BARUA MI KWONG’O NI JUKORINTHO

1 Niai kud i bang’ Paulo, ma julwong’o ubed jakwenda pa Kristu Yesu nimakere ku yeny pa Mungu, man Sosthene m’umegwa, 2 ni cokiri pa Mungu ma n’i Korintho, iwu wu ju m’edwokowu leng’ i Kristu Yesu, man m’elwong’owu kara wudok jumaleng’, man ni dhanu ma n’i kakare ceke ma gitie ku yiyoyic i* Rwoth mwa Yesu Kristu ma tie Rwoth migi man mwa bende:

3 Bero ma yawe mbe man kwiyocwiny pa Mungu Wegwa man pa Rwoth Yesu Kristu ubed kudwu.

4 Abefoyo Mungu para thiri thiri piwu pilembe enyutho iwu bero pare ma yawe mbe nikadhu kud i bang’ Kristu Yesu; 5 ni kume Mungu ulonyowu i gin ceke, emiyo iwu copo mi rweyo lembe pare man emedo ng’eyong’ec mwu, 6 tap calu ma wudaru cungo nging’ nging’ i lembatuca ma wuwinjo iwi Kristu, 7 kara kud wukos giramiya moko ki, kinde ma wubekuro kud ava ceng’ ma Rwoth mwa Yesu Kristu binyuthere i iye. 8 Ebiketho wucung bende ma tek nitundo i ajiki kara wubed m’adote mbe i wiwu i ceng’ pa Rwoth mwa Yesu Kristu. 9 Mungu pong’o lembe m’eng’olo, en m’elwong’owu kara wubed i acel* ku Wode ma Yesu Kristu, Rwoth mwa.

10 Umego, abekwayuwu i nying’ Rwoth mwa Yesu Kristu nia wubed ma dhogwu ripo acel man pokiri kud ubed i kindwu, ento wubed i acel ma pidoiwu acel man ku paru de m’urombo. 11 Kum jumoko m’i ot pa Kloe unyutho piwu ira, umego para, nia pokiri unuti i kindwu. 12 Lembe m’abemito yero ni e: Awinjo jumoko uwacu nia, “An a pa Paulo,” jukurucel “An a pa Apolo,” jumucelo “An a pa Kefa,”* man jumange lundo “An a pa Kristu.” 13 Nyo i Kristu pokere? Nyo Paulo re ma juguro iwi yen piwu? Kunoke nyo wulimo batizo i nying’ Paulo? 14 Abefoyo Mungu pilembe amiyo ngo batizo ni ng’atu moko acel de m’i kindwu, m’uweko Krispo giku Gayo. 15 Pieno, ng’atu moko mbe ma romo yero nia wulimo batizo i nyinga. 16 E abepoy, amiyo bende batizo ni Stefano ku juruot pare. Ento pi jumange no, ang’eyo ngo nia amiyo batizo ni ng’atu moko. 17 Kum Kristu uora ngo pi nimiyo batizo, ento eora arwey lembanyong’a m’umbe bodho mi wec* kara yen mi can* pa Kristu kud udok ni gin ma tije mbe.

18 Kum ponji mi yen mi can* en e lembkasegu ni ju ma jubinyotho, ento iwa wan ma wabiboth, en e tego pa Mungu. 19 Kum Lembagora uyero kumae: “Abinyotho rieko mi ju ma riek, man abicoro cen ng’eyong’ec mi ju m’ung’eyo lembe.” 20 Jarieko ni kani? Jagorcik* ni kani? Japiem mi rundi maeni* ni kani? Mungu udwoko rieko mi ng’om udoko ni lembkasegu ngo? 21 Calu ng’om nikadhu kud i rieko pare utuc ungo ning’eyo Mungu, Mungu uneno ber ya ebodh dhanu m’uyiyo nikadhu kud i lembanyong’a ma waberweyo ma jumoko neno nia utie lembkasegu.

22 Kum Juyahudi gibesayu giranyutha, Jugiriki ke gibeyenyo rieko; 23 ento waberweyo pi Kristu ma juguro iwi yen: Ni Juyahudi etie lembkier, ento ni dhanu mi thek mange etie lembkasegu. 24 Re ni ju ma julwong’o, nik’ebed Juyahudi kadi Jugiriki, Kristu en e tego pa Mungu man rieko pa Mungu. 25 Kum lembkasegu m’uai i bang’ Mungu tie riek ma sagu dhanu, man gin ma ng’ic m’uai i bang’ Mungu tie tek ma sagu dhanu.

26 Umego, wuneno cuu nia kinde ma Mungu ulwong’owu, ju ma riek i kum* gitie dupa ngo, man ju ma tek de gi nok, ju ma pigi tek de wendgi nok, 27 ento Mungu ung’iyo ju ma ng’om nenogi ni jukusegu pi ninyayu lewic iwi dhanu ma riek; man eng’iyo ju ma ng’om neno nia gitie ng’ic pi ninyayu lewic iwi ju ma tek. 28 Bende Mungu ung’iyo gin ma kabang’e mbe mi ng’om, man gin ma jucayu, ku gin m’umbe pi niketho gin m’unuti udok ni gin m’umbe, 29 kara ng’atu moko kud uyungere i wang’ Mungu. 30 Ento ni kume re ma wudikuru ku Kristu Yesu m’udoko iwa rieko m’uai i bang’ Mungu, bedopwe, dwokirileng’ man gony nikadhu kud i jamgony; 31 kara ebed tap calu m’egorere kumae: “Ng’atu m’uyungere, wek eyungere pi Yehova.”

2 Pieno umego, kinde m’abino i beng’wu nirweyo lembamung’a ma leng’ pa Mungu, atiyo ngo ku wec mi tego kunoke mi rieko. 2 Kum kud i kindwu, ang’iyo nia abed ve ang’eyo gin moko ngo ndhu Yesu Kristu kende, en ma jugure iwi yen. 3 Man abino i beng’wu m’atie ng’ic, ma lworo benega man ma kuma bemiel lee; 4 man wec para, ku lembe m’arweyo ubino ngo wec mi midodhok mi rieko, ento ebino giranyutha mi tipo man mi tego, 5 kara yiyoyic mwu kud ucung iwi rieko mi dhanu, ento iwi tego pa Mungu.

6 Kawoni wabeweco pi rieko ni dhanu ma giteng’ini, ento ungo iwi rieko mi ng’om maeni* man mi jubim mi ng’om maeni m’ucikere ninyothere cen. 7 Ento wabeweco pi rieko pa Mungu m’unyuthere i lembamung’a ma leng’, rieko m’upondo ma Mungu ular ung’olo pire i wang’ rundi dupa pi dwong’ mwa. 8 Jabim moko acel de mbe mi ng’om maeni* m’utuc ning’eyo rieko maeno, kum ka nwang’u ging’eye, nwang’u ginego ngo* Rwoth mi dwong’. 9 Ento tap calu ma Lembagora yero kumae: “Wang’ uneno ngo man ith de uwinjo ngo, kadok adunde dhanu de ular uparu ngo pi gin ceke ma Mungu yiko pi ju m’umare.” 10 Ento Mungu nyuthogi iwa nikadhu kud i tipo pare, kum tipo ng’iyo i lembe ceke, kadok i lembe ma thuc pa Mungu.

11 Kum ng’atu moko mbe ma romo ng’eyo lembe ma n’i ng’atu mange, ndhu en gire re m’eng’eyo lembe mir adundene. Kumeno bende, ng’atu moko mbe m’ung’eyo lembe pa Mungu, ndhu tipo pa Mungu re. 12 Kum wajolo ngo tipo mi ng’om, ento tipo m’uai i bang’ Mungu, kara wang’ey gin ceke ma Mungu miyo iwa ku bero. 13 Wabeyero ngo lembe ma jurieko uponjo kowa gin, ento wabeyero lembe ma tipo uponjo kowa en, kinde ma wabekoro lembe mi tipo ku wec mi tipo.

14 Ento ng’atu mi kum yiyo ngo* lembe ma tipo pa Mungu unyutho, kum gitie lembkasegu ire; man eromo tuc ungo ning’eyogi kum jung’iyo igi ku tipo. 15 Ento ng’atu mi tipo ng’iyo i lembe ceke, re en lundo ng’atu ma ng’iyo i lembe pare mbe. 16 Kum ng’a m’utuc ning’eyo paru pa Yehova kara ecopo ponje? Ento wan watie ku paru pa Kristu.

3 Pieno umego, ecopere ngo ira niweco i beng’wu calu i bang’ dhanu mi tipo, ento calu i bang’ dhanu mi kum ma gitie awiya i Kristu. 2 Atungowu ku cak, ento ku cam ma nwang’ ungo pilembe nwang’u fodi tego mwu nok. Man kawoni bende fodi asu tego mwu nok. 3 Kum asu wutie dhanu mi kum. Pilembe ka kumira ku dhau n’i kindwu, eno nyutho ngo nia wutie dhanu mi kum man wuwotho calu ma dhanu mange de wotho ko? 4 Kum kinde ma ng’atu acel uwacu nia, “An a pa Paulo,” ma kucelo ke “An a pa Apolo,” eno nwang’u wubetimuru ngo ve dhanu mange?

5 Apolo tie ng’a? Eyo, Paulo tie ng’a? Gitie jutic ma ni kumgi wudoko juyic nimakere ku gin ma Rwoth umiyo ni ng’atuman. 6 Apidho, Apolo ke kwoyo pii, ento Mungu re m’uketho edongo. 7 Pieno ng’atu m’upidho en e gin moko ngo, kadok ng’atu m’ukwoyo pii, ento Mungu m’uketho ebedongo. 8 Ng’atu m’ubepidho ku ng’atu m’ubekwoyo pii gin acel,* ento ng’atuman binwang’u sukulia pare nimakere ku tic pare. 9 Kum watie jutic m’ubetimo karacelo ku Mungu. Wun wu podho pa Mungu, giragoma pa Mungu.

10 Nimakere ku bero ma yawe mbe ma Mungu nyutho ira, acaku kathere calu jagier ot ma jabodho,* ento ng’atu mange re m’ubegiero i wiye. Dong’ ng’atuman unen cuu kite m’ebegiero ko i wiye. 11 Kum ng’atu moko mbe ma copo caku kathere mange m’uweko maeno ma jucaku, ma en e Yesu Kristu. 12 Ento tek ng’atu moko ubegiero iwi kathere maeno ku mola ma kwar, kunoke ku mola ma tar, ku kidi ma pigi tek, ku yen, ku lum kunoke ku soka, 13 tic pa ng’atuman binyuthere kamaleng’, kum nindo re ma binyuthe. Pilembe ebinyuthere nikadhu kud i mac, man mac re ma binyutho nia tic pa ng’atuman ubino kit giedo ma nenedi. 14 Tekene tic pa ng’atu moko m’egiero i wiye udong’ asu, ng’atune binwang’u sukulia, 15 enre tekene tic pa ng’atu moko uwang’ ebinwang’u ngo sukulia; ento en gire ebiboth, re ebibedo calu ve ku kind mac.

16 Wung’eyo ngo nia wun wutie hekalu pa Mungu man nia tipo pa Mungu bedo i iwu? 17 Ka ng’atu moko nyotho hekalu pa Mungu, Mungu binyothe, pilembe hekalu pa Mungu tie leng’ man wun wutie hekalune.

18 Dong’ ng’atu moko kud uwondere gire: Tek ng’atu moko m’i kindwu uparu nia etie riek i ng’om maeni,* wek edok jakasegu kara edok riek. 19 Pilembe rieko mi ng’om maeni en e lembkasegu i wang’ Mungu, kum Lembagora uyero kumae: “Emaku jurieko i awic mi rieko migi.” 20 Bende egorere kumae: “Yehova ung’eyo nia paru mi jurieko utie gin ma tije mbe.” 21 Dong’ ng’atu moko kud uyungere pi dhanu, pilembe piny ceke utie mwu, 22 dok ebed Paulo, kadi Apolo, kadok Kefa, kadi ng’om, kadok kwo, kadi tho, kadok piny ma nuti kawoni, kadok piny ma bibino; piny ceke utie mwu. 23 Wun lundo wutie pa Kristu, Kristu ke utie pa Mungu.

4 Ukwayu ng’atini unenwa ni jutic pa Kristu man jukur piny mi lembamung’a ma leng’ pa Mungu. 2 Ento gin ma juyenyo i bang’ jukur piny utie ya junwang’ gitie jukur piny mandha. 3 Etie ira lembe ma nok nia wung’ii i lembe para kunoke nia dhanu re m’ung’ii i lembe para i wang’ pido. Kum an gira de abeng’iyo ngo i lembe para. 4 Pilembe abenwang’u ngo nia atimo gin moko ma rac. Ento eno nyutho ngo nia a won bedopwe, kum ng’atu m’ung’iyo i lembe para utie Yehova. 5 Ka kumeno, kud wupok lembe i wang’ saane nitundo ma Rwoth bibino. Kum ebiketho lembe ma dhanu ubetimo i mudho uwok i der man ebiketho paru mir adunde ung’eyere, e ng’atuman binwang’u yung pare i bang’ Mungu.

6 Umego, atiyo ku lembe maeni i wiya man iwi Apolo pi bero mwu, kara nikadhu kud i bang’wa wung’ey telowic ma e: “Kud wukadh mupaka mi gin m’ugorere,” kara kuhaya kud umond i iwu man eketh wudod ng’atu moko ma sagu wadi. 7 Ng’a m’uketho ikoc ku jumange? I andha, ang’o m’itie ko ma jumiyo ngo iri amiya? Ka jumiyogi iri amiya, dong’ ke pirang’o iheyiri ve jumiyogi ngo iri amiya?

8 Nyo wudaru yeng’? Nyo wudaru doko julonyo? Nyo wucaku bimo ma fodi wan wambe? Ayenyo andhandha nia wucak bimo kara wan bende wabim wakudwu. 9 Kum i wang’a edok ebedo ve wa jukwenda, Mungu ukethowa i kind piro ma tokcen, calu dhanu ma jung’olo tho i wigi, kum wadoko ni giranena ni ng’om, ni jumalaika man ni dhanu. 10 Wa jukusegu ni kum Kristu, ento wun wuriek i Kristu; wa ng’ic, ento wun wu tek; juyungowu, ento wan jucayuwa. 11 Nitundo kawoni eni kec ubenegowa, rieu ubenegowa, wan’i can kendi,* jubefwodowa,* wakoso udi, 12 man wabeol ku tic ma wabetimo ku cingwa giwa. Kinde ma jubeyanyuwa, wamiyo mugisa; kinde ma jubenyayu ragedo i kumwa, waciro ku twiyocwiny; 13 kinde ma jubecido nyingwa, wapaku dhogwa; wadoko ni susu mi ng’om man cilo mi gin ceke nitundo kawoni.

14 Abekiewo ngo lembe maeni pi ninyayu lewic i wiwu, ento pi niponjowu calu nyithindho para ma jumer. 15 Kum kadok wutie ku juponji elufu apar (10 000) i Kristu, enre i andha wutie ku wego dupa ngo; kum adoko wegwu i Kristu Yesu ni kum lembanyong’a. 16 Pieno abekwayuwu ma tek nia wulub lapor para. 17 Pi thelembe maeno, abeoro Timoteo i beng’wu, pilembe etie nyathin para ma kacwinya man m’ubetimo ni Rwoth ku cwinye ceke. Ebipoyo wiwu i kum bodho para i Kristu Yesu, tap calu m’abeponjo kakare ceke i cokiri ceke.

18 Jumoko kuhaya umondo i igi pilembe giparu ya abibino ngo i beng’wu. 19 Ento abibino i beng’wu ceng’ini eni tek etie yeny pa Yehova, man abiwok ng’eyo tego mi dhanu maeno ma giting’iri ku kuhaya, ento ungo wec migi. 20 Kum Ker pa Mungu en e lembe mi wec ungo, ento mi tego. 21 Wuyenyo ang’o? Nia abin i beng’wu ku del kunoke ku mer man molcwiny?

5 Pi lembsasa mi tarwang’* ubeyik i kindwu, lembsasa mi tarwang’* m’umbe kadok i kind dhanu mi thek mange de: Ng’atu acel m’i kindwu ubekwo ku* ci won. 2 Anyong’a re m’ulund unegowu? Nwang’u ukwayu ngo can re m’umakwu man wucikuru nikabu ng’atu m’utimo lembe maeno cen kud i kindwu? 3 Kadok nwang’u an ku kuma ambe i kindwu, ento an’i kindwu i tipo man adaru poko lembe pa ng’atu m’utimo gin maeno calu ve atie karacelo kudwu. 4 Kinde ma wubicokuru karacelo i nying’ Rwoth mwa Yesu, man wung’eyo nia an’i karacelo kudwu i tipo ku tego pa Rwoth mwa Yesu, 5 wucikuru nimiyo ng’atu maeno ni Sitani pi nyoth mi kum, kara cokiri ubed ku nen ma ber iwi dubo i ceng’ pa Rwoth.

6 Luliri mwu tie cuu ngo. Wung’eyo ngo nia thobi ma nyanok thumo i kwen ceke? 7 Wukab thobi ma con cen kara wubed kwen ma nyen, ma thobi mbe i iye. Kum judaru thiero Kristu ma tie nyathi rombo mi lam mwa mi Kadhukuwijo. 8 Ka kumeno, dong’ watimu foc, ungo ku thobi ma con kadi ku thobi mi tarwang’ man mi dubo, ento ku kwen ma thobi mbe i iye, m’abombi de mbe i iye man mi lemandha.

9 I barua para, akiewo iwu nia wuwek nidikuru ku dhanu ma gitimo lembsasa mi tarwang’;* 10 amito yero ngo nia kud wudikuru magwei ku dhanu mi ng’om maeni ma gitimo lembsasa mi tarwang’, ma giketho cwinygi hai kum piny, ma giweg ayeki kunoke ma girwo ni ayi gin m’acwiya. Kum kan etie kumeno, ukwayu nia wuai aaia zoo kud i ng’om. 11 Ento abekiewo iwu nia wuwek nidikuru ku ng’atu moko ci ma julwong’o umego, ma timo lembsasa mi tarwang’,* kunoke ma ketho cwinye hai i kum piny, kunoke ma rwo ni ayi gin m’acwiya, kunoke ma yanyu ayany,* kadi ma mer ku kong’o, kadi ma won ayeki, man kadok acama de kud wucam ku ng’atu ma kumeno. 12 Kum en e lembe para awene nia apok lembe mi ju ma gin’i woko? Ento ukwayu wupok lembe mi ju ma gin’i iye, 13 ju ma gin’i woko Mungu bipoko lembe migi en. Pieno, “wukab jadubo cen kud i kindwu.”

6 Ka ng’atu moko m’i kindwu lembe n’i kindgi ku ng’atu mange, nenedi lworo copo nege ngo nitere i pido i wang’ judubo, kakare nitere i wang’ jumaleng’i? 2 Kunoke nyo wung’eyo ngo nia jumaleng’ gibipoko lembe m’i ng’omi? Dong’ tek wun re ma wubipoko cil lembe m’i ng’om, pirang’o ke lembe ma kabang’e mbe e poko ubevoyowu? 3 Nyo wung’eyo ngo nia wabipoko lembe mi jumalaika? Ka dong’ pirang’o ke lembe mi kwo maeni poko ubevoyowu? 4 Ka wutie ku lembe moko mi kwo maeni m’ukwayu jupoki, wulund wung’iyo dhanu ma giromo ngo i wang’ cokiri re ma gipok lembene? 5 Abeyero lembuni pi ninyayu lewic i wiwu. Nyo ng’atu moko ma riek acel de mbe i kindwu ma romo poko lembe mir umego? 6 Ento umego ubetero umego i wang’ pido, ke lundo i wang’ ju ma gi juyic de ngo!

7 Andha, tekene wubedoturu i kindwu, nwang’u lembe daru loyowu. Dong’ pirang’o ke wubeweko ngo nia jutimwu raci? Man pirang’o wubeweko ngo nia juvurwu? 8 Ento lembe ma rac, wun re ma wulund wubetimo umego rac man wubevurogi!

9 Nyo wung’eyo ngo nia jutimrac gibimondo ngo* i Ker pa Mungu? Kud wuwonduru: Kadok ju ma gitimo lembsasa mi tarwang’,* kadi ju ma rwo ni ayi gin m’acwiya, kadok weg asara, kadok co ma yiyo co wagi utim kugi ribiri, kadi co ma vuto ku co wagi, 10 kadi jukwo, kadi ju ma ketho cwinygi hai i kum piny, kadi ju ma mer ku kong’o, kadi ju ma yanyu ayany,* kadi weg ayeki, gibimondo* ki ngo i Ker pa Mungu. 11 Yang’ jumoko m’i kindwu gibino kumeno. Ento julwokowu, judwokowu leng’; jukwanuwu ni weg bedopwe i nying’ Rwoth Yesu Kristu man ku tipo pa Mungu mwa.

12 Cik uyiyo ira gin ceke, ento gin ceke ngo ma gi beco. Cik uyiyo ira gin ceke, ento abiweko ngo gin moko ci ubim wiya.* 13 Cam utie pi ic, ic ke utie pi cam, ento Mungu binyothogi ceke. Kumjo utie ngo pi lembsasa mi tarwang’,* ento pi Rwoth, man Rwoth ke utie pi kum. 14 Ento Mungu ucero Rwoth, man ni kum tego pare ebicero wan bende ku kind ju m’utho.

15 Nyo wung’eyo ngo nia kumwu utie watkum Kristu? Dong’ abiting’o watkum Kristu man abiribe ku dhaku ma won asara? Tak de ngo! 16 Wung’eyo ngo nia ng’atu m’uberibere ku dhaku ma won asara udoko kum acel kude? Pilembe Mungu yero kumae: “Gin ario gibidoko ni kum acel.” 17 Ento ng’atu m’uberibere ku Rwoth, nwang’u en e acel kude i tipo. 18 Wuring lembsasa mi tarwang’! Dubo mange ceke ma ng’atu moko ubetimo ubedo woko ku kume, ento ng’atu m’ubetimo lembsasa mi tarwang’* ubedubo i kum kume gire. 19 Wung’eyo ngo nia kumwu en e hekalu mi tipo ma leng’ ma n’i iwu m’uai i bang’ Mungu? Bende, wutie mwu giwu ngo, 20 kum jung’iewowu ku welpiny. Ka kumeno, dong’ wuyung Mungu i kumwu.

7 Iwi lembe ma wukiewo, adwoko iwu kumae: Etie ber ni ng’atu ma nico nia kud emul kum dhaku; 2 ento pi lembsasa mi tarwang’* m’unyay akeca, wek nicoman ubed ku dhaku pare man dhakuman ubed ku cware. 3 Kwayu nico umii ni dhaku pare twero* pare, man dhaku bende umii ni cware twero pare. 4 Dhaku mbe ku ng’ol iwi kume gire, ento cware re; nico bende mbe ku ng’ol iwi kume gire, ento dhaku pare re. 5 Kud wutwonuru i kindwu, ndhu tekene wuwinjuru pi nindo moko kara wutuc nikoyo saa pi rwo man wucopo dok rombo kendo; i ayi maeni wubiweko ngo kaka ni Sitani ma nia ebidh kowu pilembe wukoso bimo wi kumwu. 6 Ayiyo iwu nia wutim kumeno, ento etie cik re ngo. 7 Ayenyo nia dhanu ceke gibed ve an. Ento ng’atuman utie ku giramiya pare m’uai i bang’ Mungu, ng’atuman ku pare man ku pare.

8 Abeyero ni ju ma gigamiri ngo man ni montho nia etie igi ber ma sagu ka gibedo calu an. 9 Ento tek gicopo bimo ngo wi ava kumgi, wek gigamiri; pilembe nigamiri utie ber nisagu kum ma rewini.

10 Ni ju m’ugamiri abemiyo telowic ma e, an ungo ento Rwoth: Nia dhaku ucikere ngo nipokere ku cware. 11 Ento tek epokere kude, dong’ kud egier ng’atu mange kunoke giyik kindgi ku cware; man nico bende ucikere ngo niweko dhaku pare.

12 Ni jumange ke abeyero an kumae, ento Rwoth re ungo: Nia tek umego moko utie ku dhaku ma jayic ungo man ka dhakune uyiyo nia gibed kude, dong’ kud eweke; 13 bende tek dhaku moko cware tie jayic ungo man cwarene yiyo nia gibed kude, dong’ kud eweke. 14 Kum nico ma jayic ungo judwoke leng’ ni kum dhaku pare man dhaku ma jayic ungo bende judwoke leng’ ni kum umego; kum kan ungo nwang’u awiya mwu gitie leng’ ungo, ento kawoni gi leng’. 15 Re tek ng’atu ma jayic ungo ung’iyo nia gipokiri, wek gipokiri; i saa maeno, umego kunoke nyamego utie ngo atwiya, ento Mungu ulwong’owu i kwiyocwiny. 16 Kum in i dhaku, ing’eyo nenedi ka nyo ibibodho cweri kunoke ngo? Man in i nico, ing’eyo nenedi ka nyo ibibodho dhaku peri kunoke ngo?

17 Ng’atuman ukwo nimakere ku kit kwo ma Yehova umiyo ire tap calu m’ebino kwo ko kinde ma Mungu ulwong’e. Eno re ma tie telowic m’abemiyo i cokiri ceke. 18 Nyo julwong’o ng’atu moko nwang’u dong’ judaru timo yaa i kume? Kud eketh jukab yaa pare. Nyo julwong’o ng’atu moko nwang’u fodi jutimo ngo yaa i kume? Kud eketh jutim yaa i kume. 19 Timo yaa en e gin moko ngo, man timo yaa ngo de en e gin moko ngo; gin ma pire tek utie niworo cik pa Mungu. 20 Ng’atuman ubed i kite m’ebedo ko i saa ma julwong’e. 21 Nyo julwong’i ma nwang’u itie ng’eca? Dong’ kud iwek lembuno upid cwinyi; ento tek icopo nwang’u bedagonya, kud iwek kaka maeno ukadhi. 22 Kum ng’atu ma julwong’o i Rwoth ma nwang’u etie ng’eca, dong’ etie ng’atu m’agonya pa Rwoth; rom rom kumeno bende ng’atu ma julwong’o ma nwang’u etie agonya, etie ng’eca pa Kristu. 23 Jung’iewowu ku welpiny; ka kumeno kud wudok kendo ng’eca mi dhanu. 24 Umego, ng’atuman ubed i wang’ Mungu i kite m’ebino ko i saa ma julwong’e.

25 Pi dhanu ma sumba,* ambe ku lembang’ola m’uai i bang’ Rwoth, ento abemiyo paru para calku kisa ma Rwoth unyutho ira, kum atie ng’atu m’uromo jugen lembe pare. 26 Ni kum peko ma kawoni, aparu nia etie ber ni ng’atu ma nico nia emedere nibedo kite m’ebedo ko. 27 Nyo igamu dhaku? Dong’ kud isai nigonyiri kud i kume. Ento tek igamu ngo dhaku, dong’ kud isai nigamu dhaku. 28 Ento tek igemiri, nwang’u idubo ngo. Man tek ng’atu ma sumba ugamere, nwang’u edubo ngo. Ento ju ma gigamiri gibinwang’iri ku peko. Re nwang’u abemito aurwu kud i kum pekone.

29 M’usagu zoo, ayero kumae umego: Saa udong’ nyanok. Niai kawoni, ju ma gigamu mon gibed ve gigamu ngo, 30 ju m’ubewak gibed ve ju m’ubewak ungo, ju m’anyong’a benego gibed ve ju m’anyong’a nego ngo, ju m’ubeng’iewo piny gibed ve ju m’umbe ku piny, 31 man ju m’ubetiyo ku piny mi ng’om maeni gibed ve gibetiyo ngo kude nisagu; kum ayi ng’om maeni ubekadhu akadha. 32 Eyo, abemito cwinywu kud udieng’. Nico m’ugamu ngo dhaku cwinye dieng’ i kum lembe pa Rwoth, i kum kite m’eromo nyayu ko anyong’a i Rwoth. 33 Ento nico m’ugamu dhaku cwinye dieng’ pi piny mi ng’om, i kum kite m’ecopo nyayu ko anyong’a i dhaku pare, 34 man paru pare pokere. Bende nyaku m’ugiero ngo man ma sumba, cwinye dieng’ i kum lembe pa Rwoth iwi kite m’eromo bedo ko leng’ i kume man i paru pare. Ento dhaku m’ugiero cwinye dieng’ i kum piny m’i ng’om, i kum kite m’eromo nyayu ko anyong’a i cware. 35 Abeyero lembe maeni pi bero mwu giwu pi nidiyowu adiya re ngo,* ento pi nimiyo amora i kumwu kara wutim lembe m’atira man kara wumeduru nitimo ni Rwoth ma lembe moko mbe m’uwingo wiwu.

36 Ento tek ng’atu moko ubenwang’u nia ebetimere rac pilembe ebemedere nibedo jamusuma,* man tek edaru kadhu nindo mir ayada,* dong’ etim lembe ma e: Wek etim lembe m’ebeyenyo; edubo ngo. Wek gigamiri. 37 Re tek ng’atu moko ukeco i adundene man embe ku yeny maeno, ento etie ku copo mi bimo wi ava kume man eng’iyo niai kud i adundene nia ebed jamusuma,* nwang’u etimo ber. 38 Pieno, ng’atu m’ugamu kunoke m’ugiero utimo ber, ento ng’atu m’ugamu ngo kunoke m’ugiero ngo utimo ber ma sagu.

39 Dhaku bedo atwiya i kum cware tek fodi e kwo. Ento ka cwarene tho, etie agonya nigiero ng’atu moko ci ma iye maru, re kende kende i Rwoth. 40 Ento aparu nia eromo bedo kud anyong’a lee tekene egiero ngo; man ayiyo andhandha nia an bende atie ku tipo pa Mungu.

8 Ento pi cam ma juthiero ni ayi gin m’acwiya, wang’eyo nia wan ceke watie ku ng’eyong’ec. Ng’eyong’ec ting’ere, ento mer gierojo. 2 Ka ng’atu moko ubeparu nia eng’eyo lembe moko, i andha nwang’u fodi eng’eye ngo cuu i ayi m’ukwayu eng’eye ko. 3 Ento tek ng’atu moko umaru Mungu, ng’atuno Mungu ung’eye.

4 Pi lembe m’uneno cam ma juthiero ni ayi gin m’acwiya, wang’eyo nia ayi gin m’acwiya utie gin moko ngo man nia Mungu tie acel kende. 5 Kum kadok moko nuti ma julwong’ogi mungu, dok ebed i polo kunoke iwi ng’om, tap calu ma “mungu m’araga” gi dupa man “rwodhi” bende gi dupa, 6 ento iwa re andha Mungu tie acel ma Wego, m’ucwiyo piny ceke man wan de wa pare; man Rwoth de utie acel, niwacu Yesu Kristu, ma piny ceke ucwiyere ni kume man wan de ni kume.

7 Re dhanu ceke ngo ma gitie ku ng’eyong’ec maeni. Ento jumoko, calu con gibed giworo ayi gin m’acwiya, ka gibecamu cam ma juthiero ni ayi gin m’acwiya, ginwang’u nia gibewore; e pidocwiny migi ma ng’ic gam nyothere. 8 Enre cam coro ngo kindwa ceng’ini ku Mungu; tek wabecamu ngo, nwang’u gin moko mbe m’urem iwa, man tek wabecamu de, gin moko mbe ma wabinwang’u. 9 Ento wubed ku weng’wu saa ceke kara twero mwu mi timo ng’iyong’ic kud uketh ju ma ng’ic ukier. 10 Kum ka ng’atu moko ma pidocwiny pare ng’ic uneni in m’itie ku ng’eyong’ec ibecamu i hekalu mir ayi gin m’acwiya, nyo pidocwiny pa ng’atu maeno bicwale ngo nicamu bende cam ma juthiero ni ayi gin m’acwiya? 11 Pieno ni kum ng’eyong’ec peri, ng’atu ma ng’ic ubecinyothere, en m’etie umeru ma Kristu utho pire. 12 Ka wubedubo i kum umego mwu i ayi maeno man wucobo pidocwiny migi ma ng’ic, nwang’u wubedubo ni Kristu. 13 Pi thelembe maeno, ka cam moko copo ketho umira kier, abicamu ring’o ki ngo kara kud aketh umira kier.

9 Nyo atie agonya ngo? Nyo atie ngo jakwenda? Nyo aneno ngo Yesu ma Rwoth mwa? Nyo wutie ngo tic para i Rwoth? 2 Kadok nwang’u ni jumange atie ngo jakwenda, ento iwu re atie andha jakwenda! Kum wutie gin m’unyutho nia atie jakwenda i tic pa Rwoth.

3 Ni ju m’ubeng’iyo i lembe para abeyero kumae: 4 Nyo wambe ku twero* mi camu man mi madhu? 5 Nyo wambe ku twero mi gamu dhaku ma jayic man mi wotho kude calu ma jukwenda mange, umego pa Rwoth man Kefa* gibetimo? 6 Kunoke nyo waku Barnaba kendwa re m’ukwayu wamedara asu nitimo tic mi kum pi nikwo? 7 Jaaskari ma kani ma timo tic re lundo camu jeba pare? Ng’a ma pidho ulok re elund ecamu nyinge ngo? Kadi ng’a ma tungo udul lim man elund emadhu cage ngo?

8 Nyo lembe m’abeyero eni tie kende kende paru mi dhanu? Cik bende uyero ngo lembe maeni? 9 Kum egorere i Cik pa Musa kumae: “Kud itwii dhu thwon dhiang’ kinde m’ebeyoko cam.”* Nyo utie pi thwon dhiang’ re ma Mungu ubedieng’i? 10 Kunoke nyo etie ngo piwa re m’eyero lembe maeno? I andha lembe maeno ugorere piwa, kum ng’atu m’ubepidho man ng’atu m’ubefwodo cam gitimo tije ma ging’eyo nia gibicamu kume.

11 Ka wan wacoyo piny mi tipo i beng’wu, dong’ nyo wabekadhu mukero ka wakwayu wukonywa ku piny mi kumi? 12 Tek jumange gitie ku twero mi banju piny i beng’wu, nyo watie ku twerone nisagu ngo? Re kadok kumeno de, watiyo ngo ku twerone; ento wabeciro lembe ceke kara kud waketh macero i wang’ lembanyong’a pa Kristu. 13 Wung’eyo ngo nia ju ma gibetimo tic ma leng’ i hekalu gicamu piny mir hekalu, man ju ma gibetimo iwi pemblam gicamu kum piny ma juthiero iwi pemblami? 14 Kumeno bende, Rwoth ung’olo pi ju ma giberweyo lembanyong’a nia gikwo ni kum lembanyong’a.

15 Ento kadok atie ku twero maeno zoo de, re atiyo ngo kud acel de. Bende, akiewo ngo lembe maeni kara ya wukonya, kum etie ber ma sagu kan atho kakare ni... ng’atu moko mbe ma bikabu thelembe mi luliri para! 16 Tek aberweyo lembanyong’a, etie ngo ira thelembe mi lulara, pilembe etie tic ma juketho i kora nia atim. I andha, can i wiya tek aberweyo ngo lembanyong’a. 17 Kan abetimo tije pilembe amare, abinwang’u sukulia; ento tek abetime ma ke amare ngo, re asu juketho tic i kora. 18 Dong’ sukulia para tie ang’o? Sukulia para tie nia arwey lembanyong’a ni dhanu mi mananu, m’umbe nikwayu piny moko i bang’gi kara kud atii rac ku twero* para i tic mi rweyo lembanyong’a.

19 Kum kadok abedo agonya ni dhanu ceke, adwokara gira ni ng’eca ni dhanu ceke kara abodh dhanu dupa. 20 Ni Juyahudi, adoko calu Jayahudi kara abodh Juyahudi; ni dhanu ma gin’i the cik, adoko calu an de an’i the cik ma ke an’i the cik ungo, kara abodh ju ma gin’i the cik. 21 Ni ju m’umbe ku cik adoko ve ambe ku cik, ma ke i wang’ Mungu ambe ku cik ungo ento an’i the cik pa Kristu, kara abodh ju m’umbe ku cik. 22 Ni ju ma ng’ic, adoko ng’ic kara abodh ju ma ng’ic. Adoko gin ceke ni kwond dhanu ceke, kara ku yo moko ci abodh jumoko. 23 Abetimo gin ceke pi lembanyong’a kara atuc nitwong’e ni jumange.

24 Nyo wung’eyo ngo nia ju m’uberingo kwaya gin ceke giringo, ento ng’atu acel kende re ma nwang’u sukulia? Dong’ wuring i ayi ma wucopo nwang’e ko. 25 Ju ma giringo kwaya gikweriri gigi i lembe ceke. Gitimo kumeno pi ninwang’u jamkermiwic ma nyothere, ento wan wabinwang’u jamkermiwic ma nyothere ngo. 26 Pieno, aberingo swa ngo, man ngumi m’abegoyo de abegoyo ngo i yamu; 27 ento abefwodo* kuma man abetelo wiye calu ng’eca, kara i ng’ei rweyo ni jumange kud jubin jukwera ku yo moko.

10 Umego, amito wung’ey nia yang’ con kwaruwa ceke gibino i ther afuru man gin ceke gikadhu kud i nam; 2 gin ceke gilimo batizo i Musa nikadhu kud i afuru man nam; 3 gin ceke gicamu cam ma rom mi tipo, 4 man gin ceke gimadhu giramadha ma rom mi tipo. Kum gibed gimadhu kud i cana mi tipo m’ulubo ng’eigi, man canane ubino nyutho Kristu. 5 Re kadok kumeno de, ju ma pol m’i kindgi giwok githo i langa pilembe ginyayu ngo anyong’a i Mungu.

6 Lembe maeno ubemiyo iwa ponji,* kara kud wayeny nitimo lembe ma rac calu ma gigam giyenyo. 7 Kud wurwo ki ni ayi gin m’acwiya calu jumoko m’i kindgi gigam gitimo, tap calu ma Lembagora yero kumae: “Dhanu bedo piny pi nicamu man nimadhu. I ng’eye giai malu pi nimiel.” 8 Kud watimu lembsasa mi tarwang’* calu jumoko m’i kindgi gigam gitimo, uketho i nindo acel kende ci dhanu elufu pier ario wi adek (23 000) m’i kindgi utho. 9 Kud wamul i Yehova calu jumoko m’i kindgi gigam gimulo iye, e thwol utong’ogi githo. 10 Kadi kud wang’ur calu jumoko m’i kindgi gigam ging’ur, uketho malaika pa Mungu unyothogi. 11 Lembe maeno m’utimere igi ubemiyo iwa ponji, man jukiewogi kara ubed ni cimowang’ iwa, wan m’ajiki mi ng’om maeni utundo i wiwa.

12 Pieno ng’atu m’ubeparu nia ecungo, dong’ ebed ku wang’e kara kud epodhi. 13 Abidhe moko mbe ma wunweng’uru ko ma jumange ginwang’iri ko ngo. Ento Mungu pong’o lembe m’eng’olo man ebiweko ngo nia jubidhwu nisagu ma wucopo ciro, man kud i kind abidhene ebiyiko bende yojboth kara wutuc nicire.

14 Pieno jumerna, kud wurwo ni* ayi gin m’acwiya. 15 Abeweco i bang’ dhanu m’ung’eyo ng’iyo i lembe; dong’ wung’ii wun i lembe m’abeyero. 16 Nyo kikombe* mi mugisa ma wabepoko mugisa i wiye, uberibowa ngo karacelo ku rimb Kristu? Man nyo mukathi ma wang’weko iye, uberibowa ngo karacelo ku kum Kristu? 17 Calu mukathi tie acel, wan de kadok wa dupa, watie kum acel, pilembe wan ceke wabecamu kum mukathi acel maeno.

18 Wukepar cuu pi Juisrael mi kum: Nyo ju ma gicamu kum piny ma juthiero giribiri ngo ku pemblami? 19 Dong’ amito yero ang’o? Nyo abemito yero nia piny ceke ma juthiero ni ayi gin m’acwiya utie gin moko? Kunoke nyo ayi gin m’acwiya utie gin moko? 20 Ungo, amito yero nia piny ma dhanu mi thek mange githiero, gibethiere ni pajogi ento ni Mungu ngo, man abemito ngo wuriburu ku pajogi. 21 Wucopo madhu kikombe* pa Yehova ku kikombe mi pajogi de ngo; man wucopo camu i dhu meza pa Yehova kud i dhu meza mi pajogi de ngo. 22 Kunoke ‘nyo wamito wanyay nyeko i Yehova’? Wa tek ungo ma sage, kumeno ngo?

23 Cik uyiyo gin ceke, ento gin ceke ngo ma tie ber. Cik uyiyo gin ceke, ento gin ceke ngo ma gierojo. 24 Dong’ ng’atuman kud uyeny bero pare gire, ento emedere niyenyo bero pa ng’atu mange.

25 Wucam ring’o moko ci ma julworo i soko m’umbe nipenjo penji pi pidocwiny mwu, 26 pilembe “ng’om ku piny ceke ma n’i iye gi pa Yehova.” 27 Ka ng’atu moko ma jayic ungo ulwong’i man iyiyo nicidho, cam piny moko ci m’ebiketho i weng’i m’umbe nipenjo penji moko pi pidocwinyi. 28 Ento ka ng’atu moko uyero iri nia, “Eni tie gin ma juthiero ni lam,” kud icame pi ng’atu m’uyero iri lembene man pi pidocwiny. 29 Abeweco ngo pi pidocwinyi in, ento pi pidocwiny pa ng’atuca. Kum pirang’o pidocwiny pa ng’atu mange re m’upok lembe iwi bedagonya para? 30 Tek afoyo Mungu pi cam m’abecamu, pirang’o ke dong’ jubeyero pira rac pi cam maeno m’afoyo Mungu pire?

31 Pieno, kadok wubecamu kadi wumadhu kunoke wutimo lembe moko ci, wutim lembe ceke pi dwong’ pa Mungu. 32 Kud wutim lembe moko ma copo ketho Juyahudi kunoke Jugiriki kadi cokiri pa Mungu gikier, 33 tap calu ma an de abeii ninyayu anyong’a i dhanu ceke i lembe ceke, m’abesayu ko ngo bero para gira, ento bero mi dhanu dupa kara gibothi.

11 Wukwany kotha, tap calu ma an de akwanyu koth Kristu.

2 Abefoyowu kum i lembe ceke wubepoy pira man wubeworo lembe ceke tap calu m’aponjogi iwu. 3 Ento amito wung’ey nia wi ng’atu ma co utie Kristu; wi ng’atu ma dhaku utie ng’atu ma co, man wi Kristu ke utie Mungu. 4 Kubang’ co m’uberwo kunoke m’ubeewo m’eumo wiye ku piny moko ubenyayu lewic iwi ng’atu m’utelo wiye; 5 ento kubang’ dhaku m’uberwo kunoke m’ubeewo ma wiye tie thwolo ubenyayu lewic iwi ng’atu m’utelo wiye, kum edok ebedo tap calu dhaku ma jugobo wiye. 6 Kum tekene ng’atu ma dhaku uboyo ngo wiye, dong’ eketh junyar wiye cen; ento tekene etie lembe mi lewic ni ng’atu ma dhaku ya eketh junyar wiye kunoke jugob wiye, dong’ ecikere niboyo wiye.

7 Ng’atu ma co ucikere ngo niboyo wiye, kum etie ayi Mungu man dwong’ pare, ento ng’atu ma dhaku utie dwong’ pa ng’atu ma co. 8 Kum ng’atu ma co uai ungo i bang’ dhaku, ento dhaku re m’uai i bang’ ng’atu ma co. 9 M’umedo maeno, jucwiyo ngo ng’atu ma co pi dhaku, ento dhaku re ma jucwiyo pi ng’atu ma co. 10 Pi thelembe maeno man pi jumalaika, ng’atu ma dhaku ucikere nikendo piny moko i wiye pi ninyutho nia eworo dito.

11 Ento i kind julub pa Rwoth, co gitie ku yeny pa mon, mon bende gitie ku yeny pa co. 12 Tap calu ma jucwiyo dhaku niai kud i bang’ co, kumeno bende ng’atu ma co unyolere ni kum dhaku; ento piny ceke Mungu re m’ucwiyo. 13 Dong’ wukewung’ol wun giwu: Nyo etie lembe m’umaku piny andha nia ng’atu ma dhaku urwo ni Mungu m’eboyo ngo wiye? 14 Kadok kurajo en gire de ubeponjowu ngo nia tek yukwi ng’atu ma co uwobo en e lewic ire, 15 ento tek yukwi ng’atu ma dhaku uwobo en e dwong’ ire? Kum jumiyo ire yukwic pi niumo wiye. 16 Tek ng’atu moko ubemito nyayu piem pi niroyo kura mange, wan wambe ku kura mange m’uweko maeno, kadi cokiri pa Mungu de.

17 Ento i telowic m’abemiyo eni, abefoyowu ngo; pilembe kakare ma coko mwu umii bero iwu, elund ebenyayu peko anyaya i kumwu. 18 Kum mi kwong’o, abewinjo nia kinde ma wucokuru karacelo i cokiri, pokiri ucukubewok i kindwu; man i kadhiri moko ayiyo nia etie lemandha. 19 Kum yic ma tung’ tung’* bibedo andha i kindwu kara jung’ey kamaleng’ ju m’i kindwu ma Mungu yiyo.

20 Kinde ma wubecokuru karacelo kaka moko, etie ngo pi nicamu Cemo mir uthieno pa Rwoth. 21 Pilembe saa ma wubecame, ng’atuman lar camu cam ma pare gire, uketho inwang’u ng’atu acel kec ubenego, ma kucelo ke nwang’u dong’ udaru mer. 22 Wumbe ku udi ma wucopo camu i igi man ma wucopo madhu i igi? Nyo wubecayu cokiri pa Mungu man wubenyayu lewic iwi ju ma piny migi mbe? Ukwayu dong’ ayer iwu ang’o pi lembuni? Maku afoywu? Acopo foyowu tak de ngo.

23 Kum lembe maeni m’anwang’u i bang’ Rwoth, anyuthe bende iwu: Nia uthieno ma tokcen ma jubecicibo iye Rwoth Yesu, eting’o mukathi 24 man i ng’ei m’edwoko foyofoc, eng’weko iye ewacu kumae: “Maeni ubenyutho kuma ma bicibere piwu. Wumeduru nitimo kumeni wupoy ko pira.” 25 Etimo bende kumeno ku kikombe,* i ng’ei ma gicamu cemo mir uthieno, ewacu kumae: “Kikombe maeni ubenyutho lembariba ma nyen m’ucungo iwi rimba. Wumeduru nitimo kumeno saa ceke ma tek wumadhe, wupoy ko pira.” 26 Kum saa ceke ma tek wucamu mukathi maeni man wumadhu kikombe* maeni, wubemeduru nitwong’o pi tho pa Rwoth nitundo m’ebibino ko.

27 Pieno, ng’atu m’ucamu mukathi man m’umadhu kikombe* pa Rwoth swa, nwang’u edubo i kum kum Rwoth man i kum rimbe bende. 28 Dong’ ng’atuman ular ung’iyere cuu pi ning’eyo ka nyo eromo andha, kan i ng’eye ecam mukathi man emadh kikombe. 29 Kum ng’atu m’ubecamu man m’ubemadhu m’umbe ning’eyo nia ebenyutho kum Rwoth, ubecamu man umadhu pokolembe i wiye gire. 30 Pi thelembe maeno re ma ju ma dupa m’i kindwu gi ng’ic man gibetwoyo, man dupa gidaru tho.* 31 Enre ka nwang’u walar wang’iyara giwa cuu, nwang’u pokolembe ubecibedo mbe i wiwa. 32 Ento kinde ma pokolembe n’i wiwa, nwang’u Yehova re m’ubetwinyowa kara kud jubin jupok lembe rac i wiwa karacelo ku ng’om. 33 Pieno umego para, kinde ma wubecokuru karacelo pi nicamu cemo maeno, wukururu i kindwu. 34 Tek ng’atu moko kec ubenege, elar ecam i bang’e i pacu kara kinde ma wucokuru karacelo kud ebed pi pokolembe. Pi dong lembe mange m’udong’, abiwok yikogi saa m’abitundo kuno.

12 Umego, pi lembe m’uneno giramiya mi tipo, abemito ngo nia wubed m’umbe ng’eyong’ec. 2 Wung’eyo nia kinde ma wubino dhanu mi thek,* jubed juthokowu niworo ayi gin m’acwiya ma weco ngo man wubed wulubo tokgi kaka moko ci ma jubeterowu i iye. 3 Kawoni amito wung’ey nia ng’atu ma tipo pa Mungu ubetelo wiye copo yero ngo nia, “Kwong’ ubed iwi Yesu!” Man ng’atu moko mbe ma copo yero nia, “Yesu en e Rwoth!” ka ku tipo ma leng’ ungo.

4 Giramiya utie tung’ tung’, ento tipo en acel; 5 man tic utie tung’ tung’, ento Rwoth utie acel. 6 Tipo ma leng’ ubekonyo dhanu nitimo tic ma tung’ tung’, ento Mungu ma rom re m’uketho dhanu maeno zoo gibetimo tije. 7 Lembe ma tipo ma leng’ ubekonyogi nitimo ubenen kamaleng’ man Mungu umiye igi pi bero mi dhanu zoo. 8 Pieno ni kum tipo, ng’atu acel unwang’u wec mi rieko; ma kucelo ke ni kum tipo ma rom eno enwang’u wec mi ng’eyong’ec. 9 Ni kum tipo maeno ng’atu mange unwang’u yiyoyic, man ni kum tipo ma rom eno ng’atu ma kucelo ulund unwang’u giramiya mi keyo kum. 10 Ng’atu mange unwang’u copo mi timo udu, ma kucelo ke copo mi ewo lembila, ng’atu mange copo mi nyang’ i lembe ma tipo yuyo i wiye, ng’atu ma kucelo ke copo mi weco dhok ma tung’ tung’, man ng’atu mange unwang’u copo mi loko dhok. 11 Ento tic maeno zoo tipo ma rom re m’ubetimo man epokogi ni ng’atuman nimakere ku yeny ma iye yenyo.

12 Tap calu ma kum utie acel ento watkum gi dupa, man kadok watkum maeno gitie dupa, re gicoko dhoggi zoo ni kum acel; Kristu bende kumeno. 13 Pilembe ni kum tipo acel wan ceke walimo batizo i kum acel, nik’ebed Juyahudi kunoke Jugiriki, ng’eca kadi ng’atu ma tie agonya, wan ceke juketho wamadhu tipo acel.

14 Pieno, kum ubedo ku watkum acel kende ngo, ento ku wadhe dupa. 15 Ka nwang’u tielo uwacu kumae: “Calu an a cing ungo, atie watkum ungo,” eno nyutho ngo nia dong’ etie ngo watkum. 16 Man ka nwang’u ith uwacu kumae: “Calu atie ngo wang’, atie watkum ungo,” eno nyutho ngo nia dong’ etie ngo watkum. 17 Ka nwang’u kum zoo utie wang’, nwang’u eciwinjo lembe nenedi? Ka nwang’u kum zoo utie ith, nwang’u ecing’wiyo piny nenedi? 18 Ento Mungu uketho watkumman kakare tap calu ma iye yenyo.

19 Ka nwang’u gin zoo gibedo watkum ma rom, nwang’u kum ke ucibedo kani? 20 Ento gitie watkum dupa, re kum acel. 21 Wang’ copo yero ngo ni cing’ nia, “Ambe ku yeny peri,” man wic de copo yero ngo ni tielo nia, “Ambe ku yeny mwu.” 22 Re tung’ ku maeno, watkum ma ginen nia gitie ng’ic pigi tek lee, 23 man watkum ma waneno nia kabang’gi mbe walund wayungogi nisagu; i ayi maeno watkumwa ma gitelo ngo nen akeca walund wagwokogi nisagu, 24 ento watkumwa ma gitelo nen gimbe ku yeny mi piny moko. Re kadok kumeno de, Mungu upangu kum i ayi m’emiyo yung nisagu ni thenge ma nwang’u ukoso yung, 25 kara pokiri ubed umbe i kum, ento kara watkum ukonyiri i kindgi. 26 Ka watkum acel unwang’u ret, watkum mange ceke gisendiri karacelo kude; bende ka watkum acel unwang’u yung, watkum mange ceke anyong’a negogi karacelo kude.

27 Wun wutie kum Kristu, man ng’atuman acel acel m’i kindwu utie watkume. 28 Mungu upangu dhanu i cokiri i ayi ma e: Mi kwong’o jukwenda, mir ario jubila, mir adek juponji, i ng’eye ju m’utie ku copo mi timo udu, ju m’unwang’u giramiya mi keyokum, ju ma konyo juwagi, ju m’utie ku copo mi telowic man ju ma weco dhok ma tung’ tung’. 29 Dhanu zoo ngo ma tie jukwenda, man dhanu zoo ngo ma tie jubila, kumeno ngo? Dhanu zoo ngo ma tie juponji, man dhanu zoo ngo ma tie ku copo mi timo udu, kumeno ngo? 30 Dhanu zoo ngo ma ginwang’u giramiya mi keyokum, man dhanu zoo ngo ma tie ku copo mi weco dhok ma tung’ tung’, kumeno ngo? Dhanu zoo ngo ma gi julok dhok, kumeno ngo? 31 Ento wumeduru niyenyo kud amora giramiya ma dongo m’usagu. Enre abecinyutho iwu yo moko ma ber m’usagu zoo.

13 Tek abeweco dhok mi dhanu man mi jumalaika ma ke ambe ku mer, adoko ve cuma m’ubewak kunoke ulang’ m’ubewak. 2 Bende, tek anwang’u giramiya mi ewo lembila man anyang’ i lembamung’a ma leng’ ceke, atie ku ng’eyong’ec ceke man atie ku yiyoyic ma tek mandha m’aromo ting’o ko gudi atero kaka mange, ento ambe ku mer, nwang’u atie gin moko ngo.* 3 Tek amiyo piny para ceke pi nitungo jumange, man athiero kuma ni tho kara ayungara, ento akoso mer, nwang’u konyne mbe ira nyanok de.

4 Mer ciro lembe hai man ebedo ber ku dhanu. Mer kumira nege ngo. Eting’ere ngo man eyungere ngo, 5 etimere rac ungo, eyenyo bero pare gire ngo, man lembe ton i iye ngo. Ekwanu racu ngo. 6 Anyong’a nege ngo i kum lembe ma rac, ento anyong’a nege i kum lemandha. 7 Emulere ku gin ceke, eyiyo gin ceke, egeno gin ceke, man eciro gin ceke.

8 Mer jik i yo ki ngo. Ento kadok giramiya mi ewo lembila unuti, gibijik; copo mi weco dhok ma tung’ tung’* de bithum; man kadok ng’eyong’ec de bijik. 9 Kum wang’eyo ng’et lembe kucel kende man wabeewo bende ng’et lembila kucel kende, 10 ento saa ma ma zoo bitundo, jubikabu maeno ma kucel kende cen. 11 Kinde m’abino nyathin, abed aweco calu nyathin, abed aparu lembe de calu nyathin man abed ang’iyo i lembe calu nyathin; ento kawoni ma dong’ ateng’ini, akabu kit timo pa nyathin cen. 12 Pi kawoni, udok ubedo ve wabeneno piny nyaviavia i kieu mi cuma, ento i nindo m’ubino wabineno piny ceke terere. Kawoni fodi ang’eyo ng’et lembe kucel kende iwi Mungu, ento i nindo m’ubino abing’eyo lembe tap tap* i wiye calu ma en de eng’eya ko tap tap. 13 Re pi kawoni, gin adek ma e ginuti: Yiyoyic, genogen man mer; ento ma dit m’usagu zoo kud i kindgi utie mer.

14 Wulub tok mer, re asu wumeduru niyenyo kud amora giramiya ma tung’ tung’ mi tipo, asagane mi ewo lembila. 2 Kum ng’atu m’unwang’u giramiya mi weco dhok mange ubeweco ngo i bang’ dhanu, ento i bang’ Mungu; pilembe ng’atu moko mbe m’ubenyang’ i lembe m’ebeyero kadok nwang’u ebeyero lembamung’a ma leng’ ku kony mi tipo de. 3 Ento ng’atu m’uewo lembila ubeteng’o dhanu, ebetielo cwinygi, man ebejuko cwinygi ku wec pare. 4 Ng’atu m’unwang’u giramiya mi weco dhok ma tung’ tung’ ubeteng’ere gire kinde m’ebeweco, ento ng’atu m’ubeewo lembila ubeteng’o cokiri. 5 Nwang’u acopo maru nia wun ceke wubed ku copo mi weco dhok mange, ento ayenyo nia wuew lembila. Kum ng’atu m’ubeewo lembila usagu ng’atu m’ubeweco i dhok mange, tek jubeloko ngo lembe m’eyerone pi niteng’o cokiri. 6 Umego, ka nwang’u abino i beng’wu kawoni m’abeweco dhok mange, acopo konyowu ku girang’o m’uweko nikoro iwu lembanyutha, ng’eyong’ec, lembila kunoke nimiyo iwu ponji?

7 Etie bende kumeno pi piny ma kwo mbe i igi ma giwodho dwal, dok ebed usegu kunoke adungu. Ng’a ma copo nyang’ i dwal ma tung’ tung’ ma usegu kunoke adungu ubewodho ka jubegoyogi ngo ku dwal ma winjere terere? 8 Kan agwara ubewak terere ngo, ng’a ma biyikere pi lwinyi? 9 Kumeno bende, tek wubeyero lembe ma nyang’ i iye tek, jubinyang’ nenedi i lembe ma wubeyero? Kum nwang’u wubeweco i yamu. 10 Ecicopere nia dhok utie dupa iwi ng’om, re acel de mbe m’umbe ku thelembene. 11 Kum tek abenyang’ ungo i dhok ma ng’atu moko ubeweco, abibedo welo ni ng’atu m’ubewece, man ng’atune de bibedo ira welo. 12 Pieno, wun bende calu wubeyenyo kud ava giramiya ma tung’ tung’ mi tipo, wutim kero nipong’ ku giramiya ma biteng’o cokiri.

13 Dong’ ng’atu m’ubeweco i dhok mange urwo kara etuc niloko dhokne. 14 Kum kan aberwo i dhok mange, nwang’u aberwo ni kum giramiya mi tipo, ento nwang’u rieko para ubetimo ngo tic. 15 Dong’ ukwayu atim nenedi? Abirwo ku giramiya mi tipo man abirwo bende ku rieko para. Abiwero wer mi pak ku giramiya mi tipo, man abiwero bende wer mi pak ku rieko para. 16 Tek e kumeno ngo, kinde m’ibepaku Mungu ku giramiya mi tipo, ng’atu ma sai ma n’i kindwu biyero “Amen” nenedi i ajiki mi rwo peri mi dwoko foyofoc ma ke enyang’ ungo i lembe m’iyero? 17 Andha ibedwoko foyofoc i ayi ma cuu, ento ibeteng’o ngo ng’atu mange. 18 Abedwoko foyofoc ni Mungu pilembe aweco dhok dupa nisagu wun ceke. 19 Ento kan atundo i cokiri moko, acopo maru ayer lembe abic ku rieko para* kara aponj jumange, kakare niyero lembe elufu apar (10 000) i dhok mange.

20 Umego, i lembe m’uneno copo mwu mi nyang’ i lembe, kud wubed awiya ma thindho, ento i lembe m’uneno dubo re wubed calu awiya ma thindho man wubed judongo i copo mwu mi nyang’ i lembe. 21 Egorere kumae i Cik: “‘Abiweco i bang’ dhanu maeni i dhok mi welo man ku dhok mi juwirok, re kadok kumeno de, gibikwero niwinja,’ Yehova wacu.” 22 Pieno, niweco i dhok mange utie ngo giranyutha ni juyic, ento etie giranyutha ni juyic ungo. Niewo lembila lundo utie giranyutha ni juyic, ento etie ngo giranyutha ni juyic ungo. 23 Dong’ ka dhanu ceke mi cokiri ucokiri kaka moko man wun ceke wubeweco dhok ma tung’ tung’, e dhanu ma sai kunoke ma juyic ungo umondo i kindwu, nyo gibiyero ngo nia wiwu nyothere? 24 Ento ka wun ceke wubeewo lembila man ng’atu ma jayic ungo kunoke ma sai umondo i kindwu, lembe ma wun ceke wuyero bitwinye man biketho ebing’iyere cuu mandha. 25 Lembe m’upondo i adundene bigam wok kamaleng’, e ebipodho arieba wang’e man ebiworo Mungu m’ewacu ko kumae: “Andhandha Mungu n’i kindwu.”

26 Umego, kinde ma wucokuru karacelo, ng’atu acel m’i kindwu ubewero wer, ng’atu mange ubeponjo ponji, ma kucelo ubekoro lembe ma Mungu unyutho ire,* mange lundo ubeweco i dhok mange, ma kucelo ke ubeloko dhokne. Dong’ ukwayu lembe maeno ceke utimere nenedi? Wutim lembe ceke pi niteng’uru i kindwu. 27 Man ka jumoko ubeweco i dhok mange, wendgi ujik ario kunoke adek kende, giwoth belawiri alawa, man ng’atu moko ucikere niloko lembe ma gibeyerone. 28 Ento ka ng’atu moko mbe ma copo loko dhokne, gibed ling’ i cokiri, giwec i bang’gi gigi man i bang’ Mungu. 29 Jubila de ario kunoke adek kende re m’uweci, jumange uwinji awinja pi ninyang’ i thelembe ma giyero. 30 Ento ka ng’atu moko nwang’u lembanyutha kinde m’ebedo keca, ng’atu ma nwang’u ubeweco uling’. 31 Kum wun ceke wuromo ewo lembila ma wubelewuru alawa, kara dhanu ceke unwang’ ponji man tielocwiny. 32 Man kinde ma jubila gibetiyo ku giramiya migi mi tipo, ukwayu ging’ey nibimo wiye. 33 Pilembe Mungu en e Mungu mi yakini ngo, ento mi kwiyocwiny.

Calu i cokiri ceke mi jumaleng’, 34 ukwayu mon gibed ling’ i cokiri pilembe eyiyere ngo igi ya giweci. Ento mito gijwigiri calu ma Cik de uyero. 35 Tek gimito nyang’ i lembe moko, gidok gipenj coggi i pacu, kum etie lembe mi lewic ni dhaku nia ewec i cokiri.

36 Nyo Lembe pa Mungu ucaku i beng’wu, kunoke nyo etundo i beng’wu kendwu?

37 Tek ng’atu moko ubeparu nia e jabila kunoke nyo enwang’u giramiya moko mi tipo, ukwayu eyii nia lembe m’agoro iwu eni utie gin ma Rwoth ung’olo en. 38 Ento tek ng’atu moko ukwero lembuni, en de jubikwere.* 39 Pieno umego para, wumeduru niyenyo kud amora giramiya mi lembila, re ka ng’atu moko tie ku giramiya mi weco dhok mange, kud wukwere. 40 Ento dong’ lembe ceke uwoth i ayi m’umaku piny man kakare kakare.

15 Umego, kawoni abepoyo wiwu i kum lembanyong’a m’arweyo iwu ma wuyiyo man ma wucungo i iye bende. 2 Man wubiboth ni kum lembanyong’a m’arweyo iwu eno tekene wucungo ma tek i iye; kan ungo ke nwang’u wudoko juyic mananu.

3 Kum i kind lembe ma kwong’a m’anyutho iwu utie gin ma an de ajolo, nia Kristu utho pi dubo mwa calu ma Lembagora uyero 4 man jukunye; e i nindo mir adege egam ecer calu ma Lembagora ular unyuntho 5 man enyuthere ni Kefa,* i ng’eye ni juapar ario. 6 I ng’ei maeno enyuthere bende ni umego ma kadhu dak abic (500) wang’ acel, ma dupa m’i kindgi fodi gitie asu kudwa, ento jumoko gidaru tho. 7 I ng’eye, enyuthere ni Yakobo, macen ni jukwenda ceke. 8 Ento tokcen ne enyuthere bende ira calu ni nyathin ma jular junyolo i wang’ nindo pare.

9 Kum a nok ma sagu jukwenda ceke, man aromo ngo nia julwong’a jakwenda pilembe anyayu ragedo i kum cokiri pa Mungu. 10 Ento ni kum bero ma yawe mbe pa Mungu, atie calu m’atie eni. Man bero pare ma yawe mbe m’enyutho ira ubino mananu ngo, kum atimo tic ma tek nisagu gin ceke; enre ebino an ungo, bero ma yawe mbe pa Mungu ma n’i iya re m’utime. 11 Ento dok ebed wuwinjo ponjine i bang’a kunoke i bang’gi, wan ceke waberweyo lembe ma rom man i ayi maeno re ma wugam wuyiyo.

12 Ka waberweyo nia Kristu ucer ku kind ju m’utho, dong’ ke pirang’o jumoko m’i kindwu gibeyero nia ju m’utho bicer ungo? 13 Kan andha cer mi ju m’utho umbe, nwang’u Kristu bende ucer ungo. 14 Man ka Kristu ucer ungo, nwang’u warweyo mananu man yiyoyic mwu de tije mbe. 15 M’umedo maeno, kan andha cer mi ju m’utho mbe, nwang’u watie jumulembe mi ndra pa Mungu; pilembe nwang’u wacwayu ndra iwi Mungu nia ecero Kristu ku kind ju m’utho ma ke ecere ngo. 16 Pieno ka cer mi ju m’utho umbe, nwang’u Kristu bende ucer ungo. 17 M’umedo maeno, ka Kristu ucer ungo, e nwang’u yiyoyic mwu de tije mbe man wudong’ asu i dubo mwu. 18 Bende, nwang’u dhanu ma githo i Kristu de gidaru rwinyo. 19 Ka wageno Kristu i kwo maeni kende, nwang’u wiwa jucan nisagu dhanu mange ceke.

20 Ento Kristu ucer andha ku kind ju m’utho calu landu wi mwoka mi ju m’utho. 21 Calu ma tho umondo ni kum ng’atu acel, cer mi ju m’utho bende uwok ni kum ng’atu acel. 22 Kum tap calu ma ni kum Adamu dhanu ceke ubetho, kumeno bende ni kum Kristu dhanu ceke binwang’u kwo. 23 Ento kubang’ dhanu ng’atuman kakare: Kristu landu wi mwoka, i ng’eye ju ma gi pa Kristu i saa mi bedonuti pare. 24 I ng’eye i ajiki, ebidwoko Ker i bang’ Mungu ma en e Wego, nwang’u edaru nyotho bimobim ceke, dito ceke man tego. 25 Kum ecikere nicamu Ker nitundo ma Mungu biketho ko jukwor pare ceke i the tiende. 26 Man jakwor ma tokcen ma jubikabu woko en e tho. 27 Kum Mungu “uketho piny ceke udoko wor i the tiende.” Ento kinde ma juyero nia ‘piny ceke udoko wor,’ ubenen kamaleng’ nia eno ucoko ngo Ng’atu m’uketho piny ceke udoko wor ire. 28 Ento kinde ma piny ceke bidoko wor ire, e Wod en gire bende bijwigere ni Ng’atu m’udwoko piny ceke wor ire, kara Mungu kende re m’ubed Jabim mi piny ceke.

29 Pieno, ju ma gibelimo batizo pi nibedo ju m’utho e gibitimo ang’o? Tek cer mi ju m’utho umbe, dong’ ke pirang’o gibelimo batizo pi nibedo ju m’utho? 30 Man wan de pirang’o wan’i ariti mi tho saa ceke? 31 Abeboth abotha ku tho kubang’ rupiny. Umego, abeyero lembe maeni ni kum kulula m’atie ko piwu wun ma wu julub pa Kristu Yesu Rwoth mwa. 32 Ka calu dhanu mange* anyego ku yedi ma kwiny i Efeso, nwang’u konyne ang’o ira? Tek cer mi ju m’utho umbe, “dong’ wacamara man wamadhara, kum urwo wabitho”. 33 Kud juwondwu: Dikiri ma judikiri ko ku ju ma pigi rac nyotho pi jo ma ber.* 34 Wucew man wutim lembe m’atira ento dubo re ngo, kum jumoko m’i kindwu ging’eyo ngo Mungu. Abeyero lembe maeni pi ninyayu lewic i wiwu.

35 Ento ng’atu moko copo yero kumae: “Ju m’utho gibicer nenedi? Gibicer ku kit kum ma kani?” 36 Rieko peri nok! Kodhi m’icoyo lar tho ngo kan i ng’eye ebin etwii? 37 Man pi maeno m’icoyo, icoyo ngo tiende ma bidongo ento icoyo nyinge, dok ebed nganu kunoke kodhi mange. 38 Ento Mungu miyo ire kum calu ma iye yenyo, man kubang’ kodhiman emiyo ire kum m’uromo kude. 39 Piny ceke ma kwo* utie ngo ku kit ring’kum ma rom: Dhanu utie ku ring’kum migi, lei utie ku ring’kum migi, winyo utie ku ring’kum migi man rec bende utie ku ring’kum migi. 40 Bende, kum mi polo unuti man kum mi ng’om de unuti; ento dwong’ mi kum mi polo ukoc ku dwong’ mi kum mi ng’om. 41 Ceng’ utie ku dwong’ pare, dwi utie ku dwong’ pare man nyikaluku de gitie ku dwong’ migi; i andha, nyakalukuman utie ku dwong’ m’ukoc ku pa nyakaluku mange.

42 Cer mi ju m’utho bende kumeno. Jucoyo kum ma nyothere, ecer i kum ma nyothere ngo. 43 Jucoyo kum m’umbe ku yung, ecer i dwong’. Jucoyo kum ma ng’ic, ecer i tego. 44 Jucoye i kum maeni, ecer i kum mi tipo. Ka kum maeni unuti, nwang’u kum mi tipo bende unuti. 45 Lembagora yero kumae: “Ng’atu ma kwong’a ma tie Adamu udoko ng’eyong’ec ma kwo.” Adamu ma tokcen udoko tipo ma miyo kwo. 46 Ento ng’atu mi tipo utie ngo ma kwong’a. Ng’atu mi kum re m’utie ma kwong’a, mi tipo udok ubino i ng’eye. 47 Ng’atu ma kwong’a uai kud i ng’om man jucwiye kud utur; ng’atu mir ario uai kud i polo. 48 Calu ng’atu ma jucwiyo kud utur ubedo, ju ma jucwiyogi kud utur bende gi kumeno; man calu ng’atu mi polo ubedo, ju mi polo bende gi kumeno. 49 Man tap calu ma watie kud ayi pa ng’atu ma jucwiyo kud utur, wabibedo bende kud ayi pa ng’atu mi polo.

50 Ento ayero iwu, umego, nia kum ku rimo copo lagu Ker pa Mungu ki ngo, kadok ma nyothere de copo lagu ngo ma nyothere ngo. 51 Wuwinji! Abeyero iwu lembamung’a ma leng’: Wabinindo ngo wan ceke i tho, ento jubilokowa wan ceke 52 nyapil calu goyowang’ i saa mir agwara ma tokcen. Kum agwara biwak, e ju m’utho bicer ku kum ma nyothere ngo, man jubilokowa. 53 Pilembe ukwayu nia maeni ma nyothere ukeurony ma nyothere ngo, man maeni ma tho ukeurony ma tho ngo. 54 E kinde ma maeni ma nyothere uronyo ma nyothere ngo man maeni ma tho uronyo ma tho ngo, e lembe ma e m’ugorere bigam pong’o: “Jumwonyo tho mi nja.” 55 “Tho, aloci peri ni kani? Tho, kwir peri ni kani?” 56 Kwir ma kelo tho utie dubo, man tego mi dubo utie Cik.* 57 Ento wabedwoko foyofoc ni Mungu, kum emiyo iwa aloci nikadhu kud i bang’ Rwoth mwa Yesu Kristu!

58 Pieno umego para ma jumer, wucung nging’ nging’, ma wulokuru ngo man saa ceke wubed ku lembe dupa ma wubetimo i tic pa Rwoth, kum wung’eyo nia tic ma wumuluru ko tie mananu ngo i Rwoth.

16 Pi lembe m’uneno ajok ma pi jumaleng’, wulub telowic m’amiyo ni cokiri mi Galatia. 2 I ceng’ ma kwong’a kubang’ yenga, ng’atuman m’i kindwu ukoy piny moko ang’et nimakere ku copo pare, kara kud juwok jujok ajok kinde m’abitundo. 3 Saa m’abitundo kuno, abiwok oro ju ma wubiyiyo pigi i waraga mwu kara giter giramiya mwu ma ku berocwiny i Yeruzalem. 4 Enre tek ebikwayere nia an bende acidh kuca, wabiwok cidho wakugi.

5 Abibino i beng’wu i ng’ei m’akadhu kud i Makedonia, kum ubekwayere nia akadh kud i Makedonia. 6 Bende copere nia wabiwok bedo wakudwu pi nindo moko kunoke nyo nitundo ma saa pa koyo bikadhu, kara wulwok toka kinde m’abecidho kaka m’abicidho i iye. 7 Kum abemito ngo anenwu kawoni m’abekadhu akadha, pilembe ageno nia wabiwok bedo wakudwu pi nindo moko ka Yehova yiyo. 8 Ento fodi ani i Efeso nitundo i foc mi Pentekoste, 9 pilembe dhugola ma lac uyabere ira pi tic, ento judegi gitie dupa.

10 Saa ma Timoteo bitundo i kindwu, kud wuwok wutim lembe moko ma romo nyayu lworo i iye, kum ebetimo tic pa Yehova tap calu ma an de abetimo. 11 Pieno, ng’atu moko kud ucaye. Ento wulwok toke i woth pare kara etund i bang’a i kwiyocwiny, kum wabekure karacelo kud umego mange.

12 Pir Apolo m’umegwa, akwaye ma tek nia ebin i beng’wu karacelo kud umego mange. Ento fodi iye yenyo ngo nia ebin kawoni, re ebibino tekene kare nen.

13 Wukii, wucung ma tek i yiyoyic, wubed ratego pa mi co,* wudok tek. 14 Lembe ceke ma wutimo, wutime ku mer.

15 Abekwayuwu umego: Wung’eyo nia Stefano karacelo ku juruot pare gitie i kind dhanu ma kwong’a m’udoko julub* i Akaya man nia giwodhiri ku cwinygi ceke pi nitimo ni jumaleng’. 16 Wumeduru nijwiguru ni dhanu ma kumeno man ni ju ceke ma gibetimo tic ma tek karacelo. 17 Anyong’a benega pilembe watie karacelo ku Stefano, Fortunato man Akaiko; gikonya kakewu pilembe wumbe i ng’eta. 18 Kum gitielo cwinya man cwinywu bende. Pieno, wuwor dhanu ma kumeno.

19 Cokiri mir Azia gicwalu moth migi iwu. Akila giku Priska karacelo ku cokiri ma ni yo migi de gimothowu kud adundegi ceke i Rwoth. 20 Umego ceke gimothowu. Wumothuru i kindwu ku cwiyolimb ma leng’.

21 Eni tie moth para m’akiewo ku cinga gira an a Paulo.

22 Tek ng’atu moko umaru ngo Rwoth, kwong’ ubed i wiye. Rwoth mwa wakweyi, bin! 23 Dong’ bero ma yawe mbe pa Rwoth Yesu ubed kudwu. 24 Mer para ubed kudwu ceke i Kristu Yesu.