BARUA NI JUKOLOSAI

1 Niai kud i bang’ Paulo ma jakwenda pa Kristu Yesu ni kum yeny pa Mungu man Timoteo m’umegwa, 2 ni jumaleng’ man umego ma gin’i Kolosai ma gibegwoko bedoleng’ migi man ma gitie julub pa Kristu:

Bero ma yawe mbe man kwiyocwiny pa Mungu ma Wegwa ubed kudwu.

3 Saa ceke kinde ma waberwo piwu, wadwoko foyofoc ni Mungu ma Won Rwoth mwa Yesu Kristu, 4 pilembe wawinjo pi yiyoyic ma wutie ko i Kristu Yesu man pi mer ma wumaru ko jumaleng’ ceke, 5 ni kum genogen ma jugwoko iwu i polo. Wular wuwinjo pi genogen maeno nikadhu kud i rwonglembe mi lemandha mi lembanyong’a 6 m’utundo i beng’wu. Tap calu ma lembanyong’a ubecego nyinge i wang’ ng’om zoo man ebemedere ameda, kumeno bende ebecego nyinge man ebemedere i beng’wu niai i nindo ma wuwinjo man wung’eyo cuu mandha bero ma yawe mbe pa Mungu i andhane. 7 Eno re m’utie lembe ma wugam wuponjo i bang’ Epafra ma jamer mwa man ng’eca wadwa, en m’e jatic mandha pa Kristu m’ubetimo kakawa. 8 Bende, en re m’enyutho iwa pi mer ma tipo ma leng’ ukonyowu nicego.*

9 Pi thelembe maeno bende, wabeweko ngo nyanok de nirwo piwu niai ma wawinjo pi lembuno, man wabemedara nikwayu nia wupong’ ku ng’eyong’ec ma tap mi yeny pa Mungu i rieko ceke man i nyang’ i lembe mi tipo. 10 Kara wuwoth i ayi m’uromo ku Yehova pi ninyayu anyong’a i iye i lembe ceke kinde ma wubemeduru nicego nyingwu i tic ceke ma beco, man wubemeduru i ng’eyong’ec ma tap iwi Mungu. 11 Man kara wunwang’ kero lee ni kum tego pare ma dwong’, wek kara wutuc niciro lembe ceke ku twiyocwiny man anyong’a, 12 ma wubefoyo Wego m’uketho wun bende wudoko ni ju m’uromo pi ninwang’u giralaga karacelo ku jumaleng’ ma gin’i der.

13 Elaruwa kud i tego mi mudho man eroyowa i Ker pa Wode m’emaru dit, 14 ma ni kume wanwang’u gony nikadhu kud i jamgony, eyo, wek mi dubo mwa. 15 Etie ayi Mungu ma nen ungo, kayu mi giracwiya ceke; 16 pilembe nikadhu kud i bang’e re ma piny mange ceke ucwiyere i polo man iwi ng’om, piny ma nen man ma nen ungo, dok ebed komker, kadi ker, bimobim, kunoke dito. Piny mange ceke ucwiyere nikadhu kud i bang’e man pire. 17 Bende, elar ebedo nuti i wang’ piny mange ceke man nikadhu kud i bang’e re ma piny mange ceke ucwiyere, 18 man en re m’ebetelo wi* kum ma tie cokiri. Etie acaki, kayu mi ju m’ucer ku kind ju m’utho, kara edok ng’atu ma kwong’a i lembe ceke. 19 Kum Mungu ufoyo nia eketh Kristu pong’ ku kite* pare ceke, 20 man nikadhu kud i bang’e Mungu urip kindgi ku piny mange ceke; dok ebed piny m’i ng’om kadi m’i polo, man edwok kwiyocwiny i kindgi nikadhu kud i rimbe m’ecwiro iwi yen mi can.*

21 Eyo, naka wubino bor ku Mungu man wubino judegi pare, pilembe wiwu zoo ubino i kum timo ma reco. 22 Ento kawoni eripo kindwu kude nikadhu kud i ring’kum ng’atu m’umiyere gire i tho kara wubed leng’ i wang’e, ma poyo mbe i kumwu man m’adote de mbe i wiwu. 23 Re ukwayu wumeduru nibedo asu i yiyoyic man wucung ma tek iwi kathere ma wubelokuru ngo, man kud wubay genogen mwu mi lembanyong’a maeno ma wung’eyo, man ma jurweyo ni giracwiya ceke ma n’i the polo. An a Paulo, adoko jatic mi lembanyong’a maeno.

24 Anyong’a ubenega kawoni i kum masendi m’abesendara ko piwu, man abenwang’u nia fodi masendi m’abesendara ko calu watkum Kristu bimedere asu pi bero mi cokiri ma tie kum Kristu. 25 Adoko jatic mi cokirine nimakere ku tic ma Mungu umiyo ira mi kuro wi piny pi bero mwu kara arwey mii mandha lembe pare, 26 m’uketho i iye lembamung’a ma leng’ m’ubedo akana niai i rundi ma con* man niai i kum dhanu m’utuk ma con. Ento kawoni enyuthe ni jumaleng’ pare. 27 Mungu ufoyo nia eketh jumaleng’ ging’ey dwong’ mi lonyo mi lembamung’a maeni m’unyuthere ni dhanu mi thek mange, ma lembamung’ane utie Kristu ma ni i acel kudwu; pieno wutie ku genogen mi nwang’u dwong’ karacelo kude. 28 En re m’etie ng’atu ma wabetwong’o pire, wabejuko dhanu ceke man wabeponjogi i rieko ceke, kara wakel ng’atuman i bang’ Mungu ma nwang’u eteng’ini i winjiri m’etie ko ku Kristu. 29 Pi thelembe maeno re m’abetimo tic ma tek, man abenyego ni kum kony mi tego pare m’ubetimo ma tek i iya.

2 Abemito wung’ey maram abenyego ko lee piwu, pi ju m’i Laodikia, man pi dhanu ceke ma fodi ginena ngo,* 2 kara ginwang’ jukocwiny man gibed karacelo i acel i mer; i ayi maeno gibilony, niwacu gibinyang’ terere, man gibinwang’u ng’eyong’ec ma tap iwi lembamung’a ma leng’ pa Mungu, ma lembamung’ane tie Kristu. 3 Lonyo ceke mi rieko man mi ng’eyong’ec ukanere cuu mandha i iye. 4 Abeyero lembe maeni kara ng’atu moko kud uwondwu ku wec mi thokojo. 5 Kadok nwang’u ambe karacelo kudwu i kum, re atie kudwu i tipo. Anyong’a de ubenega nineno nia wubetimo lembe ma ber kakare kakare man wucungo ma tek i yiyoyic ma wutie ko i Kristu.

6 Pieno, tap calu ma wudaru yiyo Kristu Yesu ma Rwoth, wumeduru niwotho karacelo kude, 7 ma ulegwu unyang’ man wugieruru de i iye; bende wucung nging’ nging’ i yiyoyic, tap calu ma juponjo kowu man wudhir ku dwoko foyofoc.

8 Wubed ku weng’wu kara ng’atu moko kud udwokwu ni ng’eca* ku rieko mi dhanu man awonde ma iye nanu m’ucungo iwi lembsuru mi dhanu man paru ku timo m’i ng’om maeni, ento m’ucungo iwi Kristu re ngo; 9 pilembe kite* ceke pa Mungu upong’ bik i iye. 10 Pieno, wun de wupong’ bik ku kite* pa Mungu ni kume, en m’etie wic mi bimobim man dito ceke. 11 Ni kum winjiri ma wutie ko kude, jutimo bende yaa i kumwu ma en e yaa ma jutimo ngo ku cing’, ma jukabu ko ring’kum, ento yaa pa Kristu. 12 Kum juyikowu kude i batizo pare, man ni kum winjiri ma wutie ko kude jucerowu bende karacelo ni kum yiyoyic ma wutie ko i tego pa Mungu m’ucere ku kind ju m’utho.

13 M’umedo maeno, kadok nwang’u wular wutho i kier mwu man jutimo ngo yaa i ring’kumwu, Mungu uketho wudoko kwo karacelo kude. Eweko kier mwa ceke ku berocwinye 14 man eruco Cik ma jugoro m’utuco wiwa man m’uketho kier mwa unen kamaleng’. Mungu ukabe cen nikadhu kud i tho pa Kristu iwi yen mi can.* 15 Nikadhu kud i yen mi can eno, Mungu uketho jubim ku weg dito gibedo muneru man enyuthogi ngbeng’ i kind lwak calu dhanu ma juloyo m’ebetelo wigi i piro mir aloci.

16 Pieno, kud wuwek ng’atu moko upok lembe i wiwu pi gin ma wubecamu man ma wubemadhu, kunoke pi timo foc, man pi dwi ma por, kadi pi sabatu. 17 Kum giki maeno gitie tipopiny mi gin ma bibino, ma re mandhane utie Kristu. 18 Wubed ku weng’wu i kum ju ma gijwigiri kende kende kara jumange unengi man ma giworo jumalaika,* pilembe gicopo cerowu kara kud wunwang’ sukulia mwu. Dhanu maeno gimoko kikiki i kum gin ma gineno man gibedodiri gigi ni kum paru migi ma kathere mbe. 19 Giwanyiri cen kud i kum wic, ma en e ng’atu ma ni kume watkum ceke gibenwang’u gin ma gitie ku yenyne man gimoko karacelo cuu nikadhu kud i ujonj man ler, bende nikadhu kud i bang’e re ma Mungu uketho kum ceke ubedongo.

20 Ka wudaru tho karacelo ku Kristu man dong’ wutie agonya ni paru man timo mi ng’om maeni, pirang’o ke wubekwo ve fodi asu wun’i ng’ombe? Man wubemeduru asu niworo cik m’uyero: 21 “Kud iting’, kud ibil, kud imul;” 22 cik maeno uweco iwi gin ma nyothiri pet ka jubetiyo kugi, gitie lembang’ola man ponji mi dhanu. 23 Kadok nwang’u ginen nia ve gitie cik mi rieko de, ento gikonyo ngo dhanu ninyego i kum awanya ma rac mi kumgi, man gibeworo cikne pilembe gibemito ging’ii gin gigi ayi ma gitim ko ni Mungu, bende gibenyayu peko i kumgi gigi pilembe gibemito dhanu mange unwang’ nia gitie mol.

3 Ento tek wudaru cer karacelo ku Kristu, dong’ wumeduru niyenyo piny ma n’i malu ka ma Kristu ujany i iye yor i cing’ mir acwic pa Mungu. 2 Wumeduru niketho wiwu zoo i kum piny ma n’i malu, ento ungo i kum piny ma n’i wi ng’om. 3 Kum wutho man kwo mwu ukanere karacelo ku Kristu nimakere ku yeny pa Mungu. 4 Kinde ma Kristu ma en e kwo mwa binyuthere, e wun bende wubinyuthuru karacelo kude i dwong’.

5 Pieno, wuneg watkumwu ma gin’i ng’om pi lembe m’uneno lembsasa mi tarwang’,* sasa, ayiri, awanya ma rac, kethocwiny hai i kum piny, ma tie rwo ni ayi gin m’acwiya. 6 Kum pi lembe maeno re ma kwinyo pa Mungu ubebino. 7 Eno tie ayi ma wun bende wubed wuwotho ko i kit kwo mwu ma con. 8 Ento kawoni wucikuru nikabu timo maeni ceke cen kud i beng’wu: Ng’eicwiny, kwinyo, rac cwiny, ayany, man kadok wec ma reco de kud uwok ki kud i dhogwu. 9 Kud wucway ndra i kindwu ng’atuman ni wadi man ni wadi. Wukab ng’atu ma con cen ku timo pare de, 10 man wurony ng’atu* ma nyen, ma ni kum ng’eyong’ec ma tap ebemedere nidoko nyen nimakere kud ayi pa Ng’atu m’ucwiye, 11 ma i iye Jagiriki kadi Jayahudi umbe, ng’atu ma jutimo yaa i kume ku ma jutimo yaa ngo i kume de mbe, kadi umondo, kadi Jasithia,* kadi ng’eca, kadi ng’atu ma tie agonya; ento Kristu re ma tie gin ceke i ceke.

12 Pieno, calu dhanu ma Mungu ung’iyo, ma leng’ man m’emaru, wuronyuru ku mer ma thuc, ku kisa, ku berocwiny, ku jwigiri, ku molcwiny man mwonyolembe hai. 13 Wumeduru niciruru i kindwu ng’atuman ucir wadi man ucir wadi, man wuwek lembe m’i kindwu yot yot kadok nwang’u ng’atu moko utie ku lembe i iye i kum wadi de. Tap calu ma Yehova bende uweko lembe mwu yot yot, wun de wucikuru nitimo kumeno. 14 Ento m’usagu gin maeno ceke, wuronyuru ku mer, kum en e jamtwic ma cuu mandha ma dikojo i acel.

15 Bende, wuwek kwiyocwiny pa Kristu ubim* wi adundewu pilembe julwong’owu i kwiyocwiny maeno i kum acel. Man wubed dhanu ma dwoko foyofoc. 16 Wuwek lembe pa Kristu upong’ bik i iwu i rieko ceke. Wumeduru niponjuru man nitielo cwinywu i kindwu* ku zaburi, ku pak ni Mungu, ku wer mi tipo ma wubewero ku foyofoc, man wuwer ni Yehova niai kud i adundewu. 17 Gin moko ci ma tek wubeyero kadi ma wubetimo, wutime i nying’ Rwoth Yesu ma nwang’u wubedwoko foyofoc ni Mungu ma Wego nikadhu kud i bang’e.

18 Wu mon, wujwiguru ni cogwu, kum etie lembe m’umaku piny i Rwoth. 19 Wu cogmon, wumeduru nimaru mon mwu man kud wubed kwiny kugi.* 20 Awiya, wubed wor ni junyodo mwu i lembe ceke, kum maeno nyayu mutoro i Rwoth. 21 Wu wego, kud wubed wunyay ng’eicwiny i awiya mwu kara can kud umond i igi.* 22 Wu ng’eca, wubed wor ni judongo mwu i lembe ceke, kud wubed wor kende kende kinde ma gibenenowu pi ninyayu anyong’a i dhanu, ento wuworgi kud adundewu m’abombi mbe i iye, ma wubelworo ko Yehova. 23 Gin moko ci ma tek wubetimo, wutime kud adundewu ceke calu ni Yehova, ento ungo ni dhanu, 24 kum wung’eyo nia Yehova re ma bimiyo iwu giralaga ma tie sukulia mwu. Wutim calu ng’eca ni Rwoth ma en e Kristu. 25 Andhandha ng’atu m’utimo lembe ma rac binwang’u sukulia mi lembe ma rac m’etimo, kum akoyakoya mbe i bang’ Mungu.

4 Wu judongo, wutim lembe ni ng’eca mwu i ayi m’atira man m’umaku piny, kum wung’eyo nia wun de Rwoth mwu n’i polo.

2 Wumeduru nirwo man ni kume wukii ma wubedwoko ko bende foyofoc. 3 I saa ma rom eno wurwo bende piwa, kara Mungu uyab dhugola i wang’wa pi nirweyo lembe man niyero pi lembamung’a ma leng’ iwi Kristu ma jutwiya i kol pire, 4 man kara arwey kamaleng’ kamaleng’ i ayi m’umaku arwey ko.

5 Wumeduru nikwo ku rieko* ku dhanu ma woko, man wutii ma ber mandha ku saa mwu. 6 Wek wec mwu bed ku bero i iye saa ceke man ma kadu rome, kara wung’ey kite ma wucikuru nidwoko ko lembe ni ng’atuman.

7 Tikiko m’umego para ma jamer, ma jatic mandha man ng’eca wada i Rwoth, binyutho iwu lembe ceke m’uneno an. 8 Abeore i beng’wu kara wuwok wung’ey maram wabedo ko man kara ejuk cwinywu. 9 Ebebino karacelo kud Onesimo m’uai kuno, ma tie umira m’amaru man ng’atu ma jugeno; gibiwok nyutho iwu lembe ceke m’ubekadhu kuni.

10 Aristarko ma jakol wada ucwalu iwu moth, man Marko bende ma wat pa Barnaba (ma wunwang’u telowic pire nia wujole kinde m’etundo i beng’wu). 11 Yesu ma julwong’o Yustho de umothowu; joni gitie i kind ju ma jutimo yaa i kumgi. Man gin kendgi re ma gi jutic wada pi Ker pa Mungu; gikonya man gitielo cwinya lee. 12 Epafra m’uai i beng’wu man ma tie ng’eca pa Kristu Yesu umothowu. Ebeii aia saa ceke i rwo pare piwu, kara tokcen ne wubin wucung ma tek i yeny ceke pa Mungu calu dhanu m’uteng’ini man ma cwinygi tek. 13 Abetuco pire nia ebeii lee dit piwu man pi ju m’i Laodikia ku ju m’i Hierapoli.

14 Luka, ma munganga ma jamer umothowu, man Dema bende. 15 Wucwal moth para ni umego mi Laodikia man ni Nimfa ku cokiri ma n’i yo pare. 16 Kinde ma wusomo waraga maeni, wuor jucidh jusome bende i cokiri mi Laodikia man wun de wusom m’uai i Laodikia. 17 Bende, wuyer ni Arkipo kumae: “Keth wii zoo i kum tic m’ijolo i bang’ Rwoth, kara itime cuu.”

18 Eni tie moth para m’agoro ku cinga gira, an a Paulo. Wiwu kud uwil pi nyoro ma jutwiya ko i kol. Bero ma yawe mbe ubed kudwu.