BARUA MIR ARIO NI JUKORINTHO

1 Niai kud i bang’ Paulo ma jakwenda pa Kristu Yesu ni kum yeny pa Mungu, man Timoteo m’umegwa, ni cokiri pa Mungu ma n’i Korintho man ni jumaleng’ ceke ma gin’i ng’om mir Akaya:

2 Bero ma yawe mbe man kwiyocwiny pa Mungu ma Wegwa man pa Rwoth Yesu Kristu ubed kudwu.

3 Pak ubed ni Mungu ma Won Rwoth mwa Yesu Kristu, ma tie Wego m’upong’ ku kisa man Mungu mi jukocwiny ceke, 4 ma juko cwinywa i masendi mwa ceke, kara ni kum jukocwiny ma wanwang’u i bang’ Mungu, wajuk cwiny jumange ma gibenwang’iri ku masendi moko ci. 5 Kum tap calu ma wabesendara lee pi Kristu, kumeno bende wabenwang’u jukocwiny lee nikadhu kud i bang’ Kristu. 6 Tek wabenwang’ara ku masendi, utie pi jukocwiny mwu man pi both mwu; man tek wabenwang’u jukocwiny, utie pi jukocwiny mwu kara wucir kit can ma rom ma wabenwang’ara ko. 7 Bende, watie ku genogen ma tek i wiwu, kum wang’eyo nia calu ma wun de wubeneno can ve wan, wubinwang’u bende jukocwiny calu wan.

8 Umego, wamito ngo wamung’ pi masendi ma wanwang’ara ko i theng ng’om mir Azia. Wanwang’ara ku masendi ma lic m’ukadhu tego mwa, m’uketho cwinywa uai kadok i kum kwo mwa buu. 9 I andha, wabino nwang’u nia ve jung’olo tho i wiwa. Lembe maeno utimere kara kud wagenara giwa, ento kara wagen Mungu ma cero ju m’utho. 10 Ebodhowa kud i wang’ ariti ma dit maeno mi tho man ebibodhowa asu, eyo, watie ku genogen i wiye nia ebimedere asu nibodhowa. 11 Wun bende wuromo konyowa ku kwac ma wubekwayu ko Mungu piwa, kara bero ma wabinwang’u ni kum dwokowang’ rwo mi dhanu dupa uketh dhanu dupa gifoy Mungu.

12 Kum lembe ma wabelulara pire ni e: Pidocwiny mwa ubetuco kamaleng’ nia i ng’om man asagane i kindwu, wabedo ku timo ma leng’ man cwiny m’abombi mbe i iye m’uai i bang’ Mungu ku rieko mi kum ungo, ento ku bero ma yawe mbe pa Mungu. 13 Kum i andha wabekiewo ngo iwu lembe mange m’uweko lembe ma wuromo somo* man ma wuromo nyang’ i iye, man atie ku genogen nia wubinyang’ i lembe maeni cuu.* 14 Tap calu ma wudaru nyang’ i kadhiri moko nia wucopo luluru ni kumwa, wan bende wabilulara ni kumwu i ceng’ pa Rwoth mwa Yesu.

15 Ni kum genogen maeno, abino mito nia alar abin i beng’wu kara anyong’a negwu wang’ mir arionde;* 16 kum abino mito nia awok alieuwu kinde m’abecidho i Makedonia, man kinde m’aloko kud i Makedonia de ang’ol i beng’wu wek kara wulwok toka kinde m’abecidho i Yudea. 17 Nyo kinde m’abepangu lembuno, amake ku tuko? Kunoke nyo abed apangu lembe ku kum, uketho ayero “eyo, eyo”, i ng’eye ke “ungo, ungo”? 18 Tap calu ma juromo geno Mungu, lembe ma wayero iwu utie “eyo,” ento “ungo” ngo. 19 Kum Wod Mungu ma Yesu Kristu ma warweyo pire i kindwu, niwacu an, Silvano* man Timoteo, udoko ngo “eyo” man “ungo,” ento i iye “eyo” utie “eyo.” 20 Kum kadok nwang’u lembang’ola pa Mungu gi dupa rukani de, re gidoko “eyo” ni kume. Pieno bende ni kume, wabeyero “Amen” ni Mungu kara wamii dwong’ ni Mungu. 21 Ento ng’atu m’ung’olo kamaleng’ nia wun ku wan wa pa Kristu man m’uwirowa utie Mungu. 22 Eketho bende ayi i kumwa man emiyo iwa mukwatu* mi gin ma bibino, niwacu tipo i adundewa.

23 Abeyero lemandha man Mungu tie sadeni para, nia ka fodi abino ngo i Korintho, utie pi bero mwu. 24 Wabemito ngo wabim wi yiyoyic mwu, ento watie jutic wedwu pi mutoro mwu pilembe wucungo ni kum yiyoyic mwu.

2 Kum ang’iyo nia kinde m’abibino i beng’wu kendo, liew para kud uwok unyay can i iwu. 2 Kum kan awok anyayu can i iwu, ng’a ma binyayu anyong’a i iya m’uweko ng’atu m’anyayu can i iye? 3 Akiewo gin maeni kara kinde m’abibino, ju ma nwang’u kwayu uwok unyay anyong’a i iya kud giwok ginyay can i iya, kum ang’eyo nia gin ma nyayu anyong’a i iya nyayu bende anyong’a ma rom i iwu ceke. 4 Kum akiewo iwu ku piwang’ cur cur kud i kind masendi ma lee man adieng’acwiny, ungo pi ninyayu can i iwu, ento kara wung’ey nia amaruwu ku mer ma thuc.

5 Ento ka ng’atu moko unyayu can, eca enyayu can i iya ngo, ento enyayu can i iwu ceke i kadhiri moko; ayero kumeno pilembe abemito ngo aketh nwoc iwi lembene nikadhu mukero. 6 Juk maeno ma dhanu dupa umiyo uromo ni ng’atuno; 7 kawoni wucikuru niweko ire man nijuko cwinye kara kud emwony ni kum can pare m’akeca. 8 Pieno abekwayu wunyuth ire nia wumare. 9 Kum akiewo iwu bende pi thelembe ma e: Ning’eyo ka nyo wucopo nyutho woro mwu i lembe ceke. 10 Ka wuweko lembe ni ng’atu moko, nwang’u an de adaru weko ire. I andha gin m’aweko (tek adaru weke), m’eca aweke piwu i wang’ Kristu, 11 kara Sitani kud uvoiwa,* kum wang’eyo cuu bodho* pare.

12 Kinde m’atundo i Troa pi nirweyo lembanyong’a iwi Kristu man dhugola yabere ira i Rwoth, 13 cwinya wok ukwiyo ngo pilembe anwang’u ngo umira ma Tito. Pieno, agam acikogi man acidho i Makedonia.

14 Ento foyofoc ubed ni Mungu ma saa ceke ubetelo wiwa i piro mir aloci karacelo ku Kristu, man ni kumwa ng’eyong’ec pare ubelal kakare ceke calu ng’wic udok ma ng’ar! 15 Kum ni Mungu, wang’wii calu ng’wic udok ma ng’ar pa Kristu i kind ju ma gibiboth man i kind ju ma jubinyotho; 16 ni ju ma jubinyotho, ng’wic tho ma terojo i tho, ni ju ma gibiboth ng’wic kwo ma terojo i kwo. Ng’a dhe m’uromo pi lembe maeni? 17 Tie wan, kum wabelworo ngo* lembe pa Mungu calu ma dhanu mange dupa gibetimo, ento calu julub pa Kristu man calu dhanu ma Mungu uoro, wabeyero lembe m’abombi mbe i cwinywa i wang’ Mungu.

3 Nyo ukwayu wakewanyuthara iwu kendo nia watie jukani? Kunoke nyo calu dhanu mange ukwayu wamii iwu barua m’ucwakuwa kunoke baruane uai kud i beng’wu? 2 Wun giwu wutie barua mwa m’ukiewere i adundewa, ma dhanu ceke ung’eyo pire man gibesome de. 3 Kum ubenen kamaleng’ nia wutie barua pa Kristu ma wakiewo nikadhu kud i tic mwa, wakiewe ngo ku vino ento ku tipo pa Mungu ma kwo, iwi ban mi kidi ngo ento iwi ban mi ring’kum, niwacu i adunde.

4 Wabeyero kumeno ku tegocwinywa i wang’ Mungu ni kum Kristu. 5 Wabeyero ngo nia waromo nitimo tic maeno ni kum copo mwa giwa, ento waromo andha nitimo tije kum copo mwa uai i bang’ Mungu; 6 en re m’eketho waromo andha nibedo jutic mi lembariba ma nyen, jutic mi Cik ma jukiewo akiewa ngo ento mi tipo; kum Cik ma jukiewo akiewa kelo pokolembe mi tho, ento tipo miyo kwo.

7 Dong’ ka Cik ma kelo pokolembe mi tho man ma jugoro iwi bankidi ubino ku dwong’ ma thorukeni, m’uketho nyithindho mir Israel gituc ungo nineno wang’ Musa ni kum wang’e m’uberieny ma ke dwong’ne bikadhu akadha, 8 nyo tic ma tipo timo ucikere ngo nibedo ku dwong’ m’usagu? 9 Kum ka Cik ma kelo pokolembe ubedo ku dwong’, tic ma terojo i bedopwe lundo ucikere nibedo ku dwong’ m’usagu! 10 I andha, kadok gin ma nwang’u ubino ku dwong’ lee de, jukabu dwong’ parene pi dwong’ m’usage. 11 Kum ka gin ma bikadhu akadha jukele i dwong’, nyo ma biriyo ucikere nibedo ku dwong’ m’usagu ngo?

12 Calu watie ku genogen maeno, wabeweco ku tegocwiny ma dit. 13 Man wabetimo ngo calu Musa m’uumo wang’e ku bongu kara nyithindho mir Israel kud ginen tel kajik mi gin ma bikadhu akadha. 14 Ento ng’eyong’ec migi ubino udhuko. Kum cil kawoni kinde ma jubesomo lembariba ma con, bongu maeca fodi unuti asu pilembe ecopo kabere kende kende ku kony pa Kristu. 15 I andha, nitundo tin eni ka jubesomo lembe ma Musa ugoro, fodi bongu uumo adundegi asu. 16 Ento kinde ma ng’atini ulokere i bang’ Yehova, bongune gam kabere cen. 17 Yehova en e tipo, man kaka ma tipo pa Yehova n’i iye, keca bedagonya nuti. 18 Bende, wan ceke ma bongu kabere kud i wang’wa, waberienyo dwong’ pa Yehova calu kieu, man julokowa wadoko i ayi pare niai kud i dwong’ nitundo i dwong’ m’ucelo, tap calu ma Yehova ma en e Tipo ubetimo.*

4 Pieno, calu wanwang’u tic maeni ni kum kisa m’unyuthere iwa, wabevoc ungo. 2 Ento waweko nitimo lembe mi lewic ma jutimo aponda, wabewotho ngo ku rieko mir awondi, man waberoyo ngo ndra i lembe pa Mungu; enre kinde ma wabeketho lemandha ung’eyere, wabenyutho nia watie lapor ma ber i wang’ dhanu ceke man i wang’ Mungu. 3 I andha, tek lembanyong’a ma waberweyo ubedo auma, m’eca ebedo auma ni dhanu ma jubinyotho, 4 ni dhanu ma juyic ungo ma mungu m’i ng’om maeni* uumo wang’ pidoic migi,* kara der mi lembanyong’a mi dwong’ pa Kristu ma en e ayi Mungu kud urieny i kindgi. 5 Kum waberweyo lembe mwa giwa ngo, ento waberweyo nia Yesu Kristu tie Rwoth man wan ke watie ng’eca mwu pi Yesu. 6 Kum Mungu re m’uyero nia, “Maku der urieny i mudho,” man eketho derne urieny i adundewa kara ng’eyong’ec mi dwong’ pa Mungu m’uberieny i wang’ Kristu ucargi.

7 Ento wabedo ku piny m’akana maeni i agulu mir ulobo kara tego m’usagu ceke ubed pa Mungu, ento m’uai i bang’wa giwa re ngo. 8 Juridowa kun ku kun, re fodi wacopo yiko kumwa asu; cwinywa ng’abere, ento yojboth unuti;* 9 jubenyayu ragedo i kumwa, ento juwenjowa ngo; juredhowa thathara, ento jurucowa ngo. 10 Saa ceke wabeciro* masendi mi tho ma Yesu uciro, kara kwo pa Yesu bende unyuthere i kumwa. 11 Kum wan ma wabedo kwo wabeboth abotha ku tho pi Yesu saa ceke, kara kwo pa Yesu unyuthere bende i kumwa maeni ma tho. 12 Pieno tho ubetiyo i iwa, ento i iwu kwo re m’ubetiyo.

13 Calu wan de watie ku tipo ma rom mi yiyoyic ma jular jugoro pire kumae: “Atie ku yiyoyic uketho aweco,” wan de watie ku yiyoyic uketho wabeweco, 14 ma wang’eyo ko nia Ng’atu m’ucero Yesu bicero wan bende karacelo ku Yesu man ebinyuthowa karacelo wakudwu ire. 15 Kum lembe maeni ceke utie piwu kara bero ma yawe mbe m’ucukumedere ameda, umedere nisagu pilembe dhanu ma dupa dit ubedwoko foyofoc pi nimiyo dwong’ ni Mungu.

16 Pieno wabevoc ungo, ento kadok nwang’u ng’atu ma yo woko ubenyothere, re andhandha ng’atu ma yor i iwa ubedoko nyen kubang’ rupiny kubang’ rupiny. 17 Kadok masendi* bedo pi saa moko kende man there yot, ento emiyo iwa dwong’ ma yawe mbe* man ma galu rondo ku rondo. 18 Bende, wabeketho wang’wa i kum piny ma nen ungo, ento ungo i kum piny ma nen. Kum piny ma nen kadhu akadha, ento piny ma nen ungo bedo rondo ku rondo.

5 Kum wang’eyo nia ka ot mwa m’i ng’om, niyero hema maeni unyothere, watie ku giedo mange m’uai i bang’ Mungu, ma en e ot ma jugiero ku cing’ ungo ma bibedo rondo ku rondo i polo. 2 Kum i ot maeni wabecur acura man wabeyenyo kud ava ma dit nironyo otne ma mwa m’uai kud i polo, 3 kara kinde ma waronye, kud junwang’ wabedo muneru. 4 I andha, i hema maeni wabecur acura ma lembe unurowa, kum wabemito ngo wakab maeni cen, ento wabemito warony ma kucelo i wiye kara kwo umwony maeni ma tho. 5 Ento ng’atu m’uyikowa pi gin maeni nini utie Mungu, m’umiyo iwa tipo calu mukwatu* mi gin ma bibino.

6 Pieno cwinywa tek saa ceke, man wang’eyo nia kinde ma fodi wan’i kum maeni, wabedo bor ku Rwoth, 7 pilembe wabewotho ku yiyoyic, enre ungo nimakere ku gin ma wang’wa ubeneno. 8 Eyo, cwinywa tek lee man nwang’u waromo maru wawek kum maeni pi nicikwo i ng’et Rwoth. 9 Ento dok wabed ceng’ini kude kunoke wabed bor kude, lembakeca mwa utie ninyayu anyong’a i iye. 10 Kum wan ceke wabicungo i wang’ kom mi pokolembe pa Kristu, kara ng’atuman unwang’ sukulia pare nimakere ku gin m’etimo kinde m’eni kum, dok ebed gin ma ber kadi gin ma rac.

11 Pieno, calu wang’eyo nia wacikara nilworo Rwoth, wabemedara nithoko dhanu. Ento Mungu ung’eyowa cuu man ang’eyo nia pidocwiny mwu de ung’eyowa cuu. 12 Wabelulara ngo i wiwu kendo ento wabemiyo iwu kaka ma wululuru ko piwa, kara wubed ku copo mi dwoko lembe ni dhanu m’ubeluliri pi gin ma nen yo woko ento ungo pi gin ma ni i adunde. 13 Kum ka wiwa ugam unyothere, ubino pi Mungu; ka wiwa ubetiyo cuu, utie piwu. 14 Kum mer ma Kristu umaru kowa ubecwaluwa, pilembe wanyang’ nia ng’atu acel utho pi dhanu ceke, pieno nwang’u dhanu ceke githo. 15 Man etho pi dhanu ceke kara ju m’ubekwo kud gikwo kendo pigi gigi, ento gikwo pire en m’etho pigi man egam ecer.

16 Ka kumeno, ugamere kawoni wabeneno ngo ng’atu moko calu ma dhanu neno kojo. Kadok con wabed waneno Kristu i ayi ma dhanu neno kojo de, dong’ wanene ngo i ayi maeno nyanok de. 17 Pieno, ka ng’atu moko tie ku winjiri ku Kristu, nwang’u etie giracwiya ma nyen. Gin ma con udaru kadhu; nen! Gin ma nyen re ma dong’ unuti. 18 Ento piny ceke uai i bang’ Mungu m’uripo kindwa kude nikadhu kud i bang’ Kristu man emiyo iwa tic mi ripo kind dhanu kude, 19 niyero Mungu ubino ripo kind ng’om kude nikadhu kud i bang’ Kristu, ekwanu ngo dubo migi i wigi man emiyo iwa rwonglembe mi ripo kind dhanu kude.

20 Pieno, watie juor m’ubetimo kaka Kristu, man udong’ ubedo ve Mungu ubelwong’o dhanu nikadhu kud i bang’wa. E kumeno kaka Kristu, wabekwayuwu kumae: “Wurip kindwu ku Mungu.” 21 Ng’atu ma nwang’u ung’eyo dubo ngo, Mungu udwoke ni dubo* piwa, kara ni kume wadok weg bedopwe i wang’ Mungu.

6 Calu ma wabetimo karacelo ku Mungu, wabekwayuwu bende nia kud wujol bero ma yawe mbe pa Mungu mi mananu. 2 Kum eyero kumae: “I saa m’uyiyere awinji, man i nindo mi both akonyi.” Nen! Eni tap re m’utie saa m’uyiyere. Nen! Eni re m’utie nindo mi both.

3 Wamito ngo watim gin moko ci ma romo ketho ng’atu moko kier, kara kud juwec rac i kum tic mwa; 4 ento wabenyuthara giwa i lembe ceke nia watie jutic pa Mungu, nikadhu kud i amulaic dupa ma wabeciro, masendi, canpiny man peko; 5 jubefodowa, jutwiyowa i kol, junyayu yakini i wiwa, wabemulara ku tic ma tek, nindo ubekeng’ i wang’wa ku diewor, man wabekoso cam; 6 nikadhu kud i leng’o, ng’eyong’ec, mwonyolembe hai, bedo ber ku dhanu, tipo ma leng’ man mer m’umbe umbili; 7 nikadhu kud i lemandha ma wabeyero, man tego pa Mungu, nikadhu kud i jamlwiny mi bedopwe ma n’i cing ma yor acwic* kud i cing ma yor acam,* 8 jubeyungowa man jubenyayu lewic i wiwa, jumoko ubecido nyingwa jumange ke ubeyero piwa ber. Jubenenowa ni jundra kun ke wayero lemandha, 9 ve jung’eyowa ngo ma ke jung’eyowa cuu, ve ju m’ubetho* ento nen! Watie kwo, ve ju m’unwang’u matira ento jung’olo ngo tho i wiwa; 10 dhanu paru nia can utie i adundewa ma ke lundo anyong’a re m’ubenegowa saa ceke, giparu nia watie jucan ento wabelonyo dhanu dupa, nia wakoso piny ento watie ku piny ceke.

11 Waweco i beng’wu thwolo thwolo wu Jukorintho, man wayabu adundewa ma lac. 12 Wabeketho ngo mupaka i mer ma wamaru kowu,* ento wun wubeketho mupaka i mer ma wumaru kowa. 13 Pieno aweco i beng’wu calu i bang’ nyithindho para, akwayuwu wutim iwa calu ma wan de watimo iwu: Wuyab adundewu ma lac.*

14 Kud wuriburu karacelo ku ju ma gi juyic ungo. Kum winjiri ma kani m’utie i kind bedopwe ku turocik? Kunoke nyo der giku mudho girombo de? 15 M’umedo maeno, winjiri ma kani m’utie i kind Kristu giku Belial?* Kadi winjiri ma kani m’utie i kind jayic ku jayic ungo? 16 Man winjiri ma kani ma hekalu pa Mungu utie ko kud ayi gin m’acwiya? Kum watie hekalu pa Mungu ma kwo, tap calu ma Mungu uyero kumae: “Abibedo i kindgi, abiwotho i kindgi, abibedo Mungu migi man gibibedo dhanu para.” 17 “‘Ka kumeno, wuwok cen kud i kindgi man wukoyuru giwu,’ Yehova wacu, ‘man kud wumul gin m’ucido’”; “‘e abijolowu.’” 18 “‘Abidoko iwu Wego, man wubidoko wota ku nyiga,’ Yehova ma Jategokpo uwacu.”

7 Pieno jumerna, calu ma watie ku lembang’ola maeni, wadwokara leng’ ni gin ceke ma cido kum man ng’eyong’ec,* kara wadok leng’ nisagu, ma nwang’u wabelworo ko Mungu.

2 Wuyab adundewu iwa. Watimo ngo racu ni ng’atu moko, wanyotho ngo ng’atu moko man avura de wavuro ngo ng’atu moko. 3 Abeyero ngo lembuni pi nipoko lembe rac i wiwu. Kum calu m’adaru yero, wun’i i adundewa, nik’ebed watho athoa kunoke wakwo. 4 Abeweco i beng’wu ku tegocwiny ma dit man abeyungara lee piwu. Anwang’u jukocwiny lee, man i masendi mwa ceke anyong’a para upong’ bik.

5 I andha kinde ma watundo i Makedonia, kumwa uyom ungo, ento wanwang’ara ku masendi asu i yo ceke: Yo woko ragedo, yor i iwa ke lworo. 6 Ento Mungu ma juko ju ma cwinygi tur, ujuko cwinywa ni kum bedonuti pa Tito; 7 bedonuti pare kende ngo ento bende jukocwiny m’enwang’u ni kumwu, kum edwog enyutho iwa nia avana ubenegowu lee dit, can de mondo i iwu lee, man wubedieng’ lee dit* pira; lembuno uketho anyong’a ubenega nisagu.

8 Kum kadok anyayu can i iwu ku barua para de, re lembene uroyo ngo ang’eyang’o i iya. Kadok ku kwong’a cwinya ukeudieng’ de (pilembe barua m’akiewo unyayu can i iwu, kadok pi nyathi saa moko kende), 9 ento kawoni anyong’a ubenega, kende kende ngo pilembe can umondo i iwu, ento pilembe can m’umondo i iwune uketho wuloko cwinywu. Kum can umondo i iwu i ayi ma nyayu anyong’a i Mungu, pieno lembe ma wayero iwu utimowu rac ungo. 10 Kum can ma nyayu anyong’a i Mungu cwalujo i lokocwiny ma terojo i both, man i ng’eye ang’eyang’o bedo mbe; enre can m’i ng’om terojo i tho. 11 Wukenen maram ma can ma nyayu anyong’a i Mungu umiyo ko ava ma lee i kumwu, eyo, ava mi dwokiri leng’, eyo, ng’eicwiny, eyo, lworo, eyo, ava ma lee, eyo, amora, eyo, yiko lembe m’unyothere! I gin ceke wunyuthuru nia wutie leng’* i lembe maeni. 12 Kadok agam akiewo iwu de, akiewo ngo pi ng’atu m’utimo rac, kadi pi ng’atu ma jutimo ire racu, ento akiewo pi nineno ka nyo andha i wang’ Mungu wucopo woro juk ma wamiyo iwu. 13 Lembuno ujuko cwinywa lee.

Ento m’uweko jukocwiny ma wanwang’u, anyong’a unegowa nisagu pi mutoro ma Tito utie ko pilembe wun ceke wuwok wuyomo cwinye. 14 Kum kadok agam alulara piwu ire, lewic unega ngo; ento tap calu ma lembe ceke ma wayero iwu ubino lemandha, kumeno bende luliri ma walulara ko ni Tito ubino lemandha. 15 Bende, mer m’emaru kowu bemedere ameda kan ebepoy pi woro mwu ceke man pir ayi ma wujole ko ku lworo man mielkum. 16 Anyong’a ubenega kum acopo genowu* i lembe ceke.

8 Kawoni umego, wamito wung’ey pi bero ma yawe mbe ma Mungu unyutho ni cokiri mi Makedonia. 2 Kud i kind amulaic ma pek man masendi, gimiyo piny migi kud anyong’a lee kadok nwang’u gi jucan ma ngolongolo de; eno unyutho nia gitie weg berocwiny lee. 3 Kum gimiyo nimakere ku copo migi, eyo, abetuco ya gimiyo kadok nikadhu kadhiri ma gicopo. 4 Ging’iyo gin gigi man gimediri nirerowa ya gin de ginwang’ rwom mi miyo giramiya ma ku berocwiny pi nidikiri i tic mi konyo jumaleng’. 5 Gimiyo ngo kende kende gin ma wabino geno, ento gilar gimiyiri gigi ni Rwoth man iwa, ni kum yeny ma i Mungu yenyo. 6 Pieno, wakwayu Tito nia ebin edar joko giramiya mwu ma ku berocwiny tap calu m’elar ecaku tije i kindwu. 7 Bende, tap calu ma wupong’ i giki ceke, yiyoyic, wec, ng’eyong’ec, ava ma wutie ko man mer ma wamaru kowu, wumii bende giramiya maeni ma ku berocwiny lee.

8 Abeyero ngo lembuni pi nidiyowu adiya, ento kara wung’ey nia jumange gitie kud amora, man amito ang’ey ka nyo wutie ku mer mandha. 9 Kum wung’eyo bero ma yawe mbe pa Rwoth mwa Yesu Kristu, nia kadok ebino jalonyo, edwokere gire ni jacan piwu kara wudok julonyo nikadhu kud i can pare.

10 Man i lembe maeni abenyutho paru para: Etie pi bero mwu, kum kawoni oro ukadhu doko acel niai ma wucaku tije man wunyutho nia wutie bende kud ava mi time. 11 Dong’ kawoni, wudar bende gin ma wucaku, kara ava ma wubino ko mi timo tic unen kamaleng’ nimakere ku copo mwu. 12 Kum tek ng’atu moko utie kud ava mi miyo, e giramiya pare tie ajola asagane kan ebemiye nimakere ku gin m’etie ko, ento ungo nimakere ku gin m’embe ko. 13 Kum abemito ngo aketh lembene bed yot ni jumange, ento ebed pek iwu; 14 abemito lembe uwoth rom rom, kara gin ma kawoni usagere i beng’wu upong’ yeny migi, man gin m’usagere i bang’gi upong’ gin m’urem i beng’wu; e kumeno lembe biwotho rom rom. 15 Tap calu ma Lembagora yero kumae: “Ng’atu m’ubedo ko lee, ubedo ko ngo lee nisagu man ng’atu m’ubedo ko nyanok de ubedo ko ngo nyanok magwei.”

16 Wabefoyo Mungu pilembe eketho i adunde Tito adieng’a ma rom ma watie ko piwu, 17 kum ewinjo dwandwa, man calu ebino kud ava lee mi timo lembe ma wayero ire, en gire emaku yub mi bino i beng’wu. 18 Wabeore karacelo kud umego ma pire yik i cokiri ceke ni kum tic mi lembanyong’a. 19 M’umedo maeno, cokiri ma tung’ tung’ ung’iye kara wawoth wakugi pi nicoko dhu giramiya maeni ma ku berocwiny pi dwong’ pa Rwoth, man eno ubenyutho bende nia watie ayika nikonyo. 20 Wabetimo kumeno kara ng’atu moko kud uwec piwa rac pi giramiya maeni ma ku berocwiny ma wabecoko dhoge. 21 Kum ‘wabeii nitimo lembe ceke i ayi m’atira i wang’ Yehova kende ngo, ento bende i wang’ dhanu.’

22 Bende, wabeorogi karacelo kud umego mwa mange ma wamulo iye wang’ ma pol man wanwang’u nia etie kud amora i lembe dupa, ento kawoni etie kud amora nisagu pilembe egenowu lee dit. 23 Enre ka penji moko nuti pi Tito, etie jawodha man jatic wada pi bero mwu; kunoke tek penji moko nuti pir umego mwa mange, gitie jukwenda mi cokiri pi dwong’ pa Kristu. 24 Dong’ wuwok wunyuth ni umego maeno nia andhandha wumarugi, man wuketh cokiri mange de nen nia walulara piwu mananu ngo.

9 Pi lembe m’uneno tic mi konyo jumaleng’, pire tie tek ungo ira hai nia akiew iwu, 2 kum ang’eyo nia wutie ayika nikonyo, uketho abelulara piwu ni Jumakedonia, man ayero igi nia oro udaru doko acel niai ma wu ju mir Akaya wutie ayika nikonyo, man amora mwu umiyo bende amora i kum jumapol m’i kindgi. 3 Ento abeoro umego maenogi kara kud uwok unwang’ere nia walulara piwu i lembuni mananu, enre kara wubed andhandha ayika calu m’alar ayero. 4 Kum kan ungo, tekene wabino i beng’wu waku Jumakedonia man wanwang’u nia wutie ngo ayika, lewic binegowa pilembe wagenowu man wun de lewic binegowu. 5 Pieno, anwang’u nia etie ber ya akway umego gilar gibin i beng’wu i wang’e, kara giramiya mwu ma ku berocwiny ma wung’olo ubed ayika i wang’ saa, wek kara ebed andha giramiya ma ku berocwiny, ento ungo calu gin ma juyaku ayaka.

6 Pi lembe maeni, ng’atu m’ubecoyo ku mutwi bikayu nyanok, ento ng’atu m’ubecoyo kud amora bikayu bik. 7 Wek ng’atuman utim tap calu m’ekeco i adundene, ento ku minowang’ re ngo* kadi ma jubediye adiya de ngo, kum Mungu maru ng’atu ma miyo kud anyong’a.

8 M’umedo maeno, Mungu copo ketho bero pare ma yawe mbe ceke upong’ i beng’wu, kara saa zoo wubed ku gin ma cande ubenegowu pi nipong’o yeny mwu ceke man kara wubed ku piny ceke ma wutie ku yenyne pi nitimo tic ma ber. 9 (Tap calu ma Lembagora uyero kumae: “Epoko ku berocwinye; emiyo ni jucan. Bedopwe pare bedo mi nja.” 10 Pieno Ng’atu ma miyo kodhi lee ni jacoy kodhi man ma miyo cam ma jucamu bimiyo iwu kodhi ma wucoy; ebimiye lee man ebikonyowu kara wunwang’ adwogi dupa ma beco i tic mwu mi bedopwe.) 11 Wubelony i lembe ceke kara wunyuth berocwinywu i ayi ma tung’ tung’ man eno ubecwaluwa nidwoko foyofoc ni Mungu; 12 pilembe tic maeni ma wubetimo pi bero mi jumange utie ngo kende kende pi nipong’o yeny mi jumaleng’, ento etie bende pi nidwoko foyofoc lee ni Mungu. 13 Tic maeni mi miyo kony, ma wubetimo ubenyutho nia wutie dhanu ma nenedi, man ebiketho gibipaku Mungu pilembe wubeworo lembanyong’a ma wuberweyo iwi Kristu, man pilembe giramiya ma wujoko unyutho berocwiny mwu igi man ni dhanu mange ceke. 14 Bende, kwac ma gibekwayu piwu binyutho nia gimaruwu ni kum bero ma yawe mbe m’usagu zoo ma Mungu nyutho iwu.

15 Foyofoc ubed ni Mungu pi giramiya pare mi mananu ma korere ngo.

10 Kawoni an a Paulo, abekwayuwu ku molcwiny man bero pa Kristu, an m’a dhanu ma yoo kinde man’i kindwu, ento ayero iwu lembe thwolo thwolo kinde m’ambe kudwu. 2 Abekwayuwu nia ju ma gibeparu nia wabewotho ku kum gilar gilok nen migi, kara saa m’abitundo kuno kud awok ajukgi ku juk ma kwiny. 3 Kum kadok wabewotho calu dhanu mange, wabekiedo ngo lwiny i kum. 4 Pilembe jamlwiny ma wakiedo ko gi mi kum ungo, ento Mungu udwokogi tek pi niredho piny ceke m’ucungo ma tek. 5 Kum waberedho paru ceke ku gin ceke m’udhunjo i dhu ng’eyong’ec pa Mungu, man wabedwoko paru ceke ng’eca kara gibed wor ni Kristu; 6 man watie ayika nimiyo matira ni ng’atu m’utimo gin moko ci m’uturo cik, ka waneno nia woro mwu uromo kakare.

7 Wubeneno piny nimakere kud ayi ma ginen ko yo woko. Tek ng’atu moko uyiyo andhandha yor i iye nia etie pa Kristu, ek’epar i lembe ma e kendo: Wan de wa pa Kristu, tap calu en. 8 Lewic binega ngo kadok nwang’u ubekwayu nia akelulara kadhiri moko pi dito ma Rwoth umiyo ira mi gierowu agiera, ento mi nyothowu anyotha re ngo. 9 Abemito ngo wuwok wunwang’ nia ve abemito nyayu ndiri i iwu nikadhu kud i barua para. 10 Kum jubeyero kumae: “Barua pare gi pek man gitie ku tego i igi, ento ka en gire etuc keni kabang’e de mbe, wec pare de gi ng’ic.” 11 Dhanu ma gibeweco kumeno ging’ey nia gin ma wabekiewo i barua mwa utie tap gin ma wabitimo kinde ma wabitundo kuno. 12 Kum wang’ap ungo niyero nia watie rom ku dhanu moko ma gidodiri gigi man waporara ngo kugi. Kum kinde ma gibepimiri nimakere ku gin ma de gibeparu gin gigi nia utie cuu, eno nyutho nia gi jukusegu.

13 Kadok kumeno de, wabelulara ngo nikadhu kieu mi theritwar mwa, ento wabelulara i theritwar ma Mungu miyo iwa ma wun bende wun’i iye. 14 I andha, wabekadhu ngo kieu mi theritwar mwa calu ve nia nwang’u etundo ngo i beng’wu, kum wan re ma wabino ma kwong’a nirweyo lembanyong’a iwi Kristu nitundo i beng’wu. 15 Wabeyungara ngo pi tic ma ng’atu mange utimo en i ng’ei kieu mi theritwar ma jumiyo iwa, ento wageno nia kinde ma yiyoyic mwu ubemedere nidongo, tic ma watimo de bimedere i wang’e i teritwar mwa. Pieno wabitimo nisagu, 16 kara wacidh warwey lembanyong’a i ng’om ma bor nikadhu kaka ma wun’i iye, e wabiyungara ngo pi tic ma ng’atu mange udaru timo i theritwar pare. 17 “Ento ng’atu m’uyungere, wek eyungere pi Yehova.” 18 Kum Yehova jolo ngo ng’atu m’ubedodere gire, ento ejolo ng’atu m’eng’iyo nia ejol.

11 Akwayuwu nia wukewucira kadok ubenen ve nia wiya uyenyo nyothere de. Re nwang’u i andha de wubecira! 2 Atie ku nyeko* piwu m’etie nyeko m’uai i bang’ Mungu, kum apenjowu* ni nico acel kara aterwu ni Kristu calu nyaku ma leng’ ma sumba. 3 Ento lworo ubenega nia i ayi moko, calu thwol uwondo Eva ku rieko pare ma rac, wun de pidoiwu kud ubin unyothere ma wuwek ko mer mwu mandha man ma leng’ ma wumaru ko Kristu. 4 Kum i andha tekene ng’atu moko ubino i beng’wu man erweyo iwu pi Yesu m’uweko ma warweyo iwu, kunoke wunwang’u tipo m’uweko ma wular wujolo, kadi ng’atune rweyo iwu lembanyong’a m’uweko ma wular wuyiyo, wubejole man wucire yot yot. 5 Kum abenwang’u nia gin moko acel de mbe m’unyutho nia jukwenda mwu ma gitimiri nia ve gibamu zoo gisaga i iye. 6 Ento kadok nwang’u aweco ngo ku bodho akeca, re i andha akoso ngo ng’eyong’ec, man wanyutho iwu lembuno kamaleng’ i yore dupa man i lembe ceke.

7 Kunoke nyo atimo dubo kinde m’ajwigara kara judodwu, pilembe abino ku mutoro nirweyo iwu lembanyong’a pa Mungu mi mananu? 8 Ayaku cokiri mange kum ajolo kony i bang’gi kara atim iwu. 9 Kadok kinde m’abino i beng’wu man anwang’ara i yeny, adoko ngo ni ter ni ng’atu moko acel de, kum umego ma giai i Makedonia gipong’o yeny para ceke. Eyo, i lembe ceke agwokara kara kud adok iwu ni ter man abimedara nitimo kumeno. 10 Tekene lemandha pa Kristu n’i iya ci, abiweko ngo niyungara pi lembuni i ng’om mir Akaya. 11 Pirang’o? Nyo pilembe amaruwu ngo? Mungu ng’eyo nia amaruwu.

12 Ento gin m’abetimo, abimedara asu nitime, kara dhanu ma gibesayu thelembe ma gibed ko rom kudwa i lembe* ma gibeluliri pire kud ginwang’ thelembene. 13 Kum dhanu ma kumeno gi jukwenda mi ndra, jutic mi vupo ma giberukiri gigi kara ginen nia gitie jukwenda pa Kristu. 14 Man lembuno romo wang’u iwa ngo, kum cil Sitani de ubemedere nirukere en gire kara enen ni malaika mi der. 15 Pieno, etie ngo lembe mi zungo ka jutic pare de giberukiri gin gigi kara ginen ni jutic mi bedopwe. Ento ajiki migi bibedo nimakere ku tic migi.

16 Abeyero kendo kumae: Ng’atu moko kud upar nia wiya nyothere. Re kadok wuparu kumeno de, dong’ wukeyiya calu ng’atu ma wiye unyothere kara an de akeayungara nyanok. 17 Lembe m’abeyero kawoni abeyere ngo calu ng’atu m’ubelubo lapor pa Rwoth, ento abeyere calu ng’atu ma wiye nyothere, m’ugenere gire man m’ubeyungere. 18 Calu dhanu dupa gibeyungiri i kum,* an bende abiyungara. 19 “Wu riek” lee dit uketho wubewinjuru ma lembe moko de mbe ku ju ma wigi nyothere. 20 Ku lapor, wubewinjuru ku ng’atu m’ubedwokowu ng’eca, ku ng’atu m’ubemayu man m’ubeyaku piny mwu, ku ng’atu m’ubedodere i wiwu, man ku ng’atu m’ubepadu weng’wu.

21 Lewic ubenegowa niyero lembuni, kum ecopo nen ve nia wabedo ng’ic i lembe ma watimo.

Ento tek jumange gitimo lembe ku tegocwinygi, abeweco calu ng’atu ma wiye nyothere, an de atimo lembe ku tegocwinya. 22 Nyo gi Juebrania? An bende a Jaebrania. Nyo gitie Juisrael? An de a Jaisrael. Nyo gitie nyikway* Abraham? An de a nyakware. 23 Nyo gitie jutic pa Kristu? Abedwoko calu abelu, atie jaticne m’usagu zoo. Kum atimo tic nisagu gin ceke, jutwiya i kol wang’ ma pol nisagu gin ceke, jufoda wang’ udul man aboth ku tho wang’ dupa. 24 Wang’ abic Juyahudi gigoya del pier ang’wen wodh acel, 25 jugoya ku del wang’ adek, jung’ura ku kidi wang’ acel, aoi i nam wang’ adek, atimo diewor traka man dieceng’ duu i die nam; 26 an’i woth saa ceke, wang’ udul anwang’ara kud ariti i pii m’upong’, i cing’ weg ayeki, i kind dhanu mi thek para, i kind dhanu mi thek mange, i adhura, i langa, i nam, man i kind umego mi ndra; 27 abed atimo tic ma tek man mi kero, wang’ ma pol nindo bed ukeng’ i wang’a diewor traka, kec ku rieu ubed unega, abed akoso cam wang’ ma pol, koyo ubed unega man abed akoso kendi.*

28 M’uweko lembe maeno ma yo woko, gin moko tie m’ubepido cwinya kubang’ nindo: Adieng’a m’atie ko pi cokiri ceke. 29 Ng’a ma ng’ic ma an a ng’ic ungo? Ng’a m’ukier ma lembene unyayu ngo ng’eicwiny i iya?

30 Kan ukwayu ayungara, abiyungara pi gin m’unyutho ng’ico para. 31 Mungu ma Won Rwoth Yesu, ma tie Ng’atu ma jucikiri nipaku rondo ku rondo, ung’eyo nia abecwayu ndra ngo. 32 I adhura mi Dameski, jatela ma n’i the ng’ol p’ubimo Areta uketho jukur dhugang’ mir adhurane kara jumaka, 33 ento jugam julora ku katoko kud i wang’ madiriza mi gang’ mir adhurane, e aboth kud i cinge.

12 Ukwayu akeayungara kadok konyne mbe de. Enre abecikoro iwu pi ginmawokiwang’ mir udu man pi lembanyutha pa Rwoth. 2 Ang’eyo ng’atu moko ma jalub pa Kristu ma juting’o nitundo i polo mir adege, oro daru kadhu apar ang’wen (14) kawoni, kuno ebino i kum kunoke i kum ungo ang’eyo ngo; Mungu re m’ung’eyo. 3 Eyo, ang’eyo ng’atuno, kuno ebino i kum kunoke i kum ungo ang’eyo ngo, Mungu re m’ung’eyo; 4 jutere nitundo i paradizo man ewinjo lembe ma jucopo koro ngo man ma cik uyiyo ngo nia dhanu wec i kume. 5 Abiyungara pi ng’atu maeno ento abiyungara ngo pira gira, ndhu pi ng’ico para re. 6 Kum kadok aromo maru nia ayungara de, abibedo ngo abelu pilembe nwang’u abeyero lemandha. Ento abecerara nitimo kumeno, kara ng’atu moko kud udoda nisagu gin m’ebeneno abetimo kunoke m’ebewinjo ayero, 7 kende kende pilembe nia anwang’u lembanyutha ma wang’u ijo.

Pi nicera kara kud adok jakuhaya, jumiyo ira ukudho i ring’kum, m’utie ve malaika pa Sitani uwoth bepada,* kara kud adodara nikadhu mukero. 8 Akwayu Rwoth wang’ adek iwi lembuni nia timba ekabe cen kud i kuma. 9 Ento edwoko ira kumae: “Bero para ma yawe mbe uromo iri, kum tego para doko tek masagu i ng’ico.” Pieno, abiyungara kud anyong’a ma lee pi ng’ico para kara tego pa Kristu ubed i wiya calu hema. 10 Kum kumeno, anyong’a nega kinde m’a ng’ic, kinde ma pi Kristu jubeyanya, an’i can piny, anwang’ara ku ragedo man peko. Kum kinde m’a ng’ic, i saa maeno re ma nwang’u a tek.

11 Aweco calu ng’atu ma wiye nyothere. Wun re ma wucwala nitimo kumeno, pilembe nwang’u wun re ma wucikuru nicwaku pira. Kum kadok nwang’u kabang’a mbe de, re atimo ngo gin acel de m’ubenyutho nia jukwenda mwu ma gitimiri nia ve gibamu zoo no gisaga. 12 Eyo, ku cirocir ma dit atimo lembe m’unyutho nia andha atie jakwenda, dok ebed nikadhu kud i giranyutha, thangu, man udu. 13 Girang’o ma ber m’atimo ni cokiri mange m’atimo ngo iwu? Ang’eyo kende kende nia adoko ngo iwu ni ter. Dong’ akwayu wuwek ira kosa maeno.

14 Nen! Eni tie wang’ mir adege m’atie ayika nibino i beng’wu man abiwok doko ngo iwu ni ter. Kum abeyenyo ngo piny mwu, ento abeyenyo wun; i andha, tie ngo awiya re ma gwoko piny ni junyodo migi, ento junyodo re ma gwoko piny ni awiya migi. 15 Ento an, abinyotho piny para ceke kud anyong’a ma lee man abidaru tego para ceke piwu. Dong’ kan amaruwu thorukeno ngi, pirang’o ke wubemara nyanoki? 16 Ento kadok kumeno de, abedo ngo iwu ni ter. Re wubeyero nia atiyo ku “rieko ma rac” man amakuwu i “uwic.” 17 Ayaku ngo piny mwu nyanok de nikadhu kud i bang’ ng’atu acel de m’aoro i beng’wu, kumeno ngo? 18 Arero Tito nia ebin i beng’wu man aore karacelo kud umego mange. Tito uwok uyaku ngo piny mwu moko acel de, kumeno ngo? Wawotho ku tipo acel man wan zoo wawotho i gengi ma rom, kumeno ngo?

19 Nyo wubeparu nia nitundo kawoni wabecero bang’wa i weng’wu? Wabeweco i wang’ Mungu, wan ma watie julub pa Kristu. Ento jumerna, gin ceke ma wabetimo, wabetimogi pi niteng’owu. 20 Kum lworo ubenega nia i ayi moko saa m’abituc kuno, kud awok anwang’ nia wutie ngo ve m’abemito, man wun de kud wuwok wunwang’ nia atie ngo ve ma wubemito; ento awok anwang’ dhau, kumira, kwinyo, teliri, yeronying’, cidonying’, kuhaya man yakini. 21 Saa moko nyo kinde m’abibino kendo i beng’wu, Mungu para bijwiga i weng’wu man saa moko nyo bikwayu awaki pi jumapol m’i kind dhanu ma gilar gidubo yor i wang’e, ento giloko ngo cwinygi pi dubo ma gitimo mi lemblewic, lembsasa mi tarwang’* ku timo mir acidi man mi thwon.*

13 Eni tie wang’ mir adege m’abebino i beng’wu. “Ni kum lembatuca mi jumulembe* ario kunoke adek lembe ceke ucikere nicungo kakare.” 2 Kadok nwang’u atie ngo karacelo kudwu kawoni, udong’ ubedo ve atie karacelo kudwu wang’ mir arionde, man alar abemiyo cimowang’ ni dhanu ceke ma gidubo i wang’e man ni dong dhanu mange ceke nia kan abibino kuno kendo, abiwok timo ngo igi kisa; 3 kum wubesayu gin m’unyutho nia Kristu, ma tie ng’ic ungo yor i beng’wu ento m’ubenyutho tego pare i kindwu, ubeweco andhandha nikadhu kud i bang’a. 4 Kum i andha jugam jugure iwi yen ni kum ng’ico, ento etie kwo ni kum tego pa Mungu. Andha wan de watie ng’ic karacelo kude, ento wabibedo kwo karacelo kude ni kum tego pa Mungu m’ubenyuthere i beng’wu.

5 Wumeduru ning’iyuru ka nyo wun’i yiyoyic; man wumeduru nineno ka nyo wutie kit dhanu ma nenedi. Kunoke nyo wung’eyo ngo nia Yesu Kristu ni i acel kudwu? Tek ebedo kumeno ngo, nwang’u Mungu kwerowu. 6 Ento ageno andhandha nia wung’eyo ya Mungu ukwerowa ngo.

7 Dong’ wabekwayu Mungu nia kud wutim lembe moko acel de ma rac; utie ngo nia wamito wanen ni dhanu ma jujolo, ento kara wutim lembe ma ber kadok nwang’u wanen ni dhanu ma jukwero. 8 Kum wacopo timo ngo gin moko pi nicero lemandha, ento kende kende pi lemandha. 9 Andhandha anyong’a negowa kinde ma wa ng’ic, ento wun wutie tek. Man waberwo pi lembe ma e: Wudwog i yo m’atira. 10 Pi thelembe maeno re m’uketho akiewo iwu lembuni kinde m’ambe kudwu, kara kinde m’abibedo karacelo kudwu, kud atii ku kwinyo ku dito ma Rwoth umiyo ira, ento atii kude pi nigierowu agiera ento ungo pi ninyothowu anyotha.

11 Tokcen ne umego, wumeduru nibedo kud anyong’a, wuwek judwokwu i yo m’atira, wuwek jujuk cwinywu, wubed ku paru m’urombo, man wukwo ku kwiyocwiny; e Mungu mi mer man mi kwiyocwiny bibedo kudwu. 12 Wumothuru i kindwu ku cwiyolimb ma leng’. 13 Jumaleng’ ceke gicwalu iwu moth migi.

14 Bero ma yawe mbe pa Rwoth Yesu Kristu, karacelo ku mer pa Mungu man tipo ma leng’ ma wan ceke wanwang’u ubed kudwu ceke.