BARUA NI TITO

1 Niai kud i bang’ Paulo ma jatic pa Mungu man jakwenda pa Yesu Kristu nimakere ku yiyoyic mi ju ma Mungu ung’iyo man ng’eyong’ec ma tap mi lemandha. Ng’eyong’ec maeno uketho i iye nimoko kikiki i kum Mungu 2 man ecungo iwi genogen mi kwo ma rondo ku rondo ma Mungu ma copo cwayu ndra ki ngo ung’olo niai yang’ con; 3 ento i saa pare gire, eketho lembe pare ung’eyere nikadhu kud i tic mi rweyo lembanyong’a m’eketho i kora ni kum cik pa Mungu ma Jalar mwa; 4 ni Tito ma nyathin para mandha calku yiyoyic m’udikowa:

Bero ma yawe mbe man kwiyocwiny pa Mungu ma Wego man pa Kristu Yesu ma Jalar mwa ubed kudi.

5 Aweki i Krete kara iyik lembe m’ubewotho cuu ngo* man iketh judong cokiri kubang’ adhuraman, calku telowic m’amiyo iri: 6 Nia jadit cokiri ucikere nibedo ng’atu* m’adote mbe i wiye, cwar dhaku acel, ng’atu ma tie kud awiya ma gi juyic, man ma judotogi ngo nia kura migi rac kadi ya gi jujai. 7 Kum calu jakurpiny pa Mungu, jadit cokiri ucikere nibedo ng’atu m’adote mbe i wiye, ng’atu ma winjo jumange, ma ng’eicwiny make swa swa ngo, ma mer ungo ku kong’o, ma goyojo ngo, man ma sayu ngo ku cwinye ceke nibedo ku piny i ayi m’atira ngo; 8 ento ebed jajol, ng’atu m’umaru gin ma ber, ma wiye tiyo ma ber,* ng’atu ma pwe, m’ubegwoko bedoleng’ pare ni Mungu, ma kwerere gire, 9 man m’umoko kikiki i kum lemandha* i bodho pare mi ponji, kara ebed ku copo mi tielocwinyjo* ku ponji ma ber* man mi juko bende jupiem.

10 Kum dhanu tie dupa ma gi jujai, juwec ma iye nanu, man jundra, asagane ju m’ubecwaku timo yaa. 11 Ukwayu imii dhu dhanu maeno cen, kum gin eno re ma gibemediri nilalu i juruot ku ponjo lembe ma nwang’u gicikiri ngo niponjo kende kende pi ninwang’u piny i ayi m’atira ngo. 12 Ng’atu acel m’i kindgi ma tie jabila migi gigi uyero kumae: “Jukrete gicwayu vupo saa ceke, gi yedi ma reco, gi junyap man gi weg abamba.”

13 Lembe m’eyero eno utie lemandha. Pi thelembe maeno, mediri nijukogi m’umbe lele kara gicung ma tek i yiyoyic, 14 kud gicik ithgi i kum lembuda mi Juyahudi man i kum cik mi dhanu ma giweko lemandha. 15 Gin ceke tie leng’ ni dhanu ma gi leng’, ento ni dhanu ma gicido man ma gimbe ku yiyoyic, gin moko acel de mbe ma leng’, kum paru migi ku pidocwiny migi ceke udaru cido. 16 Gibetuco kamaleng’ nia ging’eyo Mungu, ento lembe ma gibetimo ubenyutho nia gikwere, pilembe gitie gin ma judagu, wigi tek, man Mungu uyiyogi ngo pi tic moko acel de ma ber.

2 Ento in, mediri niponjo lembe m’urombo ku ponji ma ber.* 2 Kwayu jumaco ma giteng’ini gibed dhanu ma gikadhu ngo mukero i kwo migi, ma gi wayawaya* ngo, gibed dhanu ma wigi tiyo ma ber, ma gi tek i yiyoyic, i mer man i cirocir. 3 Rom rom kumeno, kwayu jumamon ma giteng’ini gibed ku timo mi dhanu ma woro Mungu, kud giyer nying’, kud gibed ng’eca mi pigulok, ento juponji mi lembe ma ber, 4 kara gibed ku copo mi ponjo* mon ma nyir ya gimar coggi, gimar awiya migi, 5 gibed ma wigi tiyo ma ber, ma wang’gi lal ungo swa i kum co mange, ma gitimo tic i udi migi,* gibed ku kura ma ber, ma gi ng’won ni coggi, kara kud juwec rac i kum lembe pa Mungu.

6 Kumeno bende, mediri ninyutho ni awobi nia gibed ma wigi tiyo ma ber, 7 ma nwang’u in giri de ibenyutho i lembe ceke nia itie lapor i tic ma beco. Ponj lembe mandha m’umbe lele, 8 m’ibetiyo ku wec ma ber* ma jucopo cayu ngo, kara lewic umak dhanu ma gibejai, pilembe gikoso lembe ma rac ma giyer i wiwa. 9 Kwayu ng’eca gibed wor ni judongo migi i lembe ceke, gitim kero ninyayu mutoro i igi m’umbe niloko lembe i dhoggi, 10 kud gikwal judongo migi, ento ginyuth nia gitie dhanu ma jugeno i lembe ceke, kara ku yo moko ci giruk ponji pa Mungu ma Jalar mwa.

11 Kum bero ma yawe mbe pa Mungu udaru nyuthere man ebekelo both ni kwond dhanu ceke. 12 Ebeponjowa nia kud wakos woro ni Mungu man kud wabed kud awanya ma rac m’i ng’om, ento wakwo ma wiwa betiyo ma ber ku bedopwe man ma wamoko kikiki i kum Mungu i ng’om maeni,* 13 kinde ma wabekuro genogen mir anyong’a man nyuthonyuth ma dwong’ pa Mungu ma dit man pa Jalar mwa Yesu Kristu, 14 m’umiyere gire piwa kara egonywa kud i kwond timo ceke mi turocik, man kara elwok ire gire dhanu ma gi piny pare ma segi ma gitie kud amora pi tic ma beco.

15 Mediri niponjo lembe maeni, nimiyo amora i kum* jumange man nijukogi ku ng’ol ceke m’itie ko. Kud iwek ng’atu moko ceyi.

3 Mediri nipoyo wigi nia gibed gijwigiri man gibed wor ni jubim man ni judongo, gibed ayika pi tic moko ci ma ber, 2 kud giwec rac i kum ng’atu moko, kud gibed jurop, ento gibed dhanu ma i lembe migi tek ungo, man saa ceke ginyuth molcwiny ni dhanu ceke. 3 Kum wan de naka wabino jukusegu, wiwa bino tek, juwondowa, wabino ng’eca mi kwond awanya ma tung’ tung’, ng’eca mir anyong’a, wabino ku timo ma rac, jukumira, wabino gin ma judagu, man wadagara i kindwa.

4 Ento kinde ma berocwiny pa Mungu ma Jalar mwa man mer m’emaru ko dhanu unyuthere 5 (utie ngo ni kum tic moko mi bedopwe ma watimo, ento ni kum kisa pare gire), ebodhowa nikadhu kud i pii* m’uketho wanwang’u kwo man nikadhu kud i tipo pare ma leng’ m’udwokowa nyen. 6 Ekonjo tipo maeno i wiwa lee mandha* nikadhu kud i bang’ Yesu Kristu ma Jalar mwa, 7 kara i ng’ei ma jukwanuwa ni weg bedopwe ni kum bero ma yawe mbe pa ng’atu maeno, wadok jucampacu calku genogen mi kwo ma rondo ku rondo.

8 Lembe maeni gitie lemandha, man abemito nia imediri niketho nwoc i wigi, kara dhanu ma giyiyo Mungu gimediri niketho wigi ceke i kum timo tic ma ber. Lembe maeni gitie ber man gitie ku bero ni dhanu.

9 Ento kud imond i piem mi ming’o, kwanu thekwaru, teliri, man dhau ma judhau ko iwi Cik, kum gitie gin ma kony migi mbe man ma igi nanu. 10 Ng’atu m’ubecaku the yic ma tung’ lundo, koyiri cen kud i kume i ng’ei m’ijuke* wang’ ma kwong’a man mir arionde, 11 m’ing’ey ko nia ng’atu ma kumeno udaru weko yo m’atira, ebedubo man ebepoko lembe i wiye gire.

12 Kinde m’abioro Artemas kunoke Tikiko i beng’i, tim kero peri zoo ibin i bang’a i Nikopoli, kum ang’iyo nibedo kuca i saa pa koyo. 13 Pong’ cuu mandha yeny pa Zena ma tie ng’atu m’ung’eyo Cik cuu, man pa Apolo kara kud gikos gin moko ki pi woth migi. 14 Ento dhanu ma mwa de kwayu giponj nitimo tic ma ber, kara gikony tekene yeny ma pio pio uwok man kara kud gibed dhanu ma gicego ngo nyinggi.

15 Dhanu ceke ma gin’i kuda gicwalu iri moth migi. Moth dhanu ma gimaruwa ma gin’i yiyoyic.

Bero ma yawe mbe ubed kudwu ceke.