BARUA NI JUGALATIA

1 Niai kud i bang’ Paulo ma jakwenda, ma dhanu ngo re m’ukethe jakwenda, ento Yesu Kristu man Mungu ma Wego m’ucere ku kind ju m’utho re ma gikethe, 2 man niai bende kud i bang’ umego ceke ma ani kugi, ni cokiri mi Galatia:

3 Wek bero ma yawe mbe man kwiyocwiny pa Mungu ma Wegwa man pa Rwoth Yesu Kristu ubed kudwu. 4 Emiyere gire pi dubo mwa kara ebodhwa kud i ng’om maeni* ma rac nimakere ku yeny pa Mungu ma Wegwa, 5 m’uromo ku dwong’ rondo ku rondo. Amen.

6 Iya ubewang’ lii pilembe wubeweko pio dit Ng’atu m’ulwong’owu ni kum bero ma yawe mbe pa Kristu, man wucaku bewinjo kit lembanyong’a mange. 7 Tie ngo nia lembanyong’a mange unuti; ento dhanu moko tie ma gibewingo wiwu man gibemito ginyoth lembanyong’a ma juberweyo iwi Kristu. 8 Ento nik’ebed wan kadi malaika m’uai i polo ma birweyo lembe m’ukoc ku lembanyong’a ma warweyo iwu, kwong’ ubed i wiye. 9 Calu ma wadaru yero, abeyere kendo, nia ng’atu m’uberweyo lembe m’ukoc ku lembanyong’a ma wudaru yiyo, kwong’ ubed i wiye.

10 Nyo i andha abemito afoy i dhanu kunoke i Mungu? Kadi nyo amito anyay anyong’a i dhanu? Ka nwang’u abenyayu anyong’a asu i dhanu, nwang’u atie ngo ng’eca pa Kristu. 11 Umego, amito wung’ey nia lembanyong’a m’agam arweyo iwu uai ungo i bang’ dhanu; 12 kum anwang’e ngo niai kud i bang’ ng’atu moko man juponja kude aponja de ngo, ento Yesu Kristu re m’unyuthe ira.

13 Ma jiji mbe, wuwinjo pi timo ma yang’ abino ko i dini mi Juyahudi, maram amedara ko ninyayu ragedo ku rac* i kum cokiri pa Mungu man ninyothe cen; 14 bende abedo timo mediri lee i dini mi Juyahudi nikadhu dhanu dupa mi thek para ma oro migi rom ku para, man abino kud amora lee dit pi suru mi kwaru para. 15 Ento kinde ma Mungu m’anyolara ni kume* man m’ulwong’a ni kum bero pare ma yawe mbe unwang’u ya e ber 16 nia enyuth Wode nikadhu kud i bang’a kara arwey lembanyong’a i wiye ni dhanu mi thek mange, acidho ngo ndhundhu nica nipenjo juk i bang’ ng’atu moko;* 17 kadi aidho ngo malu i Yeruzalem i bang’ dhanu ma gilar gidoko ira jukwenda, ento acidho i Arabia man i ng’eye adwogo i Dameski.

18 Oro adek i ng’eye, aidho i Yeruzalem pi niliewo Kefa,* man wawok wabedo wakude pi nindo apar abic (15). 19 Ento aneno ngo kum jukwenda mange, m’uweko Yakobo m’umin Rwoth. 20 Pi lembe maeni m’abegoro iwu, ayero iwu i wang’ Mungu nia acwayu ndra ngo.

21 I ng’eye, acidho i ng’om mi Siria man Kilikia. 22 Ento nwang’u fodi julub pa Kristu ma gin’i cokiri mi Yudea ging’eya ngo. 23 Gibed giwinjo kende kende ma jumange ubeyero kumae: “Jalwo ma yang’ con ubed unyayu ragedo i kumwa ca, tin dong’ eberweyo lembanyong’a iwi yiyoyic m’ebed emito nia ejig there cen!” 24 Pieno, gicaku yungo Mungu pira.

2 Oro apar ang’wen (14) i ng’eye, wagam waidho kendo i Yeruzalem waku Barnaba, ating’o Tito bende wacidho wakude. 2 Acidho kuca kum Yesu unyutho ira nia acidhi, man awok apedho lembanyong’a m’aberweyo i kind dhanu mi thek mange i wang’gi. Ento awok akoro lembene i amung’ i wang’ dhanu mir awora, kara ang’ey ka nyo aberingo kunoke nyo adaru ringo ngo mananu. 3 Ento kadok Tito ma wawotho wakude judiye ngo nia etim yaa i kume, kadok nwang’u e Jagiriki de. 4 Lembe maeno uwok ni kum umego mi ndra ma gimondo nyalwe i cokiri calu julib, kara ging’ey pi bedagonya ma watie ko wa julub pa Kristu Yesu. Giyenyo gidwokwa kendo ni ng’eca mi Cik, 5 enre wawinjogi ngo man wajwigara ngo igi kadok nyanok de,* kara lemandha mi lembanyong’a ucung ma tek i kindwu.

6 Ento dhanu maeno ma gibino nen nia pigi tie tek, kit kwo ma gilar gibino ko i wang’e utie ira ni gin moko ngo, kum Mungu neno ngo dhanu nimakere ku gin ma nen yo woko; dhanu maeno mir awora giponja ngo ku gin moko ma nyen. 7 Tung’ ku maeno, ginyang’ nia jumiyo ira lembanyong’a arwey ni ju ma jutimo ngo yaa i kumgi tap calu ma juketho Pethro urwey ni ju ma jutimo yaa i kumgi. 8 Kum ng’atu ma rom m’umiyo tego ni Pethro kara ebed jakwenda ni dhanu ma jutimo yaa i kumgi, re m’umiyo ira bende tego kara abed jakwenda ni dhanu mi thek mange. 9 E kinde ma ginyang’ nia bero ma yawe mbe umiyere ira, Yakobo, Kefa* man Yohana, ma gibino nen ni mbegi, gimiyo cing’gi ma yor acwic iwa waku Barnaba pi ninyutho nia gidiko cing’gi kudwa, kara wacidh i bang’ dhanu mi thek mange ento gin i bang’ dhanu ma jutimo yaa i kumgi. 10 Gikwayuwa kende kende nia kud wawil ku jucan, man aii nitimo kumeno ku cwinya ceke.

11 Ento kinde ma Kefa* ubino i Antiokia, ajuke kamaleng’, pilembe ubino nen ngbeng’ nia etimo kosa.* 12 Kum ma fodi dhanu moko ma giai i bang’ Yakobo gitundo ngo, ebed ecamu ku dhanu mi thek mange; ento kinde ma gitundo, eweko nicamu kugi man ekoyere kende, pilembe ebino lworo ju ma jutimo yaa i kumgi. 13 Dong Juyahudi mange de gicaku paliri* kumeno, uketho gitelo kadok Barnaba de umondo i umbili migine. 14 Ento kinde m’aneno nia gibewotho ngo nimakere ku lemandha mi lembanyong’a, ayero ni Kefa* i wang’ dhanu ceke kumae: “Tekene in m’itie Jayahudi ibekwo calu dhanu mi thek mange ento ungo calu Jayahudi, pirang’o ibediyo dhanu mi thek mange nia gikwo nimakere ku kura mi Juyahudi?”

15 Wan ma wa Juyahudi m’anyola ento ungo dhanu mi thek mange ma gi judubo, 16 wang’eyo nia jukwanu ng’atini ni won bedopwe kende kende nikum yiyoyic m’etie ko i Yesu Kristu, ento ungo ni kum woro Cik. Pieno, watie ku yiyoyic i Kristu Yesu kara jukwanwa ni weg bedopwe ni kum yiyoyic mwa i Kristu, ento ungo ni kum woro Cik, pilembe jubikwanu ngo ng’atu* moko acel de ni won bedopwe ni kum woro Cik. 17 Ento ka junwang’uwa bende nia wa judubo ma ke wabesayu nia jukwanwa ni weg bedopwe ni kum Kristu, nyo eno nyutho nia Kristu re m’ubetimo tic mi dubo? Nyanok de ngo! 18 Kan adok abegiero kendo gin m’alar arungo, nwang’u abeturo cik. 19 Kum i Cik atho i lembe m’uneno Cik, kara adok kwo ni Mungu. 20 Jugura iwi yen karacelo ku Kristu. Dong’ etie an kendo ngo m’abekwo, ento Kristu re m’ubekwo i iya. I andha, kwo m’akwo kawono i kum utie ni kum yiyoyic m’atie ko i Wod Mungu m’umara man m’umiyere gire pira. 21 Abekwero ngo* bero ma yawe mbe pa Mungu, kum ka dhanu bibedo weg bedopwe ni kum Cik, nwang’u Kristu utho mananu.

3 E Jugalatia, wun ma rieko mwu mbe! Ng’a m’uwondo weng’wu, wun ma junyutho Yesu Kristu iwu kamaleng’ ni ng’atu ma juguro iwi yeni? 2 Amito akeapenjwu* ku penji ma e kende: Nyo wunwang’u tipo pilembe wubeworo Cik kunoke pilembe wunyutho yiyoyic i lembe ma wuwinjo? 3 Nyo rieko mwu mbe magwei? I acaki wubed wujenguru iwi tipo ma leng’; pirang’o ke kawoni wulund wubelubo rieko mi dhanu? 4 Nyo can ma wuneno e zoo ubino mi mananu? An re ang’eyo nia ebino ngo mi mananu. 5 Dong’ nyo ng’atu m’ubemiyo iwu tipo man m’ubetimo udu i kindwu ubetime pilembe wubeworo Cik kunoke nyo pilembe wunyutho yiyoyic i lembe ma wuwinjo? 6 Tap calu Abraham “ubedo ku yiyoyic i Yehova, man jukwane ire ni bedopwe.”

7 Wung’eyo cuu nia ju ma gitie ku yiyoyic re ma gi wot Abraham. 8 Mungu ular uyero oro dupa i wang’e i Lembagora pare nia ebikwanu dhanu mi thek mange ni weg bedopwe ni kum yiyoyic migi, uketho elar eyero lembanyong’a ma e ni Abraham: “Nikadhu kud i beng’i, thek ceke binwang’u mugisa.” 9 Pieno, dhanu ma gitie ku yiyoyic gibenwang’u mugisa karacelo kud Abraham m’ubino ku yiyoyic.

10 Dhanu ceke ma giketho genogen migi iwi Cik kwong’ n’i wigi, kum egorere kumae: “Kwong’ ubed iwi ng’atu moko ci m’ubemedere ngo niworo lembe ceke m’ugorere i kithabu mi Cik.” 11 M’umedo maeno, ubenen kamaleng’ nia Mungu kwanu ngo ng’atu moko acel de ni won bedopwe ni kum Cik, pilembe egorere nia “won bedopwe bikwo ni kum yiyoyic.” 12 Enre Cik ujengere ngo iwi yiyoyic. Kum egorere kumae: “Ng’atu m’ubetimo kumeno bikwo ni kumgi.” 13 Kristu ung’iewowa man edoko alam kakawa pi nigonyowa kud i ther alam mi Cik, kum egorere kumae: “Alam n’i wi ng’atu moko ci ma juliero iwi yen.” 14 Lembuno utimere kara thek unwang’ mugisa pa Abraham ni kum Kristu Yesu, wek kara wanwang’ tipo ma jung’olo pire nikadhu kud i yiyoyic mwa.

15 Umego, akemaku lapor moko: I kurajo ka judaru timo lembariba moko, ng’atu moko mbe ma romo ture kadi ma copo medo lembe mange i wiye. 16 Mungu utimo lembang’ola ni Abraham man ni nyakware.* Lembagora uyero ngo nia, “ni nyikweyi,” calu ve ni dhanu dupa. Ento eyero nia, “ni kodhi peri,” calu ni ng’atu acel ma en e Kristu. 17 M’umedo maeno, abeyero bende kumae: Cik m’udong’ utundo oro dak ang’wen ku pier adek (430) i ng’eye uturo ngo lembariba ma Mungu ular utimo, man ethiro ngo lembang’ola. 18 Kum ka giralaga ucungo iwi Cik, nwang’u dong’ ecungo ngo iwi lembang’ola; ento Mungu unyutho berocwinye ni Abraham kum emiye ire nikadhu kud i lembang’ola.

19 Kadong’ Cik ke mi thelembang’o? Jumiye kara eketh dubo unen kamaleng’ nitundo ma kodhi ma jutimo ire lembang’ola bitundo ko; man jumiye nikadhu kud i bang’ jumalaika i cing’ jarib kindjo. 20 Nie kara jarib urib kindjo, mito ngo ng’atini ubed en kende, ento Mungu tie en kende. 21 Nyo eno ubenyutho nia Cik utie jadhu lembang’ola pa Mungu? Nyanok de ngo! Kum ka nwang’u jumiyo cik moko ma copo miyo kwo, nwang’u jubekwanu dhanu ni weg bedopwe ni kum Cik. 22 Ento Lembagora uumo ba gin ceke i the loc mi dubo, kara weg yiyoyic ginwang’ piny ma beco ma jung’olo ni ju m’utie ku yiyoyic i Yesu Kristu.

23 Ento kinde ma nwang’u fodi yiyoyic utundo ngo, juketho wabedo akura i the Cik man juciko bang’wa ma wabekuro ko yiyoyic ma binyuthere. 24 Pieno Cik ubino jakur* mwa m’ubeterowa i bang’ Kristu, kara jukwanwa ni weg bedopwe ni kum yiyoyic. 25 Ento kawoni ma dong’ yiyoyic udaru tundo, wambe ku yeny pa jakur.*

26 I andha, wun ceke wutie wot Mungu ni kum yiyoyic ma wutie ko i Kristu Yesu. 27 Kum wun ceke ma wulimo batizo i Kristu wuronyo Kristu. 28 Pieno, tung’ tung’ umbe i kind Jayahudi ku Jagiriki, kadi i kind ng’eca ku ng’atu ma tie agonya, man i kind nico ku dhaku, pilembe wun ceke wutie acel i Kristu Yesu. 29 M’umedo maeno, tek wu pa Kristu, nwang’u andha wutie kodhi pa Abraham, jucampacu calku lembang’ola.

4 Ento abewacu nia ka fodi jacampacu tie nyathin ma nyanok ci, tung’ tung’ umbe i kindgi ku ng’eca kadok nwang’u etie rwoth mi gin ceke de, 2 enre en’i the ng’ol mi junen wi tic man mi jukurpiny nitundo i nindo ma won ular uketho. 3 Rom rom kumeno, wan bende kinde ma wabino awiya, wabino ng’eca mi paru man mi timo mi ng’om. 4 Ento kinde ma nindo m’ular ukethere uromo, Mungu uoro Wode ubin unyolere nikadhu kud i bang’ dhaku, man enyolere i the Cik 5 kara ecul welpiny m’ukwayere pi nigonyo ju ma gin’i the Cik, wek kara Mungu udwokwa ni wote.

6 Kawoni ma dong’ wudoko wot, Mungu uoro tipo pa Wode i adundewa man tipone ubekok kumae: “Abba,* Vwa!” 7 Pieno dong’ itie ngo ng’eca ento itie wod; man kan itie wod, itie bende jacampacu ni kum Mungu.

8 Ento kinde ma nwang’u fodi wung’eyo ngo Mungu, wubino ng’eca mi mungu m’araga ma i andha gitie ngo mungu. 9 Kawoni ma dong’ wudaru ng’eyo Mungu kunoke ma dong’ Mungu ung’eyowu, pirang’o ke wumito wudok wulub kendo piny ma tijgi mbe mi ng’om maeni man wumito wudok ng’eca migi kendo? 10 Wubeworo mii mandha ceng’, dwi, rundi man oro. 11 Lworo benega piwu nia ve tic ceke m’asendara ko piwu ubecibedo mananu.

12 Umego, abekwayuwu wudok calu an; kum an bende alar abino calu wun. Wutimo ngo ira lembe moko ma rac. 13 Wung’eyo nia twoyo m’ubino senda re m’uketho anwang’u kaka mi rweyo iwu lembanyong’a wang’ ma kwong’a. 14 Man kadok twoyo parane ubino iwu ni amulaic de, re wucaya ngo kadi aringa de wuringa ngo;* ento wujola calu malaika pa Mungu, calu Kristu Yesu. 15 Mutoro maeno ma wubino ko ni kani? Kum abetuco iwu nia ka nwang’u ebino lembe ma copere, nwang’u wugolo weng’wu wumiyogi ira. 16 Dong’ nyo adoko jakwor mwu pilembe abeyero iwu lemandha? 17 Gibethokowu kud amora, ento pi thelembe ma cuu ngo. Gibemito gikoywu kuda kara wulub tokgi kud ava. 18 Ento saa ceke etie rac ungo ka ng’atu moko ubethokowu kud amora m’etie ku thelembe ma ber kadok saa m’ambe karacelo kudwu, 19 awiya para ma thindho, m’adok awinjo kendo remo mi nyodo piwu nitundo ma Kristu udong ko i iwu. 20 Ka nwang’u kawoni acopo bedo karacelo kudwu, nwang’u abeciweco iwu i ayi mange, kum ang’eyo ngo nia ayer iwu ang’o.

21 Wukeyer ira, wun ma wumito wubed i the cik: Wuwinjo ngo lembe ma Cik uyero? 22 Ku lapor, Lembagora uyero nia Abraham ubino ku wote ario: Acel m’enyolo ku dhaku ma ng’eca man ma kucelo ke m’enyolo ku dhaku ma tie agonya; 23 ento nyathin ne ma pa dhaku ma ng’eca, junyole i ayi ma junyolo ko dhanu mange bende;* man nyathin ma pa dhaku ma tie agonya, junyole ni kum lembang’ola. 24 Lembe maeno m’utimere utie lanyuth; kum mon maeno ginyutho lembariba ario: Acel utie mi got Sinai m’unyolo awiya ni ng’eca, man etie ve Hagar. 25 Hagar nyutho got Sinai ma nwang’ere i Arabia, man jupore ku Yeruzalem ma kawoni; kum etie ng’eca kud awiya pare. 26 Ento Yeruzalem ma malu utie agonya man etie megwa.

27 Kum egorere kumae: “Anyong’a negi in m’i dhaku ma jamugumba m’unyol ungo; kok kud anyong’a in m’i dhaku m’inwang’u ngo litho mi nyodo; kum awiya pa dhaku ma julandu upong’ nikadhu pa dhaku ma cware nuti.” 28 Ento wun umego, wutie awiya mi lembang’ola rom kud Isak. 29 Re tap calu ma wod ma junyolo ku kum ubed unyayu ragedo i kum wod ma junyolo ni kum tipo, e kumeno bende kawoni. 30 Enre giragora uyero ang’o? “Riem bong’ ku wode, kum nyathin pa bong’ bicamu ngo pacu karacelo ku nyathin pa dhaku ma tie agonya.” 31 Pieno umego, watie awiya pa dhaku ma tie agonya, ento ungo awiya pa dhaku ma ng’eca.

5 Kum pi bedagonya maeno re ma Kristu ugonyowa. Pieno, wucung nging’ nging’ man kud wuwek judok jutwiwu kendo i the mberembere mi ng’eca.

2 Wuwinji! An a Paulo ayero iwu nia tekene wubeketho jutim yaa i kumwu, tij Kristu bibedo mbe iwu. 3 Abeyero ni ng’atu moko ci m’ubeketho jutim yaa i kume nia ecikere niworo lembe ceke ma Cik ung’olo. 4 Wun ma wubeyenyo ya jukwanwu ni weg bedopwe ni kum Cik, wudaru weko Kristu man wukoyuru bor kud i kum bero pare ma yawe mbe. 5 Ento piwa wan, ni kum tipo, wabekuro kud ava bedopwe ma watie ku genogen nia wabinwang’u ni kum yiyoyic. 6 Kum ni julub pa Kristu Yesu, kadok yaa kadi yaa ngo kony migi mbe, ndhu yiyoyic kende m’ubenyuthere nikadhu kud i mer.

7 Wubino ringo ma ber. Dong’ ng’a ke m’uwok ulund ucerowu kara kud wumeduru ku woro lemandha? 8 Kit paru maeno mi thokojo uai ungo i bang’ Ng’atu m’ulwong’owu. 9 Thobi ma nyanok thumo i kwen ceke. 10 Cwinya tek nia wun ma wutie i acel ku Rwoth wubiparu ngo lembe m’ukoc; ento ng’atu m’ubewingo wiwu binwang’u pokolembe m’uromo kude nik’ebed ng’a. 11 Ento pira an, umego, ka nwang’u abemedara nirweyo pi yaa, pirang’o ke jubenyayu ragedo asu i kuma? Kan e kumeno, nwang’u dong’ yen mi can* utie ngo cudho mi kier. 12 Abemito nia dhanu ma gibenyotho wiwu no giketh jukab watkumgine cen.*

13 Umego, julwong’owu kara wubed agonya; ento kud wuketh bedagonya mwune udok iwu ni kaka mi lubo tok awanya mi kum, enre ni kum mer ng’atuman utim ni wadi calu ng’eca. 14 Kum Cik ceke upong’o* i lembang’ola acel ma e: “Icikiri nimaru wedu calu in giri.” 15 Ento tek wubekeyuru man wubemvoruru i kindwu, wubed ku weng’wu wumaru deruru i kindwu.

16 Ento ayero kumae: Wumeduru niwotho nimakere ku tipo, e wubipong’o ngo awanya mi kum nyanok de. 17 Pilembe gin ma kum ubeyenyo tipo mito ngo, man gin ma tipo ubeyenyo kum mito ngo; giki ario maeni gi jukwor i kindgi, ketho wucopo timo ngo gin ma nwang’u wumito wutim. 18 M’umedo maeno, tekene tipo ubetelo wiwu en, nwang’u wumbe i the cik.

19 Ento tic mi kum ginen kamaleng’, man gitie lembsasa mi tarwang’,* sasa, timo mir acidi man mi thwon,* 20 rwo ni ayi gin m’acwiya, weco ku tipo,* adegi, dhau, nyeko, kwinyo, teliri, pokiri, yic ma tung’ tung’, 21 kumira, mero, foc ma reco* ku wagi gin ma kumeni. Abecimowu iwi gin maeni, tap calu m’alar acimowu i wang’e, nia ju ma gitimo wagi gin ma kumeni gimondo ki ngo* i Ker pa Mungu.

22 Ento nying tipo en e mer, mutoro, kwiyocwiny, mwonyolembe hai, bedo ber ku dhanu, berocwiny, yiyoyic, 23 molcwiny, kweriri gijo. Cik umbe i kum wagi gin ma kumeni. 24 M’umedo maeno, ju ma gi pa Kristu Yesu giguro kum kud awanya man avane ma rac iwi yen.

25 Tek wabekwo nimakere ku tipo, wamedara bende niwotho nimakere ku tipo. 26 Dong’ kud wadodara giwa, wamaru royo alaralara man kumira i kindwa.

6 Umego, tek ng’atu moko ukwanyu yo ma rac m’enyang’ ungo, wun ma wuteng’ini i tipo wuii nidwogo ng’atu maeno i yo m’atira, re ku molcwiny. Ento bed ku weng’i i kumi giri, maru in de ibipodho i abidhe. 2 Wumeduru nikonyuru i kindwu i lembe m’ubenurowu; i ayi maeno re ma wubipong’o cik pa Kristu. 3 Kum tek ng’atu moko uparu nia en re m’e en ma ke e gin moko ngo, nwang’u ewondere gire. 4 Ento ng’atuman ung’ii i tic pare gire, e anyong’a binege i kum tic pare gire, ento ungo pilembe ebeporere ku ng’atu mange. 5 Kum ng’atuman biyeyo ter pare* gire.

6 M’umedo maeno, ng’atu ma jubeponjo ku lembe ukony ng’atu m’ubeponje ku gin ceke ma ber.

7 Kud wuwonduru: Jucopo cayu Mungu ngo. Kum gin ma tek ng’atu moko ubecoyo, gica re m’ebikayu bende; 8 kum ng’atu m’ubecoyo i kume gire bikayu top mi kum, ento ng’atu m’ubecoyo i tipo re bikayu kwo ma rondo ku rondo i bang’ tipo. 9 Dong’ kud waol ku timo lembe ma ber, kum ka saane romo wabikayu tek wavoc ungo.* 10 Ka kumeno, tekene fodi kakare nuti iwa, watimu bero ni dhanu ceke, ento asagane ni juyic wadwa.

11 Wunen maram agoro ko iwu ku cinga gira kud arufu* ma dongo dongo.

12 Dhanu ceke ma gibemito ginen ma leng’ i kum re ma gibepimo nidiyowu kara jutim yaa i kumwu; gibetimo kumeno kende kende kara kud junyay ragedo i kumgi pi yen mi can* pa Kristu. 13 Kum kadok dhanu ma gibeketho jutim yaa i kumgi gin gigi de gibeworo ngo Cik, ento gibemito jutim yaa i kumwu kara ginwang’ thelembe ma giyungiri ko pi kumwu. 14 Ento an, abiyungara tak de ngo, ndhu pi yen mi can* pa Rwoth mwa Yesu Kristu kende, ma ni kume ng’om ubedo ira calu gin m’utho* man an de ni ng’om abedo calu ve atho. 15 Kum timo yaa en e gin moko ngo man timo ngo yaa de en e gin moko ngo, ento gin ma pire tek utie nibedo cwic ma nyen. 16 Dhanu ceke ma gibelubo telowic maeni i kwo migi, kwiyocwiny man kisa ubed i wigi, eyo, iwi Israel pa Mungu.

17 Niai kawoni, ng’atu moko kud usenda, pilembe atie ku poyo i kuma m’unyutho nia a ng’eca pa Yesu.

18 Umego, bero ma yawe mbe pa Rwoth mwa Yesu Kristu ubed kudwu pi pidoic ma ber ma wutie ko. Amen.