BARUA NI JUFILIPI

1 Niai kud i bang’ Paulo man Timoteo ma gitie ng’eca pa Kristu Yesu, ni jumaleng’ ceke ma gitie julub pa Kristu Yesu ma gin’i Filipi, karacelo ku judong cokiri man jukony tic:

2 Bero ma yawe mbe man kwiyocwiny pa Mungu ma Wegwa man pa Rwoth Yesu Kristu ubed kudwu.

3 Abed adwoko foyofoc ni Mungu para saa ceke kinde m’abepoy piwu 4 i kwac para ceke m’abekwayu piwu kpo. Abekwayu kwacman ku mutoro, 5 pilembe wudiko cingwu kara tic mi lembanyong’a ucidh i wang’e niai i nindo ma kwong’a cil kawoni. 6 Kum cwinya tek iwi lembe ma e: Nia ng’atu m’ucaku tic ma ber i iwu bimedere kude nitundo ebidare cil i ceng’ pa Kristu Yesu. 7 Etie lembe ma kakare nia abed ku paru maeno piwu ceke, kum wuni i adundena wun ma wubedikuru karacelo kuda i bero ma yawe mbe, dok ebed kinde m’atie i kol kadi kinde m’abecero bang’ lembanyong’a, man abeketho pire ung’eyere i wang’ cik.

8 Kum Mungu ung’eyo* nia ava nenowu ceke ubenega lee man amaruwu ku kit mer ma thuc ma Kristu Yesu utie ko. 9 Man abemedara nirwo pi lembe ma e: Nia mer mwu usagere asaga karacelo ku ng’eyong’ec ma tap man ng’iyo i lembe cuu; 10 nia wung’ii lembe ma pigi tek nisagu, kara wubed leng’ man kud wuketh jumange ukier cil i ceng’ pa Kristu; 11 man nia wupong’ ku nying mi bedopwe ni kum Yesu Kristu pi dwong’ man pak ni Mungu.

12 Umego, kawoni abemito wung’ey nia lembe m’uwok i kuma ulund uketho lembanyong’a dong’ umew nisagu, 13 uketho Jukur p’Ubimo ceke man dhanu mange zoo ging’eyo kamaleng’ nia jutwiya i kol pi Kristu. 14 Bende, twic ma jutwiya ko i kol uketho kawoni umego ma pol ma gibetimo ni Rwoth cwinygi udoko tek, man gibemediri niweco pi lembe pa Mungu dong’ nisagu m’umbe lworo.

15 Andha, jumoko giberweyo pi Kristu ku kumira man nyeko, ento jumange re giberweyo ni kum berocwiny. 16 Ju ma giberweyo ku berocwinygi giberweyo pi Kristu ni kum mer, pilembe ging’eyo nia jung’iya acer bang’ lembanyong’a; 17 ento ju ma giberweyo ku kumira man nyeko giberweyo ku nen mi teliri, ento ungo ku thelembe m’atira, kum gibesayu ninyayu peko i kuma i kol. 18 Kadok giberweyo ku cwiny ma ber kadi ma rac, ceke rom; anyong’a ubenega kum ku yo ceke juberweyo pi Kristu. Man anyong’a binega asu, 19 kum ang’eyo nia abiboth ni kum kwac mwu man ni kum kony mi tipo pa Yesu Kristu. 20 Cwinya tek man atie ku genogen nia lewic binega ngo i lembe moko acel de, ento calu m’abeweco m’umbe lworo, abeyungo Kristu kawoni calu m’abed ayunge i wang’e; abiyunge* kadok abedo kwo kadi atho.

21 Kum ira kan abekwo, akwo pi Kristu man kan atho ke etie ira bero.* 22 Ento kawoni tekene ukwayu nia amedara nikwo i kum, etie adwogi mi tic para, re lembe m’acopo ng’iyo abenyutho ngo. 23 Lembe ario maeni ubewiro wiya, kum abemito abed agonya man acidh abed ku Kristu ma i andha utie lembe ma ber m’usagu zoo. 24 Ento pire tie tek lee ira nia amedara asu nikwo i ng’om maeni pi bero mwu. 25 Pi thelembe maeno, cwinya tek nia abimedara asu nikwo man nibedo karacelo kudwu ceke, kara wumeduru i tic pa Mungu man anyong’a negwu i yiyoyic mwu, 26 wek kara ni kuma kinde m’abibedo kendo karacelo kudwu, anyong’a mwu umedere nisagu i Kristu Yesu.

27 Kende kende wukwo* i ayi m’uromo ku lembanyong’a iwi Kristu, kara kadok abino ninenowu kunoke ambe karacelo kudwu, awinj jubeyero piwu nia wucungo ma tek ma paru mwu urombo acel, man cwinywu de uripo acel, ma wubenyego ko karacelo kara wubed ku yiyoyic i lembanyong’a, 28 man nia wubeweko ngo judegi mwu ginyay lworo i iwu kadok nyanok de i lembe moko ci. Lembe maeni ubenyutho nia jubinyothogi, ento wun wubiboth; man Mungu uketho lembene ubenen kamaleng’. 29 Kum pi Kristu wunwang’u rwom mi yiye ayiya kende ngo, ento mi sendiri bende pire. 30 Kum wubenyego anyego ma rom ma wuneno abino i iye, man ma kawoni de wubewinjo nia abemedara asu ninyego.

2 Dong’ tekene wucopo tielo cwinywu i Kristu, tek wucopo juko cwinywu i mer, tekene wucopo dieng’ pi jumange, man tek wucopo nyutho igi mer man kisa, 2 wubed ku paru acel, wumeruru i kindwu ma cwinywu ceke uripo acel, man ma wun ceke wutie ku paru m’urombo, e wubiketho anyong’a para bipong’o hau. 3 Kud wutim gin moko ku teliri, kadi ku pidoic mir abediwang’e, ento ku jwigiri* wunen nia jumange gi dit ma sagu wun, 4 man kud wuyeny bero mwu kende, ento wuyeny bero mi jumange bende.

5 Wubed ku pidoic maeni ma Kristu Yesu bende ubino ko, 6 en ma kadok nwang’u ebino calu Mungu ngi, eyenyo ngo nia emak kaka Mungu ma nia edok rom kude. 7 Ento eweko gin moko ci m’ebino ko, edoko calu ng’eca man edoko dhanu. 8 M’usagu maeno, kinde m’ebino calu dhanu, ejwigere en gire man edoko wor nitundo i tho, eyo, tho iwi yen mi can.* 9 Pi thelembe maeno, Mungu udode malu dit apila man emiyo ire ku berocwinye nying’ m’usagu nying’ mange ceke, 10 kara i nying’ Yesu cong ceke urum, ju ma gin’i polo, ju ma gin’i ng’om man ju ma gin’i the ng’om, 11 man leb ceke utuc kamaleng’ nia Yesu Kristu en e Rwoth pi dwong’ pa Mungu ma Wego.

12 Pieno jumerna, tap calu ma saa ceke wubedo wor kende kende ngo kinde m’abino karacelo kudwu, ento wubenyutho woro ma sagu kawoni m’ambe i kindwu, wumeduru niii pi both mwu giwu ku lworo man mielkum. 13 Kum Mungu re, ma ni kum yeny ma iye yenyo ubetimo i iwu, kara wubed kud ava man kero mi timo yeny pare. 14 Wumeduru nitimo lembe ceke m’umbe ng’ur kadi piem, 15 kara wubed ma lembe mbe i wiwu man m’umbe dubo, nyithindho pa Mungu ma gimbe ku poyo i kind dhanu m’utuk ma gigondiri man ginyothiri, ma wuberieny i kindgi calu der i ng’om, 16 man ma wumaku lembe mi kwo kikiki. E abinwang’u thelembe mi bedo kud anyong’a i ceng’ pa Kristu, pilembe nwang’u ang’eyo nia aringo mananu ngo man atimo tic ma tek de mananu ngo. 17 Ento kadok jubekonja calu lam mi pigulok iwi girathiera mwu man iwi tic mwu ma leng’* ma yiyoyic ubecwaluwu nitimo, atie ku mutoro man anyong’a ubenega karacelo kudwu ceke. 18 I ayi ma rom eno, wun bende wucikuru nibedo ku mutoro man anyong’a negwu karacelo kuda.

19 Atie ku genogen nia tek etie yeny pa Rwoth Yesu, i ng’ei nindo ma nok abioro Timoteo i beng’wu, kara anwang’ tielocwiny kinde m’ebidwogo man ebikoro ira maram wubedo ko. 20 Kum ambe ku ng’atu mange m’utie ku pidoic ma calu pare m’ubedieng’ andhandha pi lembe mwu. 21 Kum jumange ceke gibesayu bero migi gigi, pa Yesu Kristu re ngo. 22 Ento en, wung’eyo lembe m’etimo, nia calu nyathin ma konyo won, etimo karacelo kuda calu ng’eca pi niketho lembanyong’a ucidh i wang’e. 23 Pi thelembe maeno, en re m’etie ng’atu m’ageno nia abioro i beng’wu ndhundhu kinde m’abing’eyo kite ma lembe para bibedo ko. 24 Atie ku genogen nia tek etie yeny pa Rwoth, an de abibino i beng’wu ceng’ini eni.

25 Re pi kawoni, anwang’u nia kwayu aor Epafrodito m’umira i beng’wu, en m’e jatic wada man jaaskari wada ma wuoro ubin ukonya man upong’ yeny para, 26 pilembe ava nenowu ceke ubenege lee man can umondo i iye lee kum wuwinjo nia ekeetwoyo. 27 I andha, etwoyo m’eboth abotha ku tho; ento Mungu uneno kisa i kume, i kume kende ngo ento i kuma bende, kara kud abed ku can wi wagi wi wagi. 28 Pieno abeore nyathotho eni kara kinde ma wubinene anyong’a negwu kendo, e an de adieng’a para bijwik. 29 Dong’ wuwok wujole kud anyong’a lee calu ma wubed wujolo ko julub pa Rwoth, man wumeduru nimaru wagi dhanu ma kumeno, 30 pilembe eyenyo tho athoa ngi pi tic pa Kristu,* man eketho kwo pare i ariti pi nimiyo ira kony ma wucopo miyo ngo kum wumbe karacelo kuda.

3 Pi nidaru, umego para, wumeduru nibedo kud anyong’a i Rwoth. Abeol ungo nigoro iwu gin ma rom m’alar agoro iwu i wang’e, pilembe etie pi bedomoth mwu.

2 Wunen ber ku gwogi; wunen ber ku ju ma nyayu peko; wunen ber ku ju ma thumo kum. 3 Kum wan re ma watie ku yaa mandha, wan ma wabetimo tic ma leng’ ni Mungu ni kum tipo pare, wabeyungara i Kristu Yesu man wabeketho ngo genogen mwa i kum, 4 kadok nwang’u atie ku thelembe mi genara i kum nisagu ng’atu moko ci.

Ka ng’atu moko ubeparu nia etie ku thelembe mi genere i kum, an lundo atie kudo nisagu: 5 Jutimo yaa i kuma i ceng’ mir abora, atie anyoli mir Israel, mi suru pa Benjamin, Jaebrania ma junyodo pare gi Juebrania; i lembe m’uneno cik abino Jafarisayo; 6 pir amora m’abino ko lee anyayu ragedo i kum cokiri; i lembe m’uneno bedopwe m’ucungo iwi cik, awore ma kosa moko acel de mbe. 7 Ento gin ma naka gi kuloka ira, akwanugi ni gin ma tijgi mbe* pi Kristu. 8 M’umedo maeno, akwanu bende gin ceke ni gin ma tijgi mbe ni kum ng’eyong’ec pa Kristu Yesu ma Rwoth para, ma bero pare usagu zoo. Pire, ayiyo niweko piny ceke man akwanugi ni susu, kara anwang’ Kristu 9 man kara junwang’ nia atie ku winjiri kude, ungo nikadhu kud i bedopwe para gira ni kum woro Cik, ento nikadhu kud i bedopwe ma ni kum yiyoyic i Kristu, ma en e bedopwe m’uai i bang’ Mungu man m’ucungo iwi yiyoyic. 10 Gin m’abeyenyo utie ning’eye, ning’eyo tego mi cer pare man nineno kit can m’eneno; bende atie ayika nitho kit tho pare, 11 pi nineno ka nyo ku yo moko an de acopo bedo i kind ju ma kwong’a ma bicer ku kind ju m’utho.

12 Abewacu ngo nia dong’ adaru nwang’u sukulia kunoke nia dong’ adaru doko leng’, enre abemedara asu ku ng’wec pi nineno ka nyo an de acopo maku gin ma Kristu Yesu ung’iya pire. 13 Umego, abenwang’u ngo nia an gira dong’ adaru make; ento abetimo lembe ma e: Wiya uwil i kum gin ma ni ng’eya man abecwalara i kum gin ma ni wang’a, 14 abemedara ku ng’wec nitundo i ajiki kara anwang’ sukulia mi lwong’o ma malu ma Mungu ulwong’a ko nikadhu kud i bang’ Kristu Yesu. 15 Pieno, wan ceke ma wateng’ini i yiyoyic maku wapar lembe nimakere ku gin m’aweco pire iwu eno; ento tekene wutie ku paru m’ukoc iwi lembe moko, Mungu bikonyowu kara wupar lembe i ayi maeno. 16 Enre i kadhiri ma wadaru timo iye mediri, dong’ wamedara asu niwotho kumeno i gengi ma rom.

17 Umego, akwayu wun ceke nia wukwany kotha man wumeduru nineno bang’ ju ma gibewotho nimakere ku lapor ma waweko iwu. 18 Kum ju ma dupa abed aweco pigi wang’ ma pol, ento kawoni abeweco pigi ku piwang’a; kum gibewotho ni judegi mi yen mi can* pa Kristu. 19 Kajik migi utie nyoth, mungu migi utie usauigi, gibeluliri pi gin ma nwang’u i andha ukwayu lewic re m’uneggi i kume, man giketho wigi zoo i kum piny m’i ng’om. 20 Ento wan, watie anyoli m’i polo man wabekuro kud ava ma dit jalar ma biai ku kuca ma en e Rwoth Yesu Kristu, 21 ma biloko kumwa ma kabang’e mbe eni bidoko ve kume m’utie ku dwong’, ni kum tego pare ma dit ma copo ketho edwok gin ceke wor i the ng’ol pare.

4 Dong’ pieno umego para m’amaru man m’ava neno ubenega, wun ma wutie anyong’a para man jamkermiwic para, wucung nging’ nging’ i Rwoth i ayi maeno, jumerna.

2 Abekwayu Eudia man abekwayu Sentike nia gibed ma cwinygi ripo acel i Rwoth. 3 Eyo, abekweyi in bende, in m’i jatic wada mandha nia imediri nikonyo jumamon maeno ma wacur kugi acura i tic mi lembanyong’a karacelo ku Klementi man jutic wada mange ma nying’gi n’i kithabu mi kwo.

4 Anyong’a negwu saa ceke i Rwoth. Awacu kendo, anyong’a negwu! 5 Wuwek dhanu ceke ung’ey nia wutie dhanu ma i lembe mwu tek ungo. Rwoth ni ceng’ini. 6 Cwinywu kud ung’abere pi gin moko ki, ento i lembe ceke ku rwo man kwayukwac karacelo ku dwoko foyofoc, wuketh Mungu ung’ey pi kwac mwu; 7 e kwiyocwiny pa Mungu m’ukadhu gin ceke ma jucopo nyang’ i iye bigwoko adundewu man pidoiwu* nikadhu kud i bang’ Kristu Yesu.

8 Dong’ pi nidaru, umego, gin ceke ma gin andha, gin ceke ma gi mi yung, gin ceke ma gi pwe, gin ceke ma gi leng’, gin ceke ma juromo maru, gin ceke ma jubeweco pigi ber, gin ceke ma bero moko ni kumgi man gin ceke ma giromo ku pak, wumeduru niparu pi* gin maeno. 9 Lembe ma wuponjo i bang’a man ma wuyiyo ku ma wuwinjo man wuneno abetimo, wumeduru nitimogi, e Mungu mi kwiyocwiny bibedo karacelo kudwu.

10 Anyong’a ubenega lee dit i Rwoth nia kawoni wudwoko pidoiwu udoko nyen kendo pira. Andha nwang’u i wang’e de wubed wudieng’ pira, ento wubino mbe ku kaka mi nyuthe. 11 Abeyero ngo lembe maeno pi canpiny m’ubenega, kum aponjo nibedo kud anyong’a i kum gin m’atie ko i lembe ceke. 12 Ang’eyo nikwo i canpiny man ang’eyo nikwo ku piny dupa. I gin ceke man i lembe ceke, ang’eyo lembamung’a mi bedo m’ayeng’ man mi bedo ma kec ubenega, mi bedo ku piny lee man mi bedo m’umbe piny. 13 Pi gin ceke atie ku kero ni kum ng’atu m’ubemiyo ira tego.

14 Ento wutimo ber ma wukonya i masendi m’anwang’ara ko. 15 I andha, wu Jufilipi bende wung’eyo nia i ng’ei ma wuwinjo lembanyong’a wang’ ma kwong’a kinde m’aai kud i Makedonia, cokiri moko acel de mbe m’ukonya man m’uyiyo nia akonygi, ndhu cokiri mwu kende; 16 kum kinde m’abino i Thesaloniki, wuoro ira piny moko pi nipong’o yeny para, wang’ acel kende ngo ento wang’ ario buu. 17 Utie ngo nia abeyenyo giramiya, ento gin m’abeyenyo utie nia lembe ma beco ma wubetimo usagere asaga i wang’ Mungu. 18 Ento atie ku gin ceke m’abedo ku yenyne kadok nisagu. Yeny para ceke upong’o kawoni m’anwang’u gin ma wuoro nikadhu kud i bang’ Epafrodito, ma calu lam ma ng’wice ng’ar m’uyiyere man ma nyayu anyong’a i Mungu. 19 Mungu para bilund pong’o yeny mwu ceke nimakere ku dwong’ mi lonyo pare nikadhu kud i bang’ Kristu Yesu. 20 Dwong’ ubed ni Mungu ma Wegwa rondo ku rondo. Amen.

21 Wucwal moth para ni jumaleng’ ceke ma gin’i Kristu Yesu. Umego ma wani kugi bende gicwalu iwu moth migi. 22 Jumaleng’ ceke, re asagane ju ma yo pa Kaisari gicwalu iwu moth migi.

23 Bero ma yawe mbe pa Rwoth Yesu Kristu ubed kudwu pi pidoic ma ber ma wutie ko.