni gang’ mi mac i ng’ete tingili man dwong’ para bipong’o iye bik,”’” Yehova wacu.

6 “Wubin! Wubin! Wuringi niai kud i ng’om ma yo malu,” Yehova wacu.

“Pilembe agam alaluwu i gund yamu ang’wen mi polo,” Yehova wacu.

7 “Bin Sayuni! Ringi, in m’ibedo karacelo ku Nyababeli. 8 Kum Yehova mir udul, en m’i ng’ey ma juyunge,* uora i bang’ thek m’ubino yakuwu, uyero kumae: ‘Ng’atu m’umulo kumwu nwang’u umulo tong wang’a. 9 Kum kawoni abiting’o cinga i kumgi man gibidoko ni jambayeki ni ng’eca migi.’ E wubing’eyo andhandha nia Yehova mir udul uora.

10 “Kok kud anyong’a, Ee Nyasayuni; kum abebino man abibedo i ii,” Yehova wacu. 11 “Thek dupa gibidikiri ku Yehova i nindo maeca man gibidoko dhanu para; man abibedo i ii.” E wubing’eyo nia Yehova mir udul uora i beng’wu. 12 Yehova bimaku Yuda ni makapiny pare i ng’om ma leng’ man ebing’iyo Yeruzalem kendo. 13 Wu ring’kum* ceke wubed ling’ i wang’ Yehova pilembe ebecitimo lembe niai kud i kabedo pare ma leng’.

3 Man enyutho ira Yocuwa ma jalam ma dit m’ucungo i wang’ malaika pa Yehova man Sitani m’ucungo i cinge mir acwic pi nijai ire. 2 I ng’eye malaika pa Yehova uyero ni Sitani kumae: “Dong’ Yehova ujuki, Ee Sitani, eyo, dong’ Yehova m’ung’iyo Yeruzalem ujuki! Nyo ng’atu maeni utie ngo dund yen m’ubewang’ ma juyudho kud i maci?”

3 Nwang’u Yocuwa ukendo bongu m’ucido man ecungo i wang’ malaikane. 4 Malaikane uyero ni ju m’ucungo i wang’e kumae: “Wuwodh bongu m’ucido no kud i kume.” I ng’eye ewacu ire kumae: “Nen, akabu kosa* peri cen kud i kumi man jubironyi ku bongu ma leng’.”*

5 Pieno awacu kumae: “Dong’ jurony jamboyo wic ma segi ma leng’ i wiye.” E giroyo jamboyo wic ma segi ma leng’ i wiye man gironye ku kendi; man nwang’u malaika pa Yehova ucungo ceng’ini kakeca. 6 I ng’eye malaika pa Yehova uyero ni Yocuwa kumae: 7 “Yehova mir udul uwacu kumae: ‘Tekene iwotho i yo para man ipong’o tic peri i wang’a, abiketho ibibedo japoklembe i ot para man ibigwoko* lela para; man abiketho ibibedo agonya niwotho i kind ju m’ucungo keca.’

8 “‘Abekwayuwu, wuwinji, Ee Yocuwa ma jalam ma dit, in ku juwodhi ma gibedo i weng’i, pilembe dhanu maeni gitie giranyutha; nen! abekelo jatic para ma tie Jang yen m’uloth! 9 Wunen kidi m’aketho i wang’ Yocuwa! I kum kidi acel maeno wang’ utie abiro; man abeng’iko kwan iwi kidine,’ Yehova mir udul uwacu, ‘man abikabu kier m’i ng’om maeni cen i nindo acel.’

10 “‘I nindo maeca,’ Yehova mir udul uwacu, ‘ng’atuman m’i kindwu bilwong’o jadhugola pare i the yend ulok pare man i the yend ulam pare.’”

4 Malaika m’ubino weco kuda udwogo man ucewa calu ma jucewo ko ng’atini kud i wang’ nindo. 2 E epenja kumae: “Ibeneno ang’o?”

Adwoko kumae: “Abeneno man nen! tiend thala ma en zoo e mi mola ma kwar ku tabu acel malu i wiye. Thala abiro n’i wiye, eyo, abiro, man thala ma n’i wiye gitie ku dhoggi abiro m’uai i the tabu. 3 Man yend oliv ario ni ceng’ini kude, acel yor acwic mi tabune man ma kucelo yor acam.”

4 E apenjo malaika m’ubino weco kuda kumae: “Rwoth para, gin maeni thelembene tie ang’o?” 5 Pieno malaika m’ubino weco kuda upenja kumae: “Ing’eyo ngo thelembe mi gin maeni?”

Adwoko kumae: “Ang’eyo ngo rwoth para.”

6 E eyero ira kumae: “Yehova ubeyero ni Zerubabel kumae: ‘“Ku tego mir udul askari ngo kadi ku kero de ngo, ento ku tipo para,” Yehova mir udul uwacu. 7 Ee got ma dit, in itie ng’a? I wang’ Zerubabel ibidoko ni ng’om pambu. Man ebiwodho kidi ma malu ma wi gul kud i kind kok ma kumae: “Ber mire maa! Ber mire maa!”’”

8 Lembe pa Yehova ubino kendo i bang’a kumae: 9 “Cing’ Zerubabel re m’uketho kathere mi ot maeni man cinge gire re ma bidare. Man wubing’eyo nia Yehova mir udul uora i beng’wu. 10 Kum ng’a m’ucayu nindo ma lembe ucaku i iye nok noki?* Kum anyong’a binegogi man gibineno thol mi pimo alima* i cing’ Zerubabel. Wang’ abiro maeni gitie wang’ Yehova ma giberingo kun ku kun i ng’om zoo.”

11 E apenje kumae: “Yend oliv ario maeni ma n’i yor acwic man ma n’i yor acam mi tiend thala ubenyutho ang’o?” 12 Apenje wang’ mir arionde kumae: “Jang oliv ario m’ubethiwo mo ma rangine ve mi mola ma kwar kud i dhu poli ario mi mola ma kwar e, ubenyutho ang’o?

13 Pieno epenja kumae: “Ing’eyo ngo thelembe mi gin maeni?”

Adwoko kumae: “Ang’eyo ngo rwoth para.”

14 Eyero kumae: “Maeni tie juario ma juwiro ma gicungo i ng’et Rwoth mi ng’om zoo.”

5 Ang’ayu wang’a malu kendo man aneno kithabu m’adola m’uberingo. 2 Malaika upenja kumae: “Ibeneno ang’o?”

Adwoko kumae: “Abeneno kithabu m’adola m’uberingo, ma bor pare tie bot* pier ario man lac wang’e bot apar.”

3 Ewacu ira kumae: “Maeni tie kwong’ m’ubecidho i wang’ ng’om zoo, pilembe ng’atu moko ci m’ubekwalu kwo calu ma jukiewo i thenge acel, unwang’u ngo matira; man ng’atu moko ci m’ubekwong’o kwong’ calu ma jukiewo i thenge ma kucelo, unwang’u ngo matira. 4 ‘Aoro kwong’ maeno,’ Yehova mir udul uwacu, ‘man ebimondo i ot pa jakwo man i ot pa ng’atu m’ubekwong’o kwong’ mi vupo ku nyinga; man ebibedo i ot maeno man ebiwang’e, ebiwang’u yende ku kidine bende.’”

5 E malaika m’ubino weco kuda ucoro man uwacu ira kumae: “Akweyi, ng’ay weng’i man nen gin m’ubewok.”

6 E apenjo kumae: “Eni tie ang’o?”

Edwoko kumae: “Eni tie ajeni acel mir efa* m’ubewok.” Emedo kumae: “Maeni tie kite ma dhanu maeno ginen ko i ng’om zoo.” 7 Man aneno juyabu wi ajenine ma ngulu ngulu ma juyiko ku cuma ma pek man dhaku moko ubedo i iye. 8 E ewacu kumae: “Maeni tie Racu.” I ng’eye ecwale edok i ajeni mir efa man eumo dhu ajenine ku cuma ma ngulu ngulu ma pek.

9 E ang’ayu wang’a malu man aneno jumamon ario gibebino man gibino idho ma tek i yamu. Vombgi ubino calu vomb nunda. Man giting’o ajenine malu i kind ng’om ku polo. 10 Pieno apenjo malaika m’ubino weco kuda kumae: “Gibetero ajeni mir efane kani?”

11 Edwoko kumae: “I ng’om mi Cinear* pi nigiero ot pare; man kinde ma gidare, jubikethe kuca i kakare ma dhe.”

6 E ang’ayu wang’a malu kendo man aneno magali ang’wen ubebino kud i kind gudi ario man gudine gibino mi mola. 2 Magali ma kwong’a ubino ku riuni* ma kwar man magali mir arionde ubino ku riuni ma col. 3 Magali mir adege ubino ku riuni ma tar man magali mir ang’wende ubino ku riuni* ma kwici kwici man riuni ma cuku cuku.

4 Apenjo malaika m’ubino weco kuda kumae: “Rwoth para, eni tie ang’o?”

5 Malaikane udwoko ira kumae: “Maeni tie tipo ang’wen mi polo ma gibewok i ng’ey ma giai gicungo i wang’ Rwoth mi ng’om zoo. 6 Magali m’utie ku riuni* ma col ubecidho i ng’om ma yo malu; m’utie ku riuni ma tar gibecidho nikadhu loka nam; man m’utie ku riuni ma kwici kwici gibecidho i ng’om ma yo piny. 7 Man ma cuku cuku gibino kud ava mi wok pi niwotho kun ku kun i ng’om.” E eyero kumae: “Wucidhi, wuwoth kun ku kun i ng’om.” E gicaku niwotho kun ku kun i ng’om.

8 I ng’eye elwong’a man eyero kumae: “Kenen, ju ma gibecidho i ng’om ma yo malu giketho tipo pa Yehova uyom i ng’om ma yo malu.”

9 Lembe pa Yehova ubino kendo i bang’a, uyero kumae: 10 “Gam gin ma Heldai, Thobiya man Yedaya gidwogo ko kud i bang’ dhanu ma gin’i ng’eca; man i nindo maeca icikiri nicidho i ot pa Yosiya ma wod Zefania karacelo ku dhanu maeni ma giai i Babeli. 11 Ting’ mola ma tar ku mola ma kwar man iyik jamker mi wic,* e ikethe iwi Yocuwa ma wod Yehozadak ma jalam ma dit. 12 Man yer ire kumae:

‘“Yehova mir udul uwacu kumae: “Ng’atu maeni nyinge tie Jang yen m’uloth. Ebiloth kud i kakare gire man ebigiero hekalu pa Yehova. 13 Etie ng’atu ma bigiero hekalu pa Yehova man etie ng’atu ma binwang’u dwong’. Ebibedo iwi komker pare man ebibimo, man ebibedo bende jalam iwi komker pare, man winjiri mi kwiyocwiny bibedo nuti i kind lembe ario maeno.* 14 Man jamker mi wicne* bibedo ni poy* pi Helem, Thobiya, Yedaya man Hen ma wod Zefania i hekalu pa Yehova. 15 Man ju ma gini bor gibibino man gibidiko cing’gi pi nigiero hekalu pa Yehova.” E wubing’eyo nia Yehova mir udul uora i beng’wu. Man lembe maeni bitimere tekene wukoso ngo niwinjo dwand Yehova Mungu mwu.’”

7 Man i oro mir ang’wende mi camuker p’Ubimo Dario, lembe pa Yehova ubino i bang’ Zekaria i nindo mir ang’wende mi dwi mir abung’wen, niwacu dwi mi Kislev.* 2 Dhanu mi Bethel gioro Carezer man Regem-melek ku dhanu pare pi nikwayu bero pa Yehova, 3 nia giyer ni julam mi ot* pa Yehova mir udul man ni jubila kumae: “Nyo ubekwayu awaki i dwi mir abic man akwir cam calu m’adaru timo pi oro ma dupa?”

4 Lembe pa Yehova mir udul ubino kendo i bang’a man uwacu kumae: 5 “Yer ni dhanu ceke mi ng’ombe man ni julam nia, ‘Kinde ma wukwiro cam man wuwak i dwi mir abic man i dwi mir abiro pi oro pier abiro, nyo wukwiro camne pira andha? 6 Man kinde ma wubino camu man wubino madhu, nyo wubino camu man wubino madhu piwu giwu ngo? 7 Nyo ugam ukwayu ngo nia wuwor lembe ma Yehova utwong’o nikadhu kud i bang’ jubila ma con, kinde ma dhanu ubed ukwo i Yeruzalem kud adhura m’udhoke i kwiyocwiny man kinde ma dhanu ubed ukwo i Negeb ku Cefela?’”

8 Lembe pa Yehova ubino kendo i bang’ Zekaria man uwacu kumae: 9 “Yehova mir udul uwacu kumae: ‘Wupok lembe i atira man wutim lembe i kindwu ku mer ma lokere ngo man kisa. 10 Kud wuvur dhatho kunoke nyathikic,* umondo kunoke jacan; man kud wupang nitimo lembe ma rac i adundewu ng’atuman i kum wadi, man i kum wadi.’ 11 Ento gimediri nikwero niciko ithgi, man giloko ng’eygi ku tego wigi man giculo ithgi kara kud giwinji. 12 Gidwoko adundegi nwang’ calu diama* man giworo ngo cik* man lembe ma Yehova mir udul uoro nikum tipo pare, nikadhu kud i bang’ jubila ma con. Pieno ng’eicwiny ma dit umaku Yehova mir udul.”

13 “‘Tap calu ma giwinjo ngo kinde m’alwong’ogi,* an de awinjogi ngo kinde ma gilwong’a,’ Yehova mir udul uwacu. 14 ‘E alalu igi ku yamu ma tek i kind thek ceke ma nwang’u ging’eyo ngo, man ng’om udong’ ni uvuru i ng’eygi, ma ng’atu moko mbe m’ukadhu kud i iye kunoke m’udwogo i iye; kum gidwoko ng’om ma ber udoko ni gin ma nyayu lworo.’”

8 Lembe pa Yehova mir udul ubino kendo man uwacu kumae: 2 “Yehova mir udul uwacu kumae: ‘Abibedo kud amora pi Sayuni, eyo, amora ma dit mandha man ku kwinyo ma dit abibedo kud amora pire.’”

3 “Yehova uyero kumae: ‘Abidwogo i Sayuni man abibedo i Yeruzalem; man jubilwong’o Yeruzalem nia adhura mi lemandha,* man got pa Yehova mir udul ke nia got ma leng’.’”

4 Yehova mir udul uwacu kumae: ‘Jumaco ku jumamon m’utii gibibedo kendo i lela ma lac mi Yeruzalem, ng’atuman kud uluth pare i cinge nikum oro pare ma lee.* 5 Man lela ma lac mir adhurane bipong’ kud awiya ma co man ma nyir ma gibetuko keca.’”

6 “Yehova mir udul uwacu kumae: ‘Kadok nwang’u nyo ebinen ni lembe ma tek lee ni dong dhanu m’udong’ maeni i nindo meca de, nyo ebinen ni lembe ma tek lee ira bende?’ Yehova mir udul uwacu.”

7 “Yehova mir udul uwacu kumae: ‘Abibodho dhanu para niai kud i ng’om ma yo nyangu man ma yo reto.* 8 Man abidwokogi i Yeruzalem, e gibibedo i iye; man gibidoko ni dhanu para man abidoko ni Mungu migi i lemandha* man i bedopwe.’”

9 “Yehova mir udul uwacu kumae: ‘Dong’ cwinyu bed tek,* wun ma kawoni wubewinjo wec maeni m’ubeai kud i dhu jubila, wec ma rom ma giyero i nindo ma juketho iye kathere mi ot pa Yehova mir udul kara jugier hekalu. 10 Kum i wang’ nindo maeno, jubed juculo ngo cul moko kadok pi dhanu kadi pi yedi; man nikum jakwor, ebino lembe mir ariti nicidho kaka moko man nidwogo, pilembe aketho dhanu ceke ng’atuman ulokere i kum wadi.’

11 “‘Ento kawoni abitimo ngo lembe ni dong dhanu m’udong’ maeni calu m’abed atimo i nindo ma yang’ con,’ Yehova mir udul uwacu. 12 ‘Kum jubicoyo kodhi mi kwiyocwiny; ulok bicego nyinge man ng’om bicego piny, man polo bimiyo thoine; e abiketho dong dhanu m’udong’ maeni gilag piny maeno ceke. 13 Man tap calu ma wudoko ni jambalam i kind thek, Ee ot mi Yuda man ot mir Israel, abibodhowu man wubidoko ni mugisa. Lworo kud unegwu! Dong’ cwinyu bed tek.’*

14 “Kum Yehova mir udul uwacu kumae: ‘“Tap calu m’agam akeco nikelo can i wiwu pilembe kwaruwu ginyayu ng’eicwiny i iya,” Yehova mir udul uwacu, “man ang’eyang’o uwok ungo i iya, 15 pieno i nindo nini akeco nitimo lembe ma ber ni Yeruzalem man ni ot mi Yuda. Lworo kud unegwu!”’

16 “‘Maeni tie gin ma wucikuru nitimo: Ng’atuman uyer lemandha ni wadi, man pokolembe mi dhugang’ mwu ucikere nicwaku lemandha man kwiyocwiny. 17 Kud wupang nitimo lembe ma reco i adundewu ng’atuman i kum wadi, man i kum wadi; man kud wumar kwong’ mi vupo kum adagu gin maeno ceke,’ Yehova wacu.”

18 Lembe pa Yehova mir udul ubino kendo i bang’a man uwacu kumae: 19 “Yehova mir udul uwacu kumae: ‘Kwirocam mi dwi mir ang’wen, kwirocam mi dwi mir abic, kwirocam mi dwi mir abiro man kwirocam mi dwi mir apar bibedo ni nindo mi mutoro man mir anyong’a ni ot mi Yuda, niwacu foc mir anyong’a. Pieno wumar lemandha man kwiyocwiny.’

20 “Yehova mir udul uwacu kumae: ‘Ebitimere andha nia dhanu man jurubedo mir adhura dupa bibino; 21 man jurubedo mir adhura acel bicidho i bang’ jurubedo mir adhura ma kucelo man gibiwacu kumae: “Dong’ wacidh wakway bero pa Yehova kud adundewa ceke man wayeny Yehova mir udul. Wan bende wabecidho.” 22 Dhanu dupa man thek ma tek gibibino pi niyenyo Yehova mir udul i Yeruzalem man pi nikwayu bero pa Yehova.’

23 “Yehova mir udul uwacu kumae: ‘I nindo maeca, dhanu apar m’uai kud i dhok ceke mi thek bimaku, eyo, gibimaku dhu kendi* pa Jayahudi* kikiki ma gibewacu kumae: “Wabemito wacidh karacelo kudwu, kum wawinjo nia Mungu ni kudwu.”’”

9 Atwong’a:

 3 Turo ugiero gang’ ma tek ire gire.

 9 Anyong’a negi lee, Ee Nyasayuni.

Kok ku kok mir aloci, Ee Nyayeruzalem.

Nen! ubimo peri ubebino i beng’i.

Jubikabu athero mi lwiny cen.

12 Wudwog i kaka ma tek, wu jukol ma wutie ku genogen.

13 Kum abigomo i* Yuda calu athero para.

10 “Wukway koth i bang’ Yehova i saa mi koth ma tokcen.

Eno re m’uketho gibiwotho swa calu rombe.

Gibisendiri, kum jakwac umbe.

4 “Yehova Mungu para uwacu kumae: ‘Kway udul rombe m’ubedo pir athuma, 5 ma ju m’ubeng’iewogi uthumogi man gibedo ma kosa mbe i wigi. Man ju m’ubelworogi giwacu kumae: “Pak ubed ni Yehova, kum abilony.” Man kisa unego ngo jukwac migi i kumgi.’

6 ‘“Kum kisa binega kendo ngo i kum dhanu m’i ng’ombe,’ Yehova wacu. ‘Pieno abiketho ng’atuman bipodho i cing’ jadhugola pare man i cing’ ubimo pare; man gibinyotho ng’ombe man abibodhogi ngo kud i cing’gi.’”

7 Man acaku kwayu udul rombe m’ubedo pir athuma pi bero mwu, Ee wu rombe m’i dwol ma junyayu can i iwu. Pieno ating’o uluth ario man alwong’o acel nia Bero man ma kucelo ke nia Bedo i acel, man acaku kwayu udul rombe. 8 Man ariemo jukwac adek i dwi acel, pilembe aromo* cirogi ngo, e gidaga* bende. 9 Man awacu kumae: “Abimedara ngo nikwayuwu. Dong’ m’ubetho utho man m’uberwinyo de urwiny. Pi dong ju m’udong’, wek gicam ring’ kumgi i kindgi.” 10 Pieno ating’o uluth para ma julwong’o nia Bero man atong’o iye aturo ko lembariba m’atimo ku dhanu ceke. 11 E etur i nindo nica man rombe mi dwol ma junyayu can i igi ma gibino nena ging’eyo nia eca ubino lembe pa Yehova.

12 Agam awacu igi kumae: “Tek e ber i weng’wu, wumii cul para; tek ungo ke wucere.” Man gimiyo* cul para tongolo mi mola ma tar pier adek.

13 E Yehova wacu ira kumae: “Bole i kakanpiny, welpiny ma dwong’ ma ginwang’u nia tie valer para.” Pieno ating’o tongolo mi mola ma tar pier adek man abole i kakanpiny i ot pa Yehova.

14 E atong’o i uluth para mir ario, niwacu Bedo i acel, ajigo ko mer mir umego i kind Yuda giku Israel.

15 Man Yehova uwacu ira kumae: “Kawoni ting’ jamtic pa jakwac ma tije mbe. 16 Kum abeketho jakwac moko uwok i ng’ombe. Ebigwoko ngo rombe m’uberwinyo; ebiyenyo ngo m’aradu kadi ebikeyo ngo kum ma ret n’i kume kadi ebitungo ngo ma tie ku copo mi cungo. Ento ebicamu ring’kum m’ucwey man ebiyeco i ubong’ tiend rombe.

17 Can iwi jakwac para ma tije mbe, m’ubewenjo dwol!

Palamularu bigoyo bote man wang’e ma yor acwic.

12 Atwong’a:

2 “Nen abeketho Yeruzalem ubedoko ni kikombe* ma ketho thek ceke m’utieke wotho thamba thamba; man jubitieko Yuda ku Yeruzalem bende. 3 I nindo maeca abiketho Yeruzalem bidoko ni kidi ma pek ni dhanu ceke. Andhandha dhanu ceke ma gibiting’e gibinwang’u ret ma lee; man thek ceke mi ng’om gibicokiri karacelo i kume. 4 I nindo maeca,” Yehova wacu, “abigoyo riuni* ceke ku ndiri man abiketho abelu bimaku ng’atu m’uberingo kude. Abiketho wang’a iwi ot mi Yuda, ento abigoyo riuni ceke mi dhanu ku corwang’. 5 Man rwodhi mi Yuda gibiyero i adundegi kumae: ‘Jurubedo mi Yeruzalem gitie tego ira nikum Yehova mir udul ma Mungu migi.’ 6 I nindo maeca abiketho rwodhi mi Yuda gibidoko calu agulu m’upong’ ku mac i kind yen man calu ridhro m’ubeliel i leni mi cam ma jukayu; man gibiwang’u dhanu m’utiekogi ceke yor acwic man yor acam man dhanu mi Yeruzalem bibedo kendo kakagi* i Yeruzalem.

7 “Man Yehova bilar bodho hema mi Yuda kara leng’o mi ot pa Daudi man leng’o mi ju ma bedo i Yeruzalem kud ubed dit nisagu iwi Yuda. 8 I nindo maeca Yehova bicero bang’ dhanu ma bedo i Yeruzalem; i nindo maeca ng’atu m’ubekier* i kindgi bibedo calu Daudi man ot pa Daudi bitelo wigi calu Mungu, calu malaika pa Yehova m’ubecidho i wang’gi. 9 Man i nindo maeca, andhandha abinyotho thek ceke m’ubino i kum Yeruzalem.

10 “Abikonjo tipo mi bero man mi kwayukwac iwi ot pa Daudi man iwi ju ma bedo i Yeruzalem, man gibineno bang’ ng’atu ma gicobo ku tong’ man gibiwage tap calu ma juwagu ko wod m’acel kulong’; man gibiwage lee mandha tap calu ma juwagu ko wod ma kayu. 11 I nindo maeca wak bibedo dit i Yeruzalem calu wak mi Hadadrimon i pambu mi Megido. 12 Man ng’ombe biwak, juruotman kakendgi; juruot mi nyikway Daudi kakendgi man mon migi kakendgi; juruot mi nyikway Nathan kakendgi man mon migi kakendgi; 13 juruot mi nyikway Lawi kakendgi man mon migi kakendgi; juruot mi nyikway Cimei kakendgi man mon migi kakendgi; 14 man juruot ceke m’udong’, juruotman kakendgi man mon migi kakendgi.

13 “I nindo maeca, jubiyabu dhu pii m’atong’a ni ot pa Daudi man ni jurubedo mi Yeruzalem kara gidwokiri leng’ kud i kum dubo migi man cilo migi.

2 “I nindo maeca,” Yehova mir udul uwacu, “abikabu nying’ ayi gin m’acwiya kud i ng’ombe man jubipoy pigi kendo ngo; man abikabu jubila man tipo mi gin m’ucido kud i ng’ombe. 3 Man tek ng’atu moko ubeewo kendo, won ku min m’unyole gibiyero ire kumae: ‘Ibikwo ngo, pilembe icwayu ndra i nying’ Yehova.’ Man won ku min m’unyole gibicobe plu pi lembe m’ebeewo.

4 “I nindo maeca lewic bimaku jubila ceke pi gin ma wok i wang’ migi kinde ma gibeewo; man gibikendo ngo kendi ma segi mi yuk ley pi nicwayu ndra. 5 Man ng’atuman m’i kindgi biyero kumae: ‘Atie jabila ngo. Atie jarafur pilembe ng’atu moko ung’iewa kinde m’abino aradu.’ 6 Man tek ng’atu moko upenje kumae: ‘Ka rem ma n’i kumi* no ke uai kani?’ ebidwoko kumae: ‘Rem maeni anwang’u i ot mi jurimba.’”*

14 “Nen! nindo ubebino, ma tie nindo pa Yehova ma jubipoko iye jambayeki m’uai kud i beng’i* i ii. 2 Abicoko dhu thek ceke karacelo pi nikiedo lwiny i kum Yeruzalem; man jubimaku adhurane, jubiyaku piny m’i udi man jubimaku jumamon ku kero. Nusu mi dhanu mir adhura bicidho i ng’eca, ento jubikabu ngo dong dhanu m’udong’ kud i adhurane.

3 “Yehova biwok man ebikiedo i dhu thek maenogi calu m’ekiedo i nindo mi lwiny. 4 I nindo maeca, tiende bicungo iwi Got mir oliv m’ubeneno Yeruzalem yo nyangu; man Got mir oliv bipokere i diere ni ario, niai yo nyangu* nitundo yo reto* m’ebiweko poga ma dit; man nusu gotne bidok yo malu man nusune bidok yo piny. 5 Wubiringo i poga mi gudi para, kum poga mi gudi bimedere nitundo i bang’ Azel. Bikwayu wuringi tap calu ma wugam wuringo pi digidi i nindo p’Ubimo Uzia mi Yuda. Man Yehova Mungu para bibino man jumaleng’ ceke bibedo karacelo kude.

6 “I nindo maeca der ma pire tek bibedo mbe, piny bital.* 7 Man nindone bidoko ni nindo m’ung’eyere nia etie nindo pa Yehova. Dieceng’ bibedo mbe kadi diewor de bibedo mbe; man uthieno der bibedo nuti. 8 I nindo maeca, pii mi kwo bimol kud i Yeruzalem, nusune biloro i nam ma yo nyangu* man nusune i nam ma yo reto.* Ebitimere i saa mi cir man i saa mi oro. 9 Man Yehova bibedo Ubimo iwi ng’om ceke. I nindo maeca Yehova bibedo acel man nyinge de acel.

10 “Ng’ombe ceke bidoko calu Araba, niai i Geba nicidho i Rimon yo piny mi Yeruzalem; man adhurane bicungo kaka m’elar ebino i iye man jubibedo i iye, niai i Dhugang’ mi Benjamin nicidho kaka ma Dhugang’ ma kwong’a n’i iye man nicidho i Dhugang’ mi gul, bende niai i bang’ Ot ma wiw pa Hananel nicidho i bang’ vur mi biyo pigulok p’ubimo. 11 Man dhanu bibedo i iye; man alam moko mbe kendo ma bikelo nyoth i wiye, man jubibedo i Yeruzalem ku bedomoth.

12 “Man Yehova bigoyo dhanu ceke ma gibekiedo i dhu Yeruzalem ku thong’om ma e: Ring’ kumgi bitop kinde ma gicungo iwi tiendgi, wang’gi bitop i ugogo wang’gi man lebgi bitop i dhoggi.

13 “I nindo maeca ndiri m’uai i bang’ Yehova bimew i kindgi; man ng’atuman bimaku jawodhe ku cinge, man cinge bibino i kum cing’ jawodhe.* 14 Yuda de bidikere i lwiny i Yeruzalem; man jubicoko dhu lonyo mi thek ceke m’udhoke tingili, mola ma kwar, mola ma tar man bongu i kadhiri ma lee dit.

15 “Man thong’om m’urombo ku thong’om maeno bibino bende i kum riuni,* i kum kit kana mange,* i kum ngamia, i kum kana man i kum lim ceke ma n’i kagonjo maeno.

16 “Ng’atu moko ci m’udong’ i kind thek ceke ma gibino i kum Yeruzalem bibeidho kubang’ oro pi nirum i wang’* Ubimo Yehova mir udul man pi nitimo Foc mi otbak.* 17 Ento tekene ng’atu moko m’i kind juruot mi ng’om uidho ngo i Yeruzalem pi nirum i wang’ Ubimo Yehova mir udul, koth bicwii ngo i wiye nyanok de. 18 Tekene juruot mi Misiri giidho ngo man gimondo ngo i iye, koth bicwii ngo i wigi. Ento gibinwang’iri ku thong’om ma Yehova ugoyo ko thek ma giidho ngo pi nitimo Foc mi otbak. 19 Eno bibedo matira mi dubo mi Misiri man mi dubo mi thek ceke ma giidho ngo pi nitimo Foc mi otbak.

20 “I nindo maeca jubikiewo wec ma nia, ‘Leng’o en e pa Yehova!’ i kum ngara mi riuni.* Man agulu mi tedo piny* m’i ot pa Yehova bibedo calu tabu i wang’ pemlam. 21 Man agulu ceke mi tedo piny* i Yeruzalem man i Yuda bibedo leng’ man ebibedo pa Yehova mir udul, man dhanu ceke ma gibethiero lam gibimondo man gibitiyo ku moko m’i kindgi pi nitedo piny. I nindo maeca Jakanan* moko mbe kendo ma bibedo i ot pa Yehova mir udul.