LEMBANYONG’A MA YOHANA UKIEWO

1 Ku kwong’a Lembe ubino nuti, man Lembe ubino karacelo ku Mungu, man Lembe ubino mungu.* 2 Ng’atu maeno ubino ku kwong’a karacelo ku Mungu. 3 Mungu utiyo kude pi nicwiyo piny ceke, man m’uweko ni kume, kadok gin moko acel de mbe m’ucwiyere.

Gin m’ucwiyere 4 ni kume ubino kwo, man kwo ubino der mi dhanu. 5 Man der uberieny i mudho, ento mudho uvoye ngo.

6 Ng’atu moko ulund ubino ma tie jaor pa Mungu; nyinge bino Yohana. 7 Ng’atu maeno ubino calu jamulembe pi nimiyo lembatuca iwi der, kara kwond dhanu ceke giyii ni kume. 8 Ebino ngo der maeno, ento ebino kara emii lembatuca iwi derne.

9 Nwang’u der mandha ma menyo kwond dhanu ceke ubecibino iwi ng’om. 10 Ebino i ng’om man Mungu utiyo kude pi nicwiyo ng’om, ento ng’om ulund ung’eye ngo. 11 Ebino i pacu ma thugi ma dhe, re dhanu pagi ma dhe gijole ngo. 12 Ento ni dhanu ceke ma giyiye, emiyo copo mi doko nyithindho pa Mungu pilembe ginyutho yiyoyic i nyinge. 13 Ginyoliri ngo ku rimo, kadi ku yeny mi kum, kadi ku yeny pa dhanu, ento ginyoliri ni kum Mungu.

14 Pieno Lembe udoko kum man ebedo i kindwa, man waneno dwong’ pare, dwong’ ma calu pa wod ma kulong’ m’uai i bang’ wego; epong’ ku bero pa Mungu* man lemandha. 15 (Yohana umiyo lembatuca i wiye, eyo, ekok kumae: “Maeni en e ng’atu m’awacu pire kumae: ‘Ng’atu m’ubebino i ng’eya ukadhu i wang’a, kum elar ebedo nuti i wang’a.’”) 16 Kum wan ceke wanwang’u kud i gin m’epong’ ko, kadok bero ma yawe mbe iwi bero ma yawe mbe. 17 Kum jumiyo Cik nikadhu kud i bang’ Musa, bero ma yawe mbe ku lemandha ke ubino nikadhu kud i bang’ Yesu Kristu. 18 Ng’atu moko mbe m’uneno Mungu kadok nyanok de; mungu ma kulong’ ma n’i ng’et Wego* re m’ukoro nia etie ng’a.

19 Maeni en e lembatuca ma Yohana umiyo kinde ma Juyahudi gioro julam ku Julawi kud i Yeruzalem pi nipenje kumae: “In i ng’a?” 20 Ekwero ngo, ento edwoko igi kamaleng’ kumae: “An a Kristu ngo.” 21 Man gipenje kumae: “Itie ng’a? Nyo itie Eliya?” Edwoko kumae: “An a en ungo.” “Itie Jabila?” Edwoko kumae: “Ungo!” 22 E giwacu ire kumae: “Dong’ itie ng’a ke? Yer iwa kara wadwok lembene ni ju m’uorowa. Ibeyero ang’o piri giri?” 23 Ewacu kumae: “An a dwand ng’atu moko m’ubekok i langa kumae: ‘Wudwok yo pa Yehova atira,’ calu ma jabila Isaya uwacu.” 24 Nwang’u Jufarisayo re m’uoro ju maeno. 25 E gipenje kumae: “Dong’ pirang’o ibemiyo batizo kan itie ngo Kristu kadi Eliya kadi Jabila?” 26 Yohana udwoko igi kumae: “An abemiyo batizo i pii. Ng’atu moko ucungo i kindwu ma wung’eye ngo; 27 etie ng’atu m’ubebino i ng’eya, ma thondh wara pare de aromo ngo nia agony.” 28 Lembe maeno utimere i Bethania loka kulo Yordan, kaka ma Yohana ubino miyo batizo i iye.

29 Urwonde eneno Yesu ubebino i bang’e, man ewacu kumae: “Nen, Nyathi rombo pa Mungu m’ubekabu dubo mi ng’om! 30 Maeni tie ng’atu m’awacu pire kumae: ‘Ng’atu moko ubebino i ng’eya m’ular ukadhu i wang’a, kum elar ebedo nuti i wang’a.’ 31 Kadok nwang’u ang’eye ngo de, re abino miyo batizo i pii kara enyuthere kamaleng’ ni Israel.” 32 Yohana umiyo bende lembatuca kumae: “Aneno tipo ubeloro calu akuru kud i polo, man ebedo i wiye. 33 Kadok nwang’u ang’eye ngo de, re Ng’atu m’uora nimiyo batizo i pii uwacu ira kumae: ‘Ng’atu m’ibineno tipo uloro man uwok ubedo i wiye, ng’atu maeno re ma miyo batizo i tipo ma leng’.’ 34 E aneno gin maeno, man amiyo lembatuca nia ng’atu maeni utie Wod Mungu.”

35 Urwonde kendo, Yohana ucungo ku julubne ario, 36 man kinde m’eneno Yesu ubewotho, ewacu kumae: “Wunen, Nyathi rombo pa Mungu!” 37 Saa ma julub ario maeno giwinjo lembe m’eyero, gigam gilubo tok Yesu. 38 E Yesu uloko wang’e man kinde m’eneno gibelubo toke, eyero igi kumae: “Wubeyenyo ang’o?” Giwacu ire kumae: “Rabi (ma ka juloke thelembene tie, “Japonji”), ibedo kani?” 39 Eyero igi kumae: “Wubin, e wubineno.” Pieno gicidho man gineno kaka m’ebedo i iye, man gibedo gikugi cing’ nica; nwang’u ubino i kum saa apar mi reto. 40 Andrea m’umin Simon Pethro ubino ng’atu acel m’i kind juario ma giwinjo lembe ma Yohana uyero man ma gilubo tok Yesu. 41 Mi kwong’o elar enwang’u Simon m’umin ma buu man ewacu ire kumae: “Wanwang’u Masiya” (ma ka juloke thelembene tie, “Kristu”), 42 man etere i bang’ Yesu. Kinde ma Yesu unene, ewacu kumae: “In i Simon ma wod Yohana; jubilwong’i Kefa” (ma ka juloke utie, “Pethro”).

43 Urwonde Yesu umito ecidh i Galilaya. Egam erombo ku Filipo man ewacu ire kumae: “Lub toka.” 44 Filipo ubino dhanu mi Bethsaida ma tie adhura ma thugi Andrea giku Pethro. 45 Filipo unwang’u Nathanael man ewacu ire kumae: “Wanwang’u ng’atu ma Musa uweco pire i Cik, man ma Jubila de gikiewo pire: En e Yesu ma wod Yosefu mi Nazarethi.” 46 Ento Nathanael uwacu ire kumae: “Nyo gin moko ma ber copo wok kud i Nazarethi?” Filipo udwoko ire kumae: “Bin inen.” 47 Yesu uneno Nathanael ubebino i bang’e man ewacu pire kumae: “Nen, Jaisrael mandha m’awondi mbe i iye.” 48 Nathanael ulund upenje kumae: “Ing’eya nenedi?” Yesu udwoko ire kumae: “Ma nwang’u fodi Filipo ulwong’i ngo, kinde m’ibino i the yend ulam, aneni.” 49 E Nathanael uwacu kumae: “Rabi, in i Wod Mungu, in i Ubimo mir Israel.” 50 Yesu udwoko ire kumae: “Iyiyo pilembe ayero iri nia aneni i the yend ulami? Ibineno lembe ma dongo ma sagu maeni.” 51 I ng’eye, Yesu uwacu ire kumae: “Andhandha abeyero iwu nia, wubineno polo uyabere man jumalaika pa Mungu gibeidho man gibeloro i bang’ Wod dhanu.”

2 I ceng’ mir adege, nwang’u foc mi nyom moko ubedo nuti i Kana mi Galilaya, man min Yesu de ubino keca. 2 Julwong’o Yesu karacelo ku julubne bende i foc mi nyomne.

3 Kinde ma pigulok udhingo thum, min Yesu uwacu ire kumae: “Gikoso pigulok.” 4 Ento Yesu uyero ire kumae: “Dhaku, lembe maeno unenowa wakudi nenedi?* Saa para fodi uromo ngo.” 5 E min uwacu ni ju m’ubetimo tic kumae: “Wutim gin ceke m’ebiyero iwu.” 6 Nwang’u agulu pii mi kidi abusiel ubino nuti keca, calu ma cik mi dwokirileng’ mi Juyahudi ukwayu; agulune acel acel romo litre pier ang’wen wi ang’wen (44) kunoke pier abusiel wi abusiel (66). 7 Yesu uwacu igi kumae: “Wupong’ agulunegi ku pii.” E gigam gipong’ogi bik. 8 I ng’eye eyero igi kumae: “Kawoni, wutwom moko man wuter i bang’ jadit mi foc.” E gitero i bang’e. 9 Kinde ma jadit mi foc ubilo pii ma dong’ ulokere udoko ni pigulok, m’eng’eyo ngo kaka m’eai i iye (ento jutic m’utwomo piine ging’eyo), egam elwong’o cwar mugole* 10 man ewacu ire kumae: “Dhanu ceke gikegilar gikelo pigulok ma mit ma kwong’a, man ka dhanu udaru mer, ka gikelo ma mit m’uromo. In ilund igwoko pigulok ma mit nitundo kawoni!” 11 Yesu utimo gin maeni i Kana mi Galilaya; ebino udu pare ma kwong’a, man eketho dwong’ pare ung’eyere, e julubne giyiye.

12 I ng’ei lembe maeno, en karacelo ku min, kud umego pare man julubne giloro i Kapernaum, ento gibedo ngo kuca nindo ma dupa.

13 Nwang’u Kadhukuwijo mi Juyahudi udhingo, man Yesu uidho i Yeruzalem. 14 Ewok enwang’u ju m’ubelworo dhieng’, rombe, man akuru i hekalu, man bende ju m’ubewilo sente ma gibedo i kabedo migi. 15 Pieno eyiko del mi thol, man eriemo ju ma gitie ku rombe ku dhieng’ kud i hekalu, eoyo tongolo mi ju m’ubewilo sente man eredho meza migi. 16 Elund ewacu ni ju m’ubelworo akuru kumae: “Wuting’ gin maeni cen ku keni! Wuwek nidwoko ot pa Vwa ni ot mi kuloka!”* 17 Julubne gilund gipoy nia Lembagora uwacu kumae: “Amora m’atie ko pi ot peri biliel i iya.”

18 Juyahudi giwacu ire kumae: “Giranyutha ang’o m’ibetimo iwa, m’ubenyutho nia itie ku twero mi timo gin maeni?” 19 Yesu udwoko igi kumae: “Wurwomb hekalu maeni, man pi ceng’ adek abiting’e malu.” 20 Juyahudi gilund giwacu kumae: “Jugiero hekalu maeni pi oro pier ang’wen wi abusiel (46), in lundo ibiting’e pi ceng’ adeki?” 21 Ento hekalu m’ebino weco pire ubino kume. 22 Kinde m’ecer kud i kind ju m’utho, julubne gipoy nia ebed ewacu lembe maeno, e giyiyo lembagora ku gin ma Yesu ugam uwacu.

23 Ento kinde m’ebino i foc mi Kadhukuwijo i Yeruzalem, dhanu dupa gibedo ku yiyoyic i nyinge kinde ma gineno giranyutha m’ebetimo. 24 Re Yesu uketho ngo genogen pare i wigi pilembe eng’eyogi ceke, 25 man pilembe ebino mbe ku yeny ma nia ng’atu moko umii lembatuca iwi dhanu, kum egam eng’eyo lembe ma n’i adunde dhanu.

3 Ng’atu moko ubino nuti i kind Jufarisayo ma nyinge Nikodem, nwang’u e jatelwic mi Juyahudi. 2 Ng’atu maeno ubino i bang’ Yesu ku diewor man ewacu ire kumae: “Rabi, wang’eyo nia itie japonji m’uai i bang’ Mungu, kum ng’atu moko mbe ma copo timo udu maeni m’ibetimo ka Mungu mbe kude.” 3 Yesu udwoko ire kumae: “Andhandha abeyero iri nia, ka ng’atini unyolere ngo kendo,* ecopo neno Ker pa Mungu ngo.” 4 Nikodem upenje kumae: “Ng’atini copo nyolere kendo nenedi kan edaru tii? Nyo ecopo mondo i min wang’ mir arionde man enyolere kendo?” 5 Yesu udwoko kumae: “Andhandha abeyero iri nia, ka ng’atini unyolere ngo ku pii man ku tipo de, ecopo mondo ngo i Ker pa Mungu. 6 Gin m’unyolere ku kum en e kum, man gin m’unyolere ku tipo en e tipo. 7 Kud izungi pilembe ayero iri nia wucikuru ninyoluru kendo. 8 Yamu koto kaka m’emito man iwinjo dwande, ento ing’eyo ngo nia eai kani man ebecidho kani. Etie kumeno bende ni dhanu ceke m’unyolere ku tipo.”

9 Nikodem ulund upenje kumae: “Lembe maeno copere nenedi?” 10 Yesu udwoko kumae: “Itie japonjo mir Israel re fodi ing’eyo ngo gin maeni? 11 Andhandha abewacu iri nia, wabeyero pi gin ma wang’eyo man wabemiyo lembatuca pi gin ma waneno, ento wun wubejolo ngo lembatuca ma wabemiyo. 12 Ka fodi ayero iwu pi gin mi ng’om de wubeyiyo ngo, dong’ wubiyiyo nenedi kan ayero iwu pi gin mi polo? 13 Bende, ng’atu moko mbe m’uidho i polo, ndhu ng’atu m’uloro kud i polo, ma en e Wod dhanu. 14 Man tap calu ma Musa uting’o thwol malu i langa, kumeno bende jubiting’o Wod dhanu malu, 15 kara ng’atu moko ci ma tek uyiye unwang’ kwo ma rondo ku rondo.

16 “Kum Mungu umaru ng’om lee mandha uketho emiyo Wode ma kulong’, kara kubang’ dhanu ceke ma tek ubenyutho yiyoyic i iye kud unyothere, ento enwang’ kwo ma rondo ku rondo. 17 Kum Mungu uoro ngo Wode i ng’om kara epok lembe iwi ng’om, ento kara ng’om uboth ni kume. 18 Ng’atu ma tek unyutho yiyoyic i iye, jubipoko ngo lembe i wiye. Ng’atu ma tek unyutho ngo yiyoyic ke, judaru poko lembe pare, kum enyutho ngo yiyoyic i nying’ Wod Mungu ma kulong’. 19 Maeni en e ukungu mi pokolembe: Nia der ubino i ng’om, ento dhanu gimaru migi mudho kakare nimaru der, kum tic migi ubino reco. 20 Kum ng’atu m’ubetimo lembe ma reco nwang’u edagu der, man ebino ngo i bang’ der, maru tic pare binyuthere kamaleng’.* 21 Ento ng’atu m’ubetimo lembe m’atira, ebino i bang’ der, kara tic pare ginyuthiri nia gitimiri calku yeny pa Mungu.”

22 I ng’ei gin maeno, Yesu ku julubne gicidho i ng’om kiaru mi Yudea; ewok etimo saa moko kuca karacelo kugi man ebino miyo batizo. 23 Ento Yohana bende ubino miyo batizo i Ainon ceng’ini ku Salim, pilembe pii ubino lee dit kuca, dhanu de uwotho bino man gilimo batizo; 24 kum nwang’u fodi jubolo ngo Yohana i kol.

25 Julub pa Yohana gigam giloko dhoggi ku Jayahudi moko iwi dwokirileng’. 26 Pieno gibino i bang’ Yohana man giwacu ire kumae: “Rabi, ng’atu ma wubino wukude loka kulo Yordan, m’igam imiyo lembatuca pire ca, nen ng’atune ubemiyo batizo man dhanu ceke ubecidho i bang’e.” 27 Yohana udwoko kumae: “Ng’atini copo nwang’u ngo kadok gin acel de ka jumiye ngo ire kud i polo. 28 Wun giwu wumiyo lembatuca nia ayero kumae: ‘An a Kristu ngo, ento juora i wang’ ng’atu maeno.’ 29 Ng’atu m’utie ku mugole* en e cwar mugole. Ento kinde ma jarimb cwar mugole ucungo man ewinje, ebedo kud anyong’a ma lee pi dwand cwar mugole. Pieno anyong’a para upong’. 30 Ng’atu maeno ucikere nimedere, ento an acikara nijwik.”

31 Ng’atu m’uai malu en’i wi jumange ceke. Ng’atu mi ng’om, en e mi ng’om, man eweco de pi piny mi ng’om. Ng’atu m’uai i polo en’i wi jumange ceke. 32 Ebemiyo lembatuca pi gin m’eneno man m’ewinjo, ento ng’atu moko mbe m’ubeyiyo lembatuca pare. 33 Ng’atu m’ujolo lembatuca pare, eyiyo kud adundene ceke* nia Mungu en e mandha. 34 Kum ng’atu ma Mungu uoro yero lembe pa Mungu, pilembe Mungu miyo ngo tipo pare ku mutwi.* 35 Wego umaru Wod man emiyo piny ceke i cinge. 36 Ng’atu m’unyutho yiyoyic i Wod, etie ku kwo ma rondo ku rondo; ng’atu m’uworo ngo Wod bineno ngo kwo, ento kwinyo pa Mungu bibedo i wiye.

4 Kinde ma Rwoth ung’eyo nia Jufarisayo giwinjo nia ebeketho* dhanu dupa udok julub, man ebemiyo batizo ni dhanu dupa nisagu Yohana, 2 kadok nwang’u Yesu en gire emiyo ngo batizo ento julubne re ma gimiyo, 3 eai kud i Yudea man ecidho kendo i Galilaya. 4 Ento ugam ukwayu eng’ol kud i Samaria. 5 Pieno etundo i adhura mi Samaria ma julwong’o Sukar, ceng’ini ku podho ma Yakobo umiyo ni wode ma Yosefu. 6 Nwang’u pii ma Yakobo utong’o ubino nuti keca. E calu ma woth uolo Yesu, ewok ebedo i dhu pii m’atong’ane.* Ubino i kum saa abusiel mi dieceng’.

7 E dhaku moko mi Samaria ubino pi nitwomo pii. Yesu ugam uwacu ire kumae: “Mii ira pii amadhi.” 8 (Kum nwang’u julubne gicidho i adhura ning’iewo cam.) 9 Pieno dha Samariane uwacu ire kumae: “Nenedi in m’i Jayahudi ibekwayu pii m’amadha i bang’a, ma an ke a dha Samaria e?” (Kum Juyahudi gidikiri ngo ku Jusamaria.) 10 Yesu udwoko ire kumae: “Ka nwang’u ing’eyo pi giramiya mi mananu pa Mungu man ng’atu m’ubewacu iri nia, ‘mii ira pii amadhi,’ nwang’u ikwaye man emiyo iri pii mi kwo.” 11 Dhaku maeno uyero ni Yesu kumae: “Rwoth, ndoy mi twomo pii de imbe ko, man vur pii bende utie thuc. Dong’ ibinwang’u pii mi kwo maeno kani? 12 Nyo itie dit nisagu kwaruwa ma Yakobo m’umiyo iwa pii m’atong’a, man en karacelo ku wote man lim pare de gimadhu pige?” 13 Yesu udwoko ire kumae: “Ng’atu moko ci m’umadhu pii maeni, rieu binege kendo. 14 Ng’atu m’umadhu pii m’abimiyo ire, rieu binege ngo nyanok de, ento pii m’abimiyo ire bidoko ni kulo mi pii m’ubedhenyini i iye, ma miyo kwo ma rondo ku rondo.” 15 Dhakune uwacu ire kumae: “Rwoth, mii ira pii maeno, kara rieu kud unega man kud abed abin keni nitwomo pii.”

16 Yesu uyero ire kumae: “Cidh ilwong’ cweri man wubin kude keni.” 17 Dhaku maeno udwoko kumae: “Cwara mbe.” Yesu ulund uwacu ire kumae: “Iyero kakare nia, ‘cwara mbe.’ 18 Kum ibino ku co abic, man ng’atu m’itie kude kawoni de utie cweri ngo. Eno re iyero lemandha.” 19 Dhakune uyero ire kumae: “Rwoth, abeneno nia itie jabila. 20 Kwaruwa gitimo thier* ni Mungu iwi got maeni, ento wun wubewacu nia Yeruzalem re m’utie kaka ma jucikiri nitimo thier i iye.” 21 Yesu ulund uwacu ire kumae: “Yii lembe para dhaku, saa ubebino ma wubitimo ngo thier* ni Wego kadok iwi got maeni, kadi i Yeruzalem. 22 Wubetimo thier* ni gin ma wung’eyo ngo; wan re wabetimo thier ni gin ma wang’eyo, pilembe both ucaku ku Juyahudi. 23 Ento saa ubebino man etie kawoni, ma jutim thier* mandha gibitimo thier* ni Wego ku tipo man lemandha, kum Wego ubeyenyo de kit dhanu ma kumeno pi nitimo ire thier. 24 Mungu en e tipo, man ju ma gibetimo ire thier* gicikiri nitimo ire thier ku tipo man lemandha.” 25 Dhakune uwacu ire kumae: “Ang’eyo nia Masiya ubebino, en ma julwong’e Kristu. Ka ng’atu maeno bibino, ebiyero iwa lembe ceke kamaleng’.” 26 Yesu uyero ire kumae: “An a en m’abeweco kudi e.”

27 E tap i saa maeno, julubne gitundo man gizungo pilembe ebeweco ku ng’atu ma dhaku. Re ng’atu moko mbe m’uwacu kumae: “Ibeyenyo ang’o?” Kunoke “pirang’o ibeweco kude?” 28 E dhakune uweko agulu pii pare, ecidho i adhura man eyero ni dhanu kumae: 29 “Wubin wunen ng’atu moko m’uyero ira gin ceke m’atimo. Nyo eni copo bedo Kristu ngo?” 30 E giai kud i adhura man gicaku bino i bang’e.

31 I saa maeno, nwang’u julubne giberere kumae: “Rabi, kecam.” 32 Ento ewacu igi kumae: “Cam para dong’ unuti ma wung’eyo pire ngo.” 33 Pieno julub giweco i kindgi kumae: “Nyo ng’atu moko ukelo ire cami?” 34 Yesu uyero igi kumae: “Cam para utie nitimo yeny pa Ng’atu m’uora man nidaru tic pare. 35 Wubewacu ngo nia fodi dwi udong’ ang’wen ka saa mi kayucam biromo? Nen! Abeyero iwu nia, wuting’ weng’wu man wunen podho; nia gidaru bogiri pir akaya. Dong’ 36 jakay cam ubenwang’u cul man ebecoko dhu cam pi kwo ma rondo ku rondo, kara ng’atu m’ucoyo ku ng’atu m’ubekayu, anyong’a uneggi karacelo. 37 Kum i lembe maeni wec ma e utie andha: Ng’atu acel utie jacoy kodhi, ng’atu ma kucelo ke jakay cam. 38 Aorowu nikayu gin ma wumuluru ngo ku tije; jumange re gimuliri ku tic man wun wunwang’u bero mi tic mi muliri migi.”

39 Jusamaria ma dupa ma giai kud i adhura maeno giyiye ni kum wec pa dhaku m’umiyo lembatuca kumae: “Eyero ira gin ceke m’atimo.” 40 Pieno kinde ma Jusamaria gitundo i bang’ Yesu, gikwaye nia ebed karacelo kugi, e ebedo keca bang’ ario. 41 Eno uketho dhanu dupa mandha giyiyo ni kum lembe m’eyero, 42 man giwacu ni dhakune kumae: “Kawoni dong’ wayiyo ni kum lembe m’iyero kende ngo; kum wan giwa wawinjo man wang’eyo nia ng’atu maeni utie andha jalar mi ng’om.”

43 I ng’ei nindo ario, eai ku keca ecidho i Galilaya. 44 Ento Yesu en gire de elar emiyo lembatuca nia jabila umbe ku yung i ng’om ma thugi. 45 Pieno kinde m’etundo i Galilaya, Jugalilaya gijole, kum gineno gin ceke m’etimo i Yeruzalem i foc, pilembe gin de gigam gicidho i focne.

46 I ng’eye, ecidho kendo i Kana mi Galilaya, kaka m’egam eloko i iye pii udoko ni pigulok. Nwang’u wod jatic moko mi kal p’ubimo ubino remo i Kapernaum. 47 Kinde ma ng’atu maeno uwinjo nia Yesu uai i Yudea ebino i Galilaya, ecidho i bang’e man ekwaye elor man ekey kum wode, kum nwang’u wodene udhingo tho. 48 Ento Yesu uwacu ire kumae: “Ka fodi wuneno ngo udu ku musana, wubiyiyo ki ngo.” 49 Jatic mi kal p’ubimo uwacu ire kumae: “Rwoth, lor ma fodi nyathin para ma nok utho ngo.” 50 Yesu uyero ire kumae: “Dok i pacu peri; wodi ubedo kwo.” Ng’atune uyiyo lembe ma Yesu uyero ire, e ecidho. 51 Ento kinde ma fodi en’i yo ebedok, jutic pare gibin girombo kude man giwacu ire nia wode ubedo kwo.* 52 E epenjogi nia kume ukey saa ma kani. Gidwoko ire kumae: “Malaria* uweke nyaworo i kum saa abiro mi dieceng’.” 53 E won nyathin ne unyang’ nia ubino tap i saa maeno re ma Yesu uwacu ire kumae: “Wodi ubedo kwo.” Pieno en ku juruot pare ceke gigam giyiyo. 54 Eno ubino udu mir ario ma Yesu utimo kinde m’eai i Yudea ebino i Galilaya.

5 I ng’ei lembe maeno, foc moko mi Juyahudi ubedo nuti, e Yesu uidho i Yeruzalem. 2 Nwang’u kut moko mi pii de ubedo nuti i Yeruzalem i Dhugola mi rombe ma julwong’o ku dhu Juebrania, Bethzatha;* ebino ku pond ot abic ma jutielo ku mbegi. 3 Udul dhanu ma dit ma giberemo, ma wang’gi tho, ma weg abala, man ma watkumgi moko utal* givuto i the pond ot maeno. 4 —— 5 Ento ng’atu moko ubino nuti keca m’utwoyo pi oro pier adek wi abora (38). 6 Kinde ma Yesu uneno ng’atu maeno uvuto keca, man enyang’ nia edaru twoyo pi nindo ma lee, ewacu ire kumae: “Nyo ibemito kumi ukeyi?” 7 Jaratwoyone udwoko ire kumae: “Rwoth, ng’atu moko mbe ma romo roya i kut saa ma pii ubedhenyini; ento kinde m’abecidho, ng’atu mange lar loro i wang’a.” 8 Yesu uyero ire kumae: “Ai malu! Ting’ kavuto peri man iwothi.” 9 E ndhundhu kum ng’atune ukey man eting’o kavuto pare, ecaku wotho.

Nindo maeno ubino ceng’ Sabatu. 10 Juyahudi gilund gicaku yero ni ng’atu ma kume ukeyne kumae: “Eni utie ceng’ Sabatu, man cik uyiyo ngo nia iting’ kavuto.” 11 Ento edwoko igi kumae: “Ng’atu m’ukeyo kuma re m’uwacu ira kumae: ‘Ting’ kavuto peri man iwothi.’” 12 Gipenje kumae: “Ng’atu m’uyero iri nia, ‘ting’ kavuto peri man iwothine tie ng’a’?” 13 Ento ng’atu ma jukeyo kumene ung’eyo ngo nia Yesu tie ng’a, kum nwang’u erwinyo i kind udul dhanu ma ni keca.

14 I ng’ei lembe maeno, Yesu unwang’e i hekalu man ewacu ire kumae: “Nen, kumi udaru key. Dong’ kud idub kendo kara lembe ma rac m’usagu kud unweng’i.” 15 E ng’atune ucidho man eyero ni Juyahudi nia Yesu re m’ukeyo kume. 16 Pi thelembe maeno re ma Juyahudi gibino nyayu ragedo i kum Yesu, pilembe ebino timo gin maeni i ceng’ Sabatu. 17 Ento Yesu udwoko igi kumae: “Vwa ubemedere nitimo tic nitundo kawoni, man an de abemedara nitimo tic.” 18 Eno re m’uketho Juyahudi gicaku yenyo lee dit nia ginege, pilembe eturo cik mi Sabatu kende ngo, ento elwong’o bende Mungu nia Won ma buu, m’ebekethere ko gire rom ku Mungu.

19 Pieno, Yesu udwoko igi kumae: “Andhandha abeyero iwu nia, Wod copo timo ngo kadok gin acel de ku paru pare gire, ento etimo ndhu gin m’eneno Wego ubetimo. Kum gin ma tek Wego ubetimo, Wod de timo kumeca. 20 Kum Wego umaru Wod man enyutho ire gin ceke ma en gire ebetimo, man ebinyutho ire tic ma dongo m’usagu maeno kara iwu uwang’ lii. 21 Kum calu ma Wego cero ju m’utho man emiyo igi kwo, Wod bende miyo kwo ni ng’atu ma iye yenyo. 22 Kum Wego poko ngo lembe iwi ng’atu moko acel de, ento edaru miyo tic mi poko lembe ceke i cing’ Wod, 23 kara dhanu ceke uyung Wod calu ma giyungo Wego. Ng’atu m’uyungo ngo Wod, nwang’u eyungo ngo Wego m’uore. 24 Andhandha abeyero iwu nia, ng’atu m’uwinjo lembe para man uyiyo Ng’atu m’uora, etie ku kwo ma rondo ku rondo, man jubipoko ngo lembe i wiye,* ento edaru kadhu kud i tho emondo i kwo.

25 “Andhandha abeyero iwu nia, saa ubebino man etie kawoni, ma ju m’utho gibiwinjo i iye dwand Wod Mungu, man ju ma giwinjo man giworo gibikwo. 26 Kum calu ma Wego utie ku copo mi miyo kwo,* emiyo copo mi miyo kwo ni Wod bende. 27 Man emiyo ire dito mi poko lembe, kum etie Wod dhanu. 28 Iwu kud uwang’ i kum lembe maeni, kum saa ubebino ma dhanu ceke ma gin’i kabuli* gibiwinjo dwande 29 man gibiwok woko, ju m’utimo lembe ma beco ni cer mi kwo, ju m’utimo lembe ma reco ke ni cer mi pokolembe. 30 Acopo timo ngo kadok gin acel de ku paru para gira. Apoko lembe calu m’awinjo man pokolembe para en e pwe, pilembe abesayu ngo yeny para gira, ento yeny pa Ng’atu m’uora.

31 “Ka an kenda re m’abemiyo lembatuca i wiya gira, nwang’u lembatuca para en e mandha ngo. 32 Ng’atu mange nuti m’ubemiyo lembatuca i wiya, man ang’eyo nia lembatuca m’ebemiyo i wiya utie mandha. 33 Wuoro dhanu i bang’ Yohana, man emiyo lembatuca iwi lemandha. 34 Kadok kumeno de, an ayiyo ngo lembatuca m’uai i bang’ dhanu, ento abeyero lembe maeni kara wubothi. 35 Ng’atu maeno ubino calu thala m’ubeliel man uberieny, man pi nindo ma nok wubino ayika nibedo kud anyong’a ma lee i der pare. 36 Ento atie ku lembatuca ma dit nisagu pa Yohana, kum tic ma Vwa umiyo nia atim, ma de abetimo, re m’ubemiyo lembatuca nia Wego uora. 37 Man Wego m’uora en gire re m’emiyo lembatuca i wiya. Wuwinjo ngo dwande kadi wang’ acel de man ayine de wuneno ngo, 38 lembe pare de ubedo ngo i iwu, pilembe wuyiyo ngo ng’atu m’eoro.

39 “Wubeng’iyo i Lembagora pilembe wubeparu nia wubinwang’u kwo ma rondo ku rondo ni kume; ma ke Lembagorane re m’ubemiyo lembatuca i wiya. 40 Re wulund wumito ngo wubin i bang’a kara wunwang’ kwo. 41 An ayiyo ngo yung m’uai i bang’ dhanu, 42 ento ang’eyo ma ber nia wumbe ku mer pa Mungu i iwu. 43 Abino ku nying’ Vwa, ento wujola ngo. Ka nwang’u ng’atu mange ubino ku nyinge gire, nwang’u wulund jole. 44 Wucopo yiyo nenedi ma ng’atuman ubejolo yung m’uai i bang’ wadi, man wubeyenyo ngo yung m’uai i bang’ Mungu ma en acel kende? 45 Kud wupar nia abidotowu ni Wego; ng’atu acel unuti m’ubedotowu, en e Musa ma wuketho genogen mwu i wiye. 46 I andha, ka nwang’u wuyiyo Musa, nwang’u wucopo yiyo an de, kum ekiewo pira. 47 Ento ka wuyiyo ngo lembe m’ekiewo, dong’ wubiyiyo lembe m’abeyero ke nenedi?”

6 I ng’ei lembe maeno, Yesu ukadhu loka nam Galilaya ma julwong’o bende nam Tiberia. 2 E udul dhanu ma lee gilubo toke pilembe gineno udu m’ebino timo m’ekeyo ko kum jurutwoyo. 3 Pieno Yesu uidho iwi got man ewok ebedo kuca ku julubne. 4 Nwang’u Kadhukuwijo ma tie foc mi Juyahudi udhingo. 5 Kinde ma Yesu uting’o wang’e man eneno udul dhanu ma lee ubebino i bang’e, eyero ni Filipo kumae: “Wabing’iewo mukathi kani ma dhanu maeni bicamu?” 6 Ento Yesu uyero lembe maeni pi nimulo i Filipo, kum eng’eyo gin ma nwang’u ebecitimo. 7 Filipo udwoko ire kumae: “Mukathi mi denari dak ario (200) de copo romo ngo, kadok nwang’u jung’wenyo thindho thindho ni ng’atuman m’i kindgi.” 8 Andrea m’umin Simon Pethro ma tie ng’atu acel m’i kind julubne uwacu ire kumae: 9 “Nyathi jalawobi moko ni e ma tie ku mukathi abic mi nganu man rec ario ma thindho. Eni ke biromo tho dhanu ma rukeni nenedi?”

10 Yesu uwacu kumae: “Wuketh dhanu ubed i ng’om.” Calu ma lum ubino lee keca, dhanu ugam ubedo; wend jumaco ubino ma romo elufu abic (5 000). 11 Yesu ugam uting’o mukathi man kinde m’edwoko foyofoc, epoke ni ju m’ubedo kakeca; etimo kumeno ku nyithi rec bende, e ginwang’u i mukero m’uromogi. 12 Ento kinde ma gicamu giyeng’, Yesu uyero ni julubne kumae: “Wucok nyithi dunde m’udong’ kara moko kud unyothere.” 13 E gicoko dhoge karacelo, man nyithi dunde m’udong’ ma ju m’ucamu mukathi abic mi nganu giweko, upong’o katoko apar ario (12).

14 Kinde ma dhanu gineno udu ma Yesu utimo, gicaku wacu kumae: “Andha eni tie jabila ma nwang’u ubebino iwi ng’om.” 15 I ng’eye, kinde ma Yesu ung’eyo nia gibemito bino nimake kara gikethe ni ubimo, eai kendo man ecidho iwi got en kende.

16 Saa ma piny unyutho, julubne giloro i dhu nam, 17 e giidho i yei man gicoko woth pi nikadhu loka i Kapernaum. Saa maeno nwang’u dong’ piny ucido, man fodi Yesu utundo ngo i bang’gi. 18 Nam bende ucaku tuk ni kum yamu ma tek m’ubekoto. 19 Ento kinde ma gikiewo yei ma romo kilometre abic kunoke abusiel, gineno Yesu ubewotho ku wi nam man edhingo tundo i bang’ yei, e lworo ugam umakugi. 20 Ento eyero igi kumae: “Tie an; lworo kud unegwu!” 21 Gimito giyeye i yei, e ndhundhu yei utundo i ng’om kaka ma gibecidho i iye.

22 Urwonde udul dhanu m’udong’ i dhu wat ma loka gineno nia yei mange mbe m’udong’ kakeca m’uweko yei moko ma nyanok, man Yesu de uidho ngo yei karacelo ku julubne, ento julubne gicidho gin kendgi. 23 Re yei m’uai i Tiberia utundo ceng’ini ku kaka ma gicamu mukathi i iye kinde ma Rwoth udwoko foyofoc. 24 E saa ma udul dhanu gineno nia kadok Yesu kadi julubne de gimbe kakeca, giidho yei migi man gicidho i Kapernaum pi nicisayu Yesu.

25 Kinde ma ginwang’e yo loka nam, gipenje kumae: “Rabi, itundo keni awene?” 26 Yesu udwoko igi kumae: “Andhandha abeyero iwu nia, wubeyenya ngo pilembe wuneno udu, ento pilembe wucamu mukathi man wuyeng’. 27 Kud wutim tic pi cam ma nyothere, ento wutim pi cam ma bedo pi kwo ma rondo ku rondo ma Wod dhanu bimiyo iwu, pilembe Wego ma en e Mungu udaru ketho en gire ayi i kum ng’atu maeni, m’ubenyutho nia eyiye.

28 Pieno gipenje kumae: “Wacikara nitimo ang’o kara watim tic pa Mungu?” 29 Yesu udwoko igi kumae: “Maeni en e tic pa Mungu, nia wunyuth yiyoyic i ng’atu m’eoro.” 30 E giwacu ire kumae: “Ibitimo udu ma kani, kara wanen man wayii? Ibitimo tijang’o? 31 Kwaruwa gicamu mana i langa, calu ma Lembagora uyero kumae: ‘Emiyo igi mukathi kud i polo kara gicam.’” 32 I ng’eye, Yesu uwacu igi kumae: “Andhandha abeyero iwu nia, Musa umiyo ngo iwu mukathi m’uai i polo, ento Vwa re m’ubemiyo iwu mukathi mandha m’uai i polo. 33 Kum mukathi pa Mungu utie ng’atu m’uloro kud i polo man m’ubemiyo kwo ni ng’om.” 34 E giwacu ire kumae: “Rwoth, bed imii iwa mukathi maeno nja.”

35 Yesu ulund uyero igi kumae: “An a mukathi mi kwo. Ng’atu ma tek ubino i bang’a, kec binege ngo nyanok de, man ng’atu ma tek unyutho yiyoyic i iya, rieu binege ngo nyanok de. 36 Ento calu m’adaru wacu iwu, kadok wudaru nena re fodi wuyiyo ngo. 37 Dhanu ceke ma Wego umiyo ira gibibino i bang’a, man ng’atu m’ubino i bang’a abirieme ki ngo; 38 kum aloro kud i polo nitimo ngo yeny para gira, ento yeny pa Ng’atu m’uora. 39 Maeni en e yeny pa Ng’atu m’uora, nia kud arwiny ng’atu acel de kud i kind ju ceke m’emiyo ira, ento nia aketh gicer i nindo ma tokcen. 40 Kum maeni en e yeny pa Vwa, nia ng’atu moko ci m’uyiyo Wod man m’unyutho yiyoyic i iye unwang’ kwo ma rondo ku rondo, man abiketho ebicer i nindo ma tokcen.”

41 E Juyahudi gicaku ng’ur i kume pilembe eyero kumae: “An a mukathi m’uloro kud i polo.” 42 Man gicaku wacu kumae: “Eni tie ngo Yesu ma wod Yosefu, ma won giku min de wang’eyo e? Dong’ nenedi kawoni elund eyero nia, ‘aloro kud i polo’?” 43 Yesu ulund uwacu igi kumae: “Wuwek ning’ur i kindwu giwu. 44 Ng’atu moko mbe ma copo bino i bang’a ka Wego m’uora utele en ungo, man abiketho ebicer i nindo ma tokcen. 45 Jubila gikiewo kumae: ‘Yehova biponjo gin ceke.’ Ng’atu moko ci m’uwinjo Wego man m’uponjo lembe i bang’e bino i bang’a. 46 Eno nyutho ngo nia ng’atu moko uneno Wego; ng’atu acel kende m’uneno Wego, utie ng’atu m’uai i bang’ Mungu. 47 Andhandha abeyero iwu nia, ng’atu m’uyiyo etie ku kwo ma rondo ku rondo.

48 “An a mukathi mi kwo. 49 Kwaruwu gicamu mana i langa re asu githo. 50 Maeni en e mukathi m’uloro kud i polo, kara ng’atu moko ci ucame man kud etho. 51 An a mukathi ma kwo m’uloro kud i polo. Tek ng’atu moko ucamu mukathi maeni, ebikwo rondo ku rondo; man andha mukathi m’abimiyo utie ring’kuma pi kwo mi ng’om.”

52 I ng’eye Juyahudi gicaku loko dhoggi i kindgi kumae: “Ng’atu maeni copo miyo ring’kume wacam nenedi?” 53 Yesu ulund uwacu igi kumae: “Andhandha abeyero iwu nia, ka wucamu ngo ring’kum Wod dhanu man wumadhu ngo rimbe, wumbe ku kwo i iwu giwu. 54 Ng’atu m’ucamu ring’kuma man m’umadhu rimba etie ku kwo ma rondo ku rondo, man abiketho ebicer i nindo ma tokcen; 55 kum ring’kuma en e cam mandha man rimba en e giramadha mandha. 56 Ng’atu m’ucamu ring’kuma man m’umadhu rimba bedo i acel kuda, man an de abedo i acel kude. 57 Calu ma Wego ma kwo uora man abekwo ni kum Wego, kumeno bende ng’atu m’ucama bibedo kwo ni kuma. 58 Maeni en e mukathi m’uloro kud i polo. Etie ngo calu ma kwaruwu gicamu re gilund githo. Ng’atu m’ucamu mukathi maeni bikwo rondo ku rondo.” 59 Eyero gin maeni saa m’ebino ponjo i sinagog* i Kapernaum.

60 Kinde ma julubne ma dupa giwinjo lembe maeni, giwacu kumae: “Wec maeni kierojo, ng’a ma copo winje?” 61 Ento calu ma Yesu ung’eyo yor i iye gire nia julubne gibeng’ur i kum lembe maeni, ewacu igi kumae: “Nyo lembe maeni uketho wukieri? 62 Dong’ ebibedo nenedi ka wubineno Wod dhanu ubeidho kaka m’elar ebino i iye i wang’e ke? 63 Tipo re ma miyo kwo; ring’kum konyne mbe nyanok de. Lembe m’adaru yero iwu, gi tipo man gi kwo bende. 64 Ento jumoko m’i kindwu gibeyiyo ngo.” Kum niai i acaki Yesu ung’eyo ju ma giyiyo ngo man ng’atu ma bicibe bende. 65 Eyero kendo kumae: “Pi thelembe maeno re m’agam awacu iwu nia, ng’atu moko mbe ma copo bino i bang’a ka Wego ung’iyo en ungo nia ebin.”

66 Ni kum lembe maeno, julubne ma dupa gidok i bang’ piny m’udong’ i ng’eygi man giwotho ngo kendo kude. 67 E Yesu uyero ni juapar ario (12) kumae: “Wun de wubemito wucidhi?” 68 Simon Pethro udwoko ire kumae: “Rwoth, wabicidho i bang’ ng’a? Itie ku wec mi kwo ma rondo ku rondo. 69 Wadaru yiyo man wadaru ng’eyo nia in i Ng’atu ma Leng’ pa Mungu.” 70 Yesu udwoko igi kumae: “Ang’iyowu wun apar ario (12) ngo? Ento ng’atu acel m’i kindwu e calu Wonabali.”* 71 Karaman ebino weco pi Yuda ma wod Simon Iskarioth, kum en re ma nwang’u ebecicibe ma ke lundo ebino ng’atu acel m’i kind juapar ario (12).

7 I ng’ei lembe maeno, Yesu umedere asu niwotho i Galilaya. Emito ngo ewoth i Yudea pilembe Juyahudi gibino yenyo ginege. 2 Ento nwang’u foc mi Otbak mi Juyahudi udhingo romo. 3 Pieno umego pare giwacu ire kumae: “Ai ku keni icidh i Yudea kara julub peri de ginen tic m’ibetimo. 4 Kum ng’atu moko mbe ma timo gin moko i aponda kan ebeyenyo nia jung’eye kamaleng’. Tek ibetimo lembe maeni, nyuthiri ni ng’om.” 5 Nwang’u de umego pare giyiye ngo. 6 Pieno Yesu uyero igi kumae: “Saa para fodi uromo ngo, ento iwu saa ceke tie ber. 7 Ng’om umbe ku thelembe mi daguwu, ento an edaga, kum abetuco lembe i wiye nia tic pare gi reco. 8 Wun wuidh i foc; an fodi abeidho ngo i foc maeno, pilembe saa para fodi uromo ngo kakare kakare.” 9 E i ng’ei m’eyero lembe maeni, edong’ i Galilaya.

10 Ento kinde m’umego pare giidho i foc, en de egam eidho, re ngbeng’ ungo ento i aponda. 11 Juyahudi gilund gicaku saye i foc ma gibewacu kumae: “Ng’atu maeni ni kani?” 12 Bende udul dhanu gibino weco pire lee i kindgi nyamung’ mung’. Jumoko gibino wacu kumae: “Etie dhanu ma ber.” Jumange ke gibino yero kumae: “Ungo. Ebewondo udul dhanu.” 13 I andha ng’atu moko mbe m’ubino weco pire kamaleng’ pilembe gibino lworo Juyahudi.

14 Kinde ma foc ukadhu diere, Yesu uidho i hekalu man ecaku ponjo. 15 E Juyahudi gizungo man giwacu kumae: “Ng’atu maeni ung’eyo Lembagora kumeni nenedi ma ke esomo de ngo e”?* 16 Yesu ulund udwoko igi kumae: “Gin m’abeponjo utie para ngo, ento utie pa Ng’atu m’uora. 17 Tek ng’atu moko ubemito etim yeny pa Mungu, ebing’eyo ka nyo ponji m’abeponjo uai i bang’ Mungu, kunoke nyo abeyero lembe m’uai i bang’a gira. 18 Ng’atu m’ubeyero lembe m’uai i bang’e gire nwang’u ebeyenyo yung pare gire; ento ng’atu m’ubeyenyo yung pa ng’atu m’uore, ng’atu maeno en e mandha man lembe ma rac umbe i iye. 19 Musa umiyo iwu Cik ungo? Ento ng’atu moko acel de mbe i kindwu m’ubeworo Cikne. Dong’ pirang’o wubeyenyo wunega?” 20 Udul dhanu ulund uloko lembe kumae: “Pajogi n’i ii. Ng’a m’ubeyenyo enegi?” 21 Yesu udwoko igi kumae: “Atimo gin acel kende man wun ceke wubezungo. 22 Pi thelembe maeni Musa umiyo iwu cik mi timo yaa; cik maeno uai i bang’ Musa ngo ento i bang’ kwaruwu, man wubed wutimo yaa i kum awiya ma co i ceng’ sabatu. 23 Tek wubed wutimo yaa i kum awiya ma co i ceng’ sabatu kara kud wutur Cik pa Musa, dong’ pirang’o kwinyo uopo i iwu i kuma pilembe akeyo kum ng’atu moko i ceng’ sabatu? 24 Wuwek nipoko lembe calku gin ma nen yo woko, ento wupok lembe i ayi ma pwe.”

25 E dhanu moko mi Yeruzalem gicaku wacu kumae: “Eni tie ngo ng’atu ma jubeyenyo kara junegi e? 26 Ento nen! Ebeweco kamaleng’ i wang’ dhanu re gibeyero lembe moko ngo ire. Nyo jubim gidaru ng’eyo nia andha ng’atu maeni tie Kristu? 27 Wan re wang’eyo kaka ma ng’atu maeni uai i iye; ento ka Kristu bibino, ng’atu moko mbe ma bing’eyo kaka m’eai i iye.” 28 E kinde ma Yesu ubeponjo i hekalu, ekok kumae: “Wung’eya man wung’eyo kaka m’aai i iye. Abino ngo ku paru para gira, ento Ng’atu m’uora unuti andha man wung’eye ngo. 29 An ang’eye pilembe atie jaor m’uai i bang’e man En re m’eora.” 30 E gicaku yenyo gimake, ento ng’atu moko mbe m’uketho cinge i kume, kum nwang’u fodi saa pare uromo ngo. 31 Re asu ju ma dupa m’i kind udul dhanu giyiye man giwacu kumae: “Kinde ma Kristu bibino, nyo ebitimo udu dupa nisagu ma ng’atu maeni utimo?”

32 Jufarisayo gigam giwinjo udul dhanu ubeyero lembe maeno nyamung’ mung’ pire, e judongo mi julam ku Jufarisayo gioro juaskari ucidh umake. 33 E Yesu ugam uyero kumae: “Fodi wabibedo kudwu pi nindo ma nok i wang’ m’acidh i bang’ Ng’atu m’uora. 34 Wubisaya, ento wubinwang’a ngo man kaka ma an’i iye wucopo bino ngo.” 35 Pieno Juyahudi giweco i kindgi kumae: “Ng’atu maeni ubemito cidho kani ma nia wabinwang’e ko ngo e? Nyo ebemito ecidh i bang’ Juyahudi ma gilal i kind Jugiriki man niponjo Jugiriki? 36 Dong’ ebemito yero ang’o kinde m’ebewacu nia, ‘wubisaya, ento wubinwang’a ngo man kaka ma an’i iye wucopo bino ngo’?”

37 Nindo ma tokcen, ma en e nindo ma dit mi foc, Yesu uai malu man ekok kumae: “Tek ng’atu moko rieu ubenege, dong’ ebin i bang’a man emadhi. 38 Ng’atu ma tek uyiya, ‘kulo mi pii mi kwo bithwogere kud i iye’ calu ma Lembagora uyero.” 39 Ento eyero lembe maeni pi tipo ma ju ma giyiye gidhingo nwang’u, kum nwang’u tipo ubino mbe pilembe fodi Yesu unwang’u ngo yung. 40 Jumoko m’i kind udul dhanu ma giwinjo wec maeni gicaku wacu kumae: “Andha eni tie Jabila.” 41 Jumange ke gibino yero kumae: “Eni tie Kristu.” Ento jumange lundo gibino wacu kumae: “Nyo Kristu ubeai andha kud i Galilaya? 42 Lembagora uyero ngo nia Kristu ubeai kud i thekwaru pa Daudi, man kud i Bethlehem ma tie pacu ma Daudi ubed ubedo i iye?” 43 Pieno pokiri uwok i kind udul dhanu pire. 44 E jumoko m’i kindgi gimito gimake, ento ng’atu moko mbe m’uketho cinge i kume.

45 Juaskari gigam gidok i bang’ judongo mi julam ku Jufarisayo man ju maeno giwacu igi kumae: “Pirang’o wukele ngo?” 46 Juaskari gidwoko kumae: “Ng’atu moko mbe ma fodi uweco kumeca.” 47 Jufarisayo gilund gidwoko igi kumae: “Nyo wun de judaru wondowu ngo nia? 48 Nyo i kind jubim ku Jufarisayo ng’atu moko tie de m’udaru yiye? 49 Ento udul dhanu maeni ma ging’eyo ngo Cik gitie dhanu ma julamu.” 50 E Nikodem m’ular ubino i bang’ Yesu i wang’e man m’ubino ng’atu acel m’i kindgi uyero igi kumae: 51 “Nyo Cik mwa uyiyo jupok lembe iwi ng’atini ma fodi jular juwinje ngo man jung’eyo ngo gin m’ebetimo?” 52 Gidwoko ire kumae: “In de iai i Galilaya ngo nia? Ketim sayusac kara inen nia jabila moko mbe ma biwok kud i Galilaya.”*

8 12 I ng’eye, Yesu uyero kendo igi kumae: “An a der mi ng’om. Ng’atu ma tek ulubo toka biwotho ngo i mudho, ento ebibedo ku der mi kwo.” 13 E Jufarisayo giwacu ire kumae: “Ibemiyo lembatuca i wii giri; lembatuca peri en e mandha ngo.” 14 Yesu udwoko igi kumae: “Kadok nwang’u abemiyo lembatuca i wiya gira de, re lembatuca para en e mandha, kum ang’eyo kaka m’aai i iye man kaka m’abecidho i iye. 15 Wupoko lembe calku paru mi dhanu;* ento an abepoko ngo lembe iwi ng’atu moko nyanok de. 16 Man kadok abepoko lembe de, pokolembe para en e mandha pilembe atie kenda ngo, ento Vwa m’uora ni karacelo kuda. 17 Bende, i Cik mwu giwu de jukiewo kumae: ‘Lembatuca mi dhanu ario en e mandha.’ 18 An abetuco pira gira, Wego m’uora de ubemiyo lembatuca i wiya.” 19 I ng’eye, gipenjo Yesu kumae: “Wuru ni kani?” Edwoko kumae: “Wung’eya ngo man wung’eyo ngo Vwa bende. Ka nwang’u wung’eya, nwang’u wung’eyo Vwa de.” 20 Eyero lembe maeni nwang’u ebeponjo i hekalu kaka ma kakanpiny ubino i iye. Ento ng’atu moko mbe m’umake, kum nwang’u fodi saa pare uromo ngo.

21 Pieno eyero igi kendo kumae: “An abecidho man wubiyenya, re wubitho i dubo mwu. Kaka m’abecidho i iye wucopo bino ngo.” 22 E Juyahudi gicaku yero kumae: “Nyo ebinegere gire? Kum ebewacu nia, ‘kaka m’abecidho i iye wucopo bino ngo.’” 23 Eyero igi kendo kumae: “Wun wu ju ma piny, an a ng’atu ma malu. Wun wu mi ng’om maeni; an a mi ng’om maeni ngo. 24 Eno re m’uketho abeyero iwu nia, wubitho i dubo mwu. Kum tek wuyiyo ngo nia an a en, wubitho i dubo mwu.” 25 E gicaku penje kumae: “In i ng’a?” Yesu udwoko igi kumae: “Eni ke pirang’o abeweco kudwu? 26 Atie ku lembe dupa m’ukwayu ayer piwu, man atie ku gin dupa m’apok lembe i wiye. Ento i andha, Ng’atu m’uora en e mandha, man gin m’awinjo i bang’e re m’abeyero i ng’om.” 27 Re ginyang’ ungo nia ebino weco igi pi Wego. 28 I ng’eye, Yesu uyero igi kumae: “Kinde ma wudaru ting’o Wod dhanu malu, e wubing’eyo nia an a en, man nia atimo ngo gin moko ku paru para gira; ento calu ma Wego uponja, abeyero lembe maeni. 29 Man Ng’atu m’uora ni kuda; eweka kenda ngo pilembe saa ceke atimo lembe ma nyayu anyong’a i iye.” 30 Kinde m’ebeyero lembe maeni, dhanu ma dupa giyiye.

31 I ng’eye, Yesu uyero kendo ni Juyahudi ma giyiye kumae: “Tek wubedo i lembe para, nwang’u wutie julubna andha, 32 man wubing’eyo lemandha, e lemandha bigonyowu.” 33 Gilund gidwoko ire kumae: “Wan wa nyikway Abraham man fodi wabedo ngo ng’eca pa ng’atu moko acel de. Dong’ nenedi ke ibeyero nia, ‘wubibedo agonya’?” 34 Yesu udwoko igi kumae: “Andhandha abeyero iwu nia, kubang’ dhanu ceke ma timo dubo en e ng’eca mi dubo. 35 Bende, ng’eca bedo ngo i ot pa rwoth pare nja; ento wod bedo nja. 36 Pieno ka Wod ugonyowu, wubibedo agonya andha. 37 Ang’eyo nia wu nyikway Abraham. Ento wubeyenyo wunega, kum wubejolo ngo ponji para. 38 Abeyero lembe m’agam aneno kinde ma fodi watie waku Vwa, ento wun wubetimo lembe ma wuwinjo i bang’ wegwu.” 39 Gidwoko ire kumae: “Wegwa utie Abraham.” Yesu ulund uyero igi kumae: “Ka nwang’u wun awiya p’Abraham, nwang’u wubetimo gin m’Abraham utimo. 40 Ento kawoni wubeyenyo wunega, an a ng’atu m’abeyero iwu lemandha m’awinjo i bang’ Mungu. Abraham utimo ngo kumeno. 41 Wubetimo tic pa wegwu.” Giyero ire kumae: “Wan junyolowa ni luk ungo; Wegwa tie acel, en e Mungu.”

42 Yesu uwacu igi kumae: “Ka nwang’u Mungu tie Wegwu, nwang’u wuromo mara; kum aai i bang’ Mungu man an’i kakeni. Abino ngo ku paru para gira, ento En re m’eora. 43 Pirang’o wubenyang’ ungo i wec m’abeyero? Kum wucopo winjo ngo lembe para. 44 Wun wuai i bang’ wegwu ma Wonabali man wubemito wutim yeny pa wegwu. Ng’atu maeno ubino janek kinde m’ecaku* man ecungo ngo ma tek i lemandha, kum lemandha umbe i iye. Kan ebecwayu vupo, ecwaye calku kura pare, pilembe en e javupo man e wego mi vupo. 45 Ento an abeyero iwu lemandha, re wubeyiya ngo. 46 Ng’a m’i kindwu ma copo nyutho nia atimo dubo? Kan abeyero lemandha, dong’ pirang’o wubeyiya ngo? 47 Ng’atu m’uai i bang’ Mungu winjo lembe pa Mungu. Eno re m’uketho wubewinjo ngo, pilembe wuai ungo i bang’ Mungu.”

48 Juyahudi gilund gidwoko ire kumae: “Wayero ngo dre nia, ‘in i Jasamaria man nia pajogi n’i ii’?” 49 Yesu udwoko kumae: “Pajogi mbe i iya, re abeyungo Vwa, ento wun wubemiyo ngo ira yung. 50 Re an abeyenyo ngo yung ira gira; Mungu re m’ubemito anwang’ yung, man En re m’ebepoko lembe. 51 Andhandha abeyero iwu nia, tek ng’atu moko ubeworo lembe para, ebineno ngo tho nyanok de.” 52 Juyahudi gilund giyero ire kumae: “Kawoni dong’ wang’eyo andha nia pajogi n’i ii. Abraham utho, jubila de githo, ento in ibewacu nia, ‘tek ng’atu moko ubeworo lembe para, ebibilo tho ngo nyanok de.’ 53 Nyo in i dit nisagu wegwa m’Abraham m’utho? Jubila de githo. Dong’ in ibekethiri nia itie ng’a?” 54 Yesu udwoko kumae: “Tek abeyungara gira, nwang’u yung para tije mbe. Vwa re m’ubeyunga, en ma wubeyero nia etie Mungu mwu. 55 Re wun wung’eye ngo, an ke ang’eye. Man kan ayero nia ang’eye ngo, nwang’u atie javupo calu wun. Ento ang’eye man abeworo lembe pare. 56 Abraham ma wegwu ukuro kud ava ma lee nineno nindo m’abibino i iye. Egam enene, man anyong’a unege.” 57 Juyahudi gilund giyero ire kumae: “Oro peri fodi pier abic (50) de ngo, re dong’ idaru neno Abrahami?” 58 Yesu uwacu igi kumae: “Andhandha abeyero iwu nia, i wang’ ma fodi junyolo ngo Abraham, nwang’u dong’ anuti.” 59 E gigam gicoko kidi kara gicanye, ento Yesu upalere igi man ewok kud i hekalu.

9 Kinde ma Yesu ubekadhu, egam eneno ng’atu moko ma wang’e tho niai i nyoliri pare. 2 E julubne gipenje kumae: “Rabi, ng’a m’udubo m’uketho ng’atu maeni unyolere ma wang’e tho, nyo en gire kunoke junyodo pare?” 3 Yesu udwoko kumae: “Ng’atu maeni udubo ngo kadi junyodo pare de, ento ebedo kumeno kara tic pa Mungu unyuthere kamaleng’ ni kume. 4 Wacikara nitimo tic pa Ng’atu m’uora ma fodi ceng’ unuti; diewor ubebino ma ng’atu moko mbe ma romo timo tic. 5 Tek fodi an’i ng’om ci, an a der mi ng’om.” 6 I ng’ei m’eyero lembe maeno, eng’ulo law i ng’om man enyobo ulobo ku lawne, e egam ewiro ulobo maeno i wang’ ng’atune 7 man ewacu ire kumae: “Cidh ilwok weng’i i kut mi Siloam” (Siloam thelembene tie, “ma juoro”). E ecidh elwoko wang’e man edwogo m’ebeneno piny ma ber.

8 E dhanu ma ceng’ini ku pacu migi, man jumange m’ubed unene m’ebekwayu piny gicaku wacu kumae: “Eni tie ngo ng’atu m’ubed ubedo, ma nwang’u ebekwayu piny e?” 9 Jumoko gibino wacu kumae: “Eni tie en.” Jumange ke giyero kumae: “Ungo, girombo aromba.” Ento ng’atune uwotho yero kumae: “An a en.” 10 E gipenje kumae: “Dong’ weng’i ke uyabere nenedi?” 11 Edwoko kumae: “Ng’atu moko ma julwong’o Yesu unyobo ulobo man ewiro i wang’a, e ewacu ira kumae: ‘Cidh ilwok weng’i i Siloam.’ E acidh alwoko wang’a man acaku neno piny.” 12 Gigam gipenje kumae: “Ng’atune ni kani?” Edwoko kumae: “Ang’eyo ngo.”

13 E gitero ng’atu maeno ma nwang’u wang’e ular utho i bang’ Jufarisayo. 14 Nwang’u nindo ma Yesu unyobo ulobo man uyabu wang’e i iye ubino ceng’ Sabatu. 15 E Jufarisayo bende gicaku penjo ng’atune nia ecaku neno piny nenedi. Edwoko igi kumae: “Eketho ulobo i wang’a man alwoko wang’a, e acaku neno.” 16 Jumoko m’i kind Jufarisayo gicaku wacu kumae: “Ng’atu maeni uai ungo i bang’ Mungu, kum ebeworo ngo Sabatu.” Jumange ke giyero kumae: “Ng’atu ma jadubo copo timo udu ma kumeni nenedi?” Pieno kindgi upokere. 17 Kendo giyero ni ng’atu ma wang’e tho kumae: “In ibeyero ang’o pire calu ma in re m’eyabu weng’i?” Edwoko kumae: “Etie jabila.”

18 Re Juyahudi giyiyo ngo nia nwang’u elar ebino abinga man ecaku neno piny, nitundo gilwong’o junyodo pa ng’atu maeno ma wang’e dong’ uyabere. 19 Gipenjo junyodo pare kumae: “Nyo eni tie wodwu ma wuwacu nia unyolere ma wang’e tho? Dong’ kawoni ke ebeneno piny nenedi?” 20 Junyodo pare gidwoko kumae: “Wang’eyo nia eni tie wodwa man nia enyolere ma wang’e tho. 21 Ento ayi ma nia kawoni ebeneno ko piny e re, wang’eyo ngo, kadi ng’a m’uyabu wang’e de wang’eyo ngo. Wupenj en. Wang’e uteng’ini. Ecopo yero pire gire.” 22 Junyodo pare giyero lembe maeno pilembe gibino lworo Juyahudi, kum nwang’u Juyahudi gidaru winjiri nia ka ng’atu moko uyiyo nia etie Kristu ci, jucikiri niriemo ng’atune cen kud i sinagog. 23 Eno re m’uketho junyodo pare giyero kumae: “Wang’e uteng’ini. Wupenj en.”

24 E wang’ mir arionde gilwong’o ng’atu maeno m’ukeubino abinga man giwacu ire kumae: “Mii yung ni Mungu; wang’eyo nia ng’atu maeno tie jadubo.” 25 Edwoko kumae: “Kuno nyo e jadubo, an ang’eyo ngo. Ang’eyo para gin acel, nia abino abinga, kawoni ke dong’ abeneno piny.” 26 Gilund giwacu ire kumae: “Etimo ang’o i kumi? Eyabu weng’i nenedi?” 27 Edwoko igi kumae: “Adaru yero iwu, re wuwinjo ngo. Pirang’o wubemito wuwinj lembene kendo? Nyo wun de wubemito wudok julub pare?” 28 E giyero ire ku cac kumae: “In i jalub pa ng’atu maeno, ento wan wa julub pa Musa. 29 Wang’eyo nia Mungu uweco ku Musa, ento pi ng’atu maeni wang’eyo ngo kaka m’eai i iye.” 30 Ng’atune udwoko igi kumae: “Etie lembe mi zungo ma dit nia wung’eyo ngo kaka m’eai i iye, ma kun ke eyabu wang’a. 31 Wang’eyo nia Mungu winjo ngo judubo, ento tek ng’atu moko ubelworo Mungu man ebetimo yeny pare, ewinjo ng’atune. 32 Niai con de fodi juwinjo ngo nia ng’atu moko uyabu wang’ ng’atu m’unyolere abinga. 33 Ka nwang’u ng’atu maeni uai ungo i bang’ Mungu, nwang’u ecopo timo ngo gin moko acel de.” 34 Gilund gidwoko ire kumae: “In zoo junyoli i dubo, re ilund ibeponjo wani?” E gigam girieme cen!

35 Yesu ugam uwinjo nia jurieme, man kinde m’enwang’e, ewacu ire kumae: “Nyo iyiyo Wod dhanu?” 36 E ng’atune udwoko kumae: “Etie ng’a rwoth, kara ayiye?” 37 Yesu uwacu ire kumae: “Idaru nene man etie de ng’atu ma wubeweco kude eni.” 38 Eyero kumae: “Ayiye, Rwoth.” E erum i wang’e.* 39 Yesu ulund uwacu kumae: “Abino i ng’om maeni pi pokolembe ma e: Nia ju ma wang’gi tho ginen piny, man ju ma wang’gi neno piny ke gidok abinga.” 40 Jufarisayo ma gibino karacelo kude giwinjo lembe maeno man gipenje kumae: “Nyo wan de wan abinga?” 41 Yesu uyero igi kumae: “Ka nwang’u wubino abinga, nwang’u wumbe ku dubo. Ento kawoni wubewacu nia, ‘wabeneno.’ Dubo mwu ubedo asu kakare.”

10 “Andhandha abeyero iwu nia, ng’atu m’ubemondo ngo i dwol mi rombe kud i dhugola ento ebeidho ku kaka mange, ng’atu maeno tie jakwo man won ayeki. 2 Ento ng’atu m’ubemondo kud i dhugola en e jakwac mi rombe. 3 Jakur dhugola yabu ni ng’atu maeno, man rombe winjo dwande. Elwong’o rombe pare ma dhe ku nying’gi man eterogi woko. 4 Kan edaru wodho rombe pare ceke woko, etelo yo i wang’gi man rombe lubo toke, pilembe ging’eyo dwande. 5 Gibilubo ngo tok welo nyanok de, ento gibiringe pilembe ging’eyo ngo dwand welo.” 6 Yesu umiyo lapor maeno igi, ento ginyang’ ungo i lembe m’ebino yero igi.

7 E Yesu uwacu kendo kumae: “Andhandha abeyero iwu nia, an a dhugola mi rombe. 8 Dhanu ceke ma gilar gibino kakara gi jukwo man weg ayeki; ento rombe uwinjogi ngo. 9 An a dhugola; ng’atu ma tek umondo kud i bang’a biboth, ng’atu maeno bimondo man ebiwok, e ebinwang’u lum m’uloth. 10 Jakwo bino ndhu pi nikwalu, ninego, man ninyotho. An abino kara ginwang’ kwo man kara gikwo lee. 11 An a jakwac ma ber; jakwac ma ber miyo kwo* pare pi rombe. 12 Ng’atu ma jatic ma tie ngo jakwac man ma rombe de tie pare ngo, kan eneno urudi ubebino, eweko rombe man eringo . . . e urudi makugi man elalugi . . . 13 pilembe etie jatic man edieng’ ungo ku rombe. 14 An a jakwac ma ber. Ang’eyo rombe para man rombe para de ging’eya, 15 tap calu ma Wego ung’eya man an de ang’eyo Wego; amiyo kwo* para pi rombe.

16 “Man atie ku rombe mange de ma gitie ngo mi dwol maeni; ju maeca de kwayu akelgi man gibiwinjo dwanda, e gibidoko udul rombe acel ku jakwac de acel. 17 Wego umara pi lembe maeni, kum amiyo kwo* para kara adok anwang’e kendo. 18 Ng’atu moko mbe ma mayu kwo para kud i bang’a, ento amiye an gira. Atie ku copo mi miye man atie ku copo mi dok nwang’e kendo. Anwang’u cik iwi lembe maeno niai i bang’ Vwa.”

19 Wec maeno ugam unyayu pokiri kendo i kind Juyahudi. 20 Ju ma dupa m’i kindgi gibino wacu kumae: “Pajogi n’i iye man wiye unyothere. Wubewinje pirang’o?” 21 Jumange ke giyero kumae: “Ng’atu ma pajogi n’i iye weco ngo kumeno. Nyo pajogi copo ketho abinga neno pinyi?”

22 I nindo maeca, foc mi Thiero hekalu utimere i Yeruzalem. Ebino saa mi koyo, 23 man Yesu ubino wotho i hekalu kaka ma julwong’o pond ot pa Suleman. 24 E Juyahudi gibin gitieke tingili man gicaku yero ire kumae: “Ibiweko wabed* ku jiji nitundo awene? Tek itie Kristu, yer iwa thwolo thwolo.” 25 Yesu udwoko igi kumae: “Adaru yero iwu, re wubeyiyo ngo. Tic m’abetimo ku nying’ Vwa, tic maeno re m’ubemiyo lembatuca i wiya. 26 Ento wubeyiyo ngo pilembe wutie rombe para ngo. 27 Rombe para winjo dwanda, man ang’eyogi man gilubo toka. 28 Amiyo igi kwo ma rondo ku rondo, man gibinyothiri ki ngo, ng’atu moko de mbe ma bimayugi kud i cinga. 29 Gin ma Vwa umiyo ira tie gin ma pire tek m’usagu piny mange ceke, man ng’atu moko mbe ma copo mayugi kud i cing’ Wego. 30 An waku Wego wan acel.”*

31 E Juyahudi gicoko kidi kendo kara gicanye. 32 Yesu uyero igi kumae: “Adaru nyutho iwu tic dupa ma beco m’uai i bang’ Vwa. Dong’ kud i kind tic maeno wubecanya pi ma kanine?” 33 Juyahudi gidwoko ire kumae: “Wabecenyi ngo pi tic ma ber, ento pi lembacidi; kum in ibekethiri nia itie mungu ma ke itie dhanu.” 34 Yesu udwoko igi kumae: “Jukiewo ngo i Cik mwu nia, ‘awacu kumae: “Wun wu mungu”’?* 35 Kan elwong’o ju ma lembe pa Mungu upoko lembe migi rac nia gi ‘mungu’ ma Lembagora ke copo lokere ngo, 36 an ma Wego udwoka leng’ man uora i ng’om wubeyero ira nia, ‘ibeyero lembacidi,’ pilembe awacu nia, ‘an a Wod Mungu’? 37 Kan abetimo ngo tic pa Vwa, kud wuyiya. 38 Ento kan abetimogi, kadok wubeyiya ngo de, wuyii ticne kara wubin wung’ey man wumeduru ning’eyo nia Wego n’i acel kuda, man an de an’i acel ku Wego.” 39 E gimito gimake kendo, ento evuth kud i cing’gi.

40 E ekadhu kendo loka kulo Yordan kaka ma Yohana ubed umiyo batizo i iye ni dhanu ku kwong’a, man ebedo kuca. 41 Dhanu dupa gigam gibino i bang’e man gicaku yero kumae: “Yohana utimo ngo udu acel de, ento gin ceke ma Yohana uyero pi ng’atu maeni ubino lemandha.” 42 Pieno, dhanu dupa gigam giyiye keca.

11 Nwang’u ng’atu moko ma nyinge Lazaru ubino twoyo; ebino dhanu mi Bethania ma tie pacu ma thugi Maria giku nyamin ma Martha. 2 Eni tie Maria m’ugam ukonjo mo iwi Rwoth man m’uweyo tiende ku yukwiye; umin ma Lazaru re m’ubino twoyo. 3 E nyimego pare gioro kwenda i bang’ Yesu, giwacu kumae: “Rwoth nen! Ng’atu m’imaru ubetwoyo.” 4 Ento kinde ma Yesu uwinjo lembe maeno, eyero kumae: “Twoyo maeni en e mi tho ngo, re etie pi dwong’ pa Mungu kara Wod Mungu unwang’ yung ni kume.”

5 Nwang’u Yesu umaru Martha giku nyamin ma Maria man Lazaru. 6 Re kinde m’ewinjo nia Lazaru ubetwoyo, ebedo asu nindo ario mange kaka m’ebino i iye. 7 I ng’ei lembe maeno, eyero ni julubne kumae: “Wacidhu kendo i Yudea.” 8 Julub giyero ire kumae: “Rabi, cing’uni eni fodi Juyudea gimito gicenyi ku kidi, re ibecidho kendo kuca?” 9 Yesu udwoko kumae: “Dieceng’ utie ku saa apar ario (12) ngo? Tek ng’atu moko ubewotho dieceng’, gin moko mbe ma copo ketho ekier pilembe ebeneno der mi ng’om maeni. 10 Ento tek ng’atu moko ubewotho diewor, ekier pilembe der umbe i iye.”

11 I ng’ei m’eyero lembe maeni, emedo kumae: “Jarimbwa ma Lazaru unindo, ento abecidho kuca pi nicewe.” 12 Julub gilund giyero ire kumae: “Rwoth, tek ebenindo, eno bikonye nikey.” 13 Ento Yesu ubino weco pi tho pare. Re giparu nia ebeweco pi yom ma juyom ko nwang’u jubenindo. 14 E Yesu uyero igi ngbeng’ kumae: “Lazaru utho, 15 man anyong’a ubenega piwu pilembe abino mbe kuca kara wuyii. Dong’ wacidhu i bang’e.” 16 E Thoma ma julwong’o nia Rut uwacu ni julub wagi kumae: “Wan bende wacidhu kara wathowu wakugi.”

17 Kinde ma Yesu utundo, enwang’u nia Lazaru udaru timo udoko nindo ang’wen i kabuli. 18 Nwang’u Bethania ubino ceng’ini ku Yeruzalem i kilometre ma romo adek. 19 Juyahudi dupa de gibino i bang’ Martha giku Maria pi nijuko cwinygi pir umeggi. 20 Saa ma Martha uwinjo nia Yesu ubebino, ecidho kara eromb kude; ento Maria ubedo asu i ot. 21 Martha ugam uyero ni Yesu kumae: “Rwoth, ka nwang’u ibino keni, nwang’u di umira tho ngo. 22 Re kadok kawoni de ang’eyo nia gin moko ci ma tek ibipenjo i bang’ Mungu, Mungu bimiyo iri.” 23 Yesu ulund uwacu ire kumae: “Umeru bicer.” 24 Martha udwoko ire kumae: “Ang’eyo nia ebicer i cer mi nindo ma tokcen.” 25 Yesu uwacu ire kumae: “An a cer man kwo. Ng’atu ma tek unyutho yiyoyic i iya, kadok etho ebikwo kendo; 26 man ng’atu ma tek ubekwo man ebenyutho yiyoyic i iya, ebitho ngo zoo de. Nyo iyiyo lembe maeni?” 27 Edwoko ire kumae: “Eyo Rwoth, adaru yiyo nia in i Kristu ma Wod Mungu, ma tie ng’atu m’ubebino i ng’om.” 28 Kinde m’eyero lembe maeni, ecidh elwong’o Maria ma nyamin, ewacu ire i ang’et kumae: “Japonji ni keni man ebelwong’i.” 29 Saa m’ewinjo lembe maeno, eai malu pio man ecidho i bang’e.

30 Nwang’u fodi Yesu utundo ngo i pacu, ento fodi asu en’i kaka ma Martha ucidh urombo kude i iye. 31 Kinde ma Juyahudi ma gibino juko cwiny Maria i ot gineno nia eai malu pio man ewok woko, gilubo toke pilembe giparu nia ebecidho i dhu kabuli pi niwak kuca. 32 Saa ma Maria utundo kaka ma Yesu n’i iye man enene, epodho piny i the tiende man ewacu ire kumae: “Rwoth, ka nwang’u ibino keni, nwang’u di umira tho ngo.” 33 Kinde ma Yesu uneno ebewak man Juyahudi ma gibino karacelo kude de gibewak, ecur yor i iye* man can de umondo i iye. 34 Epenjogi kumae: “Wukethe kani?” Gidwoko ire kumae: “Rwoth, bin inen.” 35 E piwang’ Yesu ugam ucwir. 36 Pieno, Juyahudi gicaku wacu kumae: “Nen, kara nwang’u emare andha!” 37 Ento jumoko m’i kindgi giwacu kumae: “Ng’atu maeni m’uyabu wang’ ng’atu m’abinga, nwang’u ecopo cero ngo ng’atuni kara kud etho?”

38 E i ng’ei ma Yesu ucur yor i iye kendo, ecidho i dhu kabuli. Nwang’u kabuline ubino cana m’aroka, man juriebo kidi i dhoge. 39 Yesu uyero kumae: “Wung’iel kidi cen.” E Martha ma nyamin ng’atu m’utho uwacu ire kumae: “Rwoth, kawoni dong’ ebeng’wii, kum nindo ukadhu udoko ang’wen.” 40 Yesu uwacu ire kumae: “Ayero iri ngo nia tek iyiyo ibineno dwong’ pa Mungu?” 41 Pieno, gigam ging’ielo kidi. E Yesu ung’ayu wang’e yor i polo man ewacu kumae: “Vwa, abefoyi pilembe idaru winja. 42 Andha, ang’eyo nia ibed iwinja saa ceke; ento abeweco pir udul dhanu m’ucungo i ng’eta, kara giyii nia iora.” 43 Kinde m’edaru yero lembe maeni, ekok ku dwande ma tek kumae: “Lazaru, wok woko!” 44 E ng’atu ma nwang’u utho uwok woko ma tiende ku cinge zoo ubedo ariwa, man wang’e de juriwo ku bongu. Yesu uwacu igi kumae: “Wugonye man wuwek ecidhi.”

45 Pieno, Juyahudi dupa ma gibino i bang’ Maria man ma gineno lembe m’etimo giyiye, 46 ento jumoko m’i kindgi gicidho i bang’ Jufarisayo man gikoro igi lembe ma Yesu utimo. 47 Pieno, judongo mi julam ku Jufarisayo gicokiri karacelo i coko mi Sanedrini man giwacu kumae: “Wabitimo ang’o? Kum ng’atu maeni ubetimo udu dupa. 48 Tek waweko emedere asu kumeni, gin ceke gibiyiye, e Juroma gibibino man gibimayu kabedo mwa* ku thek mwa de.” 49 Ento ng’atu acel m’i kindgi ma nyinge Kaifa m’ubino jalam ma dit i oro maeca uyero igi kumae: “Wung’eyo ngo gin moko acel de, 50 man wubenyang’ ungo nia etie pi bero mwu nia ng’atu acel utho pi dhanu, kakare ma nia thek ceke unyothere.” 51 Ento lembe maeno m’eyero uai i bang’e ngo, re calu m’ebino jalam ma dit i oro maeca, eewo nia Yesu ucikere nitho pi thek, 52 man pi thek kende ngo ento pi nicoko bende dhu nyithindho pa Mungu m’ulal ka ma tung’ tung’ karacelo i acel. 53 E niai i ceng’ maeca ci, gicaku poro lembe kara ginege.

54 Pieno, Yesu uwotho ngo kendo kamaleng’ i kind Juyahudi, ento eai ku keca, ecidho i theng ng’om ma ceng’ini ku langa i adhura ma julwong’o Efraim, man ebedo kuca ku julub. 55 Nwang’u Kadhukuwijo mi Juyahudi udhingo, man dhanu dupa ma giai kud i theng ng’om mi kiaru giidho i Yeruzalem i wang’ Kadhukuwijo kara gidwokiri leng’ calku Cik pa Musa. 56 Gibino sayu Yesu, man gicungo i hekalu ma gibeweco i kindgi kumae: “Wuparu nenedi? Nyo andha ebibino ngo i foci?” 57 Ento judongo mi julam ku Jufarisayo ging’olo nia tek ng’atu moko ung’eyo kaka ma Yesu n’i iye, ecikere ninyutho lembene kara jumake.

12 Nindo abusiel i wang’ Kadhukuwijo, Yesu utundo i Bethania kaka ma Lazaru ubino i iye, en m’e ng’atu ma Yesu ugam ucero kud i kind ju m’utho. 2 E giyiko ire cam mir uthieno keca man Martha ubino timo igi, ento Lazaru ubino acel m’i kind ju m’ubecamu* karacelo kude. 3 Maria ugam uting’o mo ma ng’wice ng’ar ma romo nusu litre, moje ubino nar* m’alili man ma beine tek dit; ekonjo mo ne iwi tiend Yesu man eweyo tiendene ku yukwiye. E ng’wic mo ma ng’ar maeno ugam uroc i ot zoo. 4 Ento Yuda Iskarioth ma tie ng’atu acel m’i kind julubne ma nwang’u ubecicibe uwacu kumae: 5 “Pirang’o julworo ngo mo ma ng’wice ng’ar maeni pi denari dak adek (300) man jumiyo sentene ni jucani?” 6 Re eyero ngo lembe maeno pilembe ebedieng’ pi jucan, ento pilembe ebino jakwo; ebed egwoko sanduku mi sente man ebed ekwalu sente kud i iye. 7 E Yesu uwacu kumae: “Wuweke, kara etim gin maeni pi niyiko ceng’ mi kuny para. 8 Kum wutie ku jucan saa ceke, ento an wabibedo wakudwu nja ngo.”

9 I kind saa maeno, udul ma lee mi Juyahudi giwinjo nia eni kakeca, e gibino pi Yesu kende ngo, ento pi nineno bende Lazaru m’ecero kud i kind ju m’utho. 10 Judongo mi julam gigam giporo lembe kara gineg bende Lazaru, 11 pilembe pire re ma Juyahudi dupa gibino cidho kuca man giyiyo Yesu.

12 Urwonde udul dhanu ma dit ma gibino i foc giwinjo nia Yesu ubebino i Yeruzalem. 13 Pieno gijaku jang thith man gicidh girombo kude, e gicaku kok kumae: “Wakweyi, bodhe!* Mugisa ni ng’atu m’ubebino ku nying’ Yehova m’Ubimo mir Israel!” 14 Kinde ma Yesu unwang’u nyathi kana moko, ebedo i wiye, tap calu ma Lembagora uwacu kumae: 15 “Lworo kud unegi, Nyasayuni. Nen! Ubimo peri ubebino m’ebedo iwi nyathi kana.” 16 Ku kwong’a julubne gikeginyang’ ungo i lembe maeno, ento kinde ma Yesu unwang’u dwong’, ka gibin gipoy nia jular jukiewo lembe maeno pire i Lembagora man nia jutimo lembene ire.

17 Nwang’u udul dhanu m’ubino karacelo kude kinde m’elwong’o Lazaru kud i kabuli man ecere kud i kind ju m’utho gibemediri asu nimiyo lembatuca. 18 Eno bende uketho udul dhanu gicidh girombo kude, pilembe giwinjo nia etimo udu maeno. 19 Pieno, Jufarisayo giweco i kindgi kumae: “Wubeneno nia lembe m’uberombo iwu mbe. Nen! Ng’om zoo udaru lubo toke.”

20 Nwang’u Jugiriki moko de gibino nuti i kind ju m’ubino timo thier* ni Mungu i foc. 21 E gibino i bang’ Filipo m’ubino dhanu mi Bethsaida mi Galilaya man gicaku kwaye kumae: “Jadit, wabemito wanen Yesu.” 22 Filipo ucidh uyero ni Andrea. Andrea giku Filipo ke gicidh giyero ni Yesu.

23 Ento Yesu udwoko igi kumae: “Saa udaru romo m’ukwayu juyung Wod dhanu. 24 Andhandha abeyero iwu nia, ka fodi nying nganu upodho ngo i ng’om man etho ngo, ebedo nyinge acel kende; ento tek etho, kan ecego nyinge dupa. 25 Ng’atu ma tek umaru kwo* pare akeca enyothe, ento ng’atu m’udagu kwo* pare i ng’om maeni, ebigwoke pi kwo ma rondo ku rondo. 26 Tek ng’atu moko ubemito timo ira, dong’ elub toka, man kaka ma an’i iye jatic para de bibedo keca. Tek ng’atu moko ubemito timo ira, Wego biyunge. 27 Kawoni cwinya* udaru ng’abere, dong’ abiyero ang’o? Vwa, bodha kud i saa maeni. Ento eni re m’uketho abino nitundo saa maeni. 28 Vwa, yung nyingi.” E dwal moko uai kud i polo uwacu kumae: “Adaru yunge man abiyunge kendo.”

29 Udul dhanu ma gicungo keca giwinjo dwalne man gicaku wacu nia polo re m’umor. Jumange ke giwacu kumae: “Malaika moko uweco i bang’e.” 30 Yesu udwoko kumae: “Dwal maeni uwok pira an ungo, ento piwu wun. 31 Kawoni dong’ jubepoko lembe iwi ng’om maeni; kawoni jubibayu jabim mi ng’om maeni woko. 32 Ento an ka judaru ting’a kud i ng’om, abitelo kwond dhanu ceke i bang’a.” 33 I andha ebino yero lembe maeno pi ninyutho kit tho ma nwang’u ebecitho ko. 34 E udul dhanu gidwoko ire kumae: “Wawinjo i Cik pa Musa nia Kristu bedo rondo ku rondo. In ilund ibeyero nenedi nia ukwayu jukejuting’ Wod dhanu malu? Wod dhanune utie ng’a?” 35 Pieno, Yesu uyero igi kumae: “Fodi der bibedo i kindwu pi nindo moko. Wuwothi ma fodi wutie ku der, kara mudho kud uvoywu; ng’atu m’ubewotho i mudho ng’eyo ngo kaka m’ebecidho i iye. 36 Kinde ma fodi wutie ku der, wunyuth yiyoyic i der, kara wudok wot mi der.”

Yesu uyero lembe maeni man ecidh epondo igi. 37 Kadok nwang’u etimo udu dupa i wang’gi de, re giyiye ngo, 38 kara lembe pa jabila Isaya upong’ kakare m’uwacu kumae: “Yehova, ng’a m’uyiyo lembe m’ewinjo i bang’wa?* Man cing’ Yehova ke unyuthere ni ng’a?” 39 Gin m’uketho giyiyo ngo utie lembe mange ma Isaya uwacu kumae: 40 “Edwoko wang’gi abinga man eketho adundegi udoko nwang’, kara kud ginen gin moko ku wang’gi man kud ginyang’ kud adundegi man kud gidwog i bang’a kara akey kumgi.” 41 Isaya uyero lembe maeni kum egam eneno dwong’ pare man eweco pire. 42 Ento kadok jubim dupa bende giyiye, re gituco ngo kamaleng’ nia giyiye ni kum Jufarisayo, kara kud juriemgi kud i sinagog; 43 kum gimaru yung m’uai i bang’ dhanu nisagu kadok yung m’uai i bang’ Mungu.

44 Ento Yesu ukok ku dwande ma tek kumae: “Ng’atu m’uyiya nwang’u eyiyo an kenda ngo, ento nwang’u eyiyo ng’atu m’uora bende; 45 man ng’atu m’ubenena nwang’u ebeneno Ng’atu m’uora bende. 46 Abino ni der i ng’om, kara ng’atu moko ci m’uyiya kud ubed i mudho. 47 Ento tek ng’atu moko uwinjo lembe para man eworogi ngo, apoko ngo lembe i wiye; kum abino ngo nipoko lembe iwi ng’om, ento nibodho ng’om. 48 Ng’atu ma tek ukwera man ujolo ngo lembe para, ng’atu moko nuti ma bipoko lembe i wiye. Wec m’adaru yero re ma bipoko lembe i wiye i nindo ma tokcen. 49 Kum abeweco ngo ku paru para gira, ento Wego m’uora en gire umiyo ira cik iwi gin m’ayer man m’aponji. 50 Man ang’eyo nia cik pare terojo i kwo ma rondo ku rondo. Pieno, gin ceke m’abeyero, abeyere tap calu ma Wego uyero ira.”

13 Yesu ular ung’eyo i wang’ foc mi Kadhukuwijo nia saa pare udaru romo mi weko ng’om maeni man mi cidho i bang’ Wego. Calu ma nwang’u edaru maru jupare ma dhe ma gibino i ng’om, emedere nimarugi nitundo i ajiki. 2 Kinde ma gibemediri ku cam mir uthieno, nwang’u dong’ Wonabali udaru royo pidoic mi cibe i Yuda Iskarioth ma wod Simon. 3 Pieno, calu ma Yesu ung’eyo nia Wego udaru miyo piny ceke i cinge, man nia eai i bang’ Mungu man ebecidho de i bang’ Mungu, 4 eai kud i dhu cam mir uthieno man eketho bongu pare ma yo woko cen. Egam eting’o bongu ma juweyo ko kum man eriwe i piere.* 5 I ng’eye, ekonjo pii i sani mi logo man ecaku lwoko tiend julub man eweyogi de ku bongu mi weyo kum ma nwang’u eriwo i piere.* 6 E ebino i bang’ Simon Pethro. Pethro uwacu ire kumae: “Rwoth, imito lwoko tienda?” 7 Yesu ugam udwoko ire kumae: “Gin m’abetimo icopo nyang’ ungo i iye kawoni, ento ibinyang’ i iye i ng’eye.” 8 Pethro uwacu ire kumae: “Ibilwoko ngo tienda nyanok de.” Yesu udwoko ire kumae: “Kan alwoko ngo tiendi, ibibedo ngo karacelo kuda.”* 9 Simon Pethro ulund uyero ire kumae: “Rwoth, kud ilwok tienda kende, dong’ lwok cinga ku wiya bende.” 10 Yesu uyero ire kumae: “Ng’atu m’udaru jom umbe ku yeny ma nia julwok kume mange m’uweko tiende kende, kum nwang’u en zoo etie leng’. Wun de wutie leng’, re wun ceke ngo.” 11 Kum egam eng’eyo ng’atu ma nwang’u ubecibe. Eno re m’uketho eyero kumae: “Wun ceke ngo ma wu leng’.”

12 Kinde m’edaru nilwoko tiendgi man ekendo bongu pare ma yo woko, edok ebedo kendo i dhu meza man epenjogi kumae: “Nyo wunyang’ i lembe m’aai atimo iwu de? 13 Wulwong’a nia, ‘Japonji man Rwoth;’ wulwong’a kumeno dre, pilembe etie de kumeno. 14 Dong’ ka an m’atie Rwoth man Japonji alwoko tiendwu, wun bende wucikuru* nilwoko tiendwu i kindwu. 15 Kum aweko iwu lapor kara tap calu m’atimo iwu, wun de wutim kumeno. 16 Andhandha abeyero iwu nia, jatic dit ungo nisagu rwoth pare, kadi ng’atu ma juoro de dit ungo nisagu ng’atu m’uore. 17 Tek wung’eyo lembe maeni, wu jumutoro tek wubetimogi. 18 Abeweco ngo piwu ceke; ang’eyo ju m’adaru ng’iyo. Ento ebedo kumeno kara lembagora upong’ kakare m’uwacu kumae: ‘Ng’atu m’ubed ucamu mukathi para uting’o ufuny tiende i kuma.’* 19 Niai kawoni, abeyero iwu lembene i wang’ ma fodi ewok ungo, kara kinde m’ewok wuyii nia an a en. 20 Andhandha abeyero iwu nia, ng’atu ma tek ujolo ng’atu m’aoro nwang’u ejolo an bende, man ng’atu m’ujolo an nwang’u ejolo Ng’atu m’uora bende.”

21 I ng’ei ma Yesu uyero lembe maeno, cwinye ugam ung’abere lee mandha man emiyo lembatuca kumae: “Andhandha abeyero iwu nia, ng’atu acel m’i kindwu biciba.” 22 Julub gicaku neno wang’gi i kindgi ma ging’eyo ngo nia ebeweco pi ng’a. 23 Nwang’u ng’atu acel m’i kind julub, ma tie ng’atu ma Yesu umaru lee ubedo ceng’ini kude.* 24 Pieno, Simon Pethro ugam utimo lanyuth ku wiye ni ng’atu maeno man ewacu ire kumae: “Yer iwa nia ebeweco pi ng’a.” 25 E ng’atu maeno ugam ulokere i dhu kor Yesu man epenje kumae: “Rwoth, tie ng’a?” 26 Yesu udwoko kumae: “Etie ng’atu m’abimiyo ire dund mukathi m’agwiyo i tabu.” E i ng’ei m’egwiyo mukathi i tabu, eting’e man emiye ni Yuda ma wod Simon Iskarioth. 27 I ng’ei ma Yuda ugamu dund mukathi, Sitani ugam umondo i iye. Pieno Yesu uwacu ire kumae: “Gin m’ibetimo, time pio mandha.” 28 Ento kud i kind ju m’ubedo i dhu meza, ng’atu acel de mbe m’ung’eyo nia pirang’o eyero lembe maeno ire. 29 Re jumoko ubino paru nia calu ma Yuda re ma begwoko sanduku mi sente, Yesu ubeyero ire nia, “ng’iew gin ma watie ku yenyne pi foc,” kunoke nia ukwayu emii piny moko ni jucan. 30 Pieno, i ng’ei m’egamu dund mukathi, ewok woko wang’ acel. Nwang’u ubino diewor.

31 E kinde m’ewok woko, Yesu uwacu kumae: “Kawoni Wod dhanu udaru nwang’u dwong’, man Mungu de unwang’u dwong’ ni kume. 32 Mungu en gire bimiyo ire dwong’, man ebimiyo ire dwong’ne ndhundhu. 33 Awiya ma thindho, fodi atie kudwu pi saa moko. Wubiyenya, man calu m’ayero ni Juyahudi, kawoni abeyero iwu de nia, ‘kaka m’abecidho i iye wucopo bino ngo.’ 34 Abemiyo iwu cik ma nyen, nia wumeruru i kindwu; tap calu m’amaruwu, wun bende wumeruru i kindwu. 35 Ni kum lembe maeni dhanu ceke bing’eyo nia wu julubna, tek wumeruru i kindwu.”

36 Simon Pethro upenje kumae: “Rwoth, ibecidho kani?” Yesu udwoko ire kumae: “Kaka m’abecidho i iye icopo lubo ngo toka kawoni, ento ibilubo toka i ng’eye.” 37 Pethro ugam uwacu ire kumae: “Rwoth, pirang’o acopo lubo ngo toki kawoni? Abimiyo kwo* para piri.” 38 Yesu udwoko kumae: “Nia ibimiyo kwo* peri pira? Andhandha abeyero iri nia, ma fodi kulok ukok ungo, ibikwera wang’ adek.”

14 “Cwinywu kud ung’abere. Wunyuth yiyoyic i Mungu; wunyuth yiyoyic i iya bende. 2 I ot pa Vwa kabedo tie dupa. Ka nwang’u kumeno ngo nwang’u ayero iwu, kum abecidho niyiko iwu kabedo. 3 Bende, tek acidho man ayiko kabedo iwu, abibino kendo man abijolowu i bang’a, kara kaka ma an’i iye wun de wubed keca. 4 Man kaka m’abecidho i iye, wung’eyo yoje.”

5 Thoma uwacu ire kumae: “Rwoth, wang’eyo ngo kaka m’ibecidho i iye. Wacopo ng’eyo yoje nenedi?”

6 Yesu ulund uyero ire kumae: “An a yo, lemandha man kwo. Ng’atu moko mbe ma copo bino i bang’ Wego, ndhu nikadhu kud i bang’a kende. 7 Ka nwang’u wung’eya, nwang’u di wung’eyo Vwa bende; niai kawoni wung’eye man wudaru nene.”

8 Filipo uwacu ire kumae: “Rwoth, nyuth iwa Wego, eno ci nwang’u uromo iwa.”

9 Yesu udwoko ire kumae: “Filipo, pi nindo ma lee ma wabedo wakudwu e zoo fodi ing’eya ngo? Ng’atu m’uneno an nwang’u eneno Wego bende. Dong’ nenedi ilund ibeyero nia, ‘nyuth iwa Wego’? 10 Ibeyiyo ngo nia an’i acel ku Wego man Wego de n’i acel kuda? Lembe m’abeyero iwu uai i bang’a gira ngo, ento Wego ma n’i acel kuda re m’ubetimo tic pare. 11 Wuyii lembe m’abeyero nia an’i acel ku Wego man Wego de n’i acel kuda; kan ungo wuyii ni kum tic en gire. 12 Andhandha abeyero iwu nia, ng’atu ma tek unyutho yiyoyic i iya, ebitimo bende tic m’abetimo; man ebitimo tic ma dongo nisagu maeni pilembe abecidho i bang’ Wego. 13 Bende, gin moko ci ma tek wukwayu ku nyinga, abitimo gin maeno kara Wego unwang’ dwong’ ni kum Wod. 14 Tek wukwayu gin moko ci ku nyinga, abitime.

15 “Ka wumara, wubiworo cik para. 16 Man abikwayu Wego, e ebimiyo iwu jakony* mange kara ubed kudwu rondo ku rondo, 17 tipo mi lemandha ma ng’om copo jolo ngo, pilembe enene ngo kadi eng’eye de ngo. Wun wung’eye, kum ebedo karacelo kudwu man en’i iwu. 18 Abiwekowu kendwu ngo.* Abebino i beng’wu. 19 I ng’ei nindo ma nyanok ng’om binena kendo ngo, ento wun wubinena pilembe abekwo man wun de wubibedo kwo. 20 I nindo maeca wubing’eyo nia an’i acel ku Vwa man wun’i acel kuda, an de an’i acel kudwu. 21 Ng’atu m’ujolo cik para man ebeworogi, ng’atu maeno re m’umara. Ng’atu ma tek umara ke Vwa de bimare, an de abimare man abinyuthara gira kamaleng’ ire.”

22 E Yuda ma tie ngo Iskarioth uwacu ire kumae: “Rwoth, lembang’o m’utimere m’uketho imito inyuthiri kamaleng’ iwa ento ni ng’om ungo?”

23 Yesu udwoko ire kumae: “Tek ng’atu moko umara ebiworo lembe para, man Vwa de bimare, e wabibino i bang’e man wabikwo* karacelo kude. 24 Ng’atu m’umara woro lembe para. Lembe ma wubewinjo utie para ngo, ento utie pa Wego m’uora.

25 “Ayero lembe maeni iwu ma fodi atie karacelo kudwu. 26 Ento jakony ma en e tipo ma leng’ ma Wego bioro ku nyinga, en re m’ebiponjowu ku lembe ceke man ebipoyo wiwu i kum lembe ceke m’ayero iwu. 27 Abeweko iwu kwiyocwiny; abemiyo iwu kwiyocwiny para. Abemiye ngo i ayi ma ng’om miye ko. Cwinywu kud upidi man lworo de kud unegwu. 28 Wudaru winjo ayero iwu nia, ‘abecidho man abidwogo kendo i beng’wu.’ Ka nwang’u wumara, nwang’u anyong’a romo negowu nia abecidho i bang’ Wego, kum Wego dit nisaga. 29 Kawoni adaru yero iwu ma fodi lembene uwok ungo, kara kinde m’ebiwok, wuyii. 30 Abiweco kudwu akeca ngo, kum jabim mi ng’om maeni ubebino, man embe ku copo i wiya. 31 Ento kara ng’om ung’ey nia amaru Wego, abetimo tap calu ma Wego ung’olo ira nia atim. Wuai malu wacidhu cen ku keni.

15 “An a yend ulok mandha, man Vwa ke tie jarafur. 2 Ekabu jange ceke m’i iya m’ubecego ngo nyinge, man elonyo m’ubecego ngo nyinge kara eceg nyinge lee nisagu. 3 Wun dong’ wudaru doko leng’ ni kum wec m’ayero iwu. 4 Wubed i acel kuda man abibedo i acel kudwu. Calu ma jang ulok copo cego ngo nyinge kan ebedo ngo i kum yende, wun de wucopo cego ngo nyingwu ka wubedo ngo i acel kuda. 5 An a yend ulok; wun ke wu jange. Ng’atu ma tek ubedo i acel kuda man an de abedo i acel kude, ng’atu maeno bicego nyinge lee nisagu; kum tung’ kuda wucopo timo ngo gin moko acel de. 6 Tek ng’atu moko ubedo ngo i acel kuda, etie calu jang yen ma judaru ng’ondo ma thwo cen. Jucoko jang yen maeno man jubologi i mac, e giwang’. 7 Tek wubedo i acel kuda man lembe para ubedo i iwu, wukway gin ceke ma wumito man ebitimere iwu. 8 Vwa nwang’u dwong’ tek wubemeduru nicego nyingwu lee nisagu man wubenyuthuru nia wu julubna. 9 Calu ma Vwa umara, an bende amaruwu; wubed i mer para. 10 Tek wuworo cik para wubibedo i mer para, tap calu ma an de aworo cik pa Wego man abedo i mer pare.

11 “Adaru yero iwu lembe maeni kara anyong’a para ubed i iwu, man anyong’a mwu de upong’. 12 Maeni en e cik para, nia wumeruru i kindwu tap calu ma an de amaruwu. 13 Ng’atu moko mbe ma tie ku mer ma dit m’usagu pa ng’atu m’ubemiyo kwo* pare pi jurimbe. 14 Wutie jurimba tek wubetimo gin m’ang’olo iwu. 15 Abelwong’owu ngo ng’eca kendo, pilembe ng’eca ng’eyo ngo gin ma rwoth pare ubetimo. Ento alwong’owu jurimo, pilembe aketho wung’eyo gin ceke m’awinjo i bang’ Vwa. 16 Wung’iya wun ungo, ento an re m’ang’iyowu, man alondowu kara wucidhi man wumeduru nicego nyingwu man nyingwune ubed asu, kara gin moko ci ma tek wukwayu i bang’ Wego ku nyinga, emii gin maeno iwu.

17 “Abeng’olo lembe maeni iwu kara wumeruru i kindwu. 18 Tek ng’om udaguwu, wung’eyo nia elar edaga i wang’ nidaguwu. 19 Ka nwang’u wubino dhanu mi ng’om, nwang’u ng’om ubemaru piny ma pare. Kawoni calu ma wu mi ng’om ungo ento ang’iyowu kud i ng’om, pi thelembe maeno ng’om udaguwu. 20 Wupoy i kum lembe ma e m’ayero iwu: Jatic dit ungo nisagu rwoth pare. Tek ginyayu ragedo i kuma, gibinyayu ragedo i kumwu bende; tek giworo lembe para, gibiworo lembe mwu bende. 21 Ento gibitimo gin maeno ceke i kumwu pi nyinga, pilembe ging’eyo ngo Ng’atu m’uora. 22 Ka nwang’u abino ngo man aweco ngo kugi, nwang’u dubo bedo mbe i wigi. Ento kawoni gimbe ku thelembe mi cero bang’gi pi dubo migi. 23 Ng’atu m’udaga nwang’u edagu bende Vwa. 24 Ka nwang’u gineno ngo udu m’atimo, ma ng’atu mange de mbe m’utimo, nwang’u dubo bedo mbe i wigi; re kawoni ginena man gidaga, gidagu bende Vwa. 25 Ento gin maeni utimere kara lembe ma jukiewo i Cik migi upong’ kakare, m’uwacu kumae: ‘Gidaga mananu.’ 26 Kinde ma jakony m’abioro iwu niai i bang’ Wego bibino, ma en e tipo mi lemandha m’uai i bang’ Wego, en ebimiyo lembatuca i wiya; 27 wun bende wucikuru nimiyo lembatuca pilembe wubedo karacelo kuda niai i acaki.

16 “Adaru yero iwu lembe maeni kara kud wukier. 2 Dhanu biriemowu kud i sinagog. Eyo, saa ubebino ma ng’atu ma binegowu biparu nia etimo tic ma leng’ ni Mungu. 3 Ento gibitimo lembe maeno pilembe gitundo ngo ning’eyo kadok Wego, kadi an. 4 Re ayero iwu lembe maeni kara ka saa m’ebitimere i iye uromo, wupoy nia adaru yerogi iwu.

“Alar ayero ngo iwu lembe maeni ku kwong’a, pilembe nwang’u fodi watie wakudwu. 5 Ento kawoni abecidho i bang’ Ng’atu m’uora; re ng’atu moko acel de mbe i kindwu m’ubepenja nia, ‘ibecidho kani?’ 6 Ento can upong’ i adundewu kum ayero iwu lembe maeni. 7 Re abeyero iwu lemandha, etie pi bero mwu re m’abecidho. Kum kan acidho ngo, jakony bibino ngo i beng’wu; ento kan acidho, abiore i beng’wu. 8 Man kan ebibino, ebituco wi ng’om kamaleng’ pi dubo, pi bedopwe, man pi pokolembe: 9 Ku kwong’a pi dubo, pilembe gibenyutho ngo yiyoyic i iya; 10 i ng’eye ke pi bedopwe, pilembe abecidho i bang’ Wego man wubinena ngo kendo; 11 tokcen ne pi pokolembe, kum judaru poko lembe pa jabim mi ng’om maeni.

12 “Fodi atie ku lembe dupa m’ukwayu ayer iwu, re wucopo nyang’ ungo i igi kawoni. 13 Ento kinde ma ng’atu maeno* bibino, ma en e tipo mi lemandha, ebitelo wiwu i lemandha ceke, kum ebiyero ngo lembe m’uai i bang’e gire, ento ebiyero lembe m’ebewinjo man ebiyero iwu pi gin ma bibino. 14 En ebiyunga, kum ebigamu gin m’ewinjo i bang’a man ebiyere iwu. 15 Gin ceke ma Wego utie ko tie para. Eno re m’uketho awacu iwu nia ebigamu gin m’ewinjo i bang’a man ebiyere iwu. 16 Edong’ nyanok wubinena kendo ngo, man kendo nyanok wubinena.”

17 E julubne moko giweco i kindgi kumae: “Ebemito yero ang’o kinde m’ebewacu nia, ‘edong’ nyanok wubinena ngo, man kendo nyanok wubinena,’ man ‘pilembe abecidho i bang’ Wego’?” 18 Pieno gibino yero kumae: “Emito yero ang’o kinde m’ebewacu nia, ‘edong’ nyanoki’? Wang’eyo ngo nia ebeweco iwi lembang’o.” 19 Yesu ung’eyo nia gibemito gipenje, pieno eyero igi kumae: “Wubepenjuru i kindwu pilembe awacu kumae: ‘Edong’ nyanok wubinena ngo, man kendo nyanok wubinena’? 20 Andhandha abeyero iwu nia, wubiwak man wubigoyo nduru, ento anyong’a binego ng’om; wubibedo ku can, ento can mwu bilokere bidoko ni anyong’a. 21 Ka moc ugoyo ng’atu ma dhaku, ebedo ku can pilembe saa pare uromo, ento kinde m’edaru nyolo nyathin, dong’ epoy ungo i kum masendi m’enwang’ere ko, ni kum mutoro m’ubenege nia enyolo dhanu i ng’om. 22 Pieno wun bende, wutie ku can kawoni; ento abinenowu kendo man adundewu bibedo kud anyong’a, e ng’atu moko mbe ma bimayu anyong’a mwu. 23 I nindo maeca, wubipenja ngo ku penji moko nyanok de. Andhandha abeyero iwu nia, ka wukwayu Wego ku gin moko ci, ebimiye iwu ku nyinga. 24 Nitundo kawoni fodi wukwayu ngo kadok gin acel de ku nyinga. Wukway man wubinwang’u, kara anyong’a mwu upong’.

25 “Ayero iwu lembe maeni ku lembabola. Saa ubebino m’abiweco ngo iwu kendo ku lembabola, ento abikoro iwu lembe thwolo thwolo iwi Wego. 26 I nindo maeca wubikwayu Wego ku nyinga; kan abeyero kumeni, amito yero ngo nia abikwayu piny moko piwu. 27 Kum Wego en gire umaruwu, pilembe wumara man wuyiyo nia abino calu jaor pa Mungu. 28 Abino calu jaor pa Wego man abino i ng’om. Kawoni abeweko ng’om man abecidho i bang’ Wego.”

29 Julubne giwacu kumae: “Nen! Kawoni dong’ ibeweco thwolo thwolo man ibetiyo ngo ku lembabola. 30 Kawoni wang’eyo nia ing’eyo lembe ceke man imbe ku yeny ma nia ng’atu moko upenji. Ni kum lembe maeno, wayiyo nia iai i bang’ Mungu.” 31 Yesu udwoko igi kumae: “Kawoni ka wubeyiyo? 32 Nen! Saa ubebino man dong’ edaru romo de ma wubilal, ng’atuman bidok i pacu pare man wubiweka kenda. Ento atie kenda ngo, pilembe Wego ni karacelo kuda. 33 Ayero iwu lembe maeni kara nikadhu kud i bang’a, wubed ku kwiyocwiny. I ng’om wubinweng’uru ku masendi, ento cwinywu bed tek! Adaru voyo ng’om.”

17 Yesu uyero lembe maeni man eting’o wang’e i polo ewacu kumae: “Vwa, saa udaru romo. Yung wodi kara wodi de uyungi, 2 calu m’imiyo ire dito iwi kum* ceke, kara emii kwo ma rondo ku rondo ni dhanu ceke m’imiyo ire. 3 Maeni en e kwo ma rondo ku rondo, nia giponj* ning’eyo in m’i Mungu mandha i kendi, ku ng’atu m’ioro ma Yesu Kristu. 4 Ayungi i ng’om man adaru tic m’imiyo nia atim. 5 Pieno kawoni, Vwa, yunga i ng’eti ku yung m’alar abino ko i vuti ma fodi ng’om umbe.

6 “Anyutho nyingi kamaleng’* ni dhanu m’imiyo ira kud i ng’om. Gibino dhanu peri man imiyogi ira, man giworo lembe peri. 7 Kawoni gidaru ng’eyo nia piny ceke m’imiyo ira uai i beng’i; 8 kum amiyo igi wec m’imiyo ira, e gijolo wecne man ging’eyo andhandha nia abino ni jaor peri, man giyiyo nia iora in. 9 Abekwayu pigi; abekwayu ngo pi ng’om, ento pi ju m’imiyo ira, kum gitie peri; 10 man piny para ceke utie peri, peri de utie para, man anwang’u yung i kindgi.

11 “An dong’ ambe i ng’om, ento gin gin’i ng’om, man abebino i beng’i. Wego ma Leng’, nen wigi pi nyingi m’imiyo ira, kara gibed acel, tap calu ma wan de wan acel.* 12 Kinde ma fodi abino karacelo kugi, abed aneno wigi pi nyingi m’imiyo ira; agwokogi man ng’atu moko acel de mbe i kindgi m’unyothere, ndhu wod mi nyoth, kara lembagora upong’ kakare. 13 Ento kawoni abebino i beng’i, man abeyero lembe maeni i ng’om kara gibed kud anyong’a para pong’ i igi. 14 Amiyo lembe peri igi, ento ng’om udagugi, pilembe gitie ngo dhanu mi ng’om, calu ma an de atie ngo mi ng’om.

15 “Abekwayu ngo nia ikabgi kud i ng’om, ento nia igwokgi ni ng’atu ma rac. 16 Gitie ngo mi ng’om, calu ma an de atie ngo mi ng’om. 17 Dwokgi leng’* ku lemandha; lembe peri en e lemandha. 18 Tap calu m’iora i ng’om, an de aorogi i ng’om. 19 Man abedwokara gira leng’ pigi, kara gin de gidwokiri leng’ ku lemandha.

20 “Abekwayu pi ju maeni kendgi ngo, ento bende pi ju ma gibiyiya ni kum lembe migi, 21 kara gin ceke gibed acel, calu ma in, Vwa, in’i acel kuda man an de an’i acel kudi, kara gin bende gibed i acel kudwa, wek kara ng’om de uyii nia iora. 22 Amiyo igi yung m’imiyo ira, kara gibed acel calu ma wan de wan acel. 23 An i acel kugi man in i acel kuda, kara gibed andhandha i acel, man kara ng’om de ung’ey nia iora man nia imarugi tap calu m’imara. 24 Vwa, abemito ju m’imiyo ira gibed karacelo kuda kaka ma an’i iye, kara ginen dwong’ para m’imiyo ira, pilembe ilar imara i wang’ thekiri mi ng’om. 25 Wego ma Leng’, andha ng’om utundo ngo ning’eyi, ento an ang’eyi man ju maeni gitundo ning’eyo nia iora. 26 Aketho ging’eyo nyingi man abiketho eng’eyere, kara mer m’imara ko ubed i igi man an de i acel kugi.”

18 I ng’ei ma Yesu uyero lembe maeni, ewok karacelo ku julubne man gikadhu loka poga mi Kidron,* pi nicidho kaka ma podho moko ubino i iye, man en karacelo ku julubne giwok gimondo i iye. 2 Nwang’u Yuda m’ucibe de ung’eyo kabedo maeno, pilembe Yesu karacelo ku julubne gibed gicokiri wang’ ma pol kuca. 3 Pieno, Yuda ukelo ungu mi juaskari man jukur m’uai i bang’ jugorcik ku Jufarisayo; gibino keca ku thorsi, ku thala, man jambnek. 4 Calu ma Yesu ung’eyo lembe zoo m’ubebino timere i kume, ecoro i bang’gi man epenjogi kumae: “Wubesayu ng’a?” 5 Gidwoko ire kumae: “Yesu ma Janazarethi.” Eyero igi kumae: “An a en.” Nwang’u Yuda m’ucibe de ucungo karacelo kugi.

6 Ento kinde ma Yesu uyero igi nia, “an a en,” gidok ku ng’eygi man gipodho i ng’om. 7 Pieno, epenjogi kendo kumae: “Wubesayu ng’a?” Giwacu kumae: “Yesu ma Janazarethi.” 8 Yesu udwoko igi kumae: “Adaru yero iwu nia an a en. Dong’ tek wubesayu an, wuwek dhanu maeni gicidhi.” 9 Gin maeni utimere pi nipong’o lembe m’elar eyero kumae: “I kind ju m’imiyo ira, ng’atu acel de mbe m’urwinyo ira.”

10 E Simon Pethro m’ubino ku palamularu uwodhe man etong’o jatic pa jalam ma dit, eng’ondo ithe mir acwic cen. Nying’ jaticne ubino Malko. 11 Re Yesu ulund uwacu ni Pethro kumae: “Dwok palamularu peri i ukorone. Nyo acikara ngo nimadhu kikombe* ma Wego umiyo ira?”

12 E juaskari ku jatela mi juaskari man jukur mi Juyahudi gimaku Yesu man gitwiye. 13 Gilar gitere i bang’ Ana, kum ebino jalwon Kaifa m’ubino jalam ma dit i oro maeca. 14 Kaifa re m’ubino ng’atu m’ugam umiyo juk ni Juyahudi nia etie pi bero migi nia ng’atu acel utho pi dhanu.

15 Nwang’u Simon Pethro giku jalub ma kucelo gibino lubo tok Yesu. Jalub maeno ging’eyiri ku jalam ma dit, e egam emondo karacelo ku Yesu i lela pa jalam ma dit, 16 ento Pethro ucungo woko i dhugola. Pieno, jalub ma kucelo maeno ma ging’eyiri ku jalam ma dit ugam ucidh uweco ku jakur dhugola man juroyo Pethro de. 17 Jatic ma nyaku m’ubino kuro dhugola ugam upenjo Pethro kumae: “In bende itie acel m’i kind julub pa ng’atu maeni ngo?” Edwoko kumae: “Ungo.” 18 Nwang’u jutic ku jukur gicungo i dhu cugimac m’ubogere ma gipangu, pilembe piny ubino ng’ic man gibino muro kumgi. Pethro de ucungo karacelo kugi man ebino muro kume.

19 E, jadit mi julam upenjo Yesu pi julub pare man pi ponji pare. 20 Yesu udwoko ire kumae: “Abed aweco ni ng’om kamaleng’. Kubang’ ceng’ abed aponjo i sinagog man i hekalu kaka ma Juyahudi ceke gicokiri i iye, man ayero ngo gin moko i aponda. 21 Pirang’o ibepenja? Penj ju m’uwinjo lembe m’ayero igi. Nen! Ju maeno ging’eyo lembe m’ayero.” 22 I ng’ei ma Yesu uyero lembe maeno, ng’atu acel m’i kind jukur m’ucungo i ng’ete upadu wang’e man uwacu kumae: “Ibedwoko lembe kumeni ni jadit mi julami?” 23 Yesu udwoko ire kumae: “Tek ayero gin moko ma rac, nyuth* ka racune; ento tek gin m’ayero utie atira, pirang’o ibepada?” 24 E Ana ugam uore i bang’ Kaifa ma jalam ma dit m’etie atwiya.

25 Nwang’u Simon Pethro ucungo kakeca m’ebemuro kume. E gipenje kumae: “In de itie ngo acel m’i kind julubne?” Egam ekwero man ewacu kumae: “Ungo.” 26 Ng’atu acel m’i kind jutic pa jalam ma dit m’ubino wat pa ng’atu ma Pethro ung’ondo ithe uwacu kumae: “Tie in ungo m’aneni i podho wukude?” 27 Ento Pethro ukwero kendo, e ndhundhu kulok ugam ukok.

28 Gilund giting’o Yesu kud i bang’ Kaifa gitere i pacu p’ubimo. Saa maeno ubino pir kugweno. Ento gin gigi gimito ngo gimond i pacu p’ubimo kara kud gibed ma gicido, ento gicam Kadhukuwijo. 29 E Pilatho uwok woko i bang’gi man ewacu kumae: “Wukelo adote ma kani i kum ng’atu maeni?” 30 Gidwoko ire kumae: “Ka nwang’u ng’atu maeni utie ngo jatimrac, nwang’u wamiye ngo i beng’i.” 31 Pilatho ulund uyero igi kumae: “Wugame wun giwu man wupok lembe i wiye calku cik mwu.” Juyahudi gidwoko ire kumae: “Cik uyiyo ngo iwa nia waneg ng’atu moko.” 32 Gin maeno utimere kumeno pi nipong’o wec ma Yesu ular uyero pi ninyutho kit tho m’ebitho ko.

33 E Pilatho umondo kendo i pacu p’ubimo man elwong’o Yesu, ewacu ire kumae: “In i Ubimo mi Juyahudi?” 34 Yesu udwoko kumae: “Penji maeni m’ipenjo uai i beng’i giri, kunoke jumange re ma giyero pira iri?” 35 Pilatho udwoko kumae: “An a Jayahudi? Thek peri giri man judongo mi julam re ma gimiyi i bang’a. Itimo ang’o?” 36 Yesu udwoko kumae: “Ker para tie ngo mi ng’om maeni. Ka nwang’u Ker para ubino mi ng’om maeni, nwang’u jutic para gikiedo kara kud jumiya i cing’ Juyahudi. Ento Ker para uai keni ngo.” 37 Pieno, Pilatho uwacu ire kumae: “Dong’ in i ubimo?” Yesu udwoko kumae: “In giri ibeyero nia an a ubimo. Kum anyolara pi maeni man abino i ng’om de pi maeni, kara amii lembatuca pi lemandha. Ng’atu moko ci ma n’i thenge mi lemandha, ewinjo dwanda.” 38 Pilatho uwacu ire kumae: “Lemandha utie ang’o?”

I ng’ei m’eyero gin maeni, ewok woko kendo i bang’ Juyahudi man ewacu igi kumae: “Anwang’u ngo thelembe moko m’aromo poko ko lembe rac i wiye. 39 Bende, etie kura mwu nia agony ng’atu acel iwu i Kadhukuwijo. Dong’ wubemito agony iwu Ubimo mi Juyahudi?” 40 Gikok kendo ma tek kumae: “Ng’atu maeno ngo, ento Barabas!” Nwang’u Barabas ubino won ayeki.

19 E Pilatho ugamu Yesu man efwode ku del. 2 Juaskari gigam gidolo uthac mir ukudho giketho i wiye man gironye ku bongu mi rangi m’uluga,* 3 e giwotho bino i bang’e ma gibewacu kumae: “Moth iri, Ubimo mi Juyahudi!” Giwotho padu wang’e bende. 4 Pilatho uwok kendo woko man ewacu igi kumae: “Wunen! Akele woko i beng’wu kara wung’ey nia anwang’u ngo lembe ma rac i wiye.” 5 Pieno Yesu uwok woko m’ekendo uthac mir ukudho man bongu mi rangi m’uluga.* E Pilatho uyero igi kumae: “Wunen ng’atu maeni!” 6 Ento kinde ma judongo mi julam man jukur ginene, gikok ma tek kumae: “Gure iwi yen! Gure iwi yen!”* Pilatho uwacu igi kumae: “Wugame wunege* wun giwu, kum an anwang’u ngo lembe moko ma rac i wiye.” 7 Juyahudi gidwoko ire kumae: “Watie ku cik, man nimakere ku cikne, ecikere nitho pilembe ekethere gire ni wod Mungu.”

8 Kinde ma Pilatho uwinjo lembe ma gibeyero, lworo ulund unege lee mandha, 9 man emondo kendo i pacu p’ubimo, e epenjo Yesu kumae: “Iai kani?” Re Yesu udwoko ngo ire lembe moko. 10 Pieno Pilatho uwacu ire kumae: “Ibekwero niweco i bang’a? Ing’eyo ngo nia atie ku copo mi gonyi man atie ku copo mi negi?”* 11 Yesu udwoko ire kumae: “Nwang’u iromo bedo mbe ku copo nyanok de i wiya, ka nwang’u jumiye ngo iri ku malu. Pieno re ma ng’atu m’umiya i beng’i utie ku dubo ma dit.”

12 Pi thelembe maeno re ma Pilatho umedere asu nisayu yo mi gonye, ento Juyahudi gikok ma tek kumae: “Tek igonyo ng’atu maeni nwang’u itie ngo jarimb Kaisari. Ng’atu moko ci m’ubekethere gire nia en e ubimo, nwang’u ebejai ni Kaisari.” 13 E kinde ma Pilatho uwinjo lembe maeno, ewodho Yesu woko man ebedo iwi kom mi pokolembe ma n’i kaka ma julwong’o Lela ma jutelo ku kidi, ento ku dhu Juebrania, Gabatha. 14 Nwang’u nindo maeno ubino ceng’ mi Yikiri mi Kadhukuwijo; ubino i kum saa abusiel mi dieceng’. E eyero ni Juyahudi kumae: “Wunen! Ubimo mwu!” 15 Re gilund gikok ma tek kumae: “Dare cen! Dare cen!” Gure iwi yen!* Pilatho uwacu igi kumae: “Aneg ubimo mwu?” Judongo mi julam gidwoko kumae: “Wambe kud ubimo mange m’uweko Kaisari.” 16 Egam emiye i cing’gi kara jugure iwi yen.

E gigame man gicidho kude. 17 Eyeyo yen mi can* pare gire man ecidho kude kaka ma julwong’o Kakar upokowic, ma ku dhu Juebrania ke julwong’o, Golgotha. 18 Kuca giwok gigure iwi yen ku dhanu mange ario i ng’ete kun ku kun, Yesu ke i diere. 19 Pilatho ukiewo bende wec moko man ekethe i thiwi yen mi can.* Wecne ubino kumae: “Yesu ma Janazarethi, Ubimo mi Juyahudi.” 20 Juyahudi dupa gisomo wec maeno pilembe kaka ma juguro Yesu i iye iwi yen ubino ceng’ini kud adhura, man jukiewo wecne ku dhu Juebrania, ku dhu Latin, man ku dhu Jugiriki. 21 Ento judongo mi julam mi Juyahudi giwacu ni Pilatho kumae: “Kud ikiew nia, ‘Ubimo mi Juyahudi,’ ento nia eyero kumae: ‘An a Ubimo mi Juyahudi.’” 22 Pilatho udwoko kumae: “Gin m’akiewo nwang’u adaru kiewo.”

23 E kinde ma juaskari gidaru guro Yesu iwi yen, giting’o bongu pare ma yo woko man gipoko iye ni ang’wen, askariman umaku thenge acel, man giting’o bende bongu pare ma yor i iye. Ento bongu ma yor i iyene ubino mbe ku wang’ kwocone, pilembe jucwiye niai i wiye nitundo piny. 24 Pieno giweco i kindgi kumae: “Kud wayecu iye, ento wagoyue i ngala pi ning’eyo nia ebibedo pa ng’a.” Lembe maeno utimere pi nipong’o Lembagora m’uwacu kumae: “Gipoko i kendi para i kindgi, man gigoyo bongu para ku gagi.” De andha juaskari gitimo lembe maeno.

25 Nwang’u min Yesu man nyamin min gicungo ceng’ini i kum yen mi can* pa Yesu; Maria ma ci Klopa giku Maria Magdalene de gibedo nuti. 26 Saa ma Yesu uneno min man jalub m’emaru gicungo ceng’ini keca, ewacu ni min kumae: “Dhaku, nen Wodi!” 27 I ng’eye, edok eyero ni jalub maeno kumae: “Nen meru!” E niai saa nica, jalub maeno uting’e man edok kude i pacu pare.

28 I ng’ei lembe maeno, kinde ma Yesu ung’eyo nia gin ceke udaru timere kara lembagora upong’ kakare, ewacu kumae: “Rieu ubenega.” 29 Agulu moko ubino nuti keca ku pigulok ma wac bik i iye. Pieno gitwiyo umvodu iwi yen moko ma ve tiend bel,* giroye i pigulok ma wacne man gikethe i dhu Yesu. 30 Kinde ma Yesu ubilo pigulok ma wacne, eyero kumae: “Edaru timere kakare!” Man ekulo wiye, e cwinye mwony.*

31 Calu m’ebino ceng’ mi Yikiri, Juyahudi gikwayu nia Pilatho uketh jutur tiend ju ma juguro iwi yen man julorgi cen, kara kumgi kud udong’ iwi yen mi can i ceng’ Sabatu, (kum Sabatu maeno ubino Sabatu ma dit). 32 Pieno juaskari gibino man gituro tiend ng’atu ma kwong’a man tiend ng’atu ma kucelo ma gibino iwi yen i ng’et Yesu. 33 Re kinde ma gitundo i bang’ Yesu, gineno nia edaru tho, pieno gituro ngo tiende. 34 Ento ng’atu acel m’i kind juaskari ucobo ng’ete ku tong’, e ndhundhu rimo ku pii uwok. 35 Man ng’atu m’uneno lembene umiyo lembatuca maeni, man lembatuca pare en e mandha man eng’eyo nia lembe m’eyero utie mandha, kara wun bende wuyii. 36 Lembe maeno utimere kara lembagora upong’ kakare, m’uwacu kumae: “Kadok cogone acel de mbe ma bitur.”* 37 Bende lembagora mange de uwacu kumae: “Gibineno bang’ ng’atu ma gicobo ku tong’.”

38 I ng’ei lembe maeno, Yosefu mir Arimathea m’ubino jalub pa Yesu ento i amung’ ni kum lworo mi Juyahudi, ubin ukwayu Pilatho ka nyo ecopo loro avuj Yesu, man Pilatho uyiyo ire. E ebino man eloro avuje. 39 Nikodem ma tie ng’atu m’ugam ubino i bang’e ku kwong’a ku diewor de ubino. Ekelo mo ma liw ma ng’wice ng’ar ma jujebo kud ukozoro, ma romo kilo pier adek (30). 40 Pieno giting’o avuje, giriwe ku bongu ma nwang’ man giketho lum ma ng’wice ng’ar i bongu ma nwang’ne calku kura mi kuny mi Juyahudi. 41 Nwang’u podho moko ubino nuti kaka ma jugure* i iye, man kabuli moko ma nyen ma fodi juroyo ngo ng’atu moko i iye de ubino nuti i podhone. 42 Calu m’ubino ceng’ mi Yikiri mi Juyahudi man kabuli de ubino ceng’ini, gigam giroyo Yesu i iye.

20 I nindo ma kwong’a mi yenga, Maria Magdalene ubino con i dhu kabuli ma fodi piny col, man ewok eneno nia judaru ng’ielo kidi cen kud i dhu kabuli. 2 Pieno, eringo ku ng’wec i bang’ Simon Pethro giku jalub ma kucelo ma Yesu umaru, man ewacu igi kumae: “Giwodho Rwoth kud i kabuli, man wang’eyo ngo kaka ma gikethe i iye.”

3 E Pethro giku jalub ma kucelo gicidho i dhu kabuli. 4 Juario maeno gicaku ringo karacelo, ento jalub ma kucelo uringo ma tek nikadhu Pethro man elar etundo i dhu kabuli. 5 Ewok ekulo kore ekemo i kabuli, re eneno bongu ma nwang’ kende m’unuti keca, ento emondo ngo i iye. 6 I ng’eye, Simon Pethro ma nwang’u ubelubo ng’eye de utundo, man ewok emondo i kabuli. E eneno bongu ma nwang’ ubedo keca. 7 Bongu ma nwang’u ubino i thiwiye ubedo ngo karacelo ku bongu ma juriwo ko kume, ento judole man jukethe kende. 8 I ng’eye, jalub ma kucelo m’ular utundo i dhu kabuli de umondo i iye, e eneno man eyiyo. 9 Kum nwang’u fodi ginyang’ ungo i lembagora m’uwacu nia ecikere nicer kud i kind ju m’utho. 10 Pieno julub gigam gidok i pacu migi.

11 Re Maria ucungo asu woko ceng’ini ku kabuli m’ebewak. Saa ma fodi ebewak, ekulo kore man ekemo i kabuli, 12 e eneno jumalaika ario ma gikendo bongu ma tar gibedo kaka ma jular juketho avuj Yesu i iye, acel ubedo yor i thiwiye, acel ke ubedo yor i tiende. 13 E giwacu ire kumae: “Dhaku, ibewagu ang’o?” Edwoko igi kumae: “Juting’o Rwoth para, man ang’eyo ngo kaka ma jukethe i iye.” 14 I ng’ei m’eyero gin maeno, eloko wang’e man eneno Yesu ucungo keca, ento enyang’ ungo nia tie Yesu. 15 Yesu uyero ire kumae: “Dhaku, ibewagu ang’o? Ibesayu ng’a?” En ebino paru nia utie jarafur, man ewacu ire kumae: “Jadit, tek iting’e in nyuth ira kaka m’ikethe i iye, man abicidho game.” 16 Yesu uyero ire kumae: “Maria!” E eloko wang’e man eyero ire ku dhu Juebrania kumae: “Raboni!” (Ma thelembene tie, “Japonji!”) 17 Yesu uwacu ire kumae: “Kud igwaka, kum fodi aidho ngo i bang’ Wego. Ento cidh i bang’ umego para man iyer igi nia, ‘abeidho i bang’ Vwa man i bang’ Wegwu, i bang’ Mungu para man Mungu mwu.’” 18 Maria Magdalene ugam ucidho man etero lembene ni julub, ewacu kumae: “Aneno Rwoth!” E ekoro igi gin ma Yesu uyero ire.

19 Reto mi cing’ nica m’ubino nindo ma kwong’a mi yenga, man dhugola de ubedo atwiya kaka ma julub gicokiri i iye ma gibelworo ko Juyahudi, Yesu ubino man ecungo i kindgi, ewacu igi kumae: “Kwiyocwiny ubed kudwu.” 20 I ng’ei m’eyero lembe maeni, enyutho cinge man ng’ete igi. E anyong’a unego julub lee kinde ma gineno Rwoth. 21 Yesu uwacu igi kendo kumae: “Kwiyocwiny ubed kudwu. Calu ma Wego uora, an de abeorowu.” 22 I ng’ei m’eyero lembe maeni, eyuyo i wigi man ewacu igi kumae: “Wunwang’ tipo ma leng’. 23 Tek wuweko dubo pa ng’atu moko, dubone biwekere; tek wuweko ngo dubo pa ng’atu moko ke, dubo parene biwekere ngo.”

24 Ento Thoma m’ubino ng’atu acel m’i kind juapar ario (12), ma jubed julwong’o nia Rut ubedo mbe karacelo kugi kinde ma Yesu ubino. 25 Pieno julub mange giyero ire kumae: “Waneno Rwoth!” Ento eyero igi kumae: “Ka fodi aneno ngo poyo mi musumali ma n’i cinge man aroyo ngo lweta i wang’ poyo mi musumaline, aroyo ngo cinga de i wang’ ng’ete, abiyiyo ngo nyanok de.”

26 Nindo abora i ng’eye, julubne gibedo kendo i ot man Thoma ubedo karacelo kugi. Yesu ubino ma ke nwang’u dhugola tie atwiya man ecungo i kindgi ewacu kumae: “Kwiyocwiny ubed kudwu.” 27 I ng’eye, eyero ni Thoma kumae: “Keth lweti kakae man inen cinga, man ting’ cingi iroy i ng’eta, e iwek nibedo ku jiji* ento yii.” 28 Thoma udwoko ire kumae: “Rwoth para man Mungu para!” 29 Yesu uwacu ire kumae: “Calu ma dong’ idaru nena, nyo iyiyo? Ju ma gilar giyiyo ma fodi gineno ngo gi jumutoro.”

30 I andha, Yesu utimo udu mange de dupa i wang’ julub, ma jukiewo ngo i kithabu m’adola maeni. 31 Ento jukiewo lembe maeni kara wuyii nia Yesu en e Kristu ma Wod Mungu, man kara ka wuyiyo wunwang’ kwo ni kum nyinge.

21 I ng’ei lembe maeno, Yesu unyuthere* kendo ni julub i dhu nam mi Tiberia. Enyuthere i ayi ma e: 2 Nwang’u Simon Pethro gibino karacelo ku Thoma (ma julwong’o Rut), Nathanael m’uai i Kana mi Galilaya, wot Zebedayo, man julubne mange ario. 3 Simon Pethro uwacu igi kumae: “Abecidwaru rec.” Gin de giwacu ire kumae: “Wacidh wakudwu.” E gicidh giidho yei, re diewor nica traka gimaku ngo piny moko.

4 Ento kinde ma piny ubelero, Yesu ucungo i dhu wat, re julub ginyang’ ungo nia eca ubino Yesu. 5 Egam ewacu igi kumae: “Awiya, wutie ku piny moko* m’acama de?” Gidwoko kumae: “Umbe.” 6 Ewacu igi kumae: “Wubol voi yor i ng’et yei mir acwic man wubinwang’u piny moko.” Pieno gigam gibolo voi, ento gicopo ngo nipeye i yei pilembe rec ubino lee dit. 7 I ng’eye, jalub ma Yesu umaru uwacu ni Pethro kumae: “Eca tie Rwoth!” Kinde ma Simon Pethro uwinjo nia eca Rwoth, ekendo* bongu pare ma yo woko kum ebino muneru,* man epiey i nam. 8 Ento julub mange gibino i yei ma nyanok ma gibepeyo voi ma rec dupa iye, kum gibino bor ungo ku ng’om, i metre ma romo pier abung’wen (90).

9 Kinde ma gitundo i dhu wat, gineno cugimac m’ubogere keca, ku rec i wiye man mukathi. 10 Yesu uyero igi kumae: “Wukel rec moko ma wuai wumaku kawoni.” 11 E Simon Pethro uidho i yei man epeyo voi ma rec ma dongo bik i iye i dhu wat, recne ubino dak acel ku pier abic wi adek (153). Kadok rec ubino dupa de, re voi uyec ungo. 12 Yesu uyero igi kumae: “Wubin wucam.” Ento jalubne acel de mbe m’ubino ku tegocwiny mi penje kumae: “Itie ng’a?” Pilembe ging’eyo nia etie Rwoth. 13 Yesu ubino man eting’o mukathi emiyo igi, man emiyo igi bende rec. 14 Eno ubino wang’ mir adege ma Yesu uwok ni julub i ng’ei m’ecer kud i kind ju m’utho.

15 Kinde ma gidaru camu, Yesu uwacu ni Simon Pethro kumae: “Simon wod Yohana, nyo imara nisagu piny maeni?” Edwoko ire kumae: “Eyo Rwoth, ing’eyo nia ameri.” Eyero ire kumae: “Mii cam ni nyithi rombe para.” 16 Yesu uyero ire kendo wang’ mir arionde kumae: “Simon wod Yohana, nyo imara?” Edwoko ire kumae: “Eyo Rwoth, ing’eyo nia ameri.” Ewacu ire kumae: “Kway rombe para ma thindho.” 17 Yesu uyero ire wang’ mir adege kumae: “Simon wod Yohana, nyo imara?” Can ugam umondo i Pethro pilembe epenje wang’ mir adege kumae: “Nyo imara?” Pieno eyero ire kumae: “Rwoth, ing’eyo lembe ceke; ing’eyo nia ameri.” Yesu uwacu ire kumae: “Mii cam ni rombe para ma thindho. 18 Andhandha abeyero iri nia, kinde ma fodi ibino aradu, ibed ikendo bongu i kumi in giri man ibed iwotho kaka ceke m’imito. Ento saa m’ibitii, ibirieyo cingi man ng’atu mange re ma bironyo bongu i kumi man biteri kaka m’imito ngo.” 19 Eyero lembe maeno pi ninyutho kit tho m’ebitho ko pi niyungo Mungu. I ng’ei ma Yesu uyero gin maeni, ewacu ire kumae: “Mediri nilubo toka.”

20 Pethro ulund uloko wang’e man eneno jalub ma Yesu umaru ubelubo tokgi, en e ng’atu m’ugam ujeng’ bende i kor Yesu i dhu cam mir uthieno man upenje kumae: “Rwoth, ng’a ma bicibi?” 21 Kinde ma Pethro unene, ewacu ni Yesu kumae: “Rwoth, ng’atu ma e ke lembe pare nenedi?” 22 Yesu uwacu ire kumae: “Tek etie yeny para nia ebed unuti nitundo m’abibino, lembe peri ke tie ang’o? In mediri nilubo toka.” 23 E wec maeno uyik i kind umego nia jalub maeno bitho ngo. Re Yesu uyero ngo nia ebitho ngo, ento ewacu kumae: “Tek etie yeny para nia ebed unuti nitundo m’abibino, lembe peri ke tie ang’o?”

24 Eni tie jalub m’umiyo lembatuca iwi lembe maeni man m’ukiewo bende lembe maeni, man wang’eyo nia lembatuca pare utie andha.

25 I andha lembe mange de tie dupa ma Yesu utimo, ma ka nwang’u jukiewogi ceke kubang’gi kubang’gi, aparu nia nwang’u ng’om zoo de copo romo ngo kithabu m’adola ma jukiewone.