BARUA MI KWONG’O NI JUTHESALONIKI

1 Niai kud i bang’ Paulo, Silvano* man Timoteo, ni cokiri mi Thesaloniki ma gi pa Mungu ma Wego man pa Rwoth Yesu Kristu:

Bero ma yawe mbe man kwiyocwiny ubed kudwu.

2 Wabed wadwoko foyofoc ni Mungu saa ceke kinde ma wabekwayu piwu ceke i rwo mwa, 3 kum wabemedara nipoy i wang’ Mungu ma Wegwa pi tic ma yiyoyic mwu ucwaluwu nitimo, pi tic mwu mi mer, man pi cirocir ma wunyutho ni kum genogen ma wutie ko i Rwoth mwa Yesu Kristu. 4 Umego ma Mungu umaru, wang’eyo nia eng’iyowu, 5 kum lembanyong’a ma warweyo utundo i beng’wu ku wec kende ngo, ento bende ku tego, ku kony pa tipo ma leng’, man waweco ma jiji mbe tap calu ma wung’eyo nia wadoko kit dhanu ma nenedi i kindwu pi bero mwu. 6 Man wudoko jukwany kothwa man koth Rwoth, kum kadok kud i kind masendi ma lee, wujolo lembe kud anyong’a ma tipo ma leng’ miyo, 7 pieno wudoko ni lapor ni juyic ceke ma gin’i Makedonia man i Akaya.

8 I andha, wurweyo lembe pa Yehova i Makedonia man i Akaya kende ngo, ento pi yiyoyic ma wutie ko i Mungu umew i kakare ceke, uketho wambe ku yeny mi yero lembe moko ci. 9 Kum dhanune gin gigi de gibemediri nikoro pi rombo mwa ma kwong’a kudwu, man pi kite ma wuweko ko ayi gin m’acwiya mwu pi nidwogo i bang’ Mungu, kara wutim ni Mungu ma kwo man mandha, 10 man kara wukur Wode ma biai kud i polo, m’ecero ku kind ju m’utho, niwacu Yesu, ma bibodhowa kud i kwinyo ma bibino.

2 Umego, wun giwu wung’eyo cuu nia liew ma wabin waliewo kowu ubino mi mananu ngo. 2 Kum calu ma wung’eyo, kadok nwang’u ku kwong’a wasendara lee man jutimowa rac dit i Filipi de, re Mungu mwa umiyo iwa tegocwiny kara warwey iwu lembanyong’a pa Mungu kadok kud i wang’ jai ma tek.* 3 Kum lembe ma wayero iwu ucungo ngo iwi lembndra, kadi iwi paru m’ucido kunoke iwi rieko mir abombi, 4 ento tap calu ma Mungu unwang’u nia waromo, emiyo iwa tic mi rweyo lembanyong’a, uketho wabeweco pi nifoyo ngo i dhanu, ento i Mungu ma ng’iyo i adundewa.

5 I andha, wung’eyo nia watiyo ngo ku wec ma mit pi niwondowu, kadi wanyuthara ngo i beng’wu nia watie dhanu ma ber pi ninwang’u piny moko; Mungu tie jamulembe mwa! 6 Bende wabesayu ngo yung i bang’ dhanu, nik’ebed i beng’wu kadi i bang’ jumange, ma ke nwang’u wa jukwenda pa Kristu wacopo bedo iwu ni ter ma pek. 7 Tung’ ku maeno, wadoko yoo i kindwu calu mego kinde m’ebepido man ebegwoko nyathin pare ma dhe ku mer. 8 Pieno, calu wamaruwu lee, wabino ayika* nirweyo iwu lembanyong’a pa Mungu kende ngo, ento nimiyo bende kwo mwa ngi piwu, pilembe wudoko ju ma kacwinywa.

9 Umego, m’umbe jiji wubepoy pi tic ma tek ma wamulara ko. Kinde ma wabino rweyo iwu lembanyong’a pa Mungu, watimo tic diewor ku dieceng’ kara kud wadok ni ter ma pek ni ng’atu moko acel de m’i kindwu. 10 Wun man Mungu bende wutie jumulembe nia i kindwu wu juyic wabino ku timo ma leng’, ma pwe man m’umbe adote. 11 Wung’eyo cuu nia waweko ngo nikwayuwu, nijuko cwinywu, man ninyutho iwu lembe m’ukwayu wutim tap calu ma wego timo ni nyithindho pare, 12 kara wumeduru niwotho i ayi m’uromo ku Mungu m’ubelwong’owu i Ker pare man i dwong’.

13 Pi thelembe maeno re ma wabedwoko foyofoc ni Mungu m’umbe niweko, pilembe kinde ma wujolo lembe pa Mungu ma wuwinjo kud i bang’wa, wujole ngo calu lembe pa dhanu, ento wujole ni lembe pa Mungu andhandha m’ubetimo bende tic i iwu wu juyic. 14 Umego, wudoko jukwany koth cokiri pa Mungu ma ginwang’iri i Yudea man ma gin’i acel ku Kristu Yesu, pilembe juthugiwu ma dhe re ma gibesendowu tap calu ma umego mi Yudea de gibesendiri i the cing’ Juyahudi, 15 ma ginego cil Rwoth Yesu ku jubila, man gibenyayu bende ragedo i kumwa. M’umedo maeno, gibefoyo ngo i Mungu man lembe ma gibetimo copo miyo ngo bero ni ng’atu moko acel de, 16 kum gibeyenyo gicerwa kara kud warwey ni dhanu mi thek mange rwonglembe ma copo bodhogi. I ayi maeno re ma saa ceke gibemedo dubo migi ameda. Ento tokcen ne kwinyo pa Mungu biloi i wigi.

17 Umego, kinde ma wapokara* kudwu pi saa ma nyanok (re i kum, ento ungo i adundewa), watimo kero mwa ceke kara wabin wanenwu kendo pilembe avewu ubino negowa lee. 18 Pi thelembe maeno re ma wayenyo nia wabin i beng’wu, eyo, an a Paulo, apimo wang’ acel kende ngo ento wang’ ario; re Sitani ucero wang’wa. 19 I andha genogen mwa, anyong’a mwa, man jamker mwa mi wic mi yungiri i wang’ Rwoth mwa Yesu i saa mi bedonuti pare utie ang’o? Nyo etie wun ungo? 20 Eyo, wun re ma wutie dwong’ mwa man anyong’a mwa.

3 Pieno, calu ma wabino kud ava lee mi ng’eyo rwonglembe ma kuno, wanwang’u nia e ber ya wabed kendwa i Athene; 2 man nia waor Timoteo m’umegwa, m’ubetimo tic pa Mungu* i lembanyong’a m’uneno Kristu, kara eketh wucung nging’ nging’* man ejuk cwinywu i yiyoyic mwu, 3 kara ng’atu moko acel de m’i kindwu kud udok lingolingo ni kum ragedo maeno. Pilembe wun giwu de wung’eyo nia wacopo uro ngo wadi gin ma kumeni.* 4 Kum kinde ma wabino karacelo kudwu, wabed wanyutho iwu i wang’e nia wabinwang’ara ku ragedo man etimere de tap kumeno calu ma wung’eyo. 5 Pi thelembe maeno calu acopo ciro ngo akeca, aoro Timoteo i beng’wu kara ang’ey pi gwokobedoleng’ mwu. Kum ka ku yo moko Jabidhe ubidhowu, e nwang’u tic ma wasendara ko ubino mananu.

6 Ento Timoteo m’uai i beng’wu utundo i bang’wa kawoni eni man edwogo ku rwonglembe ma ber pi gwokobedoleng’ man mer mwu, man ekoro nia saa ceke wubemeduru nipoy piwa ku mutoro, man nia ava nenowa ubenegowu lee tap calu ma wan de ava nenowu ubenegowa. 7 Pi thelembe maeno umego, kud i ang’abacwiny man i masendi mwa ceke, cwinywa ujukere ni kumwu man ni kum kite ma wubegwoko ko bedoleng’ mwu. 8 Kawoni kero dwogo i kumwa, kum wang’eyo nia wucungo nging’ nging’ i Rwoth. 9 Waromo timo ang’o pi nidwoko foyofoc mwa ni Mungu piwu man pir anyong’a ma yawe mbe ma watie ko i wang’e piwu? 10 Wabekwaye diewor ku dieceng’ ku tego mwa ceke nia wabin wanenwu wang’ ku wang’ man wapong’ gin ma wumbe ko kara yiyoyic mwu udok tek.

11 Dong’ Mungu ma Wegwa en gire man Rwoth mwa Yesu giyab yo iwa kara wabin i beng’wu. 12 Bende, Rwoth uketh mer mwu umedere ameda man esagere asaga ni ng’atuman ku wadi man ku wadi, man ni dhanu ceke tap calu ma wamaruwu, 13 kara eketh adundewu ucung ma tek, ma wu leng’ tetete i wang’ Mungu ma Wegwa i saa mi bedonuti pa Rwoth mwa Yesu ku jumaleng’ pare ceke.

4 Tokcen ne umego, tap calu ma wunwang’u telowic niai kud i bang’wa iwi kite ma wucikuru niwotho ko kara wunyay anyong’a i Mungu, calu ma nwang’u de wubewotho ko, wabejukowu man wabekwayuwu i nying’ Rwoth Yesu nia wumeduru nitimo kumeno nisagu. 2 Kum wung’eyo telowic ma wamiyo iwu m’uai i bang’ Rwoth Yesu.

3 Kum maeni en e yeny pa Mungu nia wubed leng’ man wuceruru i kum lembsasa mi tarwang’.* 4 Ng’atuman m’i kindwu ucikere ning’eyo ayi m’ebim ko wi kume gire i leng’o man i yung, 5 ento kud ewenjere ni ayiri man ni ava mi timo tarwang’ ma bimo wie tek calu ma dhanu mi thek mange ma ging’eyo Mungu ngo gitie ko. 6 Ng’atu moko kud ukadh mupaka man etim umin rac i lembe maeni, kum Yehova bimiyo matira ni dhanu ma gibetimo lembe maeni ceke, tap calu ma walar wapoyowu man wacimowu bende ma tek mandha. 7 Kum Mungu ulwong’owa pi sasa ngo, ento pi dwokirileng’. 8 Pieno, ng’atu m’ucayu cimowang’ maeni nwang’u ebecayu ngo dhanu, ento ecayu Mungu ma miyo iwu tipo pare ma leng’.

9 Ento iwi lembe m’uneno mer mir umego, wumbe ku yeny ma nia wakiew iwu gin moko, kum wun giwu de Mungu uponjowu nia wumeruru i kindwu. 10 Man wubetimo de kumeno andha ni umego ceke ma gin’i Makedonia ngung’. Ento wabekwayuwu umego, nia wumeduru nitimo kumeno dong’ nisagu. 11 Wutim kero nikwo ku kwiyocwiny, kud wumond i lembe mi jumange, man wutim tic ku cingwu tap calu ma wang’olo iwu, 12 kara wuwoth i ayi m’umaku piny i wang’ ju ma woko, man ma wumbe ku yeny mi gin moko ci.

13 M’umedo maeno umego, wabemito ngo nia wubed m’umbe ng’eyong’ec iwi dhanu ma githo, kara can kud unegwu calu dong’ dhanu mange ma gimbe ku genogen. 14 Kum tek wayiyo nia Yesu utho man edok ecer, wayiyo bende nia Mungu bicero julub pa Yesu ma githo kara gibed karacelo kude. 15 Kum eni tie gin ma wabeyero iwu ni kum lembe pa Yehova, nia wan ma wakwo i saa mi bedonuti pa Rwoth wabitelo yo ki ngo ni ju ma githo; 16 kum Rwoth ku kume biloro niai kud i polo ku kok mi ng’ol, ku dwal pa jadit mi jumalaika, man kud agwara pa Mungu; e ju ma githo i Kristu gibilar cer. 17 I ng’eye, wan ma wabedo kwo jubiting’owa malu i afuru pi nibedo karacelo kugi man nirombo ku Rwoth i kor polo; e wabibedo ku Rwoth nja. 18 Pieno, dong’ wumeduru nijuko cwinywu i kindwu ku lembe maeni.

5 Ento umego, pi nindo man pi saa ma lembe maeni bitimere i iye, wumbe ku yeny ma nia jukiew iwu lembe moko. 2 Kum wun giwu wung’eyo cuu nia nindo pa Yehova bibino tap calu jakwo ma bino ku diewor. 3 Kinde ma gibiyero kumae: “Kwiyocwiny ku bedomoth!” E nyoth ma rek biwok i wigi ndhundhu nica tap calu moc* ma goyo dhaku ma iye nuti, man gibiboth ki ngo. 4 Ento wun, umego, wun’i mudho ngo ma nia ceng’ maeno urubwu rek calu ma der rubo ko jukwo, 5 kum wun ceke wutie nyithindho mi der man mi dieceng’. Watie ngo nyithindho mi diewor kadi mi mudho.

6 Pieno, dong’ kud wanindu calu dhanu mange, ento wamedara nikiyo man wabed nger. 7 Kum dhanu ma gibenindo, ginindo ku diewor; man dhanu ma gibemer de gimer ku diewor. 8 Ento piwa wa nyithindho mi dieceng’, wamedara nibedo nger, warony asi mi yiyoyic man mi mer, bende warony genogen mi both calu sabu, 9 pilembe Mungu ung’iyowa ngo kara ekel kwinyo pare i wiwa, ento kara wanwang’ both nikadhu kud i bang’ Rwoth mwa Yesu Kristu. 10 Etho piwa, kara nik’ebed wabekiyo kunoke wabenindo,* wakwo karacelo kude. 11 Pieno, wumeduru nitielo cwinywu* i kindwu man niteng’uru i kindwu tap calu ma wubetimo.

12 Umego, wabekwayuwu nia wunyuth woro ni ju ma gibetimo tic ma tek i kindwu, ku ma gibetelo wiwu i Rwoth man ma gibejukowu; 13 wumii igi bende yung m’usagu man wumargi pi tic migi. Wubed ku kwiyocwiny i kindwu. 14 M’umedo maeno, wabekwayuwu, umego, nia wujuk ju ma gibetimiri swa, wuwec i ayi ma juko cwiny ni ju ma cwinygi tur,* wutiel ju ma ng’ic, man wucir dhanu ceke. 15 Wunen nia ng’atu moko acel de uculo ngo kwor ni wadi, ento saa ceke wuii nitimo bero ng’atuman ni wadi man ni wadi, man ni dhanu mange ceke.

16 Anyong’a negwu saa ceke. 17 Wurwo areri. 18 Wudwok foyofoc pi gin ceke. Kum maeni gitie lembe ma Mungu ubeyenyo i beng’wu wun ma wu julub pa Kristu Yesu. 19 Kud wuneg mac mi tipo. 20 Kud wucay lembila. 21 Wung’ii cuu i lembe ceke; wumok kii i kum gin ma ber. 22 Wuceruru i kum kit racu moko ci.

23 Umego, wek Mungu mi kwiyocwiny en gire udwokwu leng’ tetete, man wek kumwu, tipowu, ku ng’eyong’ec* mwu ubed agwoka ma cilo mbe nitundo i saa mi bedonuti pa Rwoth mwa Yesu Kristu. 24 Ng’atu m’ulwong’owu bitimo lembe maeno andha, pilembe etimo lembe m’eng’olo.

25 Umego, wumeduru nirwo piwa.

26 Wumoth umego ceke ku cwiyolimb ma leng’.

27 Abeng’olo iwu ma tek i nying’ Rwoth nia wuketh jusom barua maeni ni umego ceke.

28 Bero ma yawe mbe pa Rwoth mwa Yesu Kristu ubed kudwu.