BARUA MIR ARIO NI JUTHESALONIKI

1 Niai kud i bang’ Paulo, Silvano* man Timoteo, ni cokiri mi Thesaloniki ma gi pa Mungu ma Wegwa man Rwoth Yesu Kristu:

2 Bero ma yawe mbe man kwiyocwiny pa Mungu ma Wego man pa Rwoth Yesu Kristu ubed kudwu.

3 Umego, wabenwang’u nia wacikara nidwoko foyofoc ni Mungu saa ceke piwu. Man etie lembe ma kakare, kum yiyoyic mwu ubemedere ameda nidongo man wun ceke mer ma ng’atuman umaru ko wadi ubemedere ameda. 4 Eno uketho wabelulara piwu i kind cokiri pa Mungu ni kum cirocir man yiyoyic ma wubenyutho i ragedo man peko ceke ma wubenweng’uru ko.* 5 Lembe maeno ceke ubenyutho nia Mungu upoko lembe atira, man eno biketho jukwanwu ni dhanu m’uromo ku Ker pa Mungu ma de nwang’u wubeneno can pire.

6 Kum etie lembe ma pwe ni Mungu nia ecul kawang’ masendi ni ju m’ubesendowu. 7 Ento wun ma jubesendowu, wubinwang’u yom karacelo kudwa saa ma Rwoth Yesu binyuthere niai kud i polo karacelo ku jumalaika pare ma gi weg tego 8 i mac m’ubeliel piet piet, kinde m’ebiculo kwor ni ju m’ung’eyo ngo Mungu man ni ju m’ubeworo ngo lembanyong’a pa Rwoth mwa Yesu. 9 Dhanu maeno gibinwang’u matira mi nyoth ma rondo ku rondo, man jubikabugi cen kud i wang’ Rwoth; e gibineno ngo kendo dwong’ mi tego pare. 10 Lembe maeno bitimere kinde ma Rwoth bibino kara juyunge pi jumaleng’ pare man kara dhanu ceke ma gitie ku yiyoyic i iye ginene ku wang’uic; calu wuyiyo lembe ma wayero iwu, e wun de wubibedo i kind dhanu maeno.

11 Pi thelembe maeni re ma waberwo saa ceke piwu nia Mungu mwa ukwanwu ni dhanu m’uromo ku lwong’o m’elwong’o kowu, man nia ni kum tego pare eketh lembe ceke ma beco m’emaru utimere man bende tic ceke ma yiyoyic mwu ucwaluwu nitimo. 12 Watimo kumeno kara nying’ Rwoth mwa Yesu unwang’ dwong’ ni kumwu man wun de wunwang’ dwong’ ni kume calku bero ma yawe mbe pa Mungu mwa man pa Rwoth Yesu Kristu.

2 Ento umego, pi lembe m’uneno bedonuti pa Rwoth mwa Yesu Kristu man cok ma jubicoko kowa karacelo kude, wabekwayuwu 2 nia kud wuwek juwing wiwu yot yot man kud wuwek jung’ab cwinywu ku wec moko ma nia tipo uyuyo i wiye,* kadi ku lembe moko ma jubekoro, kunoke ku barua moko m’ubenen nia uai i bang’wa m’ubetuco nia ceng’ pa Yehova utundo.

3 Kud wuwek ng’atu moko uwondwu i ayi moko ci, pilembe ceng’ maeno bitundo ngo ka fodi jai ular uwok ungo man ka fodi jaturcik unyuthere ngo, ma en e ng’atu ma jubinyotho. 4 Ebijai man ebidodere gire iwi giki ceke ma dhanu lwong’o ya mungu kunoke ma girwo igi, e ebibedo kadok cil i hekalu pa Mungu man ebinyuthere gire kamaleng’ nia etie mungu. 5 Wubepoi ungo nia kinde m’abino karacelo kudwu abed ayero iwu lembe maeni?

6 Ento kawoni wung’eyo gin ma fodi ubecere kara ebin enyuthere i saane. 7 I andha, tego mi turocik eno dong’ ubetiyo i amung’ nitundo ma ng’atu ma fodi kawoni ubecere biai ko. 8 I ng’eye, jaturcik eno binyuthere kamaleng’, en m’etie ng’atu ma Rwoth Yesu binego ku yamu mi dhoge* man ebinyothe cen ku nyuthonyuth mi bedonuti pare. 9 Ento jaturcik eno biwok ni kum tego pa Sitani man ebitimo kwond udu ma tung’ tung’, ebiwondo dhanu ku giranyutha, man ebitimo thangu dupa 10 ku kwond vupo ceke mi turocik ni dhanu ma matira migi bibedo tho, pilembe giyiyo ngo man gimaru ngo lemandha ma nwang’u romo bodhogi. 11 Pi thelembe maeno, Mungu uweko giwondiri ku ponji mi ndra kara giyii vupo, 12 wek kara jubin jupok lembe i wigi ceke, pilembe giyiyo ngo lemandha ento anyong’a ubenegogi i gondiri.

13 Umego, wabenwang’u nia wacikara nifoyo Mungu saa ceke piwu, wun ma Yehova umaruwu, pilembe niai i acaki Mungu ung’iyowu kara wubin wubothi, edwokowu leng’ ni kum tipo pare man ni kum yiyoyic ma wutie ko i lemandha. 14 Elwong’owu ni bothne nikadhu kud i lembanyong’a ma waberweyo, kara wunwang’ dwong’ pa Rwoth mwa Yesu Kristu. 15 Pieno umego, dong’ wucung nging’ nging’ man wumok kii i kum lembe ma juponjo kowu, dok ebed ku dhok kadi ku barua m’uai i bang’wa. 16 M’umedo maeno, wek Rwoth mwa Yesu Kristu en gire man Mungu ma Wegwa m’umaruwa, m’umiyo iwa bende jukocwiny ma thum ungo, man genogen ma ber ni kum bero pare ma yawe mbe 17 gijuk adundewu man gimii iwu tego kara saa ceke wutim man wuyer lembe ma beco.

3 Pi nidaru, umego, wumeduru nirwo piwa kara lembe pa Yehova umedere nimew pio pio man ninwang’u dwong’, tap calu m’ebetimere ko i kindwu, 2 man kara waboth kud i cing’ jutimrac man judubo, kum tie ngo dhanu ceke ma gitie ku yiyoyic. 3 Ento calu Rwoth pong’o lembe m’eng’olo, ebidwokowu tek man ebigwokowu ni ng’atu ma rac.* 4 M’umedo maeno, watie ku genogen i Rwoth piwu nia wubeworo telowic ma wamiyo iwu man nia wubimeduru niwore. 5 Dong’ Rwoth umedere nitelo wi adundewu kara wumar Mungu man wunyuth cirocir pi Kristu.

6 Umego, kawoni wabeng’olo iwu i nying’ Rwoth mwa Yesu Kristu, nia wukoyuru cen kud i kum umego ceke m’ubewotho swa, man m’ubeworo ngo telowic ma wunwang’u* niai kud i bang’wa. 7 Kum wun giwu de wung’eyo gin ma wucikuru nitimo pi nilubo lapor mwa, pilembe watimara ngo swa i kindwu, 8 kadok cam pa ng’atu moko de wacamu ngo mananu. Tung’ ku maeno, wamulara ku tic ma tek, wabed watimo tic dieceng’ ku diewor kara kud wadok ni ter ma pek ni ng’atu moko acel de m’i kindwu. 9 Utie ngo nia wambe ku twero mi penjo piny i beng’wu, ento wabemito nia wan giwa wabed iwu ni lapor ma wucopo lubo. 10 Kinde ma wabino i beng’wu, wabed wamiyo iwu telowic ma e: “Tek ng’atu moko ubemito ngo etim tic, dong’ acama de kud ecam.” 11 Ento wabewinjo nia jumoko gibewotho swa i kindwu, gibetimo ngo tic nyanok de, man gibemondo i lembe m’uneno gin ungo. 12 Ni dhanu ma kumeno, wabeng’olo man wabekwayugi i nying’ Rwoth Yesu Kristu nia gicikiri nitimo tic ku cwinygi m’upoto man gicam cam ma ginwang’u gin gigi.

13 Ento wun umego, kud wuol ku timo gin ma ber. 14 Tek ng’atu moko ubeworo ngo lembe ma wagoro i barua maeni, wunen kude ma tek* man wuwek nidikuru kude kara lewic umake. 15 Re kadok kumeno de, kud wunene ni jakwor, ento wumeduru nijuke calu umego.

16 Dong’ wek Rwoth mi kwiyocwiny umii iwu kwiyocwiny i lembe ceke man saa zoo. Rwoth ubed kudwu ceke.

17 Eni tie moth para m’akiewo ku cinga gira an a Paulo, etie bende ayi m’abed aketho ko cinga i the barua para ceke man ayi m’agoro kogi.

18 Bero ma yawe mbe pa Rwoth mwa Yesu Kristu ubed kudwu ceke.