BARUA MI KWONG’O NI TIMOTEO

1 Niai kud i bang’ Paulo ma jakwenda pa Kristu Yesu, calku lembang’ola pa Mungu ma Jalar mwa man Kristu Yesu ma en e genogen mwa, 2 ni Timoteo* ma tie nyathin para mandha i yiyoyic:

Bero ma yawe mbe, kisa man kwiyocwiny pa Mungu ma Wego man pa Kristu Yesu ma Rwoth mwa ubed kudi.

3 Tap calu m’alar akweyi nia ibed i Efeso kinde m’abecicidho i Makedonia, kawoni bende abekweyi nia ibed asu kuno kara ikwer dhanu moko nia kud giponj ponji m’ukoc, 4 man kud giketh wigi i kum lembatada mi vupo kadi i kum kwanu thekwaru. Kum gin maeno gimiyo ngo bero moko kadok nyanok de, ento giketho jucaku coro lembe swa, man gitie ngo i kind piny ma Mungu umiyo pi niteng’o yiyoyic mwa. 5 I andha, lembakeca mi telowic* maeni utie nia wabed ku mer m’uai kud i adunde m’abombi mbe i iye, ku pidocwiny ma leng’ man yiyoyic m’umbe umbili. 6 Jumoko giweko gin maeni man gilokiri gidok nilubo piem ma kathere mbe. 7 Gibemito gibed juponji mi cik, ento gibenyang’ ungo i gin ma gibeyero kadi gin ma gibeketho nwoc i wiye ku tego migi ceke.

8 Enre wang’eyo nia Cik utie ber tekene ng’atini ubetiyo kude cuu,* 9 man tekene enyang’ nia jumiyo cik ungo pi won bedopwe, ento pi dhanu ma turo cik man ma jujai, pi dhanu ma woro ngo Mungu man judubo, pi dhanu ma gwoko ngo bedoleng’ migi* man pi ju ma cayu gin ma leng’, pi dhanu ma nego wego man ma nego mego, pi jumange ceke ma nego nek, 10 pi ju ma timo lembsasa mi tarwang’,* pi co ma vuto ku co wagi, pi ju ma kwalu dhanu, pi juvupo, pi ju ma kwong’o kwong’ mi ndra, man pi gin moko ci m’ujai i kum ponji ma ber* 11 nimakere ku dwong’ mi lembanyong’a pa Mungu ma jamutoro ma juketho i kora.

12 Abedwoko foyofoc ni Kristu Yesu ma Rwoth mwa m’umiyo ira tego, pilembe enwang’u nia atie ng’atu ma jugeno uketho emiyo ira tic, 13 kadok nwang’u con abino jayer lembacidi, janyay ragedo man jacac; ento jutimo ira kisa kum abed atimo lembuno m’umbe ng’eyong’ec man m’umbe yiyoyic. 14 Enre bero ma yawe mbe pa Rwoth mwa unyuthere nisagu karacelo ku yiyoyic man mer ma n’i Kristu Yesu. 15 Wec m’ulubo e utie lemandha man ukwayu juyiye andhandha: Kristu Yesu ubino i ng’om pi nibodho judubo, ma i kindgi atie ma kwong’a. 16 Ento jutimo ira kisa an m’a jadubo ma kwong’a, kara ni kuma, Kristu Yesu unyuth cirocir pare ceke man eketh adok ni macal ni dhanu ceke ma giyiye pi kwo ma rondo ku rondo.

17 Dong’ yung ku dwong’ ubed nja ku nja ni Ubimo ma rondo ku rondo m’etho ngo, m’enen ungo man en kende re m’etie Mungu. Amen.

18 Nyathin para Timoteo, abemiyo iri telowic* maeni nimakere ku lembila ma jular juewo piri kara ni kumgi imediri nikiedo lwiny ma ber, 19 m’ibegwoko ko yiyoyic peri man pidocwiny ma ber ma jumoko giweko, uketho yiyoyic migi umwony. 20 Himenayo gikud Alekzandre gin’i kind dhanu maeno man amiyogi ni Sitani, kara twiny ma ginwang’u uponjgi nia kud giyer lembacidi.

2 Pieno, gin ma kwong’a m’abekwayu i beng’wu utie nia wutim kwayukwac, wurwo, wukway man wudwok foyofoc pi kwond dhanu ceke, 2 pi jubim man pi dhanu ceke ma gitie ku dito, kara wamedara nikwo ma kumwa poto man ma cwinywa kwiyo, ma wabemoko ko kikiki i kum Mungu i lembe ceke man wabetimo lembe ceke akethacwinywa. 3 Kum eno tie lembe ma ber man eyiyere bende i wang’ Mungu ma Jalar mwa, 4 m’ubemito nia kwond dhanu ceke gibothi man gituc i bang’ ng’eyong’ec ma tap mi lemandha. 5 Kum Mungu tie acel, man jarib kind dhanu ku Mungu utie ng’atu acel, ma en e Kristu Yesu, 6 m’umiyere gire ni jamgony m’uromo pi dhanu ceke; eno re m’utie gin m’ukwayu dhanu gituc pire tap i saane. 7 Pi lembatuca maeno, jung’iya nia abed jarwey man jakwenda kara aponj dhanu mi thek mange iwi yiyoyic man lemandha. Abeyero lemandha, acwayu ndra ngo.

8 Pieno, abeyenyo nia i kakare ceke jumaco gimediri nirwo ma giting’o cing’gi malu, ma lembe moko mbe i igi, m’umbe ng’eicwiny kadi piem. 9 Jumamon bende kumeno, gicikiri nikendo kendi m’umaku piny, ma cuu man mi woro, ungo ku kit wic m’akieda kadi mola ma kwar kadi tigo, kadi bongu ma bei migi tek lee, 10 ento girukiri ku tic ma beco calu m’eromo ku mon ma gituco ya giworo Mungu.

11 Ukwayu dhaku uponj lembe ling’ ling’ ku jwigiri ma lee. 12 Abemiyo ngo kaka ni dhaku nia eponj ponji kunoke nia ebed ku dito iwi ng’atu ma nico, ento ecikere nibedo ling’. 13 Kum ku kwong’a jular jucwiyo Adamu, kan i ng’eye jucwiyo Eva. 14 Bende juwondo Adamu ngo, ento dhaku re ma juwondo ma ceke man edoko jaturcik. 15 Re kadok kumeno de, dhaku biboth ni kum nyolo nyodo, tekene emedere nibedo ku yiyoyic, ku mer, leng’o man ma wiye ubetiyo ma ber.*

3 Wec maeni utie lemandha: Tek ng’atu moko ubeyenyo edok jadit cokiri, nwang’u ebeyenyo tic ma ber. 2 Pieno, jadit cokiri ucikere nibedo ng’atu m’adote mbe i wiye, cwar dhaku acel, ng’atu ma kadhu ngo mukero i kwo pare, ng’atu ma wiye tiyo ma ber,* ma pangu lembe kakare kakare, jajol, jabodho mi ponji, 3 ng’atu ma mer ungo ku kong’o, ma goyojo ngo, ma i lembe pare tek ungo, jarop ungo, jamar sente ngo; 4 ento ebed ng’atu ma bimo wi* juode i ayi ma ber, ma ketho awiya pare giwore m’umbe lele 5 (kum ka ng’atu moko ung’eyo ngo nibimo wi* juode gire, ebilund gwoko cokiri pa Mungu nenedi?), 6 kud ebed jayic ma nyen maru kuhaya bimondo i iye man ekadh i pokolembe ma rom ma Wonabali unwang’u. 7 M’umedo maeno, ecikere nibedo ng’atu ma dhanu ma woko de giyero pire ber,* kara kud junyay acidi i wiye man kud epodh i uwic pa Wonabali.

8 Kumeno bende, jukony tic gicikiri nibedo dhanu ma wayawaya ngo, kud gibed dhanu ma dhoggi ario,* kadi ma madhu kong’o akeca, man ma sayu ngo ku cwinygi ceke nibedo ku jukupiny i ayi m’atira ngo; 9 ento gimok kii i kum lembamung’a ma leng’ mi yiyoyic ku pidocwiny ma leng’.

10 Bende, kwayu jukejular jupimgi pi nineno ka nyo giromo; man kan adote mbe i wigi, e gitim calu jukony tic.

11 Kumeno bende, mon gicikiri nibedo dhanu ma wayawaya ngo, ma yero nying’ ungo, ma kadhu ngo mukero i kwo migi, ento ma gwoko bedoleng’ migi i lembe ceke.

12 Maku jakony tic ubed cwar dhaku acel, m’ubebimo wi* awiya man wi juode i ayi ma ber. 13 Kum jumaco ma gibetimo tic i ayi ma ber pigi ng’eyere ma ber, man giweco pi yiyoyic ma gitie ko i Kristu Yesu ku tegocwiny ma dit.

14 Abekiewo iri lembe maeni kadok nwang’u atie ku genogen nia abibino i beng’i nindo ma ceng’ini eni, 15 kara kan agalu, ing’ey maram icikiri niwotho ko i ot pa Mungu ma tie cokiri pa Mungu ma kwo, mbegi man kathere mi lemandha. 16 Ma jiji mbe, lembamung’a ma leng’ maeni mi moko kikiki i kum Mungu e dwong’: ‘Enyuthere i kum, jukwane ni won bedopwe i tipo, enyuthere ni jumalaika, jurweyo pire i kind thek, juyiye i ng’om man jujole malu i dwong’.’

4 Ento tipo pa Mungu uyero kamaleng’ nia i nindo m’ubino, jumoko bibadhiri kud i kum yiyoyic, kum gibiketho wigi i kum lembe ma tipo mi ndra uyuyo i wiye man ponji mi pajogi; 2 gibiwinjo vupo mi weg umbili ma pidocwinygi udhuko ve junyele* ku cuma ma lieth. 3 Gibikwero ya kud jugamiri man gibing’olo ni dhanu nia kud gicam cam moko, ma ke Mungu ucwiyo kara dhanu ma gitie ku yiyoyic man ng’eyong’ec ma tap i lemandha gicam ma gibedwoko ko foyofoc ire. 4 Kum gin moko ci ma Mungu ucwiyo utie ber, man piny moko mbe ma jucikiri nikwero tek jubejole ku dwoko foyofoc, 5 pilembe Mungu udwoke leng’ ni kum lembe pare man ni kum rwo ma jurwo i wiye.

6 Kan imiyo juk maeni ni umego, e ibibedo jatic ma ber mandha pa Kristu Yesu m’ubetungere ku lembe mi yiyoyic man mi ponji ma ber m’ilubo cuu. 7 Kud iwinj lembuda mi ndra man ma cido Mungu, calu ve ma mon dongo gibed gikoro. Tung’ ku maeno, tim kero peri ceke* kara inyuth nia imoko kikiki i kum Mungu. 8 Pilembe rieyokum utie ku bero ma nyanok, ento nimoko kikiki i kum Mungu utie ku bero i lembe ceke; kum etie ku lembang’ola mi kwo ma kawoni man mi kwo ma bibino. 9 Lembe maeno tie lemandha m’uromo wayii kubang’e kubang’e. 10 Eno re m’uketho wabetimo tic ma tek man wabeii ku kero mwa ceke pilembe waketho genogen mwa i Mungu ma kwo, m’e Jalar mi kwond dhanu ceke, asagane mi ju ma gibegwoko bedoleng’ migi ire.

11 Mediri nimiyo telowic maeni man niponjogi de. 12 Kud iwek ng’atu moko uceyi ki nia i nyathin. Ento i wec, i timo, i mer, i yiyoyic man i leng’o, bed lapor ni ju ma gimoko kikiki i kum Mungu. 13 Mediri nimiyiri i somo piny i wang’ dhanu, i jukojuk* man i ponji, cil m’abitundo ko kuno. 14 Kud iwenj giramiya m’umiyere iri nikadhu kud i lembila kinde ma guriri mi judong cokiri giketho cing’gi i wii. 15 Bed ipar cuu pi lembe maeni; miyiri zoo i igi, kara dhanu ceke unen kamaleng’ nia ibeteng’ini. 16 Bed ku weng’i i kumi giri man i kum ponji peri saa ceke. Mediri asu nitimo gin maeni, kum tek itimo kumeno, ibibodhiri giri man ibibodho bende ju m’ubewinji.

5 Kud idhau adhawa iwi ng’atu m’uteng’ini. Ento kwaye akwaya calu wego, kway awobi calu umego, 2 mon dongo calu mego, mon ma nyir calu nyimego, ma nwang’u itie ku timo m’umaku piny yor i bang’gi.

3 Yung montho ma coggi utho andha.* 4 Ento ka dhatho moko utie kud awiya kunoke nyikwaye, gicikiri nilar gwoko juruot migi gigi pi ninyutho nia gimoko kikiki i kum Mungu, man gicikiri nidwoko kawang’ bero ma junyodo migi man kwaru migi utimo igi; kum maeni tie gin ma ber i wang’ Mungu. 5 Enre dhatho ma cware utho andha man m’umbe ku piny moko acel de ketho genogen pare i Mungu, emiyere i rwo man kwayukwac diewor ku dieceng’. 6 Tung’ ku maeno, dhatho m’ubemiyere nipong’o awanya mi kume utie avu kadok nwang’u e kwo. 7 Pieno, mediri nimiyo igi telowic* maeni kara gibed m’adote mbe i wigi. 8 I andha, ka ng’atu moko ubepong’o ngo yeny mi jupare asagane mi juode ma dhe, nwang’u ekwero yiyoyic man edoko rac ma sagu kadok ng’atu m’umbe ku yiyoyic.

9 Dhatho ma jubikiewo nyinge ucikere nibedo dhatho ma oro pare pier abusiel (60) niidho malu, m’ubino dhaku pa nico acel kende, 10 ma pire uyik ni kum lembe ma beco m’etimo, m’utungo awiya, m’ubino jajol, m’ulwoko tiend jumaleng’, m’ukonyo ju ma n’i peko man m’umiyere i tic ma beco ceke.

11 Tung’ ku maeno, kud ikiew nying’ montho ma nyir, pilembe kinde m’ava kumgi utang’ man ubecerogi ku timo ni Kristu, e gimito gigier. 12 Pieno, gibiwayu pokolembe i wigi pilembe giweko lembang’ola ma gilar gitimo. 13 I saa ma rom eno giromo doko junyap, ma nwang’u giwotho ot kubang’ ot; eyo gidoko junyap kende ngo ento gidoko bende juyer nying’, gicaku mondo i lembe mi dhanu mange man niweco iwi lembe m’ukwayu ngo giwec i wiye. 14 Pieno, abeyenyo nia montho ma nyir gigier, ginyol awiya, gigwok udi migi, kara kud gimii kaka ma jujai ucay kowa. 15 Kum jumoko dong’ gidaru lokiri gidok nilubo tok Sitani. 16 Tek dhaku moko ma jayic utie ku wedi pare moko ma gi montho, kwayu ekonygi kara kud gibed ni ter ni cokiri. Eno biketho cokiri bikonyo montho ma coggi utho andha.*

17 Maku jukwan judong cokiri ma gibetelo wi cokiri i ayi ma ber nia giromo ku yung wang’ ario, asagane ju ma gibetimo tic ma tek mi yero lembe pa Mungu man mi ponji. 18 Kum Lembagora uyero kumae: “Kud itwii dhu thwon dhiang’ kinde m’ebeyoko cam,” man eyero bende kumae: “Jatic uromo ku cul pare.” 19 Kud iyii adote ma jukelo iwi ng’atu m’uteng’ini,* ndhu ni kum lembatuca mi jumulembe ario kunoke adek. 20 Ju ma gibetimo dubo, jukgi i wang’ dhanu ceke, kara ebed ni cimowang’ ni jumange.* 21 Abeng’olo iri ma tek i wang’ Mungu, i wang’ Kristu Yesu man i wang’ jumalaika ma jung’iyo, nia iwor telowic maeni m’ibeng’iyo ko i lembe ceke cuu man m’umbe akoyakoya.

22 Kud iketh cingi nyapio pio iwi ng’atu moko ki* man kud idikiri i dubo mi jumange; gwokiri giri leng’.

23 Kud ibed imadh pii kende, ento bed imadh bende pigulok moko nyanok pi konyo cino ii man pi twoyo ma besendi.

24 Dubo mi dhanu moko ng’eyere kamaleng’ man eketho jupoko lembe ndhundhu i wigi, ento mi jumange dok ng’eyere kamaleng’ i ng’eye. 25 Kumeno bende, tic ma ber pigi ng’eyere kamaleng’ man kadok ma pigi ung’eyere ngo de jucopo kanugi ngo.

6 Ukwayu dhanu ma gitie ng’eca* gimediri nikwanu judongo migi nia giromo ku yung ceke, kara kud jucid nying’ Mungu man ponji pare nyanok de. 2 M’uweko maeno ju ma judongo migi utie juyic, wigi kud ubed tek i bang’gi pilembe nia gitie umego. Ento gicikiri nibedo ayika nitimo tic lee nisagu, kum ju m’ubenwang’u bero mi tic migi ma ber utie juyic wagi man umego migi ma gimaru.

Mediri niponjo lembe maeni man nimiyo juk maeni. 3 Tek ng’atu moko ubeponjo ponji m’ukoc man eyiyo ngo telowic ma ber* m’uai i bang’ Rwoth mwa Yesu Kristu, man ka gin m’ebeponjo copo cwalu ngo dhanu kara gimok kikiki i kum Mungu, 4 eca nwang’u kuhaya re m’ubesende man gin m’ebenyang’ i iye de mbe. Emiyere ku tego pare zoo i kum piem man i kum teliri iwi wec. Lembe maeno nyayu kumira, dhau, yeronying’, nibedo ku paru ma rac iwi ng’atini; 5 ecwalu bende dhanu ma rieko migi nyothere man ma dong’ ginyang’ ungo i lemandha i teliri saa ceke iwi lembe ma kabang’gi mbe. Dhanu maeno paru nia nimoko kikiki i kum Mungu utie yore mi nwang’u piny. 6 I andha re, nimoko kikiki i kum Mungu miyo mugisa lee, tekene ng’atini ung’eyo nibedo kud anyong’a i kum piny m’etie ko.* 7 Kum wakelo ngo piny moko iwi ng’om, man wacopo ai de ngo ku piny moko. 8 Pieno, tekene watie ku cam man kendi,* dong’ cwinywa ucung kum gin maeni.

9 Ento dhanu ma gibeyenyo ku cwinygi ceke nia gibed julonyo gipodho i abidhe, i uwic man i lembkasegu kud i awanya dupa ma reco ma terojo i peko man i nyoth. 10 Kum mer ma jumaru ko sente utie ulag kwond lembe ceke ma reco, man jumoko ma gimiyiri i merne gikier bor kud i kum yiyoyic man gidhuyiri gigi ku peko dupa.

11 Ento in m’i dhanu pa Mungu, ring cen lembe maeno ceke. Enre lub tok bedopwe, wodhiri ni Mungu, yiyoyic, mer, cirocir man molcwiny. 12 Kied lwiny ma ber mi yiyoyic; mok kikiki i kum kwo ma rondo ku rondo ma jugam julwong’i pire man m’ituco pire kamaleng’ i wang’ jumulembe dupa.

13 I wang’ Mungu m’ubegwoko gin ceke kwo, man i wang’ Kristu Yesu m’umiyo lembatuca ma ber kamaleng’ i wang’ Pontio Pilatho, abeng’olo iri 14 nia iwor cik man ibed leng’ m’adote mbe i wii nitundo i nyuthonyuth pa Rwoth mwa Yesu Kristu, 15 ma Jabim ma jamutoro ma en kende re m’esagu zoo, binyutho i saa m’ukethere. Etie Ubimo mi ju m’ubebimo man Rwoth mi rwodhi, 16 en kende re m’etie ku kwo ma tho ngo, m’ebedo i lero ma jucopo tundo ngo i kume, ma ng’atu moko mbe m’unene man ma copo nene. Yung man tego ma rondo ku rondo ubed ire. Amen.

17 Ng’ol ni ju ma gi julonyo i ng’om maeni* nia kud gibed jukuhaya, man kud giketh genogen migi i lonyo ma thum, ento i Mungu ma miyo iwa gin ceke lee mandha kara wabed ku mutoro. 18 Ng’ol igi nia gitim bero, eyo, gilony i tic ma beco;* gibed weg berocwiny,* man gibed ayika nikonyo jumange ku piny migi, 19 e gibicoko igi lonyo i kaka m’agwoka, niwacu gibiketho igi kathere ma ber ma gibigiero i wiye i nindo m’ubino, kara gimak kikiki kwo mandha.

20 Timoteo, gwok gin ma jumiyo i beng’i, koyiri bor kud i kum wec ma iye nanu m’ubecido gin ma leng’, man kud i kum piem ma dhanu ubewondiri nilwong’o nia “ng’eyong’ec.” 21 Kum jumoko ma gimiyiri ninyutho nia gitie ku ng’eyong’ec maeno gikier kud i kum yiyoyic.

Bero ma yawe mbe ubed kudi.