BARUA NI JURUMI

1 Niai kud i bang’ Paulo, ma jatic pa Kristu Yesu ma julwong’o pi nibedo jakwenda, man ma jung’iyo pi lembanyong’a pa Mungu, 2 m’elar eng’olo pire niai con i Lembagora ma leng’ nikadhu kud i bang’ jubila pare. 3 Lembanyong’ane utie iwi Wode m’ubino nyakwar* Daudi, 4 andha etie Wod Mungu kum Mungu utiyo ku tego mi tipo pare ma leng’ pi nicere ku kind ju m’utho; eyo, en e Yesu Kristu Rwoth mwa. 5 Ni kume, Mungu unyutho iwa bero pare ma yawe mbe, bende Yesu ung’iya abed jakwenda pi nikonyo dhanu mi thek ceke kara gibed ku yiyoyic, ginyuth woro man giyung nyinge. 6 Wun bende wutie ju ma julwong’o kud i kind thek maeno pi nilubo Yesu Kristu. 7 Iwu ceke ma wun’i Roma, wun ma Mungu maruwu man elwong’owu wubed jumaleng’:

Bero ma yawe mbe man kwiyocwiny pa Mungu ma Wegwa man pa Yesu Kristu ma Rwoth ubed kudwu.

8 Ku kwong’a abefoyo Mungu para piwu ceke nikadhu kud i bang’ Yesu Kristu, kum pi yiyoyic mwu uyik i ng’om zoo. 9 Mungu m’abetimo ire kud adundena ceke nikadhu kud i lembanyong’a m’aberweyo iwi Wode, ung’eyo nia saa ceke abeweko ngo nirwo piwu; 10 abekwayu nia kan ecopere man tek etie yeny pa Mungu, abin i beng’wu kokoro. 11 Kum ava nenowu ubenega lee dit kara akonywu i thenge mi tipo wek kara wucung ma tek, 12 kunoke kara watiel cwinywa i kindwa nikadhu kud i yiyoyic mwa, para ku mwu bende.

13 Ento umego, amito wung’ey nia wang’ dupa amito abin i beng’wu, re ecopere ira ngo; ayenyo anen kite ma tic mi lembanyong’a ubecego ko nyinge kuno calu m’ebecego ko i kind thek mange. 14 Atie ku banja mi Jugiriki ku mi Jugiriki ngo de, mi ju ma riek ku mi ju ma riek ungo bende; 15 eno uketho ava bino rweyo lembanyong’a iwu i Roma kuno bende ubenega lee. 16 Lewic ubenega ngo i kum lembanyong’a, kum etie yo ma pire tek mandha ma Mungu ubetiyo ko pi nibodho dhanu ceke ma gitie ku yiyoyic, ku kwong’a Juyahudi man Jugiriki bende. 17 Nikadhu kud i lembanyong’a, bedopwe pa Mungu ubenyuthere ni weg yiyoyic man eno ubetielo yiyoyic migi, tap calu ma Lembagora uyero kumae: “Ento won bedopwe bikwo ni kum yiyoyic pare.”

18 Kwinyo ubenego Mungu niai kud i polo i kum dhanu ceke ma gibewore ngo man ma gibetimo lembe ma reco pilembe gibecero lemandha kud ung’eyere, 19 ma ke gin ma gicikiri ning’eyo iwi Mungu unyuthere igi kamaleng’, pilembe Mungu unyuthe ngbeng’ igi. 20 Kum kite* pare ma nen ungo ubenen terere niai m’ecwiyo ng’om, pilembe gibenen nikadhu kud i piny m’ecwiyo m’ubenyutho nia etie ku tego m’ajikine mbe man etie Mungu andha. Pieno kalokolembe mbe ni dhanu maeno. 21 Kadok ging’eyo Mungu de, re gibeyunge ngo man gibefoye de ngo, ento paru migi udoko ni gin ma kony pare mbe man adundegi m’umbe ku rieko dong’ n’i mudho. 22 Gibekethiri nia gi riek ma ke gi jukusegu. 23 Kakare niyungo Mungu ma tho ngo, gibeyungo migi ayi gin m’acwiya mir ayi pa dhanu ma tho,* mir ayi pa winyo, pa lei man giracwiya ma lak alaka.

24 Pieno, Mungu uweko gipong’ awanya ma rac mir adundegi, kara gicid kumgi gigi ku timo mi lewic. 25 Giwilo lemandha pa Mungu ku vupo, gibeworo man gibetimo ni giracwiya kaka Jacwic m’uromo ku pak rondo ku rondo. Amen. 26 Pi thelembe maeno, Mungu uwenjogi ni awanya ma rac mi tarwang’ ma nyayu lewic, kum mon migi de giweko timo ribiri i ayi m’atira ku co, ento gibetimo ribiri i ayi m’atira ngo. 27 Kumeno bende, jumaco uweko nitimo ribiri i ayi m’atira ku mon, man giweko awanya ma rac uopo i igi kum co wagi ma gibetimo ko lembsasa i kindgi gigi, ento gibinwang’u matira* m’uromo ku timo migi ma recone.

28 Calu ma ginwang’u nia pire tie tek ungo ning’eyo Mungu,* Mungu uwenjogi i paru migi ma reco kara gitim lembe ma nwang’u umaku ngo gitim. 29 Gipong’ ku kit timo ma reco ceke, dubo, kethocwiny hai i kum piny, gondiri, gipong’ ku kumira, nek, dhau, ndra, akece man yeronying’, 30 gicido nying’ jumange, gidagu Mungu, gi jucac, gi jukuhaya, giting’iri, gisayu yo mi timo lembe ma reco, wigi tek ni junyodo migi, 31 gimbe ku ng’eyong’ec, gitimo ngo lembe ma ging’olo, gimaru ngo dhanu wagi man kisa mbe i igi. 32 Kadok nwang’u ging’eyo cuu nia Mungu ung’olo ya ju ma gibetimo lembe ma kumeno giromo ku tho de, re gibemediri asu nitimogi man gibecwaku bende ju m’ubetimo lembene.

2 Tek ibepoko lembe iwi jumange, eca nwang’u ibepoko lembe i wii giri nik’ibed ng’a; kum ibepoko lembe i wigi pi gin ma rom ma in de ibetimo, pieno kalokolembe mbe iri. 2 Ento wang’eyo nia ka Mungu ubepoko lembe iwi dhanu m’utimo lembe ma kumeno, epoko lembene nimakere ku lemandha.

3 Nyo iparu nia ibiboth ni pokolembe pa Mungu kinde m’ibepoko lembe iwi dhanu m’ubetimo gin ma rom ma in de ibetimo? 4 Kunoke nyo ing’eyo ngo nia Mungu ubenyutho iri bero ma lee, kisa man cirocir? Ibenyang’ ungo nia bero pa Mungu uketho ebemedere nikonyi kara ilok cwinyi? 5 Ento calu cwinyi nwang’ man ikwero loko cwinyi, Mungu bimiyo iri matira i ceng’ mi kwinyo pare kinde m’ebikelo pokolembe pare ma pwe. 6 Ebiculo ng’atuman nimakere ku tic pare: 7 Ni dhanu m’ubesayu dwong’, yung man kum ma nyothere ngo, ebimiyo kwo ma rondo ku rondo pilembe gibemediri nitimo lembe ma beco; 8 ento ni jupiem man ju m’ubetimo lembe ma reco kakare niworo lemandha, Mungu bikelo kwinyo i wigi. 9 Ng’atu* moko ci m’ubetimo lembe ma reco nik’ebed Jayahudi kadi Jagiriki binwang’ere ku masendi man can, 10 ento ng’atu moko ci m’ubetimo lembe ma beco binwang’u dwong’, yung man kwiyocwiny, ku kwong’a Jayahudi man Jagiriki bende. 11 Kum Mungu mbe kud akoyakoya.

12 Dhanu ceke ma gidubo ma ging’eyo Cik ungo gibitho m’umbe Cik, ento dhanu ceke ma gidubo ma ke ging’eyo Cik, jubing’olo lembe m’i wigi nimakere ku Cik. 13 Pilembe i wang’ Mungu, dhanu m’ubewinjo Cik awinja kende gitie ngo weg bedopwe, ento dhanu m’ubeworo Cikne re ma jubikwanugi ni weg bedopwe. 14 Kum tek dhanu mi thek mange ma gimbe ku Cik gibetimo gigi lembe ma Cik uyero, eno nyutho nia gitie ku cik m’ukiewere i adundegi. 15 Gin ma gibetimo unyutho nia lembe ma Cik ubeponjo ukiewere i adundegi man pidocwinygi bende ubecwakugi; paru migi gigi de dotogi kunoke cwakugi. 16 Gin maeni bitimere i ceng’ ma Mungu bikelo pokolembe nikadhu kud i bang’ Kristu Yesu iwi lembe ceke m’upondo ma dhanu ubetimo, calku lembanyong’a m’aberweyo.

17 In m’iyero ya i Jayahudi, ing’eyo cik man ibeluliri nia ing’eyo Mungu, 18 ing’eyo bende yeny pare man itie ku copo mi koyo kind gin ma ber ku gin ma rac pilembe juponji ku Cik, 19 iyero ma cwinyi tek nia icopo telo wi abinga man iromo bedo lero ni dhanu ma gin’i mudho, 20 ibeparu nia iromo twinyo ju ma ming’ man iromo ponjo awiya ma thindho pilembe ing’eyo man inyang’ i lemandha mir ukungu ma nwang’ere i Cik. 21 Dong’ in m’ibeponjo jumange, pirang’o ibeponjiri giri ngo? In m’iberweyo nia, “Kud jukwal,” ilund ibekwalu? 22 In m’ibeyero nia, “Kud jutim abor,”* ilund ibetimo abori? In m’ibeyero nia idagu ayi gin m’acwiya, ilund ibekwalu piny mir hekalu? 23 In m’ibeyungiri nia ing’eyo cik pa Mungu, pirang’o ilund ibecido nyinge nikadhu kud i Cik pare m’ibeturo? 24 Calu ma Lembagora uyero, “Timo mwu uketho nying’ Mungu ucidere i kind thek mange.”

25 Tek ibeworo Cik, yaa ma jutimo i kumi tije unuti; ento tek ibeworo ngo Cik, idoko rom ku ng’atu ma jutimo ngo yaa i kume. 26 Re tek ng’atu ma jutimo ngo yaa i kume ubeworo lembe ma Cik ung’olo, Mungu binene ni ng’atu ma jutimo yaa i kume. 27 Juponjowu ku lembe iwi timo yaa man ku Cik, ento wubeworo ngo Cikne. Pieno tek ng’atu ma jutimo ngo yaa i kume ubeworo Cik, nwang’u ebepoko lembe i wiwu. 28 Nibedo Jayahudi m’anzilo nen ungo kende kende yo woko, bende timo yaa m’atira utie ngo ma jutimo i kum. 29 Jayahudi m’anzilo utie ma yor i adunde man yaa pare bende utie mir adunde ni kum tipo ma leng’, ento ungo nimakere ku Cik. Ng’atu maeno Mungu re ma yunge ento dhanu ngo.

3 Ka kumeno nibedo Jayahudi konyne utie ang’o? Kunoke timo yaa bero pare ang’o? 2 Berone dupa. Mi kwong’o, Juyahudi re ma Mungu umiyo igi lembe pare* ma leng’. 3 E ka Juyahudine m’ukoso yiyoyic ke? Nyo koso yiyoyic migi nyutho nia dong’ dhanu copo geno ngo Mungu? 4 Tak de ngo! Kadok unwang’ere nia dhanu ceke gi juvupo de, ento dhanu zoo gicikiri ning’eyo nia Mungu yero kwa lemandha, tap calu ma Lembagora uyero kumae: “Jubinwang’u nia itie pwe i wec peri man ibiloyo kinde ma jubepoko lembe i wii.” 5 Ento tek koso bedopwe mwa ubenyutho kamaleng’ nia Mungu tie won bedopwe, dong’ nyo ebetimo rac kinde m’ebemiyo matira ni judubo? (Abeng’iyo i lembe i ayi ma dhanu ng’iyo ko i lembe.) 6 Ungo! Mungu en e won bedopwe, kan ungo ebipoko lembe iwi ng’om nenedi?

7 Ento tek vupo para uketho ebenen kamaleng’ nia Mungu yero kwa lemandha man ebemiyo dwong’ ire, pirang’o ke jubepoko lembe i wiya nia a jadubo? 8 Dong’ wakeyer tap calu ma dhanu moko ubeloko ko lembe i wiwa nia wabeyero kumae: “Watimu lembe ma reco kara wanwang’ bero.” Jubipoko lembe mi dhanu m’uyero lembe ma kumeno nimakere ku bedopwe.

9 Dong’ nyo wa Juyahudi waloyo jumange? Ungo! Pilembe wadaru nyutho nia Juyahudi ku Jugiriki ceke gi judubo, 10 tap calu m’egorere kumae: “Ng’atu ma pwe acel de mbe; 11 ng’atu moko acel de mbe ma riek man ng’atu moko acel de mbe m’ubesayu ka Mungu. 12 Dhanu ceke ulokiri cen kud i kume man gin ceke tijgi doko mbe; ng’atu moko acel de mbe i kindgi m’unyutho bero, kadok ng’atu acel de.” 13 “Dwandgi calu liel ma dhoge thwolo; gitiyo ku lebgi pi nicwayu vupo.” “Man adra ma calu pa thwol n’i dend dhoggi.” 14 “Dhoggi pong’ kud alam man wec mir akece.” 15 “Tiendgi yot i kum nego nek.” 16 “Giweko nyoth ku can kaka moko ci ma gikadhu kud i iye, 17 man ging’eyo kwo ngo ku dhanu ku kwiyocwiny.” 18 “Lworo pa Mungu mbe nyanok de i the wang’gi.”

19 Kawoni wang’eyo nia gin moko ci ma Cik uyero utie pi dhanu ma gin’i the Cik kara ng’atu moko ci kud unyay piem, man kara dhanu ceke ung’ey nia gi judubo man giromo ku matira pa Mungu. 20 Pieno, Mungu bikwanu ngo ng’atu moko acel de ni won bedopwe ni kum woro Cik, kum Cik uketho wafong’eyo dubo terere mandha.

21 Kawoni wang’eyo nia dong’ ng’atini copo bedo pwe i wang’ Mungu m’umbe niworo Cik calu ma Cik ku jubila de ular unyutho. 22 Ento ng’atu moko ci m’utie ku yiyoyic i Yesu Kristu, tie won bedopwe i wang’ Mungu, pilembe thek m’uloyo wagi mbe. 23 Kum kawa ceke wadubo man warem ni dwong’ pa Mungu, 24 ento giramiya ma Mungu umiyo mi mananu utie nia ekwanuwa ni weg bedopwe ni kum bero pare ma yawe mbe m’enyutho iwa nikadhu kud i jamgony ma Kristu Yesu uthiero. 25 Mungu umiyo Yesu ni lam mi ripo kindjo pi dhanu ceke ma gitie ku yiyoyic i rimbe. Mungu utimo kumeno pi ninyutho bedopwe pare man pi ninyutho cirocir pare kara ewek dubo ma jutimo con kende ngo. 26 Ento tin bende, enyutho iwa bedopwe pare kum eneno ng’atu m’utie ku yiyoyic i Yesu ni won bedopwe.

27 Ka kumeno, nyo thelembe mi luliri utie? Acel de mbe. Nyo wacikara nilulara pilembe wabeworo Cik? Ungo, wacopo lulara ndhu kende kende tek wabeworo cik mi yiyoyic. 28 Kum wang’eyo nia ng’atini romo bedo won bedopwe ni kum yiyoyic, ento ungo pilembe ebeii nitimo lembe ma Cik ung’olo. 29 Kunoke nyo Mungu tie Mungu mi Juyahudi kendgi? Nyo etie ngo Mungu mi dhanu mi thek ceke? Eyo, etie Mungu mi dhanu mi thek ceke. 30 Calu Mungu tie acel kende, ebineno dhanu ma jutimo yaa i kumgi ku ma jutimo ngo yaa i kumgi ceke ni weg bedopwe ni kum yiyoyic migi. 31 Dong’ nyo yiyoyic mwa uketho Cik udoko ni gin ma tije mbe? Ungo! Ento wabecero bang’ Cik.

4 Ka kumeno, wacopo yero ang’o pi kwaruwa ma Abraham? 2 Ka nwang’u jukwanu Abraham ni won bedopwe pi gin m’etimo, nwang’u ecibedo ku thelembe moko mi yungere, ento i wang’ Mungu re ngo. 3 Kum Lembagora uyero kumae: “Abraham ubedo ku yiyoyic i Yehova, man jukwane ire ni bedopwe.” 4 Ka juculo ng’atu moko m’utimo tic, juneno ngo cul maeno ni giramiya,* ento etie piny pare. 5 Enre tek ng’atu moko m’utimo ngo tic uyiyo Mungu ma kwanu judubo ni weg bedopwe, ebikwanu ng’atu maeno ni won bedopwe ni kum yiyoyic pare. 6 Tap calu ma Daudi unyutho kinde m’eweco pi mutoro pa ng’atu ma Mungu ukwanu ni won bedopwe, kadok nwang’u ng’atune utimo ngo tic de; eyero kumae: 7 “Mutoro ni ng’atu ma juweko kier pare, man ma juumo dubo pare.* 8 Mutoro ni ng’atu ma Yehova ukwanu ngo dubo pare.”

9 Nyo dhanu ma jutimo yaa i kumgi kendgi re ma ginwang’u mutoro maeno, kunoke nyo etie bende pi dhanu ma jutimo ngo yaa i kumgi? Kum wayero kumae: “Ni kum yiyoyic pa Abraham jukwane ni won bedopwe.” 10 Jukwane ni won bedopwe saa ma kani? Nyo nwang’u judaru timo yaa i kume kunoke nwang’u fodi? Jukwane ni won bedopwe nwang’u fodi jutimo ngo yaa i kume. 11 Kan i ng’eye Mungu uyero ire nia jutim yaa i kume. Eno ubino giranyutha ma nia jukwane ni won bedopwe ni kum yiyoyic m’ebino ko nwang’u fodi jutimo ngo yaa i kume. Lembe maeno utimere kara edok wego mi dhanu ceke ma ginyutho yiyoyic kadok nwang’u jutimo ngo yaa i kumgi, wek kara jukwan gi ni weg bedopwe. 12 Edoko bende wego mi dhanu ma jutimo yaa i kumgi; re etie wego mi dhanu ma jutimo yaa i kumgi kendgi ngo, ento etie bende wego mi dhanu ceke ma gitie ku kit yiyoyic ma wegwa ma Abraham unyutho kinde ma nwang’u fodi jutimo ngo yaa i kume.

13 Kum Abraham ku nyikwaye ginwang’u lembang’ola ma nia gibilagu ng’om ni kum cik ungo. Ento ginwang’u lembang’ola maeno pilembe Abraham ubino won bedopwe ni kum yiyoyic pare. 14 Ka dhanu ma gibeworo cik re ma gibilagu lembang’ola, nwang’u tij yiyoyic umbe, man lembang’ola ma Mungu utimo ni Abraham de tije mbe. 15 I andha, ka ng’atini uturo Cik, enwang’u matira.* Ento kaka ma cik umbe i iye, ng’atu ma ture de mbe.

16 Eno re m’uketho wanwang’u lembang’ola ni kum yiyoyic, kum etie giramiya ma Mungu umiyo iwa mi mananu,* kara nyikway* Abraham ceke ginwang’ lembang’ola, ju m’ubeworo Cik man bende ju m’utie ku yiyoyic ma calu pa Abraham, ma tie wegwa wan ceke. 17 (Tap calu ma Lembagora uyero kumae: “Aketho ibed wego mi thek dupa.”) Abraham unyutho kit yiyoyic maeno i wang’ Mungu ma cero ju m’utho, man ma weco pi gin m’umbe calu ve gitie.* 18 Kadok nwang’u Abraham ubino mbe ku thelembe mi geno nia ebinyolo awiya de, re ni kum genogen eyiyo nia ebidoko wego mi thek dupa calu ma Mungu ung’olo ire kumae: “Nyikweyi* bibedo kumeno.” 19 Kadok nwang’u Abraham ubino ku yiyoyic ma tek de, re kinde m’eparu pi kume gire, enwang’u nia ve kumene udaru tho (pilembe ebino ku oro ma romo dak acel [100]); bende eng’eyo nia Sara de udaru tii m’eromo nyolo ngo awiya. 20 Ento ni kum lembe ma Mungu ung’olo ire, Abraham ubino mbe ku jiji; ento yiyoyic pare udwoke tek, uketho eyungo Mungu. 21 Man eyiyo ku cwinye ceke nia Mungu tie ku copo mi pong’o lembe m’eng’olo ire. 22 Pieno, ni kum yiyoyic pare, “jukwane ni won bedopwe.”

23 Enre, wec ma nia “jukwane ni won bedopwe,” ukiewere pire kende ngo. 24 Ekiewere bende piwa. Wan de Mungu bikwanuwa ni weg bedopwe, pilembe wayiye, en m’ecero Yesu ma Rwoth mwa ku kind ju m’utho. 25 Mungu uweko etho pi dubo mwa, man ecer kara jukwanwa ni weg bedopwe.

5 Calu ma Mungu udaru kwanuwa ni weg bedopwe ni kum yiyoyic mwa, dong’ wacopo bedo ku kwiyocwiny i kindwa ku Mungu ni kum Rwoth mwa Yesu Kristu. 2 Yiyoyic ma watie ko i Yesu uketho wacopo coro i vut Mungu, man Mungu unyutho iwa bero pare ma yawe mbe. Pieno, wacopo bedo kud anyong’a pilembe wang’eyo nia wabinwang’u dwong’ m’uai i bang’ Mungu. 3 Re eno kende ngo. Wabedo bende kud anyong’a kinde ma wabenwang’ara ku masendi, pilembe wang’eyo nia masendi nyolo cirocir, 4 man cirocir mwa ketho Mungu yiyowa; ka Mungu yiyowa ke, wabedo ku genogen, 5 man genogen nyayu ngo lewic i wijo, pilembe Mungu ukonjo mer pare i adundewa nikadhu kud i tipo ma leng’ m’emiyo iwa.

6 Kum kinde ma nwang’u fodi tijwa mbe,* Kristu utho pi judubo tap i saane. 7 Wang’ ma pol ng’atu moko mbe ma copo maru etho pi won bedopwe; pi jabero re nyo ng’atu moko copo bedo ayika nitho. 8 Ento Mungu unyutho mer pare iwa, pilembe kinde ma nwang’u fodi wa judubo, Kristu utho piwa. 9 Pieno, kawoni ma dong’ Mungu ukwanuwa ni weg bedopwe ni kum rimb Yesu, wang’eyo nia andha wabiboth ni kwinyo pa Mungu. 10 Kadok nwang’u wabino judegi pa Mungu de, re ni kum tho pa Wode, wadoko jurimbe.* Eno uketho wayiyo andhandha nia kawoni ma dong’ watie jurimb Mungu, wabiboth ni kum kwo pa Yesu. 11 Lembe ma Mungu utimo nikadhu kud i bang’ Rwoth mwa Yesu Kristu ubenyayu anyong’a i iwa, pilembe ni kume wadoko jurimb Mungu.*

12 Ka kumeno, calu ni kum ng’atu acel dubo umondo i ng’om, man tho ni kum dubo, e kumeno tho ulal i bang’ dhanu ceke kum kagi ceke gidubo. 13 Dubo ular umondo i ng’om nwang’u fodi Cik umbe, ento ng’atu moko mbe ma jucopo kwanu ni jadubo ka cik umbe. 14 Kum kumeno, tho ubimo wi dhanu ceke niai i kum Adamu nitundo i kum Musa. Ebimo kadok wi dhanu m’utimo ngo kit dubo ma rom ku m’Adamu utimo, en m’ebedo ayi pa ng’atu ma bibino.

15 Ento giramiya ma Mungu umiyo utie ngo calu dubo p’Adamu. Pilembe ni kum dubo pa ng’atu acel eno, dhanu dupa utho. Enre ni kum bero ma yawe mbe ma Mungu unyutho, man giramiya m’emiyo mi mananu nikadhu kud i bang’ ng’atu acel, niwacu Yesu Kristu m’unyutho iwa bende bero ma yawe mbe, dhanu dupa binwang’u mugisa. 16 M’umedo maeno, adwogi mi giramiya ma Mungu umiyo mi mananu, ukoc ku matoke ma dubo pa ng’atu acel ukelo, pilembe dubo ma ng’atu acel utimo ukelo pokolembe. Ento giramiya ma Mungu umiyo mi mananu i ng’ei dubo dupa, uketho jukwanu dhanu ni weg bedopwe. 17 Kum ni kum dubo pa ng’atu acel nica, tho ubimo wi dhanu ceke. Ento bero ma yawe mbe ma Mungu unyutho, man giramiya m’emiyo mi mananu utie dit nisagu. Pilembe dhanu m’unwang’ugi gibikwo, man gibibimo ni kum ng’atu acel ma en e Yesu Kristu.

18 Pieno, calu ma dubo acel ukelo pokolembe iwi kwond dhanu ceke, kumeno bende timo acel mi bedopwe uketho jucopo kwanu kwond dhanu ceke ni weg bedopwe, man gicopo nwang’u kwo. 19 Kum calu ni kum ng’atu acel m’uturo cik, dhanu dupa gidoko judubo; kumeno bende ni kum ng’atu acel m’uworo cik, dhanu dupa bidoko weg bedopwe. 20 Mungu umiyo Cik ni dhanu kara ging’ey nia gi judubo dit. Ento ka ma dubo lee i iye, Mungu nyutho bero pare ma yawe mbe nisagu. 21 Tap calu ma dubo bimo wi dhanu man dubone kelo tho, kumeno bende bero ma yawe mbe pa Mungu ubebimo kara Mungu ukwan dhanu ni weg bedopwe, wek kara ginwang’ kwo ma rondo ku rondo nikadhu kud i bang’ Yesu Kristu Rwoth mwa.

6 Dong’ nyo eno nyutho nia ukwayu wamedara nitimo dubo, kara Mungu unyuth iwa bero pare ma yawe mbe nisagu? 2 Nyanok de ngo. Calu ma wadaru tho ni dubo, dong’ wacopo medara nitimo dubo asu nenedi? 3 Kunoke nyo wung’eyo ngo nia wan ceke ma walimo batizo i Kristu Yesu, walimo bende batizo i tho pare? 4 Pieno, nikadhu kud i batizo ma walimo i tho pa Kristu, juyikowa karacelo kude, wek kara tap calu ma Kristu ucer ku kind ju m’utho ni kum dwong’ mi tego pa Wego, wan bende wakwo kwo ma nyen. 5 Calu ma wadaru dikara karacelo kude pilembe watho ve en, ma jiji mbe wabidikara bende kude kinde ma wabicer i ayi ma en de egam ecer ko. 6 Kum wang’eyo nia juguro timo mwa ma con karacelo kude iwi yen, wek kara kumwa mi dubo unyothere. Pieno wacikara ngo nibedo asu ng’eca mi dubo. 7 Pilembe ng’atu m’utho, dubo pare udaru wekere.*

8 M’umedo maeno, wayiyo nia tek watho karacelo ku Kristu, wabikwo bende karacelo kude. 9 Wang’eyo nia Kristu udaru cer ku kind ju m’utho, man ecopo tho kendo ngo. Pieno, tho dong’ ubebimo ngo i wiye. 10 Kum etho pi nikabu dubo wang’ acel pi nja. Ento kawoni dong’ ebekwo pi nitimo yeny pa Mungu. 11 Kumeno bende, ukwayu wunenuru ni avu i lembe m’uneno dubo. Ento kawoni wubekwo pi nitimo yeny pa Mungu calu julub pa Kristu Yesu.

12 Kum kumeno, kud wuwek dubo ubim wi kumwu ma tho, ma nia wuwor ko awanya migi. 13 Kud wuthier watkumwu ni dubo man ni jamtic mi timo lembe ma reco, ento wuthieruru ni Mungu calu ju ma kwo m’ucer ku kind ju m’utho. Man wuthier bende watkumwu ni Mungu calu jamtic mi timo bedopwe. 14 Dubo ucikere ngo nibimo wiwu pilembe wumbe i the Cik, ento wunwang’u bero ma yawe mbe pa Mungu.

15 Dong’ nyo eno ubenyutho nia wacikara nitimo dubo pilembe wambe i the Cik, man pilembe Mungu ubenyutho iwa bero pare ma yawe mbe? Ungo. 16 Nyo wung’eyo ngo nia ka wubewodhuru niworo ng’atu moko calu ng’eca, eca nwang’u wubedwokuru ni ng’eca pa ng’atune? Pieno, tek wutie ng’eca mi dubo, ebiterowu i tho. Ento tek wutie ng’eca pa Mungu man wubewore, wubibedo dhanu m’ubewotho i bedopwe. 17 Wabedwoko foyofoc ni Mungu, pilembe kadok con wubedo ng’eca mi dubo de, re kawoni wubeworo kud adundewu ceke ponji ma juponjo kowu. 18 Eyo! I ng’ei ma jugonyowu kud i ng’eca mi dubo, wudoko ng’eca mi bedopwe. 19 Abetiyo ku wec ma dhanu nyang’ i iye pilembe wu ng’ic. Con wubed wuthiero watkumwu ni ng’eca mi timo lembsasa man dubo, ento kawoni wucikuru nithiero watkumwu ni ng’eca mi timo bedopwe man leng’o. 20 Kum kinde ma wubino ng’eca mi dubo, wubedo mbe ku yeny mi timo lembe m’atira.

21 Adwogi mi timo mwu mi saa maeca ubedo ang’o? Wubed wutimo lembe ma kawoni lewic re ma negowu i kume. Man timone terojo i tho. 22 Ento kawoni ma dong’ wutie agonya ni dubo man wudoko ng’eca pa Mungu, wubetimo lembe m’atira, m’adwogine utie kwo ma rondo ku rondo. 23 Kum sukulia mi dubo en e tho, ento giramiya ma Mungu umiyo mi mananu re en e kwo ma rondo ku rondo nikadhu kud i bang’ Kristu Yesu Rwoth mwa.

7 Umego, abeweco i beng’wu wun ma wung’eyo Cik: Nyo wung’eyo ngo nia Cik bimo wi ng’atini tekene fodi e kwo? 2 Ku lapor, cik utwiyo dhaku m’ugamere ku cware tekene fodi e kwo; ento tekene cwarene tho, etie agonya i kum cik pare. 3 Kan egiero nico mange ma fodi cware kwo, jubilwong’e nia etie dhaku ma gierere swa. Ento ka cware tho, etie agonya i kum cik pa cware, man jubilwong’e ngo nia dhaku ma gierere swa tek egiero nico mange.

4 Romrom kumeno umego para, Kristu utho kara wubed agonya i kum* Cik. Lembe maeno utimere kara wugom ng’atu mange, ma tie ng’atu m’ucer ku kind ju m’utho. Kawoni dong’ wacikara nicego nyingwa ni Mungu. 5 Kinde ma wabino kwo nimakere ku kumwa mi dubo, Cik uketho wang’eyo awanya mi dubo m’ubino tiyo i kumwa ma nwang’u ubeciterowa i tho. 6 Ento kawoni watie agonya i kum Cik man watho ni gin ma yang’ umakuwa ni ng’eca. Kawoni wabetimo ni Mungu* i ayi ma nyen nikadhu kud i tipo, ento ungo i ayi ma con nikadhu kud i Cik.

7 Nyo wayero nia Cik utie dubo? Ungo! Nwang’u acing’eyo ngo nia dubo tie ang’o ka nwang’u Cik upe. Ku lapor, nwang’u acing’eyo ngo nia kethocwiny hai i kum piny pa ng’atu mange utie dubo ka nwang’u Cik uyero ngo nia, “Kud iketh cwinyi hai i kum piny pa ng’atu mange.” 8 Ento dubo utiyo ku cik maeno pi niting’o lak kwond awanya ma rac moko ci i iya. Ka nwang’u cik maeno bino mbe, nwang’u dubo de tegone bedo mbe.* 9 I andha, abino kwo ma nwang’u fodi Cik umbe. Re kinde ma Cik uwok, dubo de ugam uwok man atho. 10 Cik ma nwang’u mito utera i kwo ulund utera i tho. 11 Kum dubo tiyo ku cik maeno pi niwonda man pi ninega. 12 Re Cik en gire etie leng’ man lembang’ola de leng’, e pwe man eber de.

13 Nyo eno nyutho nia Cik pa Mungu ma tie ber re m’ukelo tho i wiya? Ungo! Dubo re m’ukelo tho i wiya. Cik utie ber, ento eketho ubenen kamaleng’ nia dubo ubekelo tho i wiya. Pieno ni kum cik, dubo unyuthere nia andha etie dubo. 14 Wang’eyo nia Mungu re m’umiyo Cik nikadhu kud i tipo pare.* Ento lembe utie an, a leng’ ungo* man julwora ni ng’eca mi dubo. 15 Kum abenyang’ cuu cuu ngo i kum gin m’abetimo. Kakare nitimo gin m’abemito, alund atimo gin m’adagu. 16 Kadok abetimo gin m’amito ngo, re asu ayiyo nia Cik utie ber. 17 I andha, utie an ungo re m’abetimo lembe ma reco maeno, ento dubo ma n’i iya re. 18 Kum ang’eyo nia gin moko ma cuu acel de mbe i iya, niwacu i kuma mi dubo. Kum atie kud ava mi timo gin ma ber, ento ambe ku copo mi time. 19 Abetimo ngo lembe ma beco ma nwang’u amito atim, ento lembe ma reco ma nwang’u amito ngo atim re m’alund abetimo. 20 Dong’ kan abetimo lembe ma nwang’u amito ngo atim, tie ngo an re m’abetimogi, ento dubo ma n’i iya re m’ubetimogi.

21 Abenwang’u cik ma e i iya: Kan amito atim lembe ma ber, lembe ma reco re ma n’i iya. 22 An gira yor i iya, amaru cik pa Mungu lee. 23 Ento abeneno i kuma cik mange m’ubekiedo i kum cik mi pidoiya, man edwoka ni jakol* ni cik mi dubo ma ni kuma. 24 Can i wiya! Ng’a ma bibodha kud i kum maeni m’ubetera i tho? 25 Abefoyo Mungu lee pilembe ebodha nikadhu kud i bang’ Yesu Kristu Rwoth mwa! Pieno i pidoiya, atie ng’eca mi cik pa Mungu; ento i kuma, atie ng’eca mi cik mi dubo.

8 Pieno, dhanu ma gini i acel ku Kristu Yesu pokolembe mbe i wigi. 2 Kum cik mi tipo ma miyo kwo ni kum Kristu Yesu udaru gonyowu kud i the cik mi dubo man mi tho. 3 Cik ubino mbe ku copo mi gonyowu pilembe dhanu tie ng’ic man gitie judubo. Ento pi nigonyowu, Mungu uoro Wode ubin unyolere ku kum mi dhanu ma judubo kara ekab dubo cen. I ayi maeno, Mungu ubepoko lembe iwi dubo i kum 4 kara wan ma wabewotho nimakere ku tipo, ento ku kum re ngo, watim lembe ma pwe ma Cik ung’olo. 5 Kum ju ma gibekwo nimakere ku kum, giketho wigi zoo i kum piny mi kum, ento ju ma gibekwo nimakere ku tipo, giketho wigi zoo i kum piny mi tipo. 6 Kum niketho wijo i kum piny mi kum terojo i tho, ento niketho wijo i kum piny mi tipo terojo i kwo man kwiyocwiny. 7 Kum ka waweko kumwa mi dubo ubim wiwa, eno ketho wadoko judegi pa Mungu, pilembe kum mi dubo woro ngo cik pa Mungu man ecopo wore de ngo. 8 Pieno, dhanu ma gibewotho nimakere ku kumgi mi dubo gicopo nyayu mutoro i Mungu tak de ngo.

9 Ento wun, umego, wubewotho ngo nimakere ku kumwu mi dubo. Tekene tipo pa Mungu utie andha i iwu, nwang’u wubewotho nimakere ku tipo. Dong’ tek ng’atu moko umbe ku tipo pa Kristu, nwang’u ng’atu maeno e pa Kristu ngo. 10 Enre tek wutie i acel karacelo ku Kristu, tipo uketho wunwang’u kwo ni kum bedopwe, kadok nwang’u kumwu udaru tho ni kum dubo de. 11 Tekene tipo pa Mungu m’ucero Yesu ku kind ju m’utho n’i iwu, e ng’atu ma rom m’ucero Kristu Yesu ku kind ju m’utho, biketho bende kumwu ma tho bidoko kwo nikadhu kud i tipo pare ma n’i iwu.

12 Pieno umego, wacikara ngo nikwo nimakere ku kumwa mi dubo. 13 Tekene wubekwo nimakere ku kum, wung’ey nia wubitho andha, ento tekene wubeweko tipo ma leng’ ukonywu ninego awanya ma rac mi kumwu, wubibedo kwo. 14 Kum dhanu ma tipo pa Mungu re m’ubetelo wigi, gitie andha wot Mungu. 15 Kum wunwang’u ngo tipo m’udwokowu ng’eca man m’uketho wubekwo kendo i lworo, ento wunwang’u tipo m’uketho wadoko wot Mungu; tipo maeno uketho wakok kumae: “Abba,* Vwa!” 16 Tipo pa Mungu en gire, karacelo ku tipo mwa, nyutho kamaleng’ nia watie nyithindho pa Mungu. 17 Tekene watie nyithindho pa Mungu, nwang’u watie bende jucam pacu pare, man jucam pacu karacelo ku Kristu. Ento ma kwong’a ukwayu wasendara karacelo, kara wabin wanwang’ dwong’ bende karacelo.

18 Aneno nia masendi ceke ma wabeciro kawoni utie gin moko ngo ka jupore ku dwong’ ma binyuthere i iwa. 19 Kum giracwiya ceke ubekuro kud ava nindo ma Mungu binyutho iye wote. 20 Kum nwang’u giracwiya maru ngo nibedo i the ng’ol mi kwo m’umbe genogen mi nindo m’ubino,* ento Mungu weko kaka; enre kinde m’eng’olo lembe maeno, emiyo iwa genogen. 21 Eng’eyo bende nia jubigonyo giracwiya kud i ng’eca mi top, man ebinwang’u bedagonya mi dwong’ mi nyithindho pa Mungu. 22 Kum wang’eyo nia cil kawoni, giracwiya ceke ubecur acura man gibesendiri karacelo. 23 M’uweko maeno, wan bende ma wanwang’u tipo ma leng’ ma tie landu wi mwoka mi piny ma bibino, wabecur acura i iwa, kinde ma wabekuro kud ava nindo ma Mungu bidwokowa i iye ni wote. I saa maeca, ebigonyowa kud i kumwa mi dubo nikadhu kud i jamgony ma Yesu uthiero. 24 Wagam wanwang’u genogen maeno kinde ma jubodhowa, ento tek wabeneno gin ma wageno, en e genogen kendo ngo; kum ka ng’atini ubeneno gin moko, nyo egene kendo? 25 Ento tekene wageno gin ma fodi waneno ngo, wakure kud ava man cirocir.

26 Bende, tipo ma leng’ konyowa kinde ma wa ng’ic, kum saa moko ka wamito warwo, wang’eyo ngo lembe m’ukwayu warwo pire. Saa maeno tipo gire kwayu piwa kinde ma wabecur pilembe wakoso wec ma tap. 27 Ento Mungu ma yenyo i adunde ung’eyo gin ma tipo ubekwayu, pilembe tipone kwayu pi jumaleng’ nimakere ku yeny pa Mungu.

28 Wang’eyo nia Mungu ketho tic pare ceke timere karacelo pi bero mi ju m’umare, ju m’elwong’o nimakere ku yeny pare. 29 Pilembe ku kwong’a Mungu ng’eyogi, man elar eketho nia gidok calu Wode, kara Wode udok kayu i kind umego dupa. 30 M’umedo maeno, Mungu ulwong’o dhanu m’elar eng’iyo, man ekwanu bende dhanu m’elwong’one ni weg bedopwe; i ng’eye, eyungo dhanu m’ekwanu ni weg bedopwe.

31 Wabilund yero ang’o i kum lembe maeni? Ka Mungu ni kudwa, ng’a ma bibedo jadhogwa? 32 En m’ecero ngo kadok Wode ngi, ento emiye kara ebin etho piwa ceke; m’uweko Wodene, nyo ebimiyo ngo iwa gin mange ceke ku berocwinye? 33 Ng’a ma copo doto dhanu ma Mungu ng’iyo? Mungu re ma kwanugi ni weg bedopwe. 34 Ng’a ma copo poko lembe rac i wigi? Ng’atu moko acel de mbe. Kum Kristu Yesu utho pigi, man ecer ku kind ju m’utho; kawoni ebedo yor i cing’ Mungu mir acwic man ebekwayu piwa.

35 Ang’o ma copo cero Kristu ku maruwa? Nyo masendi, ang’abacwiny, ragedo, kec, koso kendi, ariti kunoke palamularu? 36 Tap calu ma Lembagora uyero kumae: “Piri wabeboth abotha ku tho saa ceke, dhanu benenowa calu rombe ma jubecithumo.” 37 Ento i gin maeni ceke, wabenwang’u aloci ni kum ng’atu m’umaruwa. 38 Kum ayiyo andhandha nia kadok tho, kadi kwo, kadi jumalaika, kadi bimobim, kadi gin ma nuti kawoni, kadi gin ma bibino, kadi tego, 39 kadi gin ma malu, kadi gin ma piny, kadi giracwiya mange, bicero ngo Mungu ku maruwa nikadhu kud i bang’ Kristu Yesu Rwoth mwa.

9 Abeyero lemandha i Kristu, acwayu ndra ngo; pidocwiny para ma tipo ma leng’ ubetelo wiye de ubenyutho 2 nia atie ku can ma dit man litho i adundena saa ceke. 3 Nwang’u acopo maru akoyara gira ku Kristu calu ng’atu ma julamu, wek kara akony umego para, niwacu juthuwa 4 ma gitie Juisrael. Mungu ung’iyogi kara gidok nyithindho pare, enyutho igi dwong’ pare, etimo kugi lembariba, emiyo igi Cik ku lembang’ola man emiyo igi rwom mi timo ire. 5 Gitie nyikwayu pa kwaruwa man nikadhu kud i bang’gi re ma Kristu unyolere ku kum pa dhanu. Wek Mungu m’ubimo wi piny ceke unwang’ yung rondo ku rondo. Amen.

6 Ento eno nyutho ngo nia lembang’ola pa Mungu upodho. Kum tie ngo dhanu ceke ma gi nyikway Israel re ma gitie Juisrael mandha. 7 Bende, tie ngo nia gi nyikway* Abraham ci, nia dong’ gin ceke gitie awiya pare ma dhe, pilembe Mungu uwacu ni Abraham kumae: “Gin ma jubilwong’o nia nyakweri* biai kud i bang’ Isak.” 8 Eno nyutho nia awiya ma Abraham unyolo ku kum gitie ngo awiya mandha pa Mungu, ento awiya m’enyolo ni kum lembang’ola re ma gitie nyikwaye* mandha. 9 Kum Mungu ugam ung’olo kumae: “Abidwogo oro ma cen i saa ma rom eni man Sara binyolo nyathin ma nico.” 10 Lembe uwotho bende kumeno kinde ma Rebeka unwang’u ic mir awiya ma rut ku kwaruwa ma Isak, 11 kum i wang’ ma fodi ginyoliri ngo man ma fodi gitimo ngo lembe ma ber kadi ma rac, Mungu unyutho nia lembakeca pare bicungo ngo iwi tic mi dhanu, ento iwi ng’atu m’eng’iyo man m’elwong’o. 12 Pieno, Mungu uyero ni Rebeka kumae: “Nyathin ma kayu bitimo ni jang’eye.” 13 Tap calu ma Lembagora uyero kumae: “Amaru Yakobo, ento adagu Esau.”

14 Nyo wayero nia Mungu tie won gondiri? Nyanok de ngo! 15 Kum Mungu uyero ni Musa kumae: “Kisa binega kum ng’atu moko ci m’amaru nia kisa nega i kume, man ngisi de binega kum ng’atu m’amito ngisi nega i kume.” 16 Pieno, ng’iyong’ic pa Mungu cungo ngo iwi yeny pa ng’atini kunoke iwi kero m’ebetimo,* ento iwi kisa pa Mungu. 17 Kum Mungu uyero ni Farao i Lembagora kumae: “Aweki ibedo kwo, kara ni kumi anyuth tego para man kara juyung nyinga i ng’om zoo.” 18 Pieno, kisa nego Mungu i kum ng’atu moko ci m’emaru kisa nege i kume. Ento ng’atu ma wiye tek, eweko cwinye dok nwang’.

19 Ng’atu moko m’i kindwu copo penja kumae: “Pirang’o Mungu ubenwang’u kosa asu i iwa? Kum ng’a ma copo jai kum yeny ma iye yenyo?” 20 Ento in ma i dhanu ma dhanu e, ng’a miyo iri twero mi loko lembe i dhu Mungu? Nyo agulu romo yero ni ng’atu m’ucwiye nia, “Pirang’o icwiya kumeni?” 21 Nyo jacwi agulu umbe ku twero mi cwiyo kud ulobo ma rom agulu ario: Acel ma jutiyo ko i tic mi yung,* ma kucelo ke ma jutiyo ko i tic mi yung ungo?* 22 Dong’ ka Mungu umito enyuth ng’eicwiny pare man eketh tego pare ung’eyere, man eciro ku mwonyolembe hai agulu mi kwinyo* ma nwang’u uromo ku nyoth, nyo embe ku twerone? 23 Dong’ kan etimo kumeno pi ninyutho dwong’ pare ma yawe mbe ni agulu mi kisa* m’elar eyiko pi nimiyo igi dwong’, 24 niwacu wan m’elwong’owa ku kind Juyahudi kende ngo, ento ku kind thek mange bende, dong’ wabiyero ang’o? 25 Tap calu m’elar eyero i buku pa Hoseya kumae: “Ju ma gi dhanu para ngo abilwong’ogi ‘dhanu para,’ man dhaku ma jumaru ngo abilwong’e ‘nyaramara’; 26 man i kaka m’abed ayero igi kumae: ‘Wutie dhanu para ngo’, kakeca abilwong’ogi ‘wot Mungu ma kwo.’”

27 M’umedo maeno, Isaya uwak kumae pi nyithindho mir Israel: “Kadok nwang’u wend nyithindho mir Israel ve kwiyo mi dhu nam, dhanu ma nok m’i kindgi* re ma biboth. 28 Kum Yehova bikelo pokolembe iwi ng’om, man ebiketho pokolembene bitimere pio pio.” 29 Bende, tap calu ma Isaya ular uyero kumae: “Ka nwang’u Yehova mir udul uweko ngo iwa nyikwayu,* nwang’u wadoko calu Sodoma man nwang’u wabedo calu Gomora.”

30 Dong’ waromo yero ang’o pi dhanu mi thek mange? Kadok nwang’u gibino sayu ngo bedopwe de, jukwanugi ni weg bedopwe ni kum yiyoyic ma ginyutho. 31 Ento nyithindho mir Israel, kadok nwang’u gibino sayu nilubo cik mi bedopwe de, re gituc ungo nikwo nimakere ku cikne. 32 Pirang’o? Pilembe gibino sayu nia jukwan gi ni weg bedopwe ni kum tic migi, ento ungo ni kum yiyoyic. E gikier iwi “kidi ma kierojo”; 33 tap calu ma Lembagora uyero kumae: “Nen! Abeketho ng’atu moko i Sayuni ma bibedo calu kidi ma kierojo man cana ma timojo rac,* ento ng’atu m’uyiye lewic binege ngo.”

10 Umego, abeyenyo kud adundena ceke man abekwayu Mungu kara Juisrael gibothi. 2 Abeyero ma jiji mbe nia gibetimo ni Mungu ku kero migi zoo, ento nimakere ku ng’eyong’ec ma tap re ngo. 3 Kum calu ging’eyo ngo cik mi bedopwe pa Mungu, gibelubo cik migi gigi. Pieno, gibeworo ngo cik ma pwe pa Mungu. 4 Kum Kristu en e ajiki mi Cik; pieno ng’atu ma tek uyiye, jubikwane ni won bedopwe.

5 Musa ukiewo pi kite ma ng’atini romo timo ko bedopwe nimakere ku Cik kumae: “Ng’atu m’ubetimo gin ma Cik ung’olo bikwo ni kumgi.” 6 Ento pi bedopwe ma ng’atini nyutho ni kum yiyoyic, Lembe pa Mungu yero kumae: “Kud iwac i adundeni nia, ‘Ng’a ma biidho i polo?’ niwacu kara eketh Kristu lor i ng’om; 7 kunoke nia, ‘Ng’a ma biloro i longoro ma there mbe?’ niwacu kara ecer Kristu ku kind ju m’utho.” 8 Ento Lembagora uwacu ang’o? Ewacu kumae: “Lembe ni ceng’ini kudi, i dhogi man i adundeni,” niwacu “lembe” mi yiyoyic ma waberweyo. 9 Tek ibetuco ku dhogi kamaleng’ nia Yesu tie Rwoth, man iyiyo kud adundeni nia Mungu cere ku kind ju m’utho, ibiboth. 10 Kum kara ng’atini ubed won bedopwe, umito ebed ku yiyoyic i adundene. Ento kara ebothi, ukwayu etuc kamaleng’ pi yiyoyic parene ku dhoge.

11 Giragora uwacu kumae: “Ng’atu m’uyiye, lewic binege ngo.” 12 Kum tung’ tung’ umbe i kind Jayahudi ku Jagiriki, pilembe wan ceke watie ku Rwoth ma rom, ma konyo ku berocwiny dhanu ceke ma gibelwong’e. 13 Kum “ng’atu moko ci ma bilwong’o nying’ Yehova biboth.” 14 Ento gibilwong’o nyinge nenedi tek giyiye ngo? Gibiyiye nenedi tek giwinjo ngo pire? Gibiwinjo pire ke nenedi ka ng’atu moko mbe m’urweyo? 15 Man gibirweyo nenedi tekene juorogi ngo? Tap calu m’egorere kumae: “Tiend ju m’uberweyo lembanyong’a mi gin ma ber leng’ mire ma!”

16 Ento giyiyo lembanyong’a gin ceke ngo, kum Isaya uyero kumae: “Yehova, ng’a m’uyiyo lembe m’ewinjo i bang’wa?”* 17 Pieno, yiyoyic wok ni kum lembe ma juwinjo, man ng’atini winjo lembene nwang’u jubeweco pi Kristu. 18 Ento akepenjo pi Juisrael kumae: Nyo gigam giwinjo? Eyo, giwinjo. Kum Lembagora uyero kumae: “Dwandgi uwinjere i wang’ ng’om zoo, man rwonglembe migi utundo kadok i bang’ dhanu mi gund ng’om ma bor.” 19 Abepenjo bende kumae: Nyo Juisrael ginyang’ ungo? Ku kwong’a Musa uyero kumae: “Abitiyo ku dhanu ma gitie thek ungo pi ninyayu nyeko i iwu; man abitiyo ku thek ma tie jakasegu pi ninyayu ng’eicwiny i iwu.” 20 I ng’eye, Isaya uyero ku tegocwinye kumae: “Dhanu ma nwang’u ubino saya ngo re ma ginwang’a; man dhanu ma nwang’u ubino yenyo ngo ya ging’eya re ma ging’eya.” 21 Ento eyero pi Juisrael kumae: “Athang’u cinga duu i bang’ dhanu ma wigi tek man ma gi jujai.”

11 Dong’ akepenjo kumae: Nyo Mungu ukwero dhanu pare? Nyanok de ngo! Pilembe an de atie Jaisrael, nyakwar* Abraham, mi suru pa Benjamin. 2 Mungu ukwero ngo dhanu pare m’elar eng’iyo. Nyo wung’eyo ngo lembe ma giragora uyero pir Eliya, maram ewak ko i bang’ Mungu pi Juisrael? 3 “Yehova, ginego jubila peri man gimugo bende pemblam peri; kawoni adong’ kenda man gibemito ginega.” 4 Ento Mungu udwoko ire ang’o? “Fodi dhanu elufu abiro (7 000) udong’ ira ma gitimo ngo* ni Baal.” 5 Kumeno bende, tin de nyathi dong dhanu moko fodi udong’ kud i kind dhanu ma Mungu ung’iyo ni kum bero pare ma yawe mbe. 6 Eno nyutho ngo nia Mungu ung’iyogi ni kum gin ma gitimo, ento eng’iyogi ni kum bero pare ma yawe mbe; kum ka nwang’u gitimo kero kara Mungu ung’iigi, nwang’u eng’iyogi ngo ni kum bero pare ma yawe mbe.

7 Dong’ waromo yero ang’o? Dhanu mir Israel ginwang’u ngo gin ma gibino sayu ku cwinygi zoo, ju ma nok ma jung’iyo re ma ginwang’e. Ento dong dhanune m’udong’ gikwero niwinjo.* 8 Tap calu m’egorere kumae: “Mungu uketho nindo ma pek unurogi, kara wang’gi kud unen piny man ithgi de kud uwinj lembe, cil tin.” 9 Bende, Daudi uyero kumae: “Wek foc* migi udok igi ni uwic man voi, kara gipodhi man ginwang’ matira. 10 Wek wang’gi ucid bii kara kud ginen piny man wek ter migi ma pek ugom korgi kwa.”

11 Ka kumeno akepenjo kumae: Nyo Juyahudi gikier ma gipodho ko apodha ngi? Ungo! Ento kier migi uketho dhanu mi thek mange unwang’u both, e kumira ucaku nego Juyahudi. 12 Ka kier migi ukelo mugisa ni ng’om zoo, man wendgi m’ujwik uketho dhanu mi thek mange unwang’u mugisa lee, dong’ ka jucoko wendgi zoo mugisa romo bedo lee rukani!

13 Kawoni dong’ fodi akeweco i beng’wu wu dhanu mi thek mange. Calu atie jakwenda mi dhanu mi thek mange, aneno tic m’abetimo ni Mungu ni gin ma pire tek lee.* 14 Ageno bende nia ku yo moko acopo ketho kumira umond i juthuwa pi gin ma wunwang’u kara abodh ju moko m’i kindgi. 15 Kwer ma jukwero kogi uketho dhanu moko m’i ng’om udoko ku winjiri ma ceng’ini ku Mungu; pieno ka Mungu udok ujologi kendo, ebibedo ve ecerogi ku kind ju m’utho. 16 M’umedo maeno, ka tek ng’et kwen ma juting’o calu girathiera mi landu wi mwoka tie leng’, nwang’u kwende ma zoo de leng’; bende kan ulag yen tie leng’, nwang’u jange de leng’.

17 Ento juturo jange moko cen kud iwi yende. Man juting’i e jumwoni i kind jange m’udong’, kadok nwang’u ibino jang oliv m’i lum; kawoni in de ibecwiyo pii m’ulag olivne ubetelo. 18 Dong’ kud iting’iri* iwi jang yen ne ma juturo. Pilembe tek iparu nia iloyogi, mito ipoi nia tie in ungo re m’iyeyo ulag yende, ento ulage re m’uyeyi. 19 Ng’atu moko m’i kindwu copo yero kumae: “Si juturo jang yen ne kara jumwona kakagi.” 20 Iyero lemandha! Juturogi pilembe gikoso yiyoyic, ento in icungo ni kum yiyoyic peri. Dong’ kud iyungiri; ento bed ku weng’i. 21 Kum ka Mungu uweko ngo jange ma dhe, iparu nia in ecopo weki? 22 Dong’ poy nia Mungu tie jabero man saa mange enyutho ngo kisa. Enyutho ngo kisa ni dhanu m’upodho pilembe gikoso yiyoyic. Ento enyutho bero iri tek ibemediri nibedo i bero pare; kan ungo re, in de ebing’ondi cen kud i kum yen. 23 Man Juyahudi bende ka gidok gicaku nyutho yiyoyic, Mungu bimwonogi i kum yen pilembe etie ku copo mi dok mwonogi kendo. 24 Kum ka in m’ibino jang oliv m’i lum, jumwoni i kum yend oliv m’apidha ma ke nwang’u etie lembe ma jutimo ngo, nyo ecibedo yot ungo ma sagu nidok mwono jang oliv m’apidha i kum yende ma dhe?

25 Umego, amito wung’ey lembamung’a ma leng’ ma e kara kud wudok riek i weng’wu giwu: Cwiny Juisrael moko udoko nwang’ man ebibedo kumeca nitundo ma Mungu bicoko dhanu ceke m’eng’iyo kud i kind thek mange. 26 I ayi maeno re ma Juisrael ceke biboth, tap calu ma Lembagora uyero kumae: “Jalar biai kud i Sayuni man ebikabu timo ma reco ceke kud i kind nyikway Yakobo. 27 Man eni tie lembariba m’abitimo kugi kinde m’abikabu dubo migi cen.” 28 Andha, Juyahudi moko gitie judegi mi lembanyong’a, man lembuno uketho wunwang’u mugisa; ento Mungu re m’ung’iyogi man emarugi pi kwarugi. 29 Kum Mungu biloko ngo nen pare iwi giramiya m’emiyo man dhanu m’elwong’o. 30 Kum tap calu ma wu dhanu mi thek mange de con wubed wuworo ngo Mungu, ento kawoni etimo iwu kisa pilembe Juyahudi gibeworo ngo Mungu, 31 kawoni gin bende gibeworo ngo Mungu man Mungu utimo iwu kisa. Ento ecopo timo kisa igi bende, tap calu m’egam etimo iwu. 32 Kum Mungu utwiyogi ceke i kol mi koso woro kara enyuth kisa pare igi ceke.

33 Ei! Berocwiny pa Mungu, rieko pare man ng’eyong’ec pare lee mire ma! Ninyang’ i pokolembe pare man i yo pare utie lembe ma tek mire ma! 34 Kum “ng’a m’utuc ning’eyo paru pa Yehova, man ng’a m’udoko jamii juk pare?” 35 Kunoke “ng’a m’ular umiyo piny moko ni Mungu kara ecul ire kawang’e?” 36 Kum ecwiyo piny ceke man ginuti ni kume man pire. Dwong’ ubed ire rondo ku rondo. Amen.

12 Umego, calu ma Mungu nyutho iwu kisa pare, akwayuwu nia wuthier kumwu ubed calu lam ma kwo, ma leng’ man ma Mungu yiyo; man wutii ku copo mwu mi paru i lembe pi nitimo ire. 2 Wuwek niwotho nimakere ku ng’om maeni, ento wuwek Mungu ulok ayi ma wuparu ko lembe kara wung’ey yeny pa Mungu m’e ber, m’eyiyere man m’e leng’ de.

3 Ni kum bero ma yawe mbe ma Mungu nyutho ira, ayero iwu ceke nia ng’atu moko kud upar nia pire tek nisagu jumange, ento epar i ayi m’ukwayere nimakere ku kadhiri mi yiyoyic ma Mungu miyo ire. 4 Tap calu ma kumjo utie ku watkum dupa ento gin zoo ngo ma gitimo tic ma rom, 5 kumeno bende, kadok nwang’u wa dupa, watie kum acel i Kristu, ento ng’atuman utie watkum wadi. 6 Wan ceke Mungu miyo iwa giramiya ma tung’ tung’ nimakere ku bero pare ma yawe mbe. Dong’ tek wanwang’u giramiya mi lembila, waeu lembilane nimakere ku yiyoyic m’emiyo iwa; 7 kunoke tek etie giramiya mi konyo jumange, dong’ wamedara nikonyogi; tek wanwang’u giramiya mi ponji, dong’ waponj cuu; 8 tek giramiyane tie mi juko cwiny jumange, wamedara nijuko cwinygi; tekene etie mi miyo piny, dong’ wamiye ku berocwinywa; tek etie mi telo wi cokiri, wek watele cuu; tek etie mi timo kisa, dong’ watim kisane kud anyong’a.

9 Wumar jumange kud adundewu ceke.* Wudag gin ma rac man wumok kii i kum gin ma ber. 10 Wunyuth mer mir umego man ng’atuman unyuth mer ni wadi man ni wadi. Wubed ma kwong’a i nyutho yung ni jumange. 11 Wutim tic ma tek, kud wubed junyap. Wek tipo ma leng’ umii iwu tego man wutim ni Yehova kud adundewu ceke. 12 Anyong’a negwu i genogen. Wucir kinde ma wubenweng’uru ku masendi. Wumeduru nirwo. 13 Wukony juyic wedwu* ku piny ma cande negogi. Wumeduru nijolo welo. 14 Wumii mugisa ni ju m’ubenyayu ragedo i kumwu; wukway Mungu umii mugisa ni dhanu, ento kud wulamgi. 15 Anyong’a negwu ku ju m’anyong’a negogi; wuwak ku ju m’ubewak. 16 Wudieng’ pi jumange tap calu ma wubedieng’ ko piwu giwu; kud wupar piwu giwu nisagu, ento wubed dhanu ma wujwiguru. Kud wunwang’ nia wu riek nisagu jumange.

17 Kud wucul wang’ rac ku rac ni ng’atu moko ci. Wutim lembe i ayi ma ber ma dhanu ceke neno nia tie cuu. 18 Wutim lembe ceke ma wucopo kara wukwo ku kwiyocwiny ku dhanu ceke. 19 Jumerna, kud wucul kwor, ento wuwek kaka ni kwinyo pa Mungu; kum Lembagora yero kumae: “‘Culo kwor en e para; abiculo an,’ Yehova wacu.” 20 Ento “tek kec ubenego jadegi peri, mii ire cam; ka rieu ubenege, mii ire emadhi; kum tek itimo kumeno, ibicoko cugimac i wiye.”* 21 Kud iwek lembe ma rac uloyi, ento mediri nivoyo lembe ma rac ku gin ma ber.

13 Kubang’ dhanu* ceke maku giwor jubim mi ng’om, kum bimobim moko mbe ma copo bedo nuti ka Mungu kuweko kakare en ungo. Jubim ceke ma gitie i dito migi Mungu wekogi en. 2 Pieno, ka ng’atu moko ubeworo ngo jubim, nwang’u ebejai i kum yub pa Mungu; man jubipoko lembe iwi ng’atu m’ujai i kum yub maeno. 3 Dhanu ma gitimo lembe ma ber gilworo ngo jubim, ento ju m’utimo lembe ma rac re ma gilworogi. Dong’ kan imito ngo ilwor jubim, mediri nitimo lembe ma ber, e gibiyungi. 4 Gitie jutic pa Mungu pi bero peri, ento tekene ibetimo lembe ma rac, ukwayu ilworgi. Kum giting’o palamularu mananu ngo; gitie jutic pa Mungu pi nimiyo matira ni ng’atu m’utimo lembe ma rac.

5 Pieno, ukwayu wubed wor igi kende kende ngo pi niuro kwinyo migi, ento kara wumeduru bende nibedo ku pidocwiny ma leng’. 6 Eno re m’uketho wuculo bende palatha, pilembe gitie jutic pa Mungu* ma gibemiyiri pi nitimo tije. 7 Wumii ni ng’atuman gin m’uromo jumii ire: Palatha ni ng’atu m’uromo jucul ire palatha, ajok ni ng’atu m’uromo jumii ire ajok, woro ni ng’atu m’uromo ku woro, man yung ni ng’atu m’uromo ku yung.

8 Kud wubed ku banja pa ng’atu moko, ndhu banja mi bedo ku mer i kindwu re, kum ng’atu m’umaru dhanu wagi upong’o cik. 9 Kum Cik m’uwacu nia, “Kud itim abor,* kud ineg nek, kud ikwal kwo, kud iketh cwinyi hai i kum piny pa ng’atu mange,” man lembang’ola mange bende mi Cik, ucoko dhoge i cik ma e: “Icikiri nimaru dhanu wedu calu in giri.” 10 Ng’atu m’umaru dhanu mange timogi rac ungo; pieno ng’atu ma tie ku mer upong’o Cik kakare.

11 Wucikuru nitimo gin maeno pilembe wung’eyo nia saa udaru romo m’ukwayu wucew i iye kud i wang’ nindo, kum kawoni both mwa dong’ ni ceng’ini magwei nisagu saa ma wadoko i iye juyic. 12 Diewor ubekadhu man piny udhingo ruu. Dong’ wakebu cen timo mi mudho man waronyu jamlwiny mi der. 13 Dong’ wawothu i ayi m’umaku piny calu dhanu m’ubewotho ku dieceng’, i timo foc ma reco man mer ku kong’o ngo, ku lembsasa mi tarwang’ kadi timo mir acidi man mi thwon* de ngo, kud wadhau ku ju mange, man kud wadok jukumira. 14 Enre, wulub kilili mandha lapor pa Rwoth Yesu Kristu, man kud wupang nipong’o awanya ma rac mi kumwu.

14 Wujol ng’atu ma yiyoyic pare ng’ic, ento kud wupok lembe iwi ju ma paru migi ukoc ku mwu. 2 Ng’atu acel yiyoyic pare tek m’ecamu ko kwond cam ceke, ento ng’atu ma kucelo yiyoyic pare ng’ic uketho ecamu dek ma col kende. 3 Dong’ ng’atu ma camu kwond cam ceke ucikere ngo nicayu ng’atu ma camu ngo kwond cam ceke; man ng’atu ma camu ngo kwond cam ceke ucikere ngo nipoko lembe iwi ng’atu ma camu kwond cam ceke, kum Mungu daru jole. 4 In i ng’a m’ipoko lembe iwi jatic pa ng’atu mange? Rwoth pare re ma ng’olo nia etimo ber kunoke rac, kum ku kony pa Yehova, ecopo cungo.

5 Ng’atu moko ubenwang’u nia nindo acel usagu wadi, ento ng’atu ma kucelo ulund ubenwang’u nia nindo ceke rom. Dong’ ng’atuman ung’ey gire nia gin m’eparu tie cuu. 6 Ng’atu m’ubenwang’u nia nindo acel usagu wadi ubetimo kumeno pi niyungo Yehova; ng’atu m’ubecamu kwond cam ceke de ubeyungo Yehova, pilembe ebedwoko foyofoc ni Mungu pi camne; man ng’atu m’ubecamu ngo de ubeyungo Yehova, pilembe en de ebedwoko foyofoc ni Mungu. 7 Ng’atu moko mbe m’i kindwa ma kwo pire gire, man ng’atu moko mbe ma kan etho, etho pire gire. 8 Kum ka wabekwo, wabekwo ni Yehova, man kadok watho de, watho ni Yehova; pieno dok wabedo kwo kunoke watho, watie pa Yehova. 9 Kum pi thelembe maeno re ma Kristu utho man ecer, kara ebed Rwoth mi ju m’utho ku mi ju ma kwo bende.

10 Dong’ pirang’o ibepoko lembe iwi umeru kunoke pirang’o ibecayu umeru? Kum wan ceke wabicungo i wang’ kom mi pokolembe pa Mungu. 11 Kum Lembagora uyero kumae: “‘Calu abedo kwo,’ Yehova wacu, ‘dhanu ceke birumo cong’gi i wang’a, man leb ceke bituco nia atie Mungu.’” 12 Pieno, ng’atuman biyero* pire gire ni Mungu.

13 Dong’ ng’atu moko kud upok lembe iwi wadi, ento kwayu etim kero kara kud eketh cudho mi kier kunoke macero i wang’ umego. 14 Ang’eyo man ayiyo i Rwoth Yesu nia i kind cam ma wacamu m’ucido mbe, ento tek ng’atu moko paru nia gin moko ucido, ukwayu ngo ecame. 15 Kum tek cam m’ibecamu ketho umeru kier, nwang’u ibewotho ngo i mer. Dong’ ku cam m’ibecamu, kud inyoth yiyoyic p’umeru ma Kristu utho pire. 16 Pieno kud itim lembe moko ma copo ketho jumange yero nia gin ma ber m’ibetimo utie rac. 17 Kum camu ku madhu ngo re ma ketho ng’atini mondo i Ker pa Mungu, ento ukwayu ebed won bedopwe, ekwo ku kwiyocwiny ku jumange man ebed kud anyong’a i tipo ma leng’. 18 Kum ng’atu m’ubetimo ni* Kristu i ayi maeno nyayu mutoro i Mungu man dhanu de yiye.

19 Pieno, dong’ wamedara nitimo lembe ma ketho wakwo ku kwiyocwiny ku jumange, man wateng’ara i kindwa. 20 Wek ninyotho tic pa Mungu pi lembe pa cam. Andha cam ceke tie leng’, ento etie rac nicamu gin ma copo ketho ng’atu mange kier.* 21 Etie ber nia cika kud icam ring’o man kud imadh pigulok, kunoke kud itim lembe moko ci kan ecopo ketho umeru kier. 22 Yiyoyic m’itie ko, bed kude giri i wang’ Mungu. Mutoro ni ng’atu m’adundene poko lembe i wiye ngo kinde m’ebetimo lembe m’eyiyo nia utie atira. 23 Ento ka ng’atu moko ubecamu ma ke etie ku jiji, pokolembe n’i wiye tek ecamu, pilembe ecamu m’embe ku yiyoyic; kum gin moko ci ma ng’atu moko ubetimo m’embe ku yiyoyic utie dubo.

15 Dong’ wan ma wa tek waciru ng’ico mi ju ma tek ungo, man kud wanyay anyong’a i iwa giwa. 2 Ng’atuman m’i kindwa ucikere ninyayu anyong’a i wadi, man nitimo ire lembe ma ber pi niteng’e. 3 Kum kadok Kristu de unyayu ngo anyong’a i iye gire, tap calu ma Lembagora uyero kumae: “Cac mi ju m’ubeceyi udwogo i wiya.” 4 Kum gin ceke m’ukiewere yang’ con i Lembagora ukiewere pi ponji mwa, kara ni kum cirocir mwa man jukojuk ma wanwang’u i Lembagora, wabed ku genogen. 5 Wek Mungu ma miyo cirocir man jukojuk ukonywu wubed ku kit paru ma rom ku ma Kristu Yesu de ubino ko, 6 kara wun ceke wubed ma dhogwu ripo acel pi niyungo Mungu ma Won Rwoth mwa Yesu Kristu.

7 Pieno, wujoluru i kindwu tap calu ma Kristu de ujolowu, pilembe maeni miyo dwong’ ni Mungu. 8 Kum abeyero iwu nia Kristu udoko jatim ni Juyahudi* pi ninyutho nia Mungu yero lemandha man nia lembe m’eng’olo ni kwarugi utie ndra ngo. 9 Man kara dhanu mi thek mange uyung Mungu pi kisa pare, tap calu m’egorere kumae: “Ka kumeno, abipeki i kind dhanu mi thek mange man abipaku nyingi ku wer.” 10 Man kendo Mungu uyero kumae: “Anyong’a negwu wu dhanu mi thek mange karacelo ku dhanu para.” 11 Ewacu kendo kumae: “Wupak Yehova, wu dhanu mi thek ceke man wek dhanu ceke pake.” 12 Isaya bende uyero kumae: “Ulag Yese biwok, man ebibimo iwi thek, e thek biketho genogen migi i wiye.” 13 Wek Mungu ma miyo genogen uketh wupong’ kud anyong’a man kwiyocwiny pilembe wugene, kara genogen mwu umedere ameda ni kum tego mi tipo ma leng’.

14 Umego para, kawoni ang’eyo andhandha nia wutie ayika nitimo bero, man wupong’ ku ng’eyong’ec ceke, bende wutie ku copo mi miyo juk* i kindwu. 15 Ento iwi lembe moko, akiewo iwu lembe thwolo thwolo pilembe amito apoywu i wigi ni kum bero ma yawe mbe ma Mungu unyutho ira. 16 Kara adok jatic pa Kristu Yesu i kind dhanu mi thek, awodhara nitimo tic ma leng’ mi rweyo lembanyong’a pa Mungu, kara dhanu maeno mi thek gidok ni girathiera ma foyo i Mungu ma gidoko leng’ ni kum tipo pare ma leng’.

17 Atie kud anyong’a nibedo jalub pa Kristu Yesu, man nitimo tic pa Mungu. 18 Abiweco ngo iwi lembe moko ci m’atimo an gira, ento iwi lembe ma Kristu utimo man m’eyero nikadhu kud i bang’a ni dhanu mi thek mange, kara gibed wor ire. 19 Giworo ni kum tego mir udu man giranyutha ma tipo pa Mungu utimo. I ayi maeno re m’atuc nirweyo lembanyong’a mii iwi Kristu kakare ceke m’awotho i iye niai i Yeruzalem nitundo i Iliriko. 20 Amito ngo arwey lembanyong’a kaka ma judaru rweyo pi Kristu i iye, kara kud agier iwi kathere ma ng’atu mange uketho. 21 Tap calu ma Lembagora uyero kumae: “Dhanu ma jukoro ngo pire igi, gibinene; man ju ma giwinjo ngo pire, gibinyang’.”

22 Pi thelembe maeno re ma wang’ ma pol anwang’ara ku macero, uketho abino ngo i beng’wu. 23 Ento kawoni adaru rweyo lembanyong’a i kabedo ma kuni ceke; man pi oro ma dupa, ava bino liewowu unega lee. 24 Pieno, aparu nia kinde m’abecidho i Espany, abiwok nenowu; man i ng’ei ma wabedo wakudu nyanok, ageno nia wubilwoka kinde m’acidho kuca. 25 Ento fodi akecidho i Yeruzalem pi nikonyo jumaleng’ ma gin’i kuca. 26 Kum umego mi Makedonia ku mir Akaya gijoko piny migi kud anyong’a kara ucidh ukony jucan ma kind dhanu pa Mungu* ma gin’i Yeruzalem. 27 Gitimo kumeno kud anyong’a dre kum gibino ku banja mir umego mi Yeruzalem, pilembe umego mi Yeruzalem ular umiyo igi giramiya mi tipo; pieno, ukwayu gikonygi ku jamcing’gi. 28 I ng’ei m’abitero ajok* maeno igi, abikadhu ninenowu kinde m’abecidho i Espany. 29 M’umedo maeno, ang’eyo nia kinde m’abibino i beng’wu, abikelo iwu mugisa ma lee m’uai i bang’ Kristu.

30 Akwayuwu, umego, nikadhu kud i bang’ Rwoth mwa Yesu Kristu man nikadhu kud i mer ma tipo ma leng’ miyo, nia wakudwu ceke wakweyu Mungu ma tek pira; 31 kara ebodha kud i cing’ dhanu ma gi juyic ungo ma gin’i Yudea man kara dhanu pa Mungu ma gin’i Yeruzalem giwok gijol ajok* m’abetero igi. 32 E i ng’eye tek Mungu yiyo, abibino liewowu m’apong’ kud anyong’a man wabitielo cwinywa karacelo kudwu. 33 Dong’ Mungu ma miyo kwiyocwiny ubed kudwu ceke. Amen.

16 Abenyutho iwu pi nyamegwa ma Foibe ma timo i cokiri mi Kenkrea, 2 kara wujole i Rwoth i ayi m’ukwayu jujol ko jumaleng’ man wukonye ku piny moko ci m’etie ku yenyne, pilembe ecero bang’ dhanu dupa, uketho i iye an bende.

3 Wumoth Priska gikud Akila ma gi jutic wada i Kristu Yesu, 4 kum giketho kwo migi* i ariti pira, man an ku cokiri ceke mi dhanu mi thek mange wabedwoko igi foyofoc. 5 Wumoth bende cokiri ma n’i ot migi. Man wumoth jamerna ma Epaineto m’utie acel m’i kind dhanu ma kwong’a* m’udoko julub pa Kristu i ng’om mir Azia. 6 Wumoth Maria m’utimo tic ma tek piwu. 7 Wumoth Androniko giku Yunia ma gi wedi para man jukol wada, gin ma jukwenda de ng’eyo pigi cuu man gilar gidoko ira julub pa Kristu.

8 Wumoth Ampliatho ma jamerna i Rwoth. 9 Wumoth Urubano ma jatic wadwa i Kristu man Stakis ma jamerna. 10 Wumoth Apele ma en e ng’atu ma juyiyo i Kristu. Man wumoth bende juruot pa Aristobulo. 11 Wumoth Herodion ma wat para. Wumoth bende juruot pa Narsis ma gin’i Rwoth. 12 Wumoth Trifena giku Trifosa ma gitie nyimego m’ubetimo tic ma tek i Rwoth. Wumoth bende Persis ma jamer, pilembe etimo tic ma tek i Rwoth. 13 Wumoth Rufo ma tie ng’atu ma jung’iyo i Rwoth, man min bende m’adoko calu wode. 14 Wumoth Asunkrito, Filegon, Hermes, Patroba, Herma man umego ma gibedo gikugi. 15 Wumoth Filologo man Yulia; wumoth bende Nereo giku nyamin man Olimpa karacelo ku jumaleng’ ceke ma ni kugi. 16 Wumothuru i kindwu ku cwiyolimb ma leng’. Cokiri ceke pa Kristu umothowu.

17 Kawoni akwayuwu umego, nia wubed ku weng’wu i kum dhanu m’ubenyayu pokiri man m’ubeketho jumange gibekier, pilembe gibetimo tung’ ku gin ma juponjo kowu; dong’ wukoc bor kugi. 18 Kum dhanu maeno gibetimo ngo ni Kristu ma Rwoth mwa, ento gitie ng’eca mir awanya migi gigi,* man gibewondo dhanu m’ukoso ngo ku korolembe ma ku mido doggi man wec mir abidhe. 19 Dhanu ceke ung’eyo pi woro mwu man eno ubenyayu anyong’a lee mandha i iya. Dong’ amito wubed riek pi timo lembe ma ber, ento m’umbe ng’eyong’ec pi lembe ma rac. 20 Kago eni, Mungu ma miyo kwiyocwiny birungo Sitani i the tiendwu. Dong’ bero ma yawe mbe pa Rwoth mwa Yesu ubed kudwu.

21 Timoteo ma jatic wada umothowu, man bende Lukio, Yason man Sosipater ma gitie wedi para.

22 An a Thertio, m’agoro barua maeni de amothowu i Rwoth.

23 Gayo m’abedo yo pare, man m’umego ku nyimego gicokiri i ot pare, umothowu. Erastho ma jagwok sente* mir adhura gikud umin ma Kwarto de gimothowu.24 ——

25 Mungu copo dwokowu tek nikadhu kud i lembanyong’a man rwonglembe m’aberweyo iwi Yesu Kristu, calku lembanyutha mi lembamung’a ma leng’ ma jukanu pi oro ma dupa. 26 Ento kawoni enyuthere iwa man lembila mi Lembagora uketho wang’eye, pilembe Mungu ma bedo rondo ku rondo ung’olo nia thek ceke ung’ey lembamung’ane kara ni kum yiyoyic gibed wor ire. 27 Dong’ Mungu ma en kende re m’e riek unwang’ dwong’ nikadhu kud i bang’ Yesu Kristu rondo ku rondo. Amen.