BARUA MIR ARIO NI TIMOTEO

1 Niai kud i bang’ Paulo ma jakwenda pa Kristu Yesu ni kum yeny pa Mungu man nimakere ku lembang’ola mi kwo ma ni kum Kristu Yesu, 2 ni Timoteo ma nyathin para m’amaru:

Bero ma yawe mbe, kisa, man kwiyocwiny pa Mungu ma Wego man pa Kristu Yesu ma Rwoth mwa ubed kudi.

3 Abedwoko foyofoc ni Mungu m’abetimo ire tic ma leng’ calu ma kwaru para gibed gitimo, m’atie ku pidocwiny ma leng’; bende abeweko ngo nyanok de nipoi piri i kwayukwac para diewor ku dieceng’. 4 Kinde m’abepoi pi piweng’i, ava neni maka mi tuko de ngo, man kinde m’abineni anyong’a binega lee. 5 Kum abepoi pi yiyoyic peri m’umbe umbili m’ular ubino ku kwong’a i wang’umiri ma Lois man i meru ma Eunike, man ayiyo andhandha nia en’i ii bende.

6 Pi thelembe maeni, abepoyi nia iop giramiya pa Mungu ma n’i ii calu mac, m’inwang’u ni kum cinga m’aketho i wii. 7 Kum Mungu umiyo ngo iwa tipo mi lworo, ento mi tego, mi mer man mi wic m’ubetiyo ma ber. 8 Pieno, lewic kud unegi nirweyo pi Rwoth mwa, man lewic kud unegi pira an m’a jakol pire, ento mediri niciro can pi lembanyong’a m’ibejengiri iwi tego pa Mungu. 9 Elaruwa man elwong’owa ku lwong’o ma leng’. Elwong’owa ni kum tic mwa ngo, ento ni kum lembakeca pare man ni kum bero pare ma yawe mbe, m’umiyere iwa con dit nikadhu kud i bang’ Kristu Yesu. 10 Ento kawoni enen kamaleng’ mandha nikadhu kud i nyuthonyuth pa Jalar mwa Kristu Yesu m’ukabu tho, man enyutho iwa ayi mi nwang’u kwo man kum ma nyothere ngo nikadhu kud i lembanyong’a, 11 ma pire jung’iya abed jarwey, jakwenda man japonji.

12 Pi thelembe maeno re ma an bende abenwang’ara ku peko maeni, enre lewic ubenega ngo. Kum ang’eyo Ng’atu m’ayiyo, man ayiyo andhandha nia etie ku copo mi gwoko gin m’akanu i bang’e nitundo i ceng’ maeca. 13 Dong’ mediri nimoko i kum ponji ma ber* m’iwinjo i bang’a, man mediri bende ninyutho yiyoyic man mer calu ng’atu m’utie i acel ku Kristu Yesu. 14 Gin ma ber maeni ma juketho i kori, gwoke ku kony pa tipo ma leng’ ma n’i iwa.

15 Calu m’ing’eyo, dhanu ceke m’i theng ng’om mir Azia gilal kud i kuma, uketho i iye Fijelo man Hermojene. 16 Abekwayu Rwoth unyuth kisa ni juruot pa Onesifor, kum ejuko cwinya wang’ udul, man lewic unege ngo nyanok de i kum nyoro ma jutwiya ko. 17 Bende kinde m’ebino i Roma, esayu kakara mii mandha cil m’enwang’a. 18 Wek Rwoth uketh enwang’ kisa pa Yehova i ceng’ maeca. Ing’eyo cuu pi tic ceke m’etimo i Efeso.

2 Ento in, nyathin para, mediri ninwang’u tego ni kum bero ma yawe mbe ma n’i Kristu Yesu; 2 man lembe m’iwinjo i bang’a ma jumulembe dupa de gicwaku pire, kethgi i kor dhanu ma jugeno, ma gin bende gibibedo ku copo mi ponjo jumange. 3 Calu jaaskari mandha pa Kristu Yesu, mediri niciro can. 4 Ng’atu moko mbe m’ubetimo calu jaaskari ma mondo i lembe mi kuloka* mi kwo maeni tek ebemito enyay anyong’a i ng’atu m’ukiewo nyinge i tic mir askari. 5 Man kadok i kwaya, jumiyo jamkermiwic ni ng’atu m’uloyo kende kende tekene eworo cik mi kwayane. 6 Jarafur m’ubetimo tic ma tek ucikere nibedo ng’atu ma kwong’a nicamu piny m’ucek i podhone. 7 Bed iketh wii saa ceke i kum lembe m’abeyero; Rwoth bikonyi kara inyang’ i lembe ceke.*

8 Poi nia Yesu Kristu ucer ku kind ju m’utho man ebino nyakwar Daudi,* eno re ma tie lembanyong’a m’aberweyo, 9 ma jubesenda pire man ma jutwiya pire calu jatimrac. Ento lembe pa Mungu utie ngo atwiya. 10 Pi thelembe maeno re m’abemedara niciro gin ceke pi bero mi ju ma jung’iyo, kara gin bende ginwang’ both nikadhu kud i bang’ Kristu Yesu, man bende dwong’ ma rondo ku rondo. 11 Lembe m’ulubo e utie lemandha: Andhandha ka watho karacelo kude, wabikwo bende karacelo kude; 12 tek wamedara niciro, wabibimo bende karacelo kude; ento ka wakwere, en de ebikwerowa; 13 tek wa mandha ngo, en re e mandha kwa, kum eromo kwerere gire ngo.

14 Mediri nipoyo wigi i kum lembe maeni, ponjgi* i wang’ Mungu nia kud gidhau iwi wec, kum emiyo kony moko ngo acel de ento enyotho ju m’ubewinje anyotha.* 15 Tim kero peri ceke kara inyuthiri ni Mungu ni jatic m’eyiyo, m’umbe ku lewic i kum gin moko acel de ento m’ubeponjo man m’ubekoro lembe mi lemandha kubang’e kubang’e. 16 Kud iwinj wec ma igi nanu m’ubecido gin ma leng’, kum gibiketho dhanu bimediri ameda niworo ngo Mungu, 17 man lembe ma gibeyero binyay calu adhola. Himenayo giku Fileto gin’i kind ju maeno. 18 Dhanu maeno giweko lemandha, gibeyero nia cer dong’ udaru kadhu man gibenyotho yiyoyic mi jumoko. 19 Re kadok kumeno de, kathere pa Mungu ucungo nging’ nging’ man etie kud ayi ma e: “Yehova ung’eyo jupare,” man, “Ng’atu moko ci m’ubelwong’ere ku nying’ Yehova ucikere niweko timo ma rac.”

20 I ot ma dwong’ junwang’u ajeni mi mola ma kwar ku mi mola ma tar kende ngo, ento bende mi yen man mir ulobo; moko ma jutiyo ko i tic mi yung, mange ke ma jutiyo ko i tic mi yung ungo. 21 Pieno tek ng’atu moko ugwokere bor kud i kum ajeni mi yung ungo, ebibedo ni ajeni* mi tic mi yung ma judwoko leng’, ma pire tek ni won, man ma tie ayika pi tic ceke ma ber. 22 Dong’ ring awanya ma rac ma jubedo ko i saa mir aradu ento lub tok bedopwe, yiyoyic, mer, man kwiyocwiy karacelo ku dhanu ma gigeno Rwoth pilembe gitie kud adunde ma leng’.

23 M’umedo maeno, kwer piem mir abelu man mi pang’ pang’, pilembe ing’eyo nia gikelo dhau. 24 Kum jatic pa Rwoth ucikere ngo nidhau, ento ukwayu ebed yoo ku dhanu ceke, eng’ey bodho mi ponji, ebim wiye gire kinde ma jubetime rac, 25 man eponj ju ma gitie ngo ayika, re ku molcwiny. Saa moko nyo Mungu copo ketho giloko cwinygi* kara ginwang’ ng’eyong’ec mi lemandha, 26 man saa moko nyo wigi romo lero man givudhiri kud i uwic pa Wonabali m’umakugi ma kwo kara gitim yeny pare.

3 Enre ing’ey lembe ma e, nia i kajik ceng’ nindo mi can ma ciro tek bibedo nuti. 2 Pilembe dhanu bibedo ma ng’atuman bimarere gire, gibibedo jumar sente, jukulula, ju ma giting’iri, ju ma giyero lembacidi, ju ma wigi tek ni junyodo migi, ju ma dwoko ngo foyofoc, ju ma gwoko ngo bedoleng’ migi, 3 ju m’umaru ngo dhanu wagi, ju ma winjiri ngo nyanok de ku jumange, ju ma nyotho nying’ juwagi, ju ma kweriri gigi ngo, ju ma kwiny, ju m’udagu gin ma ber, 4 ju ma cibo juwagi, ju ma wigi tek, jukuhaya, ju m’umaru migi anyong’a kakare nimaru Mungu, 5 ma ginen ve nia gibetimo ni Mungu ento gibeworo ngo cik pare; koc bor kud i kum dhanu ma kumeno. 6 Jumoko m’i kindgi gibemondo ku rieko i udi mi mon ma ng’ic man ma dubo nuro man gibekwalu adundegi, mon maeno gitie ng’eca mir awanya migi ma rac, 7 saa ceke gibemediri niponjo lembe re giromo tuc ungo nyanok de i kum ng’eyong’ec ma tap mi lemandha.

8 Tap calu ma Yane giku Yambre gigam gijai ni Musa, joni bende gibemediri nijai i kum lemandha. Wigi udaru nyothere magwei man Mungu uyiyogi ngo pilembe gibewotho ngo nimakere ku yiyoyic. 9 Ento gibijik, kum kasegu migi* binen kamaleng’ i wang’ dhanu ceke tap calu m’utimo Yane giku Yambre. 10 Ento in, ilubo kilili mandha ponji para, kit kwo para, lembakeca para, yiyoyic para, mwonyolembe para, mer para, cirocir para, 11 man ing’eyo pi ragedo ku masendi m’agam anwang’ara ko i Antiokia, i Ikonio man i Lustra. Aciro ragedo maeno, man Rwoth ubodha kud i igi ceke. 12 I andha, dhanu ceke ma gibemito giwor Mungu man gibed ku winjiri ku Kristu Yesu gibinwang’iri bende ku ragedo. 13 Ento dhanu ma reco ku jundra gibimediri nitimo lembe ma reco nisagu, gibiwondo dhanu man gin de jubiwondogi.

14 Ento in, mediri nibedo i gin m’iponjo man ma juketho iyiyo, pilembe ing’eyo nia iponjogi i bang’ ng’a 15 man niai i mukere peri, ing’eyo lembagora ma leng’ ma copo dwoki riek pi both ni kum yiyoyic m’itie ko i Kristu Yesu. 16 Lembagora ceke Mungu yuyo i wiye en, man konyne nuti pi ponji, pi juko dubo, pi twinyo lembe ceke, man pi ponjojo pi bedopwe, 17 kara dhanu pa Mungu ubed m’eromo kakare, m’etie ku gin moko ci m’ukwayere pi tic ceke ma ber.

4 I wang’ Mungu man i wang’ Kristu Yesu ma bipoko lembe mi ju ma kwo, ku mi ju m’utho nikadhu kud i nyuthonyuth man Ker pare, abeng’olo iri ma tek kumae: 2 Rwey lembe; tim tije kud amora dok ebed i saa ma ber kadi i saa mi peko; twiny dhanu, jukgi, man mii amora i kumgi ku cirocir ceke man ku bodho mi ponji. 3 Kum rundi biwok ma gibifoyo ngo ku ponji ma ber,* ento nimakere kud awanya migi, gibicoko juponji igi gigi kara ubed uyer igi lembe ma nyang’ugi. 4 Gibiweko niwinjo lemandha man gibiketho wigi nilubo lembuda mi vupo. 5 Ento in, bed nger i lembe ceke, cir can, mediri nirweyo lembanyong’a,* tim tic peri cuu mandha.

6 Kum an dong’ jubekonja calu girathiera mi pigulok, man saa mi gony para udhingo. 7 Adaru kiedo lwiny ma ber, aringo kwaya nitundo i ajiki man agwoko yiyoyic. 8 Niai kawoni dong’ jukanu ira jamkermiwic mi bedopwe, ma en e sukulia ma Rwoth ma tie japoklembe ma pwe bimiyo ira i ceng’ maeca, eyo ira kende ngo, ento ni dhanu ceke m’umaru nyuthonyuth pare.

9 Tim kero ibin i bang’a kuni nyathotho. 10 Kum Dema uweka pilembe emaru ng’om maeni* man ecidho i Thesaloniki, Kreske ke ucidho i Galatia, man Tito lundo i Dalmatia. 11 Luka kende re m’udong’ i ng’eta. Wubin karacelo ku Marko, pilembe etie ira ku kony lee i tic. 12 Ento aoro Tikiko i Efeso. 13 Kinde m’ibebino, bin ku koti m’aweko i Troa yo pa Karpo, bin bende ku kithabu m’adola, asagane mir adila.

14 Alekzandre ma jathiedh cuma utima rac mi tuko ngo. Yehova biculo ire nimakere ku tic pare. 15 In de bed ku weng’i i kume, pilembe ejai ku rac i kum lembe ma wabeyero.

16 Kinde m’abino cero bang’a wang’ ma kwong’a i wang’ pido, ng’atu moko mbe m’ucungo i ng’eta, ento gin ceke giweka adong’ kenda; Mungu kud ukwan racune i wigi. 17 Ento Rwoth ucungo i ng’eta man emiyo ira tego, kara nikadhu kud i bang’a lembanyong’a urweyere mii mandha man thek ceke uwinje; bende ebodha kud i dhug umvor. 18 Rwoth bibodha kud i tic ma rac ceke man ebigwoka pi Ker pare m’i polo. Dwong’ ubed ire rondo ku rondo. Amen.

19 Moth Priska gikud Akila man juruot pa Onesifor bende.

20 Erasto udong’ i Korintho, ento aweko Trofimo uberemo i Mileto. 21 Tim kero peri ceke ilar itund i wang’ saa mi koyo.

Eubulo, Puden, Lino, Klaudia man umego ceke gimothi.

22 Rwoth ubed kudi pi pidoic ma ber m’itie ko. Bero pare ma yawe mbe ubed kudi.