MALAKI

1 Atwong’a:

Lembe ma Yehova uyero ni Israel nikadhu kud i bang’ Malaki:*

2 Yehova uwacu kumae: “Anyutho iwu mer.”

Ento wuyero kumae: “Inyutho iwa merne nenedi?”

“Nyo Esau ubino ngo umin Yakobo?” Yehova wacu. “Ento amaru Yakobo, 3 man adagu Esau; aketho gudi pare udong’ ni uvuru man aweko giralaga pare ni utho mi langa.”

4 “Kadok nwang’u Edom uwacu kumae: ‘Jurungowa nziki nziki ento wabidwogo man wabigiero uvurune kendo,’ Yehova mir udul uwacu kumae: ‘Gibigiere, ento an abirwombe cen man jubilwong’ogi nia, “ng’om mi racu” man “dhanu ma Yehova upoko lembe i wigi rac rondo ku rondo.” 5 Wubineno lembene ku weng’wu man wubiwacu kumae: “Dong’ jupak Yehova i ng’om mir Israel.”’”

6 ‘“Wod yungo won man jatic yungo rwoth pare. Pieno tekene atie wego, yung m’uromo kuda ni kani? Man tekene atie Rwoth,* lworo* m’uromo kuda ni kani?’ Yehova mir udul uwacu iwu wu julam ma wubecayu nyinga.

‘“Ento wuwacu kumae: “Wacayu nyingine nenedi?”’

7 “‘Nikum cam* m’ucido ma wubekelo iwi pemlam para.’

“‘Man wuyero kumae: “Wacidi nenedi?”’

“‘Nikum lembe ma wuyero kumae: “Meza pa Yehova utie gin m’uromo jucay.” 8 Man kinde ma wubekelo ley m’abinga pi nithiere ni lam, wuwacu kumae: “Tie rac ungo.” Man kinde ma wubekelo ley m’abala kunoke m’uremo, wuwacu kumae: “Tie rac ungo.”’”

“Akwayuwu, wukepim niterogi ni jabim mwu. Nyo anyong’a binege i kumwu kunoke ebijolowu ku bero?” Yehova mir udul uwacu.

9 “Man kawoni akwayuwu, wukway Mungu nia enyuth iwa bero. Ku girathiera ma kumeno m’i cingwu giwu, nyo ebijolo ng’atu moko acel de m’i kindwu ku bero?” Yehova mir udul uwacu.

10 “Man ng’a m’i kindwu ma tie ayika niciko dhugola?* Kum m’umbe cul wubikudho ngo kadok mac iwi pemlam para. Anyong’a nega ngo i kumwu,” Yehova mir udul uwacu, “man anyong’a nega ngo nyanok de i kum giramiya m’athiera moko ci m’i cingwu.”

11 “Kum niai kaka ma ceng’ wok i iye nitundo kaka m’emwony i iye,* nyinga bibedo dwong’ i kind thek. Jubiketho yiro mi lam uduny i kabedo ceke man jubithiero girathiera ni nyinga calu giramiya ma leng’; pilembe nyinga bibedo dwong’ i kind thek,” Yehova mir udul uwacu.

12 “Ento wubecide* ma wubeyero ko kumae: ‘Meza pa Yehova ucido, man lam m’i wiye ku cam m’i wiye tie gin m’uromo jucay.’ 13 Wubeyero bende kumae: ‘Nen! etie gin ma olojo maa!’ man wubekudho ku cac yor i bang’e,” Yehova mir udul uwacu. “Man wubekelo ley ma jukwalu, m’abala man m’uremo. Eyo, wubekelo gin ma kumeno ni giramiya! Nyo acikara nijole kud i cingwu?” Yehova wacu.

14 “Kwong’ iwi won abombi m’utie ku ley ma leng’ i dwol pare, ento etimo lembang’ola ma ku kwong’ man ethiero ley ma mulima n’i kume ni Yehova. Kum atie Ubimo ma dit,” Yehova mir udul uwacu, “man nyinga bibedo ni gin ma ng’oyo ndiri i kind thek.”

2 “Man kawoni, Ee julam, cik maeni tie piwu. 2 Tekene wukwero niwinjo man wudieng’ ungo i adundewu niyungo nyinga,” Yehova mir udul uwacu, “abioro kwong’ i wiwu man abiloko mugisa mwu bidoko ni kwong’. Eyo, aloko mugisa udoko ni kwong’ pilembe wubedieng’ ungo i kum lembene i adundewu.”

3 “Nen! piwu, abinyotho* cam ma wucoyo, man abidhenyo wey i weng’wu, wey mi foc mwu man jubiterowu i bang’ weyne.* 4 E wubing’eyo nia amiyo cik maeni iwu kara lembariba para ku Lawi umedere,” Yehova mir udul uwacu.

5 “Lembariba para kude ubino lembariba mi kwo man mi kwiyocwiny m’amiyo ire karacelo ku lworo.* Ebed elwora, eyo, ebed elworo nyinga ku lworo ma thuc. 6 Cik* mi lemandha ubino i dhoge, man koso bedopwe moko mbe m’unwang’ere i dend dhoge. Ewotho kuda i kwiyocwiny man i bedopwe man eketho ju ma dupa gilokiri cen kud i kum kosa. 7 Kum dend dhu jalam ucikere nigwoko ng’eyong’ec man dhanu gicikiri nisayu cik* niai kud i dhoge pilembe etie jakwenda pa Yehova mir udul.

8 “Ento wun giwu wukier kud i yo. Wuketho ju ma dupa gikier kud i kum cik.* Wunyotho lembariba pa Lawi,” Yehova mir udul uwacu. 9 “Pieno abiketho wubidoko ni jamcac man abijwigowu i wang’ dhanu ceke, pilembe wugwoko ngo yo para, ento wunyutho akoyakoya i tiyo ku cik.”

10 “Nyo wan ceke wegwa acel ungo? Nyo Mungu acel ungo re m’ucwiyowa? Dong’ pirang’o wabecibara ng’atuman ku wagi man ku wagi, ma wabenyotho ko lembariba pa kwaruwa? 11 Yuda ucibojo man gin moko ma judagu utimere i Israel man i Yeruzalem; pilembe Yuda ucido leng’o* pa Yehova m’emaru, man egamu nyaku pa mungu mi juwirok ni mugole. 12 Yehova bikabu ng’atu moko ci m’utimo kumeno kud i hema pa Yakobo nik’ebed ng’a,* kadok nwang’u ekelo giramiya m’athiera ni Yehova mir udul.”

13 “Man gin mange* nuti ma wubetimo m’uketho jubeumo pemlam pa Yehova ku piwang’, ku wak man ku cur, uketho ebemedere ngo niketho wiye i kum giramiya m’athiera mwu, kadi ebeneno ngo ku bero gin moko ci m’uai kud i cingwu. 14 Man wuyero kumae: ‘Pi thelembe ma kani?’ Etie pilembe Yehova utimo calu jamulembe i kindwu wuku dhaku mir aradu peri m’icibo, kadok nwang’u etie jawodhi man dhaku peri mi lembariba.* 15 Ento ng’atu moko ubino nuti m’utimo ngo kumeno pilembe ebino ku gin m’udong’ mi tipo. Man ng’atu maeno ubino sayu ang’o? Kodhi* pa Mungu. Pieno wubed ku weng’wu i kum paru* mwu man ng’atu moko m’i kindwu kud ucib dhaku mir aradu pare. 16 Kum adagu* lalu gamiri,” Yehova Mungu mir Israel uwacu, “man ng’atu ma umo bongu pare ku rop,”* Yehova mir udul uwacu. “Man wubed ku weng’wu i kum paru* mwu man wucikuru ngo nicibojo.

17 “Wuolo Yehova ku wec mwu. Ento wuwacu kumae: ‘Waole nenedi?’ Nikum lembe ma wubeyero kumae: ‘Ng’atu moko ci m’ubetimo gin ma rac tie ber i wang’ Yehova man anyong’a nege i kume,’ kadi kinde ma wuwacu kumae: ‘Mungu mi bedopwe ni kani?’”

3 “Nen! abeoro jakwenda para man ebiyiko yo i wang’a. Man rek kumeni, Rwoth mandha ma wubeyenyo bibino i hekalu pare; man jakwenda mi lembariba m’anyong’a negowu i kume bibino. Nen! andhandha ebibino,” Yehova mir udul uwacu.

2 “Ento ng’a ma biciro nindo mi bino pare man ma bicungo kinde m’enyuthere? Kum ebibedo calu mac pa jalil mola man calu sabuni pa jalwok bongu. 3 Man ebibedo calu jalil mola man jadwok mola ma tar leng’ man ebidwoko wot Lawi leng’; man ebidwokogi leng’* calu ma judwoko ko mola ma kwar man mola ma tar leng’ man andhandha gibidoko dhanu ma githiero giramiya m’athiera i bedopwe ni Yehova. 4 Man andha giramiya m’athiera mi Yuda man mi Yeruzalem binyayu anyong’a i Yehova calu i nindo ma con man calu i rundi ma con.

5 “Abicoro ceng’ini i kumi pi pokolembe man abibedo jamulembe m’ubemiyo lembatuca pio pio i kum ajoga, i kum weg abor,* i kum ju ma gikwong’o kwong’ mi vupo, i kum ju ma givuro jatic ma juculo acula, dhatho, nyathikic,* man ju ma gikwero nikonyo umondo.* Ju maeni gi ju ma gilwora ngo,” Yehova mir udul uwacu.

6 “Kum an a Yehova; alokara ngo. Man wun wu wot Yakobo; fodi wutundo ngo i ajiki mwu. 7 Niai i nindo pa kwaruwu, wulokuru cen kud i kum telowic para man wuworogi ngo. Wudwog i bang’a man abidwogo i beng’wu,” Yehova mir udul uwacu.

Ento wuwacu kumae: “Ubekwayu wadwog nenedi?”

8 “Nyo dhanu ma dhanu e bikwalu Mungu? Ento wun wubekwala.”

Man wuwacu kumae: “Wakweli nenedi?”

“I apaje* man i ajok. 9 Andhandha, kwong’ n’i wiwu* kum wubekwala, eyo, thek zoo ubetimo kumeno. 10 Wukel apaje ma boo* i dero, kara cam ubed unuti i ot para; man akwayuwu, wumul iya i lembe nini,” Yehova mir udul uwacu, “kara wunen ka nyo abiyabu ngo iwu dhu polo man aketh mugisa ucwii* i wiwu nitundo ma wubikoso ngo piny moko.”

11 “Man abijuko iwu ng’atu ma mvoro piny* man ebinyotho ngo nying cam mi ng’om mwu, kadi ulok mi podho mwu de bibedo ngo ma nyinge mbe,” Yehova mir udul uwacu.

12 “Thek ceke bilwong’owu nia wu jumutoro, kum wubidoko ng’om mir anyong’a,” Yehova mir udul uwacu.

13 “Wuweco rac dit i kuma,” Yehova wacu.

Man wuwacu kumae: “Wayero ang’o ma rac i kumi i kindwa?”

14 “Wubewacu kumae: ‘Konyne mbe nitimo ni Mungu. Wanwang’u bero ang’o nikum timo lembe m’ebekwayu i bang’wa man nikum wotho ku can i wang’ Yehova mir uduli? 15 Kawoni wabenwang’u nia dhanu ma gi weg rikini re ma gi ju mutoro. Bende ju ma gibetimo lembe ma rac re ma lembe ubewotho igi miero. Gibeng’ap niketho Mungu i amulaic man lembene uberombo igi.’”

16 I nindo maeca ju ma gilworo Yehova giweco i kindgi, ng’atuman ku jawodhe man Yehova umedere niketho wiye cuu man niwinjo. Man jukiewo buku mi poy i wang’e pi ju ma gilworo Yehova man pi ju ma giparu pi* nyinge.

17 “Man gibibedo para,” Yehova mir udul uwacu, “I nindo m’abiwodho piny ma segi* i iye. Abitimo igi kisa tap calu ma ng’atini timo kisa ni wode m’ubetimo ire. 18 Man wubineno kendo tung’ tung’ i kind won bedopwe ku jatimrac, i kind ng’atu m’ubetimo ni Mungu ku ng’atu m’ubetimo ngo ire.”

4 “Kum nen! nindo ubebino m’ubeliel calu uka, kinde ma weg rikini ceke ku ju ceke ma gitimo lembe ma reco gibidoko calu soka. Andhandha nindo m’ubebinone biwang’ugi,” Yehova mir udul uwacu, “man ebiweko ngo ulaggi kadi janggi de. 2 Ento iwu wu ju ma wubeyungo* nyinga, ceng’ mi bedopwe birieny i wiwu, ku keyokum iwi vombe* man wubipor calu nyithi dhieng’ m’ucwey.”

3 “Man wubinyono jutimrac i the tiendwu, kum gibibedo calu utur m’i the tiendwu i nindo m’abitimo lembe i iye,” Yehova mir udul uwacu.

4 “Wupoy i kum Cik pa jatic para ma Musa, i kum telowic man i kum lembapoka m’ang’olo i Horeb nia Israel ceke uwor.

5 “Nen! abeoro iwu jabila Eliya i wang’ bino mi nindo ma dit man ma ng’oyo ndiri pa Yehova. 6 Man ebiloko adunde wego udwog i bang’ wot, man adunde wot udwog i bang’ wego; kara kud abin man agoy ng’om m’anyothe ko cen.”

(Ajiki mi lok mi Lembagora mi dhu Juebrania man Aramea, m’ubelubo tie Lembagora mi Jugiriki mi Jukristu)