BARUA NI JUEBRANIA

1 Yang’ con Mungu ugam uweco i bang’ kwaruwa nikadhu kud i bang’ jubila wang’ dupa man i ayi ma tung’ tung’. 2 Ento kawoni, i nindo maeni mi kajik, eweco i bang’wa nikadhu kud i bang’ Wode m’eng’iyo ubed jacampacu mi piny ceke, man ma nikadhu kud i bang’e ecwiyo piny ceke.* 3 Eberienyo dwong’ pa Mungu man etie ayi ma tap pa Mungu ku kume, etielo gin ceke nikadhu kud i tego mi wec pare man i ng’ei m’elwoko dubo mwa, ebedo yor i cing’ mir acwic pa Mungu ma dit i kabedo ma malu. 4 Pieno, edoko dit nisagu jumalaika kum elagu nying’ ma ber mandha m’usagu migi.

5 Ku lapor, ni malaika ma kani ma Mungu uyero kumae: “Itie woda; tin adoko wuru”? Man kendo kumae: “Abidoko won, man ebidoko woda”? 6 Ento kinde m’ekelo kendo Wode ma kayu i ng’om, eyero kumae: “Wek jumalaika pa Mungu ceke giwore.”*

7 Bende, pi jumalaika eyero kumae: “Eketho jumalaika gidok tipo ma tek, man jutic pare* ni lebmac.” 8 Ento pi Wod, eyero kumae: “Mungu tie komker peri rondo ku rondo, man uluth mi Ker peri en e uluth mi bedopwe. 9 Imaru bedopwe man idagu turocik. Pi thelembe maeno re ma Mungu, Mungu peri uwiri ku mo mir anyong’a nisagu juwedu.” 10 Lembagora uyero bende kumae: “E Rwoth, i acaki iketho kathere mi ng’om, man polo gitie tic mi cingi. 11 Gibinyothiri, ento in ibibedo asu; man calu bongu, gin ceke gibitii 12 man ibidologi tap calu bongu, bende calu kendi, jubiwilogi cen. Ento in ilokiri ngo, man oro peri bijik ki ngo.”

13 Ento ni malaika ma kani ma Mungu uyero kumae: “Bed yor i cinga mir acwic nitundo m’aketh ko jukwor peri ni dul mi the tiendi”? 14 Nyo gin ceke gitie ngo tipo pi tic ma leng’ ma juoro pi nitimo ni dhanu ma bibothi?

2 Pi thelembe maeno, pire tie tek nia dong’ waketh wiwa nisagu zoo i kum lembe ma wawinjo, kara kud wakier nyanok de kud i yo. 2 Kum tek lembe ma juyero nikadhu kud i bang’ jumalaika ugam ucungo ma tek, uketho judok jumiyo matira ni ng’atu moko ci m’utimo kier man m’ukoso woro nimakere ku bedopwe, 3 dong’ wabiboth nenedi tekene wacayu tho both ma lee rukeni ngi? Kum Rwoth mwa ubino ng’atu ma kwong’a m’ucaku rweyo pi bothne man ju m’uwinje gituco pire iwa nia etie lemandha, 4 kinde ma Mungu bende umiyo lembatuca nikadhu kud i giranyutha, thangu, udu ma tung’ tung’ man nikadhu kud i giramiya mi tipo ma leng’ m’epoko nimakere ku yeny pare.

5 Kum utie ngo ni jumalaika re ma Mungu uketho ng’om mi nindo m’ubino ma wabeweco pire ubed wor. 6 Ento jamulembe acel uyero kaka moko kumae: “Dhanu en e ang’o ma nia ii pid pire, kadi wod dhanu ma nia idieng’ pire? 7 Iketho ebedo piny nyanok nisagu jumalaika; ironye ku dwong’ man yung, man ikethe iwi tic mi cingi. 8 Iketho piny ceke udoko wor i the tiende.” Kinde ma Mungu uketho piny ceke udoko wor ire, piny moko mbe m’eweko udoko ngo wor ire. Re kawoni wabeneno nia fodi piny ceke ngo ma tie wor ire. 9 Ento wabeneno Yesu ma Mungu udwoke piny nyanok nisagu jumalaika man eronye ku dwong’ man yung pi tho m’esendere ko, kara ni kum bero ma yawe mbe pa Mungu, ebil tho pi dhanu ceke.

10 Kum pi nikelo wot dupa i dwong’, ebino lembe ma kakare nia ng’atu ma piny ceke ucwiyere pire man ni kume uketh Jatela ma dit mi both migi udok ndhu cuu nikadhu kud i masendi. 11 Kum nik’ebed ng’atu m’ubedwokojo leng’ man ju m’ebedwokogi leng’, ceke giai i bang’ ng’atu acel, man pi thelembe maeno re ma embe ku lewic nilwong’ogi nia umego, 12 calu m’eyero kumae: “Abinyutho nyingi ni umego para; man i kind cokiri abipeki ku wer.” 13 Eyero kendo kumae: “Abiketho genogen para i iye.” Man bende: “Nen! An karacelo kud awiya ma thindho ma Yehova umiyo ira.”

14 Pieno, calu “awiya ma thindho” gitie giracwiya mi kum ku rimo, kumeno bende en de edoko kum ku rimo kara nikadhu kud i tho pare, enyoth cen ng’atu m’utie ku copo mi nego nek, niwacu Wonabali, 15 man kara egony dhanu ceke ma gibino ng’eca i kwo migi zoo ni kum lworo mi tho. 16 Kum i andha, utie ngo jumalaika re m’ebekonyo, ento ebekonyo nyikway* Abraham. 17 Pieno, ugam ukwayu nia edok calu “umego” pare i lembe ceke kara edok jalam ma dit ma won kisa man mandha i tic pa Mungu, wek kara ethier lam mi ripo kindjo* pi dubo mi dhanu. 18 Calu ma en gire de esendere kinde m’ebino i amulaic, pieno etie ku copo mi konyo dhanu ma gibenwang’iri i amulaic.

3 Pieno umego ma leng’, ma wunwang’u bende lwong’o mi polo, wupar cuu mandha pi jakwenda man jalam ma dit ma wabetuco pire, niwacu Yesu. 2 Ebino wor ni Ng’atu m’ukethe, tap calu ma Musa de ubino wor i ot ceke pa Mungu. 3 Kum jukwane* nia eromo ku dwong’ lee nisagu Musa, pilembe ng’atu m’ugiero ot bedo ku yung lee nisagu ode. 4 I andha, kubang’ ot ceke ng’atu moko giero en, ento ng’atu m’ugiero piny ceke utie Mungu. 5 Musa ubino jatic ma wor i ot ceke pa Mungu; eno ubino lanyuth* mi gin ma jubidok weco pire i ng’eye, 6 ento Kristu ubino wor iwi ot pa Mungu calu wod. Watie ot pa Mungu tekene wagwoko cuu mandha tegocwiny mwa man genogen ma wabelulara pire nitundo i ajiki.

7 Kum kumeno, tap calu ma tipo ma leng’ uyero, “Tin tekene wuwinjo dwande, 8 kud wudwok adundewu udok nwang’ calu i ceng’ mi kwinyo ma lake tek man i ceng’ mir amulaic i langa 9 kaka ma kwaruwu gimulo iya i iye man gitema, kadok nwang’u gineno tic para pi oro pier ang’wen (40) buu. 10 Eno uketho ava dhanu m’utuk maeno uai i kuma man ayero kumae: ‘Saa ceke gibekier i adundegi, man gituc ungo ning’eyo gengi para.’ 11 Pieno i ng’eicwiny para akwong’o nia, ‘Gibimondo ngo i yom para.’”

12 Umego, dong’ wubed ku weng’wu kara ng’atu moko m’i kindwu kud ubed kud adunde ma rac m’ukoso yiyoyic m’uketh ekoc bor ku Mungu ma kwo; 13 ento wumeduru nijuko cwinywu i kindwu kubang’ ceng’ tekene fodi asu nindo ma julwong’o “Tin” ubemedere, kara cwiny ng’atu moko m’i kindwu kud udok nwang’ ni kum awondi mi tego mi dubo. 14 Kum wabinwang’u andha gin ma Kristu bende unwang’u, kende kende tek wagwoko cuu mandha nitundo i ajiki tegocwiny ma wabino ko i acaki. 15 Calu m’egorere kumae: “Tin tekene wuwinjo dwande, kud wudwok adundewu udok nwang’ calu i ceng’ mi kwinyo ma lake tek.”

16 Kum jukani ma giwinjo ento giketho kwinyo ma lake tek umake? Nyo etie ngo dhanu ceke ma giwok kud i Misiri i the telowic pa Musa? 17 M’umedo maeno, jukani m’ubadhu cwiny Mungu pi oro ma kadhu pier ang’weni (40)? Nyo ubino ngo ju ma gidubo m’avujgi uvuto i langa? 18 Man ni jukani m’ekwong’o nia gibimondo ngo i yom pare? Nyo ubino ngo ni ju ma giwore ngo? 19 Pieno, wabeneno nia gigam gimondo ngo ni kum koso yiyoyic.

4 Pieno, calu fodi lembang’ola mi mondo i yom pare unuti asu, dong’ wabed ku wang’wa* maru jubinwang’u nia ng’atu moko m’i kindwu urem nimondo i iye. 2 Kum wan bende jurweyo iwa lembanyong’a tap calu ma jurweyo igi, ento lembe ma giwinjo umiyo ngo igi kony, pilembe gibino mbe ku yiyoyic ma rom ku mi ju m’uwinjo. 3 Ento wan ma watie ku yiyoyic, wabemondo i yom m’eyero pire kumae: “Pieno i ng’eicwiny para akwong’o nia, ‘Gibimondo ngo i yom para,’” kadok nwang’u tic pare uthum niai i thekiri mi ng’om. 4 Kum i kaka moko eyero lembe m’ulubo e pi ceng’ mir abiro: “Man Mungu uyom i ceng’ mir abirone ni tic pare ceke,” 5 man kaka mange eyero kumae: “Gibimondo ngo i yom para.”

6 Pieno, calu fodi ecopere ni jumoko nimondo i iye, man ju ma jular jurweyo igi lembanyong’a gimondo ngo ni kum koso woro, 7 eketho kendo nindo moko calu m’edok eyero i ng’eye bor i zaburi pa Daudi nia, “Tin”; tap calu m’ewacere malu kumae: “Tin tekene wuwinjo dwande, kud wudwok adundewu udok nwang’.” 8 Kum ka nwang’u Yocuwa ugam uterogi i kabedo mi yom, nwang’u i ng’eye Mungu udok uweco ngo pi nindo mange. 9 Pieno, yom moko mi sabatu fodi unuti asu pi dhanu pa Mungu. 10 Kum ng’atu m’umondo i yom pa Mungu eyom bende ni tic pare, tap calu ma Mungu de uyom ni tic pare.

11 Dong’ watimu kero mwa ceke kara wamond i yom maeno, kara ng’atu moko acel de kud upodh i kit koso woro ma rom. 12 Kum lembe pa Mungu e kwo man etie ku tego, e bith nisagu palamularu ma lake kun ku kun man emondo nitundo epoko kadok kind ng’eyong’ec* ku tipo,* man kind ujonj ku miyo, bende etie ku copo mi ng’iyo kind paru man yeny mir adunde. 13 Man giracwiya moko mbe m’upondo i wang’ Mungu, ento piny ceke bedo muneru man ginen ngbeng’ kamaleng’ i wang’ ng’atu ma wabiwodho ire wel.

14 Kum kumeno, calu watie ku jalam ma dit ma dwong’ m’ukadhu kud i kind polo, niwacu Yesu ma Wod Mungu, dong’ wamedara nituco pi yiyoyic ma watie ko i iye. 15 Kum jalam mwa ma dit utie ngo ng’atu ma kisa copo nege ngo i kum ng’ico mwa, ento watie ku jalam ma dit m’ukadhu i amulaic i lembe ceke calu wan, re m’umbe dubo. 16 Dong’ wacoru i kum komker mi bero ma yawe mbe ku tegocwinywa, kara wanwang’ kisa man wanwang’ bero ma yawe mbe pi nikonyowa tap i saane.

5 Kum kubang’ jalam ma dit ma jung’iyo kud i kind dhanu jukethe etim ni Mungu pi bero mi dhanune, kara ethier giramiya man lam pi dubo. 2 Calu en bende etie ku ng’ico, ecopo timo ku kisa* ni dhanu m’umbe ku ng’eyong’ec man m’urwinyo,* 3 man pi thelembe maeno ukwayu ethier lam pi dubo pare gire bende, tap calu m’ebethiero pi dubo mi dhanu.

4 Ng’atu moko mbe ma ng’iyere gire pi ninwang’u yung maeno, ento enwang’e kende kende tek Mungu re m’ung’iye, tap calu m’egam eng’iyo Arun. 5 Kumeno bende, Kristu ung’iyere gire ngo pi ninwang’u dwong’ mi doko jalam ma dit, ento Ng’atu m’umiyo ire dwong’ne utie Ng’atu m’uyero ire kumae: “Itie woda; tin adoko wuru.” 6 Calu eyero bende kaka mange kumae: “Itie jalam rondo ku rondo i ayi pa Melkisedek.”

7 Kinde ma Kristu ubino kwo iwi ng’om, etimo kwayukwac man erwo kud adundene ceke, ku dwal ma tek man piwang’ i bang’ Ng’atu ma copo lare kud i tho man ewinje yot yot ni kum lworo m’elworo ko Mungu. 8 Kadok nwang’u ebino wod, eponjo nibedo wor nikadhu kud i masendi m’enwang’ere ko. 9 Man i ng’ei m’edoko ng’atu m’uromo kakare, edoko ukungu mi both ma rondo ku rondo ni dhanu ceke ma gibewore, 10 pilembe Mungu ung’iye ebed jalam ma dit i ayi pa Melkisedek.

11 Watie ku lembe lee ma wayer pire, ento koro i lembene tek pilembe wudoko udhing’. 12 Kum kadok kawoni nwang’u wucikuru nibedo juponji, ento wutie ku yeny ma nia ng’atu moko ukeuponjwu kendo ku gin ma kwong’a ma wuponjo i lembe pa Mungu, man wudok kendo niyenyo cak kakare nicamu cam ma nwang’. 13 Kum ng’atu moko ci m’ubemedere nitungere ku cak nwang’u eng’iyo ngo ku lembe mi bedopwe, pilembe etie nyathin ma nyanok. 14 Ento cam ma nwang’ utie pi dhanu m’uteng’ini, ma ni kum tiyo ma gibetiyo ko ku copo migi mi ng’iyo i lembe, giponjo nikoyo kind gin ma ber ku gin ma rac.

6 Pieno, kawoni ma dong’ wadaru kadhu kadhiri mi ponji ma kwong’a m’uneno Kristu, watimu kero mwa ceke kara wadok dhanu m’uteng’ini, ma nwang’u wabeketho ngo kathere kendo, niwacu lokocwiny kud i kum timo ma kony migi mbe man yiyoyic i Mungu, 2 ponji m’uneno kit batizo ma tung’ tung’, kethocing’ i wijo, cer mi ju m’utho, man pokolembe ma rondo ku rondo. 3 Andha wabimedara niteng’ini tek Mungu yiyo.

4 Enre pi ju ma der ular ucaru ma gibilo giramiya mi mananu m’uai i polo, ma ginwang’u bende tipo ma leng’, 5 ma gibilo lembe ma ber pa Mungu man ma gineno mugisa* ma bibedo nuti i ng’om ma bibino,* 6 ento gidok gipodho, ecopere ngo nidok cerogi kendo kara gilok cwinygi, pilembe gin gigi gidok gibeguro kendo Wod Mungu iwi yen man gibenyayu lewic i wiye i wang’ lwak. 7 Kum ng’om nwang’u mugisa m’uai i bang’ Mungu kinde m’ebemadhu pikoth m’ubecwi i wiye areri man i ng’eye ecego cam ma dok konyo ju ma jubefure pigi. 8 Ento tek etwiyo ukudho man ucok, juwenje cen man nwang’u eni ceng’ini ku kwong’; i ajikine ke juwang’e ku mac.

9 Kadok nwang’u wabeweco kumeno de, re piwu wun ma wu jumer, cwinywa tek nia lembe mwu ber man wubetimo lembe ma biketho wubinwang’u both. 10 Kum Mungu en e won gondiri ngo ma nia wiye wil i kum tic mwu man mer ma wunyutho pi nyinge, kum wutimo ni jumaleng’ man wubemeduru asu nitimo igi. 11 Ento wabeyenyo nia ng’atuman m’i kindwu unyuth amora ma rom kara ebed ku genogen ma nging’ nging’ cil i ajiki, 12 wek kara kud wudok junyap, ento wubed dhanu m’ubelubo lapor mi ju ma ni kum yiyoyic man twiyocwiny gibelagu lembang’ola.

13 Kum kinde ma Mungu utimo lembang’ola pare ni Abraham, calu ng’atu mange mbe ma dit nisage m’eromo kwong’ere ku nyinge, ekwong’ere ku nyinge gire; 14 ewacu kumae: “Abimiyo iri mugisa andha man man abiketho ibinyay andha.” 15 Pieno i ng’ei ma Abraham unyutho twiyocwiny, enwang’u lembang’ola maeno. 16 Kum dhanu kwong’iri ku nying’ ng’atu ma dit nisagugi man kwong’ migi utie ajiki mi piem ceke, kum enyutho nia lembe ma gibeyero utie lemandha. 17 I ayi ma rom eno, kinde ma Mungu ung’iyo nia enyuth ngbeng’ kamaleng’ ni jucampacu mi lembang’ola nia lembakeca pare* lokere ngo, emedo kore* ku kwong’, 18 kara nikadhu kud i piny ario ma gilokiri ngo ma i igi Mungu copo cwayu ndra ngo, wan ma wadaru ringo i kapondo, wanwang’ tielocwiny ma lee kara wamok kikiki i kum genogen ma juketho i wang’wa. 19 Genogen maeni utie iwa calu nanga pi ng’eyong’ec mwa,* ma e mandha man ma tek man ekadhu plu kud i bongu m’upoko kusika mir hekalu, 20 kaka ma Yesu ular umondo i iye i wang’wa piwa, en m’edoko jalam ma dit rondo ku rondo i ayi pa Melkisedek.

7 Kum Melkisedek eno m’ubimo mi Salem man jalam pa Mungu ma Malu ngbir, ucidh urombo kud Abraham kinde m’Abraham uai unego jubim man epoko mugisa i wiye, 2 man Abraham umiyo ire apaje mi piny ceke. Ku kwong’a, thelembe mi nyinge utie “Ubimo mi Bedopwe,” man etie bende ubimo mi Salem, niwacu “Ubimo mi Kwiyocwiny.” 3 Calu jung’eyo ngo won kadi min, jukiewo ngo pi thekwaru pare man acaki mi nindo pare kadi ajiki mi kwo pare de mbe, ento judwoke edoko calu Wod Mungu, emedere nibedo jalam pi nja.

4 Wunen maram ng’atu maeno ubedo dit ko, en m’Abraham ma tie kwaruwa umiyo ire apaje mi piny ma beco m’eyaku i lwiny. 5 Andha nimakere ku Cik, jung’olo ni wot Lawi ma gibetimo tic mi julam nia gijok apaje i bang’ dhanu, niwacu i bang’ umego migi, kadok nwang’u umego migine de gitie nyikway Abraham.* 6 Ento ng’atu maeno m’umbe i thekwaru pa Lawi ugamu apaje i bang’ Abraham man epoko mugisa iwi ng’atu m’unwang’u lembang’ola. 7 M’umbe piem, ng’atu ma dit re ma poko mugisa iwi ng’atu ma nok. 8 Julawi gibed ginwang’u apaje man gibino dhanu ma tho, ento pi ng’atu ma kucelo m’unwang’u apaje, Lembagora utuco nia e kwo. 9 Bende jucopo yero nia kadok Lawi m’ubenwang’u apaje ugam uculo apaje nikadhu kud i bang’ Abraham, 10 pilembe i saa nica nwang’u fodi ebino nyakwar Abraham ma binyolere anyola* kinde ma Melkisedek urombo kude.

11 Ka nwang’u tic mi lamulam mi Julawi dwokojo leng’ (kum ebino yub ma Cik ma jumiyo ni dhanu re m’uketho), nyo nwang’u yeny pa jalam mange ma juyero pire nia bibedo i ayi pa Melkisedek ento ungo i ayi p’Arun ucibedo nuti? 12 Kum calu jubewilo tic mi lamulam, ubekwayere nia juwil Cik bende. 13 Kum ng’atu ma juyero lembe maeni pire uai kud i suru mange man ng’atu moko acel de mbe m’i surune m’ubed utimo tic mi pemlam. 14 Ung’eyere kamaleng’ nia Rwoth mwa uai kud i suru pa Yuda, ento Musa uyero ngo lembe moko acel de pi julam m’uai kud i suru maeno.

15 Man lembuno udok unen dong’ kamaleng’ nisagu kinde ma jalam mange uwok ma calu Melkisedek; 16 edoko kumeno, ungo calku thekwaru calu ma Cik ung’olo, ento ni kum tego m’umiyo ire kwo ma nyothere ngo. 17 Kum jutuco pire kumae: “Itie jalam rondo ku rondo i ayi pa Melkisedek.”

18 Pieno, juketho cik ma con cen pilembe e ng’ic man egam ekonyo ngo dhanu. 19 Kum Cik udwoko ngo gin moko cuu, ento genogen ma ber m’udok umiyere iwa re, ma nikadhu kud i iye wabecoro ceng’ini i vut Mungu. 20 Bende, calu ma lembe maeno utimere ku kwong’ i iye, 21 (kum andha dhanu moko nuti ma gidoko julam m’umbe kwong’, ento ng’atune maeni udoko jalam nikadhu kud i kwong’ ma Ng’atu m’uyero lembe m’ubelubo e ukwong’o pire: “Yehova ukwong’o, man ebiloko paru pare ngo: ‘Itie jalam rondo ku rondo’”), 22 Yesu udoko mukwatu mi lembariba ma ber nisagu. 23 M’umedo maeno, dhanu dupa gibed giwiliri awila nibedo julam pilembe tho ubed ucerogi nimediri ku ticne, 24 ento calu en e kwo rondo ku rondo, ng’atu moko mbe ma biwile i tic pare mi lamulam. 25 Pieno etie bende ku copo mi bodho cuu mandha dhanu ma gibecoro i vut Mungu nikadhu kud i bang’e, pilembe etie kwo nja pi nikwayu pigi.

26 Kum i andha de nwang’u watie ku yeny pa jalam ma dit ma kumeno, ma tie ng’atu mandha, ma lembe mbe i wiye, ma leng’, m’ukoc bor ku judubo man ma judodo malu ngbir iwi polo. 27 Tung’ ku julam mange ma dongo, embe ku yeny mi bethiero lam kubang’ ceng’, ku kwong’a pi dubo pare gire kan i ng’eye pi dubo mi dhanu, pilembe edaru thiero lamne wang’ acel pi nja kinde m’ethierere gire. 28 Kum dhanu ma Cik ubed uketho gibed julam ma dongo gibino ku ng’ico, ento wec mi kwong’ ma jukwong’o i ng’ei Cik uketho Wod ma judaru dwoko leng’ pi nja re m’ubed jalam ma dit.

8 Nie i kind gin ma wabeyero, lembe ma pire tek lee ni e: Watie ku jalam ma dit ma kumeno man ebedo yor i cing’ mir acwic mi komker pa Mungu ma dit i polo, 2 man e jatic mi kamaleng’ m’usagu man mi hema mandha ma Yehova re m’uguro ento dhanu ngo. 3 Kum kubang’ jalam ma dit juketho ebed ethier giramiya man lam bende; pieno ugam ukwayere nia Yesu bende ubed ku piny moko m’eromo thiero. 4 Ka nwang’u ebedo iwi ng’om nwang’u ecidoko ngo jalam, pilembe dong’ dhanu tie ma gibethiero giramiya calku Cik. 5 Dhanu maeno gibetimo tic ma leng’ m’utie ayi ma tap man tipopiny mi gin m’i polo; tap calu ma Mungu ung’olo ni Musa kinde m’ebecigiero hema, eyero kumae: “Nen nia iyiko piny ceke nimakere kud ayi ma junyutho iri iwi got.” 6 Ento kawoni Yesu udaru nwang’u tic* ma ber m’usagu pilembe etie bende jarib kindjo mi lembariba ma ber m’ucungo nging’ nging’ nimakere ku cik iwi lembang’ola ma beco m’usagu.

7 Ka nwang’u lembariba mi kwong’o ubino mbe ku kosa, nwang’u jubecibedo mbe ku yeny mi lembariba mir ario. 8 Kum Mungu ubedhau adhawa iwi dhanu kinde m’eyero kumae: “‘Nen! Nindo ubebino,’ Yehova uwacu, ‘m’abitimo iye lembariba ma nyen ku ot mir Israel man ku ot mi Yuda. 9 Ebibedo ngo calu lembariba m’agam atimo ku kwarugi i nindo m’amaku iye cing’gi pi niwodhogi kud i ng’om Misiri, pilembe gibedo ngo i lembariba para uketho aweko nidieng’ pigi,’ Yehova uwacu.”

10 “‘Maeni en e lembariba m’abitimo ku ot mir Israel i ng’ei nindo maeca,’ Yehova uwacu. ‘Abiketho cik para i pidoic migi man abikiewogi i adundegi. Abidoko Mungu migi, man gibidoko dhanu para.’”

11 “‘E gibiponjiri ngo kendo i kindgi ma nia ng’atuman uponj jathugi kunoke uponj umin m’ewac ko kumae: “Ng’ey Yehova!” Kum gin ceke gibing’eya niai i ng’atu ma nok nitundo i kum ma dit m’i kindgi. 12 Pilembe kisa binega i kumgi pi timo migi ma reco, man abipoy kendo ngo pi dubo migi.’”

13 Kinde m’ebeyero nia “lembariba ma nyen,” eketho ma kwong’a kakare kadhu. Ento gin ma kakare kadhu man m’ubetii there dhingo tho.

9 Ento lembariba ma con ubino ku lembe ma cik ukwayu pi tic ma leng’ man ebino ku kamaleng’ pare iwi ng’om. 2 Kum kusika ma kwong’a mi hema ma jugiero jubed juketho i iye tiend thala, meza man mukathi m’anyutha;* man jubed julwong’o kusikane Kamaleng’. 3 Ento yo ng’ei bongu mir ario ma jupoko ko kusika* mi hema ubino kusika mange ma julwong’o Kamaleng’ m’usagu. 4 I iye, jubed juketho tabu mi mola ma kwar pi wang’u udok ma ng’wice ng’ar man sanduku mi lembariba ma juwiro kume zoo ku mola ma kwar; i sandukune jubed juketho agulu mi mola ma kwar ma mana n’i iye, uluth p’Arun m’ugam uloth, man ban mi lembariba; 5 juketho jukerubi ma gitie ku dwong’ iwi sandukune man tipogi uumo jam umo wi kaka mi ripo kindjo.* Ento eni tie ngo saa mi koro i lembe maeno ceke acel acel.

6 I ng’ei ma jugiero piny maeno i ayi maeni, julam gibed gimondo thiri thiri i kusika ma kwong’a mi hemane pi nitimo tic ma leng’; 7 ento jalam ma dit kende re ma mondo i kusika mir arionde wang’ acel kende kubang’ oro, emondo ku rimo m’ebecithiero pi dubo pare gire man pi dubo ma dhanu utimo m’umbe ng’eyo. 8 Kumeno re ma tipo ma leng’ uketho enen ngbeng’ nia nwang’u yo m’umondo i Kamaleng’ m’usagu fodi unyuthere ngo kinde ma fodi hema ma kwong’a ucungo asu. 9 Hema maeni utie giranyutha pi saa ma kawoni, man nimakere ku yub maeno nik’ebed giramiya kadi lam, ceke jubethiero. Ento gin maeno gimbe ku copo mi dwoko pidocwiny pa ng’atu m’ubetimo tic ma leng’ udok leng’. 10 Gitie kende kende lembe m’uneno giracama, giramadha, man ayi ma tung’ tung’ mi dwokirileng’;* gibino lembe ma cik ukwayu pi kumjo man juketho dhanu utimgi cil i saa m’ukethere pi nidwoko lembe atira.

11 Ento kinde ma Kristu ubino calu jalam ma dit mi gin ma ber ma dong’ udaru timere, ekadhu kud i hema ma dit man ma leng’ magwei ma jutimo ku cing’ ungo, niwacu m’i ng’om maeni ngo. 12 Emondo i Kamaleng’ m’usagu ku rimb diegi kadi ku rimb nyithi dhieng’ ungo, ento ku rimbe gire, wang’ acel pi nja man enwang’u iwa both* ma rondo ku rondo. 13 Kum ka rimb diegi, rimb thwoni dhieng’, man vuru mi rwaya dhiang’ ma jukiro iwi ju ma gicido ubed udwokogi leng’ i kum, 14 ka dong’ rimb Kristu ma nikadhu kud i tipo ma rondo ku rondo, uthierere gire ni Mungu m’umbe poyo bidwoko ngo pidocwiny mwa leng’ nisagu kud i kum tic ma kony migi mbe, kara watim tic ma leng’ ni Mungu ma kwo?

15 Pi thelembe maeno re m’etie jarib kindjo i lembariba ma nyen, kara ni kum tho m’etho, ebodh nikadhu kud i jamgony dhanu ma gitimo dubo kinde ma gibino i lembariba ma con, ju ma julwong’ogi kara ginwang’ lembang’ola mi giralaga ma rondo ku rondo. 16 Kum kaka ma lembariba n’i iye ubekwayu ng’atu m’ubetimo lembaribane ukeutho be, 17 pilembe tho re ma ketho lembariba cungo, kum tego pa lembariba mbe tekene fodi ng’atu m’utime kwo. 18 Pi thelembe maeno, kadok lembariba ma kwong’a de ucaku ngo tic* m’umbe rimo. 19 Kum kinde ma Musa ubino koro lembe ceke ma Cik ung’olo ni dhanu ceke, eting’o rimb nyithi dhieng’, man rimb diegi, ku pii, ku yuk rombe ma kwar, kud uboko* man ekirogi iwi kithabu m’adola man iwi dhanu ceke, 20 ewacu kumae: “Maeni tie rimo mi lembariba ma Mungu ung’olo iwu nia wuwor.” 21 Ekiro bende rimone i kum hema man i kum ajeni ceke mi tic ma leng’. 22 Eyo, nimakere ku Cik, rimo re ma dwoko kago piny ceke leng’ man ka rimo ucwir ungo, weko dubo de mbe.

23 Pieno, pire bino tek nia judwok piny ma gitie ayi giki m’i polo leng’ i ayi maeno, ento pi piny m’i polo ukwayu lam ma beco nisagu. 24 Kum Kristu umondo ngo i Kamaleng’ m’usagu ma jutimo ku cing’, ma en e ayi mi mandhane, ento emondo i polo ku kume, kara enyuthere kawoni i wang’ Mungu piwa. 25 Emondo ngo kara ebed ethierere kendo kendo calu ma jalam ma dit ubed umondo i Kamaleng’ m’usagu kubang’ oro ku rimbe gire ngo. 26 Kum kan ungo, nwang’u ucikwayere nia esendere wang’ dupa niai i thekiri mi ng’om. Ento kawoni edaru nyuthere wang’ acel pi nja i ajiki mi ng’om maeni,* kara ekab dubo cen nikadhu kud i lam m’ethierere ko en gire. 27 Man tap calu ma dhanu ceke tho wang’ acel kende ento yor i ng’eye ginwang’u pokolembe, 28 kumeno bende Kristu uthierere wang’ acel pi nja kara eyey dubo mi dhanu dupa; man kinde m’ebinyuthere wang’ mir arionde, ebibedo ngo pi nikabu dubo, ento pi nibodho dhanu ma gibekure kud ava.

10 Kum calu Cik ubedo ku tipopiny mi gin ma ber ma bibino, ento etie ngo piny mandhane, ecopo ketho ngo nyanok de dhanu ma gibecoro i vut Mungu gidok leng’ nikadhu kud i lam ma rom eno ma jubed juthiero kubang’ oro. 2 Ka nwang’u lam dwokojo leng’, nwang’u juciweko ngo nithiero lami? Pilembe dhanu ma gibetimo tic ma leng’ ma jular judwokogi leng’ nwang’u cwinygi ubecipido ngo kendo nyanok de pi dubo. 3 Tung’ ku maeno, lamne ubed upoyo wi dhanu i kum dubo kubang’ oro kubang’ oro, 4 kum rimb dhieng’ man rimb diegi copo kabu ngo dubo.

5 Pieno kinde ma Kristu ubino i ng’om, eyero ni Mungu kumae: “‘Iyenyo ngo lam kadi giramiya, ento iyiko ira kum. 6 Ijolo ngo lam m’awang’a* ma boo ku lam mi dubo.’* 7 Man ayero kumae: ‘Nen! Abino pi nitimo yeny peri, E Mungu (jugoro pira i kithabu m’adola).’” 8 I ng’ei m’elar eyero kumae: “Iyenyo ngo kadi ajola de ijolo ngo lam, giramiya, man lam m’awang’a ma zoo ku lam mi dubo,” ma gitie lam ma jubed juthiero nimakere ku Cik, 9 edok eyero kumae: “Nen! Abino pi nitimo yeny peri.” Ekabu gin ma kwong’a cen kara edok eketh mir arionde. 10 Ni kum “yeny” maeno, wadoko leng’ nikadhu kud i bang’ Yesu Kristu m’uthiero kume wang’ acel pi nja.

11 Bende, jalamman cungo i dhu tic pare kubang’ ceng’ pi nitimo tic ma leng’* man pi nithiero kit lam ma rom wang’ udul, kadok nwang’u lamne copo kabu ngo dubo mi magwei. 12 Ento Kristu uthiero lam acel kende pi dubo pi nja man ebedo yor i cing’ mir acwic pa Mungu, 13 man niai eca ebekuro nitundo ma Mungu biketho jukwor pare i the tiende calu dul. 14 Kum ni kum lam acel m’ethiero re m’edwoko dhanu ma jubelonyo gidoko leng’ pi nja. 15 M’umedo maeno, tipo ma leng’ bende ubetuco iwa lembe maeni, kum i ng’ei m’eyero kumae: 16 “‘Maeni en e lembariba m’abitimo kugi i ng’ei nindo maeca,’ Yehova uwacu. ‘Abiketho cik para i adundegi man abikiewogi i pidoic migi.’” 17 Edok eyero kumae: “Man abipoy kendo ngo pi dubo migi kadi pi timo migi mi turo cik.” 18 Ento tek judaru weko dubo, yeny mi thiero lam pi dubo dong’ umbe kendo.

19 Pieno umego, calu ma ni kum rimb Yesu watie ku tegocwiny mi tiyo ku yo m’umondo i Kamaleng’ m’usagu 20 m’eyabu iwa calu yo ma nyen ma terojo i kwo nikadhu kud i bongu m’upoko kusika, ma bongune ke tie kume; 21 man calu watie ku jalam ma dit ma juketho iwi ot pa Mungu, 22 dong’ wacoru i vut Mungu kud adunde m’abombi mbe i iye man ku yiyoyic ma boo, pilembe judaru dwoko adundewa* man pidocwinywa ma rac udoko leng’ man julwoko bende kumwa ku pii ma leng’. 23 Dong’ wamoku kikiki i kum lembatuca ma kamaleng’ mi genogen mwa m’umbe niyengiri, kum waromo geno ng’atu m’ung’olo lembene. 24 Man dong’ iwa pid piwa* ng’atuman pi wadi man pi wadi kara wacwalara* i mer man i tic ma beco, 25 man kud wawek nicokara karacelo calu ma jumoko gibetimo, ento wajukara i kindwa man watim kumeno lee nisagu, kum wabeneno nia ceng’ maeno udhingo.

26 Kum tek wabetimo dubo akakaka i ng’ei ma wanwang’u ng’eyong’ec ma tap mi lemandha, lam mange mbe ma jucopo thiero kendo pi dubo mwa, 27 ento gin m’udong’ utie kende kende nikuro ku lworo pokolembe ma bibino, man kwinyo ma lake tek calu mac ma biwang’u dhanu m’ubejai ni Mungu. 28 Ng’atu moko ci m’uturo Cik pa Musa, junege ma kisa mbe ni kum lembatuca mi jumulembe ario kunoke adek. 29 Dong’ wuparu nia ng’atu m’unyono Wod Mungu man m’uneno rimo mi lembariba ma judwoke leng’ ni kume ni gin ma kabang’e mbe, m’uyanyu man m’ucayu tipo mi bero ma yawe mbe binwang’u matira ma kwiny rukani? 30 Kum wang’eyo Ng’atu m’uyero kumae: “Culo kwor en e para; abiculo an.” Man kendo: “Yehova bipoko lembe mi dhanu pare.” 31 Nipodho i cing’ Mungu ma kwo utie lembe ma rac dit!

32 Ento wumeduru nipoy pi nindo ma con, nia i ng’ei ma der ucaruwu wuciro anyego ma dit karacelo ku masendi. 33 Saa moko jubed juyanyuwu man junyayu ragedo i kumwu i wang’ dhanu,* saa mange ke wubed wudikuru ku* dhanu ma gibekadhu kud i lembe ma kumeno. 34 Kum wunyutho kisa ni ju ma gin’i kol man wuyiyo ku mutoro ya juyak piny mwu, pilembe wung’eyo nia wutie ku piny ma ber akeca man ma riyo.

35 Pieno, kud wubay tegocwiny mwu ma sukuliane bibedo lee. 36 Kum wutie ku yeny mi cirocir, kara i ng’ei ma wutimo yeny pa Mungu, wubin wunwang’ gin m’eng’olo. 37 Kum “i ng’ey saa ma nyanok kende,” e “ng’atu m’ubebino bitundo man ebigalu ngo.” 38 “Ento won bedopwe para bikwo ni kum yiyoyic” man “tek edok ku ng’eye, anyong’a binega ngo* i kume.” 39 Ento wan watie ngo kit dhanu ma gibedok ku ng’eygi ni nyoth, enre watie kit dhanu ma gitie ku yiyoyic pi nibodho kwo* mwa.

11 Yiyoyic utie tegocwiny ma nging’ nging’ ma jubedo ko iwi lembe ma jugeno, giranyutha ma piemere ngo mi gin ma fodi juneno ngo. 2 Ni kum yiyoyic eno re ma dhanu mi rundi ma con* ginwang’u lembatuca nia gifoyo i Mungu.

3 Ni kum yiyoyic, wabeneno nia piny ceke* upangere ni kum wec m’uai i dhu Mungu, man piny ma nen udoko nuti niai kud i piny ma nen ungo.

4 Ni kum yiyoyic, Abel uthiero ni Mungu lam ma ber lee nisagu pa Kain, man ni kum yiyoyic maeno enwang’u lembatuca nia etie won bedopwe kum Mungu ujolo giramiya pare, man kadok etho, ebeweco asu nikadhu kud i yiyoyic pare.

5 Ni kum yiyoyic, juting’o Enok kara kud enen tho, man junwang’e ngo kaka moko pilembe Mungu ting’e; i wang’ ma juting’e, enwang’u lembatuca nia efoyo i Mungu. 6 I andha, m’umbe yiyoyic ecopere ngo ninyayu mutoro i Mungu, pilembe ng’atu m’ubecoro i vut Mungu, ucikere niyiyo nia enuti man nia edoko ng’atu ma miyo sukulia ni dhanu m’ubeyenye ku cwinygi ceke.

7 Ni kum yiyoyic, i ng’ei ma Noa unwang’u cimowang’ pa Mungu i kum gin ma fodi unen ungo, elworo Mungu man egiero avur pi nibodho juruot pare; ni kum yiyoyic maeno, epoko lembe iwi ng’om man jukwane ni won bedopwe ni kum yiyoyicne.

8 Ni kum yiyoyic, kinde ma julwong’o Abraham, eworo man ecidho i kabedo ma Mungu ung’olo nia ebimiyo ire; etugo woth kadok nwang’u eng’eyo ngo kaka m’ebecidho i iye. 9 Ni kum yiyoyic, ekwo calu umondo i ng’om mi lembang’ola, ekwo i the hema karacelo kud Isak man Yakobo ma gitie jucampacu mi lembang’ola ma rom karacelo kude. 10 Kum ebino kuro adhura m’utie ku kathere mandha ma Mungu re m’utie jacak there man jagomne.

11 Bende ni kum yiyoyic, Sara unwang’u mugisa* kadok nwang’u edaru kadhu oro mi nyolo nyodo, pilembe eneno nia Ng’atu m’ung’olo ire lembene utie ng’atu ma jugeno. 12 Pi thelembe maeno, ng’atu acel ma kume ubino ve udaru tho unyolo awiya dupa ma wendgi calu nyikaluku m’i kor polo, man ma wendgi kwanere ngo calu kwiyo m’i dhu nam.

13 Dhanu maeno ceke githo i yiyoyic kadok nwang’u ginwang’u ngo piny ma jung’olo igi; ento ginenogi ku bor man anyong’a negogi i kum pinje, gituco kamaleng’ nia gitie umondo man dhanu m’ubedo i ng’ombe pi nindo moko kende. 14 Kum ju ma gibeweco i ayi maeno, giketho enen kamaleng’ nia gibeyenyo kud ava ninwang’u kabedo migi gigi. 15 Re ka nwang’u gimediri niparu pi kabedo ma giai kud i iye, nwang’u gicinwang’u kaka mi dok. 16 Ento kawoni gibetimo kero ninwang’u kabedo moko ma ber m’usagu, niwacu kabedo m’i polo. Pieno, lewic ubenego ngo Mungu i kumgi nia julwong’e Mungu migi, pilembe eyiko igi adhura moko.

17 Ni kum yiyoyic, kinde ma jumulo i Abraham, eboth nyang’wi ku thiero Isak, eyo, ng’atu m’ujolo lembang’ola kud anyong’a uyenyo thiero wode m’acel kulong’, 18 kadok nwang’u Mungu ular uyero ire kumae: “Gin ma jubilwong’o nia nyakweri* biai kud i bang’ Isak.” 19 Ento enwang’u nia Mungu utie ku copo mi cere kadok ku kind ju m’utho, man edok ejole kendo ku kind ju m’utho i ayi mi lapor.

20 Bende ni kum yiyoyic, Isak upoko mugisa iwi Yakobo man Esau pi lembe ma bitimere i nindo m’ubino.

21 Ni kum yiyoyic, kinde ma Yakobo udhingo tho, epoko mugisa iwi wot Yosefu kubang’gi kubang’gi, man erwo ni Mungu m’etielere atiela iwi uluth pare.

22 Ni kum yiyoyic, kinde ma Yosefu udhingo ajiki mi kwo pare, eweco pi ai mi nyithindho mir Israel man eng’olo igi lembe pi cogone.*

23 Ni kum yiyoyic, i ng’ei nyoliri pa Musa, junyodo pare gikane pi dwi adek pilembe gineno nia nyathin ne ubino leng’ man gilworo ngo lembe m’ubimo ung’olo. 24 Ni kum yiyoyic, kinde ma Musa udongo, ekwero nia kud julwong’e wod nyaku pa Farao, 25 ento eng’iyo nisendere karacelo ku dhanu pa Mungu kakare ninwang’u anyong’a mi dubo ma kadhu akadha, 26 pilembe ekwanu nia ninwang’u cac calu Kristu utie lonyo ma dit nisagu lonyo mi Misiri; kum eketho wang’e tel i bang’ sukulia. 27 Ni kum yiyoyic, eai kud i Misiri m’umbe nilworo kwinyo p’ubimo, kum emedere nicungo ma tek calu ve ebeneno Ng’atu ma nen ungo. 28 Ni kum yiyoyic, ekwiro Kadhukuwijo man eketho jukiro rimo kara janyoth kud umul kum kayu migi.*

29 Ni kum yiyoyic, gikadhu kud i Nam ma kwar calu iwi ng’om m’uthwo, ento kinde ma Jumisiri bende gipimo nikadhu, pii umwonyogi.

30 Ni kum yiyoyic, gang’ kidi mi Yeriko urwombere i ng’ei ma dhanu udhoke ku woth pi nindo abiro. 31 Ni kum yiyoyic, Rahab ma won asara ugam unyothere ngo ku dhanu ma giworo ngo Mungu, pilembe ejolo julib ku kwiyocwiny.

32 Man abiyero ang’o kendo? Kum saa bidoko nok ira kan aketho amedara nikoro lembe ma Gideon, Barak, Samson, Yeftha, Daudi, man Samwel ku jubila mange gitimo. 33 Gin ma ni kum yiyoyic giloyo bimobim ma tung’ tung’, gitimo bedopwe, ginwang’u lembang’ola, man gimiyo dhug umvor, 34 ginego lak tego mi mac, giboth kud i lak palamularu; gin ma gibino ng’ic gidoko tek, gidoko jurukara i lwiny, man giriemo udul askari m’umondo i ng’om migi. 35 Nikadhu kud i cer, jumamon gijolo wedi migi m’utho, ento jumaco mange jusendogi nitundo i tho, kum gikwero kud jugonygi ku jamgony moko, kara gibin gicer cer ma ber m’usagu. 36 Eyo, jumange jusendogi nikadhu kud i cac man fwodo; m’usagu maeno, jutwiyogi ku nyoro man jubologi i kol. 37 Jucanyugi ku kidi, jumulo igi pi yiyoyic migi, juthumo igi pu ni ario ku sii, junegogi ku palamularu, giwotho kun ku kun ma gikendo adila rombe kud adila diegi, gibino i yeny, ginwang’iri ku ragedo, man jusendogi; 38 gibino dhanu ma ng’om maeni uromo kugi ngo. Gibed giwotho swa i langa, iwi gudi, i od cana, man i od ng’om.

39 Ento kadok dhanu maeni ceke ginwang’u lembatuca ma ber pi yiyoyic migi de, re ginwang’u ngo gin ma Mungu ung’olo, 40 pilembe Mungu upangu nimiyo iwa piny moko ma ber, kara kud gidok leng’ ma wambe i kindgi.

12 Pieno, calu ma watie kud afuru ma dit ma kumeno mi jumulembe m’utwodowa, dong’ wek wan bende wawany gin moko ci ma pek man dubo ma moko i kumwa yot yot, man waringu ku cirocir kwaya ma juketho i wang’wa, 2 ma wabeneno kilili mandha bang’ Yesu ma tie Jatela ma dit mi yiyoyic mwa man ng’atu m’ubepong’e bik. Pilembe ni kum mutoro ma juketho i wang’e eciro yen mi can,* m’ekwanu ngo ku lewicne, man ebedo yor i cing’ mir acwic mi komker pa Mungu. 3 Eyo, wuketh paru mwu zoo i bang’ ng’atu maeno m’uciro wec ma reco dupa mi judubo ma gibino nyayu peko i kumgi gigi ku wec migine, kara kud wuol man kud wuvoci.*

4 I anyego ma wubenyego ko ku dubo, fodi wunyego ngo nitundo i tho. 5 Man wiwu udaru wil magwei i kum juk ma jumiyo iwu calu ni wot kumae: “Woda, kud icay twiny pa Yehova, man kud ivoci kinde m’emiyo iri matira; 6 kum Yehova twinyo ju m’emaru, eyo, ejwito* ng’atu moko ci m’ejolo calu wod.”

7 Wucikuru niciro pilembe etie pi twiny* mwu. Mungu ponjo awiya pare kumeno. I andha wod ma kani ma won twinye ngo? 8 Ento tekene wubejolo ngo twiny maeni, nwang’u andhandha wutie luk, ento wot mandha re ngo. 9 Kum kadok wegwa maeni mi kum gibed gitwinyowa man wabed waworogi. Nyo dong’ wacikara ngo nijwigara yot yot ma sagu ni Wego mi kwo mwa mi tipo kara wabed kwo? 10 Kum gibed gitwinyowa pi saa ma nyanok nimakere ku gin m’ubenen ber i wang’gi, ento Mungu timo kumeno pi bero mwa kara wabed leng’ calu en. 11 I andha, twiny moko mbe ma nen i saa ma jubemiye i iye ni gin mir anyong’a, ento enyayu can; re tokcen ne ecego nyinge mi kwiyocwiny ni dhanu ma ginwang’u ponji ni kume, niwacu edwokogi pwe.

12 Pieno, wutiel cing’ m’uoy jebele man cong ma tego mbe i igi, 13 man wumeduru niyiko yo ma wubewotho i iye ubed atira, kara watkum m’abala kud ufudhere kud i ujonjne ento ekey akeya. 14 Wuyeny nibedo ku kwiyocwiny ku dhanu ceke man wuyeny leng’o, kum m’umbe leng’o ng’atu moko mbe ma bineno Rwoth. 15 Wubed ku weng’wu kara ng’atu moko m’i kindwu kud ukos ninwang’u bero ma yawe mbe pa Mungu, kara ulag gin moko ma iye ju kwir kud utwii i kindwu pi ninyayu peko man uketh dhanu dupa gicidi. 16 Bende, wubed ku weng’wu kara ng’atu moko acel de m’i kindwu kud ubed ng’atu ma timo lembsasa mi tarwang’,* kadi ng’atu ma cayu gin ma leng’ calu Esau m’ugam uwilo twero pare mi bedo kayu ku cam ma wang’ acel kende. 17 Kum wung’eyo nia i ng’eye kinde m’emito elag mugisa, jukwere; kadok nwang’u eyenyo niloko paru pa won ku tego pare zoo cil ku piwang’e, enwang’u ngo kaka.

18 Kum wucoro ngo i bang’ gin moko* ma juromo mulo kume man m’ubewang’ ku mac, kadi i kum afuru ma col, man mudho ma col bii, man avuvu, 19 man dwand agwara m’ubewak, ku dwal m’ubeweco, ma kinde ma dhanu uwinjo, gikwayu nia kud jumed niyero igi lembe mange. 20 Kum gicopo ciro ngo lembe ma e ma jung’olo: “Kadok cil lei m’umulo kum got jucikiri ning’ure ku kidi.” 21 Bende, giranyuthane ubino ma nyayu ndiri lee, uketho Musa uyero kumae: “Lworo ubenega man kuma ubemiel.” 22 Ento wucoro i kum Got Sayuni man i bang’ adhura pa Mungu ma kwo, Yeruzalem m’i polo, man udul jumalaika 23 ma gicokiri karacelo, man cokiri mi nyithindho ma kayu ma jugoro nying’gi i polo, man Mungu ma Japoklembe mi gin ceke, man kwo mi tipo mi weg bedopwe ma judaru dwokogi leng’, 24 man Yesu ma tie jarib kindjo i lembariba ma nyen, man rimo ma jukiro m’ubeweco ber nisagu rimb Abel.

25 Wubed ku weng’wu kara kud wukwer niwinjo ng’atu m’ubeweco. Kum tek ju ma gikwero niwinjo ng’atu m’i ng’om m’ubemiyo cimowang’ m’uai i bang’ Mungu giboth ungo, dong’ nyo wan wabiboth andha tekene waloko ng’eiwa ni ng’atu m’ubeweco niai kud i polo buu? 26 I saa maeca dwande ugam uyengo ng’om, ento kawoni eng’olo kumae: “Wang’ acel kendo abiyengo ng’om kende ngo, ento polo bende.” 27 Wec ma nia, “wang’ acel kendo” ubenyutho nia jubikabu cen piny ma juyengo ma tie piny ma juyiko, kara piny m’uyengere ngo ubed asu. 28 Pieno, calu ma wabinwang’u Ker ma copo yengere ngo, dong’ wamedara ninwang’u bero ma yawe mbe, ma ni kume waromo timo tic ma leng’ ma Mungu jolo, ma wabelwore man wabewore. 29 Kum Mungu mwa en e mac ma wang’u piny ruk.

13 Wumeduru nimeruru i kindwu calu umego. 2 Wiwu kud uwil i kum jolo welo, pilembe ni kume jumoko gigam gijolo jumalaika m’umbe ning’eyo. 3 Wumeduru nibeparu pi ju ma gin’i kol* calu ve jutwiyowu karacelo kugi, man pi dhanu ma jubesendogi, pilembe wun de fodi wun’i kum.* 4 Wek dhanu ceke yung gamiri, man kavuto mi gamiri de kud ubed ku cilo, kum Mungu bipoko lembe iwi dhanu ma gitimo lembsasa mi tarwang’* man weg abor.* 5 Wubed agonya i kum mer ma jumaru ko sente, ento cwinywu cung i kum gin ma wutie ko kawoni. Kum eyero kumae: “Abiweki ki ngo, man kadok akuna de abikuni ki ngo.” 6 Pieno wacopo yero ma cwinywa tek lee kumae: “Yehova en e jakonyna; lworo binega ngo. Dhanu copo timo ang’o i kuma?”

7 Wupoi pi ju ma gibetelo wiwu, ma giyero iwu lembe pa Mungu, man kinde ma wubeneno adwogi mi timo migi, wukwany ba yiyoyic migi.

8 Yesu Kristu utie rom nyaworo, tin, man pi rondo ku rondo.

9 Kud wuwek ponji ma tung’ tung’ man ma welo uwing wiwu, kum etie ber niteng’o adunde ku bero ma yawe mbe kakare niteng’e ku cam* ma miyo ngo kony ni dhanu ma gibemiyiri i iye.

10 Watie ku pemlam acel ma ju ma gitimo tic ma leng’ i hema, gimbe ku twero mi camu piny m’i wiye. 11 Pilembe kum lei ma jalam ma dit ubed utero rimbgi i Kamaleng’ m’usagu calu lam mi dubo, jubed juwang’u woko i ng’ei kagonjo. 12 Pieno, Yesu bende usendere woko i ng’ei adhura* kara edwok dhanu leng’ ku rimbe gire. 13 Dong’ wek wacidhu i bang’e woko i ng’ei kagonjo ma wayeyo cac m’eyeyo, 14 kum wambe kud adhura moko keni ma bedo pi nja, ento wabeyenyo kud ava adhura ma bibino. 15 Nikadhu kud i bang’e, dong’ saa ceke wathier ni Mungu lam mi pak m’uai kud i dhogwa m’ubetuco kamaleng’ pi nyinge. 16 M’umedo maeno, wiwu kud uwil ku timo bero man nikonyo dhanu mange ku piny mwu, kum lam ma kumeno nyayu anyong’a lee i Mungu.

17 Wubed wor ni dhanu ma gibetelo wiwu man wujwiguru igi, kum gibeneno wiwu* calu dhanu ma biwodho wel, kara gitime kud anyong’a ento ma gibecur acura re ngo, kum eno romo miyo peko iwu.

18 Wumeduru nirwo piwa, kum wageno andhandha nia watie ku pidocwiny m’atira pilembe wabemito wawoth atira i lembe ceke. 19 Ento abekwayuwu akecane nia wurwo kara judwoga nyathotho i beng’wu.

20 Dong’ wek Mungu mi kwiyocwiny m’ucero jakwac ma dit mi rombe ku kind ju m’utho, niwacu Rwoth mwa Yesu ku rimo mi lembariba ma rondo ku rondo, 21 upong’wu ku gin moko ci ma ber pi nitimo yeny pare, en m’ebetimo i iwa gin m’ubefoyo iye nikadhu kud i bang’ Yesu Kristu. Dwong’ ubed ni Mungu rondo ku rondo. Amen.

22 Umego, kawoni akwayuwu nia wuwinj ku twiyocwiny wec maeni mi tielocwiny, kum akiewo iwu barua m’adundo. 23 Abemito wung’ey nia judaru gonyo umegwa ma Timoteo. Tek ebitundo ceng’ini eni, wabibino wakude ninenowu.

24 Wumoth dhanu ceke ma gibetelo wiwu man jumaleng’ ceke. Umego mir Italia gicwalu moth migi iwu.

25 Bero ma yawe mbe ubed kudwu ceke.