BARUA NI JUEFESO

1 Niai kud i bang’ Paulo, ma jakwenda pa Kristu Yesu ni kum yeny pa Mungu, ni jumaleng’ ma gini i Efeso man ma gitie julub pa Kristu Yesu ma gibegwoko bedoleng’ migi:

2 Bero ma yawe mbe man kwiyocwiny pa Mungu ma Wegwa man pa Rwoth Yesu Kristu ubed kudwu.

3 Pak ubed ni Mungu ma Won Rwoth mwa Yesu Kristu, kum emiyo iwa mugisa ceke mi tipo i kabedo m’i polo, wan ma watie julub pa Kristu, 4 pilembe eng’iyowa niai i wang’ thekiri mi ng’om wabed i acel kude,* kara i wang’e wabed leng’ man ma poyo mbe i kumwa i mer. 5 Kum elar eketho nia ebidwokowa ni wote nikadhu kud i bang’ Yesu Kristu, nimakere ku lembe m’ufoyo iye man yeny pare, 6 kara jupake pi dwong’ mi bero pare ma yawe mbe m’enyutho iwa ku berocwinye nikadhu kud i bang’ Wode m’emaru. 7 Nikadhu kud i bang’e, wanwang’u gony ni kum jamgony nikadhu kud i rimbe, eyo, Mungu uweko kier mwa ni kum lonyo mi bero pare ma yawe mbe.

8 Eketho bero pare ma yawe mbe maeno usagere asaga yor i bang’wa i rieko ceke man i nyang’ i lembe, 9 m’eketho wang’eyo ko lembamung’a ma leng’ mi yeny pare. Etimo kumeno nimakere ku lembe m’ufoyo iye man lembakeca pare 10 pi nitelo wi lembe i ajiki mi saa m’ukethere, kara ecok dhu piny ceke karacelo i Kristu, piny m’i polo man piny m’i wi ng’om. Eyo i iye, 11 en ma watie i acel kude man jung’iyowa wabed jucampacu karacelo kude, man jular jukethowa calku lembakeca pa ng’atu m’ubetimo giki ceke calu m’eng’iyo nimakere ku yeny pare, 12 kara wan ma wabino dhanu ma kwong’a ma gigeno Kristu, watim pi pak mi dwong’ pare. 13 Ento wun bende wugene i ng’ei ma wuwinjo lemandha, niwacu lembanyong’a mi both mwu. I ng’ei ma wuyiyo, eketho ayi i kumwu nikadhu kud i tipo pare ma leng’ m’elar eng’olo, 14 ma en e mukwatu* mi giralaga mwa, kara ni kum jamgony juwar piny pa Mungu pi nipake pi dwong’ pare.

15 Eno re m’uketho an bende niai m’awinjo pi yiyoyic ma wutie ko i Rwoth Yesu man pi mer ma wubenyutho ni jumaleng’ ceke, 16 aweko ngo nyanok de nidwoko foyofoc ni Mungu piwu. Abemedara nikwayu piwu i rwo para, 17 nia Mungu pa Rwoth mwa Yesu Kristu ma Wego mi dwong’ umii iwu tipo ma bikonyowu wubed ku rieko, man wunyang’ i lembe m’ebenyutho kara wubed ku ng’eyong’ec ma tap i wiye. 18 Eyabu adundewu kara wunen man wutuc ning’eyo genogen m’elwong’owu pire, wek kara wung’ey dwong’ mi lonyo m’egwoko ni giralaga pi jumaleng’, 19 man wung’ey bende maram tego pare m’enyutho yor i bang’wa wa juyic utie dwong’ ko nisagu. Man dwong’ne ugam unen i ayi m’etiyo ko ku tego pare 20 yor i bang’ Kristu kinde m’ecere ku kind ju m’utho, man ekethe ebedo yor i cinge mir acwic i kabedo m’i polo 21 malu ngbir iwi ker ceke, iwi ng’ol ceke, iwi tego ceke, iwi bim ceke, man iwi nying’ ceke ma jucopo lwong’o i ng’om maeni* man i ng’om ma bibino. 22 Bende, Mungu uketho piny ceke udoko wor i the tiende man ekethe ebed wic mi piny ceke m’uneno cokiri 23 m’utie kume, man cokirine upong’ thur ku Kristu m’ubepong’o piny ceke i ayi ceke.

2 M’umedo maeno, Mungu uketho wudoko kwo ma ke nwang’u wutho i kier mwu man i dubo mwu, 2 ma yang’ wubed wuwotho i iye nimakere ku ng’om maeni, ma ng’atu m’ubetelo wi yamu m’ubewingo wi dhanu man wi tipo ma kawoni ubetiyo i dhanu ma giwor ungo re m’ubino telo wiwu. 3 Eyo, i kindgi wan ceke yang’ wabed wawotho nimakere kud awanya mi kumwa, wabed watimo lembe ma kumwa ubeyenyo man ma wabeparu, man niai i anyoli mwa wabino ju m’uromo ku kwinyo pa Mungu calu dong dhanu mange. 4 Ento Mungu m’upong’ ku kisa ni kum mer pare ma dit m’emaru kowa, 5 uketho wadoko kwo karacelo ku Kristu kadok nwang’u walar watho i kier mwa; bero pare ma yawe mbe re m’uketho ebodhowu. 6 M’umedo maeno, ecerowa man eketho wabedo karacelo kude* i kabedo m’i polo wan ma wa julub pa Kristu Yesu; 7 kara i rundi ma bibino, enyuth iwa dwong’ mi lonyo mi bero pare ma yawe mbe nikadhu kud i berocwiny m’ebinyutho iwa, wan ma wa julub pa Kristu Yesu.

8 Ni kum bero ma yawe mbe maeno, ebodhowu nikadhu kud i yiyoyic, man etie ngo ni kum lembe ma wutimo wun giwu, ento etie giramiya pa Mungu. 9 Eyo, both maeno utie ngo ni kum tic kara ng’atu moko kud unwang’ kaka mi lulere. 10 Watie tic mi cing’* Mungu man calu watie julub pa Kristu Yesu, ecwiyowa pi tic ma ber m’elar eketho nia wabitimo.

11 Ento wupoy nia wun ma wunyoluru i kind dhanu mi thek mange, naka “ju ma jutimo yaa i kumgi” ku cing’ dhanu gibed gilwong’owu nia “ju ma jutimo ngo yaa i kumgi.” 12 I saa maeca, nwang’u wung’eyo ngo Kristu, wubino bor ku thek mir Israel man calu wubino juwirok, kakewu ubino mbe i lembariba m’ucungo iwi lembang’ola pa Mungu; i ng’om wubino mbe ku genogen man nwang’u wung’eyo ngo Mungu. 13 Ento kawoni ma dong’ wutie julub pa Kristu Yesu, wun ma con wubino bor ku Mungu wudoko ceng’ini kude ni kum rimb Kristu. 14 Kum etie kwiyocwiny mwa, man ng’atu m’udiko ungu ario udoko ni acel man erwombo gang’ ma nwang’u upoko kindgi cen. 15 Nikadhu kud i kume m’ethiero, ekabu Cik man lembang’ola mi Cik pa Musa cen, kum Cikne ubino royo adegi i kind ungu ario. I ng’ei m’ediko ungu arione ni ungu acel ma nyen, gin ceke gidoko julub pare man Kristu uroyo kwiyocwiny i kindgi. 16 Bende, ediko kind ungu ario maeno gidoko kum acel, kara erip kindgi cuu ku Mungu nikadhu kud i yen mi can,* pilembe nikadhu kud i kume gire re m’ekabu cen gin m’ubino nyayu adegi. 17 Ebino man erweyo lembanyong’a mi kwiyocwiny iwu ma wubino bor ku Mungu man ni ju ma ni ceng’ini kude, 18 kum nikadhu kud i bang’e re ma wan ungu ario zoo wacopo coro m’umbe macero i bang’ Wego ni kum tipo acel.

19 Pieno, dong’ wutie ngo kendo juwirok kadi umondo; ento wutie anyoli mi ng’om ma rom ku jumaleng’ man wun bende wutie i kind juruot pa Mungu. 20 Jugierowu iwi kathere mi jukwenda man mi jubila, ma Kristu Yesu ku kume re m’utie kidi mi gul mi katherene. 21 I iye, giedo maeno zoo ubemoko karacelo cuu man ebeidho pi nidoko hekalu ma leng’ ni Yehova. 22 Wun bende jubegierowu karacelo i iye ni kabedo acel ma Mungu bedo i iye i tipo.

3 Pi thelembe maeni re ma an a Paulo a jakol pa Kristu Yesu piwu wu dhanu mi thek mange. 2 Ma jiji mbe, wuwinjo pi tic mi kuro wi bero ma yawe mbe pa Mungu m’umiyere ira pi bero mwu; 3 eyo, Mungu uketho ang’eyo lembamung’a ma leng’ m’adaru goro pire iwu i adundo. 4 Pieno kinde ma wubesome, wucopo nyang’ i ng’eyong’ec m’atie ko iwi lembamung’a ma leng’ pa Kristu. 5 Lembamung’a maeni ugam ung’eyere ngo i kind dhanu m’utuk mi rundi ma con calu ma tin tipo unyuthe ni jukwenda pare ma leng’ man jubila. 6 Lembamung’ane ni e: Dhanu mi thek mange ma gi julub pa Kristu Yesu gibilagu gin ma Kristu ulagu man gibidoko kum acel; gin bende gibinwang’u piny ma rom ma Mungu ung’olo iwa nikadhu kud i lembanyong’a. 7 Adoko jatic mi lembamung’a maeni ni kum bero ma yawe mbe pa Mungu. Emiyo ira giramiyane mi mananu pi ninyutho tego pare.

8 Bero ma yawe mbe maeni umiyere ira an m’a nok magwei nisagu ng’atu ma nok m’i kind jumaleng’ ceke, kara arwey lembanyong’a ni dhanu mi thek mange iwi lonyo ma kaporne mbe pa Kristu, 9 man kara aketh ng’atu moko ci unen kite ma Mungu ubetelo ko wi lembe mi lembamung’a ma leng’ m’ubedo akana pi oro dupa i Mungu m’ucwiyo piny ceke. 10 Lembuno utimere kara nikadhu kud i cokiri, kwond rieko ma kwanere ngo pa Mungu ung’eyere kawoni ni jubim man ni weg dito i kabedo m’i polo. 11 Mungu utimo lembe maeno nimakere ku lembakeca pare ma rondo ku rondo m’uneno Kristu Yesu ma Rwoth mwa, 12 ma ni kume wabeweco ku tegocwiny man watie agonya nicoro i bang’ Mungu ma cwinywa tek ni kum yiyoyic ma watie ko i iye. 13 Dong’ abekwayuwu nia cwinywu kud utur pi masendi m’abesendara ko piwu, kum etie pi dwong’ mwu.

14 Pi thelembe maeno, arumo conga ni Wego, 15 ma ni kume juruot ceke m’i polo ku m’i ng’om gibedo nuti. 16 Abekwayu Mungu nia ni kum lonyo mi dwong’ pare etii ku tego ma tipo pare miyo pi nidwoko adundewu man pidoiwu tek, 17 man nia ni kum yiyoyic mwu, wuketh Kristu ubed i adundewu ku mer. Wek ulegwu nyang’ man wucung ma tek iwi kathere 18 ketho karacelo ku jumaleng’ ceke, wubed ku copo mi nyang’ cuu mandha i kalac mi lemandha, i kaborne, i kadongone man i kathucne; 19 man wung’ey mer pa Kristu m’ukadhu ng’eyong’ec ceke, kara wupong’ thur ku kite* ceke ma Mungu miyo.

20 Mungu, ma ni kum tego pare m’ubetiyo i iwa copo timo lee dit apila nisagu ma wapenjo man ma wabeparu, 21 uromo ya jumii ire dwong’ nikadhu kud i cokiri man nikadhu kud i bang’ Kristu Yesu i kind dhanu m’utuk ceke pi rondo ku rondo. Amen.

4 Pieno an m’a jakol pi Rwoth abekwayuwu nia wuwoth i ayi m’uromo ku lwong’o ma julwong’o kowu, 2 ku jwigiri ceke man molcwiny, ku mwonyolembe hai, wuciruru i kindwu ku mer, 3 man wutim kero mwu ceke nikwo ku kwiyocwiny i kindwu kara wugwok bedo i acel mwu ma tipo umiyo. 4 Pilembe kum utie acel man tipo de utie acel, tap calu ma genogen ma julwong’owu pire de utie acel; 5 Rwoth acel, yiyoyic acel, batizo de acel; 6 man Mungu de tie acel m’e Wego mi dhanu ceke; ebamu zoo, ebetiyo i iwa ceke man tego pare ubenen i ayi ceke.

7 Ento bero ma yawe mbe umiyere ni ng’atuman acel acel m’i kindwa nimakere kud ayi ma Kristu upoko ko giramiya mi mananu. 8 Kum egorere kumae: “Kinde m’eidho malu, egonyo ju ma gibino ng’eca man emiyogi ni giramiya ma dhanu.” 9 Ka nwang’u elar eloro ngo i kabedo ma piny, niwacu i ng’om, nwang’u wec ma nia “eidho” thelembene cibedo ang’o? 10 Ng’atu ma rom eno m’uloro piny re m’udok uidho bende malu ngbir iwi polo ceke kara eketh lembe ceke upong’.

11 Emiyo jumoko gibed jukwenda, jumange gibed jubila, jumange ke gibed jurwey lembanyong’a, jumoko gibed jukwac man juponji; 12 pi twinyotwiny mi jumaleng’, pi tic mi kony man pi nigiero kum Kristu, 13 nitundo ma wan ceke wiwa uromb acel i yiyoyic man wanwang’ ng’eyong’ec ma tap iwi Wod Mungu, kara wadok dhanu m’uteng’ini i mukero mi dongo man mi pong’ pa Kristu. 14 Pieno, wacikara ngo nibedo kendo awiya ma wawek juthorwa kun ku kun calu mujanga ma thoro piny, man kud wawek bende wang’wa ulal i tok yamu mi ponji ma tung’ tung’ mi vupo ma dhanu ubetiyo ko man mi repdhok mir abidhe. 15 Ento wayeru lemandha man wanyuthu mer i kindwa; i ayi maeno wabidongo i lembe ceke ma nwang’u wabelubo ko lapor pa Kristu ma tie wic. 16 Ni kume, watkum ceke umoko karacelo cuu man giwinjiri i kindgi nikadhu kud i ujonj ma tung’ tung’ ma miyo igi gin ma gitie ku yenyne. Kinde ma watkumman ubetiyo ma ber, eno ketho kum dongo man egierere i mer.

17 Pieno, abeyero man abetuco lembe ma e i Rwoth: Wuwek niwotho calu ma dhanu mi thek mange ubewotho ko i rieko migi ma iye nanu.* 18 Ng’eyong’ec migi ni mudho man gikoc bor ku kwo ma Mungu miyo, pilembe gikoso ng’eyong’ec man cwinygi tie nwang’. 19 Calu ma dong’ gimbe ku kuratimo ceke ma ber, gimiyiri i timo mir acidi man mi thwon* pi nitimo kwond lembsasa moko ci ku ngiri.

20 Ento juponjowu man wung’eyo nia Kristu utie ngo kumeno, 21 tek andha wuwinje man juponjowu nikadhu kud i bang’e nimakere ku lemandha ma n’i Yesu. 22 Juponjowu nia wukab cen ng’atu* ma con m’urombo ku kurabedo mwu ma kwong’a ma nyothere ni kum awanyane ma rac mir abombi. 23 Ukwayu wumeduru nidwoko paru* man timo mwu udok nyen, 24 man wucikuru nironyo ng’atu* ma nyen m’ucwiyere nimakere ku yeny pa Mungu i bedopwe man i gwokobedoleng’ m’andhandha.

25 Pieno, kawoni ma dong’ wudaru weko vupo cen, ng’atuman m’i kindwu uyer lemandha ni wadi, pilembe wan ceke watie kum acel ma ng’atuman utie watkum wadi man watkum wadi. 26 Kinde ma ng’eicwiny umakuwu, kud wudubi; kud wuwek ceng’ umwony ma fodi wutie asu ku ng’eicwiny; 27 kud wuwek kaka ni Wonabali. 28 Dong’ jakwo kud ukwal kendo; ento etim tic ma tek man ma ber ku cinge gire, kara ebed ku piny moko m’eromo konyo ko ng’atu m’utie i yeny. 29 Wec m’utop kud uwok ki kud i dhogwu, ento kende kende wec ma ber ma teng’ojo calu yenyne bedo nuti pi nimiyo bero ni ju m’ubewinjo. 30 Bende kud wunyay can i tipo ma leng’ pa Mungu m’eketho ko ayi i kumwu pi nindo mi gony nikadhu kud i jamgony.

31 Wukab akece ceke kud i kindwu, kwinyo, ng’eicwiny, kok man ayany ku gin moko ci ma timojo rac. 32 Ento wubed ber ng’atuman ku wadi man ku wadi, wubed ku cwiny mi ngisi,* man wubed ayika niweko lembe m’i kindwu tap calu ma Mungu bende nikadhu kud i bang’ Kristu uweko iwu lembe yot yot.

5 Pieno, wukwany koth Mungu calu nyithindho pare ma jumer, 2 man wumeduru niwotho i mer tap calu ma Kristu bende umaruwa,* uketho emiyere gire piwa* ni giramiya man lam, ng’wic udok ma ng’ar ni Mungu.

3 Kud juwinj nyanok de pi lembsasa mi tarwang’* i kindwu, kadi pi kwond sasa moko ci kunoke pi kethocwiny hai i kum piny, kum gitie lembe m’umaku piny ungo ni jumaleng’; 4 kud junwang’ bende timo mi lewic, kadok wec mi ming’o, kadi sosi ma reco kum gitie lembe m’umaku piny ungo, ento ukwayu dwoko foyofoc ni Mungu re m’unwang’ere i kindwu. 5 Kum wung’eyo lembe maeni man wunyang’ i iye cuu nia ng’atu ma timo lembsasa mi tarwang’,* kadok ng’atu m’ucido, kadi ng’atu ma ketho cwinye hai i kum piny, ma en e jarwo ni ayi gin m’acwiya, umbe ku giralaga acel de i Ker pa Kristu man pa Mungu.

6 Kud wuwek ng’atu moko uwondwu ku wec ma iye nanu, kum pi wagi lembe ma kumeno re ma kwinyo pa Mungu ubebino iwi dhanu ma giwor ungo. 7 Dong’ kud wudikuru kugi; 8 pilembe naka wubino mudho, ento kawoni dong’ wutie der kum wu dhanu pa Rwoth. Pieno, wumeduru niwotho calu nyithindho mi der, 9 kum nying ma der cego en e kwond berocwiny ceke, ku bedopwe man lemandha. 10 Wumeduru ning’iyo gin ma nyayu mutoro i Rwoth; 11 man wuwek nidikuru i tic mi mudho ma cego ngo nyinge, ento wutuc wigi kamaleng’. 12 Kum etie lembe mi lewic niweco iwi gin ma gibetimo i aponda. 13 Ento gin ceke ma jutuco wiye* der ketho enen kamaleng’, kum gin ceke m’ubenen kamaleng’ en e der. 14 Pieno egorere kumae: “Cew, in m’ibenindo, ai ku kind ju m’utho man der pa Kristu birieny i wii.”

15 Ka kumeno wubed ku weng’wu lee kara kud wuwoth calu dhanu ma rieko migi mbe, ento wuwoth calu ju ma riek, 16 man wutii ma ber mandha ku saa mwu, kum wabekwo i nindo ma rac. 17 Pi thelembe maeno wuwek nibedo jukusegu, ento wumeduru ninyang’ nia yeny pa Yehova tie ang’o. 18 M’umedo maeno, kud wumer ku pigulok kum eterojo i kwond timo ceke ma reco,* ento wumeduru nipong’ ku tipo. 19 Wujukuru i kindwu ku zaburi, wupak Mungu man wuwer wer mi tipo ma nwang’u wubewer ni Yehova kud adundewu ceke; 20 wudwok foyofoc saa ceke ni Mungu ma Wegwa pi gin ceke i nying’ Rwoth mwa Yesu Kristu.

21 Wujwiguru ng’atuman ni wadi man ni wadi i lworo pa Kristu. 22 Ukwayu mon gijwigiri ni coggi calu ni Rwoth, 23 kum cwar dhaku en e wic ni dhaku pare, tap calu ma Kristu tie wic mi cokiri ma tie kume m’e jalarne. 24 Eyo, calu ma cokiri jwigere ni Kristu, mon bende gicikiri nijwigiri ni coggi i lembe ceke. 25 Cogmon, wumeduru nimaru mon mwu tap calu ma Kristu bende umaru cokiri man emiyere gire pire, 26 pi nidwoke leng’ man elwoke elony ku pii mi lembe pa Mungu, 27 kara ethier cokiri ire gire m’eberieny, ma cilo kadi bel kunoke wagi gin ma kumeno umbe acel de i kume, ento m’e leng’ man ma poyo mbe i kume.

28 I ayi ma rom eno, cogmon gicikiri nimaru mon migi calu kumgi gigi. Nico m’umaru dhaku pare nwang’u emarere gire, 29 kum ng’atu moko acel de mbe m’udagu kume gire, ento etunge man egwoke tap calu ma Kristu bende ubetimo ni cokiri, 30 pilembe watie watkume. 31 “Pi thelembe maeni, nico biweko won ku min man ebimoko i kum* dhaku pare man gin ario gibidoko kum acel.” 32 Lembamung’a ma leng’ maeni e dwong’. Ento abeweco pi Kristu man cokiri. 33 Enre ng’atuman m’i kindwu ucikere nimaru dhaku pare calu m’emarere ko gire; i thenge ma kucelo, dhaku ucikere ninyutho woro ma thuc ni cware.

6 Awiya, wubed wor ni junyodo mwu i Rwoth, kum etie lembe m’umaku piny. 2 “Yung wuru ku meru” kum maeni en e cik ma kwong’a ma ku lembang’ola: 3 “Kara lembe uwoth ber iri* man ikwo pi nindo ma lee iwi ng’om.” 4 Man wun wu wego, kud wubed wunyay ng’eicwiny i awiya mwu, ento wumeduru nitungogi ma nwang’u wubeponjogi man wubetwinyogi nimakere ku telowic* pa Yehova.

5 Wu ng’eca, wubed wor ni judongo mwu ku lworo man mielkum, kud adundewu m’abombi mbe i iye calu ni Kristu. 6 Kud wubed wor kende kende kinde ma jubenenowu pi ninyayu anyong’a i dhanu, ento calu ng’eca pa Kristu, wutim yeny pa Mungu kud adundewu ceke. 7 Wutim igi ku berocwiny calu ni Yehova, ento ungo ni dhanu, 8 pilembe wung’eyo nia gin moko ci ma ber ma ng’atuman ubetimo ebinwang’u sukuliane i bang’ Yehova, dok ebed ng’eca kunoke ng’atu ma tie agonya. 9 Wu judongo bende, wumeduru nitimo kumeno ni ng’eca mwu; kud wunyay lworo i igi, kum wung’eyo nia Rwoth mwu wukugi ceke ni i polo man i bang’e akoyakoya mbe.

10 Pi nidaru, wumeduru ninwang’u tego i bang’ Rwoth ni kum tego pare ma dit. 11 Wurony jamlwiny ceke ma Mungu miyo, kara wutuc nicungo ma tek i dhu rieko mir awondi pa Wonabali. 12 Kum wabekiedo ngo i dhu kum ku rimo, ento wabekiedo i dhu* jubim, i dhu weg ng’ol, i dhu jubim m’i ng’om maeni ma n’i mudho man i dhu tego mi tipo m’ucido i kabedo m’i polo. 13 Pi thelembe maeno, wurony jamlwiny ceke ma Mungu miyo kara wubin wucung ma tek i nindo ma rac, man i ng’ei ma wudaru lembe ceke, wucung nging’ nging’.

14 Pieno, wucung nging’ nging’ ma wutwiyo pierwu ku mukaba mi lemandha man wukendo asi mi bedopwe i korwu, 15 man wukend amora mi rweyo lembanyong’a mi kwiyocwiny i tiendwu calu wara. 16 M’umedo maeno ceke, wuting’ ban ma lac mi yiyoyic ma wubituc ninego ko lak athero* ceke mi mac pa ng’atu ma rac. 17 Bende, wukend sabu mi both i wiwu, man wumak palamularu mi tipo ma en e lembe pa Mungu i cingwu; 18 ku kwond rwo ceke man kwayukwac, wurwo saa ceke i tipo. Pi thelembe maeno wukii ma wuberwo ko thiri thiri pi jumaleng’ ceke. 19 Wurwo bende pira kara wec umiyere ira kinde m’abeyabu dhoga, wek kara atuc niweco ku tegocwiny pi niketho jung’ey pi lembamung’a ma leng’ mi lembanyong’a 20 ma Mungu uora arwey man ma jutwiya pire ku nyoro, man kara ayer pire ku tegocwinya calu m’acikara niyero.

21 Ento kara wun bende wung’ey lembe para man maram abedo ko, Tikiko m’umego ma jamer man jatic mandha i Rwoth biketho wubing’eyo lembe ceke. 22 Abeore i beng’wu pi thelembe maeno, kara wung’ey maram wabedo ko man kara ejuk cwinywu.

23 Wek umego ku nyimego ceke ginwang’ kwiyocwiny, mer, man yiyoyic m’uai i bang’ Mungu ma Wego, man i bang’ Rwoth Yesu Kristu. 24 Bero ma yawe mbe ubed ku dhanu ceke ma gimaru Rwoth mwa Yesu Kristu ku mer ma thum ungo.