BARUA MIR ARIO PA PETHRO

1 Niai kud i bang’ Simon Pethro ma jamiru man jakwenda pa Yesu Kristu, ni ju ma ginwang’u yiyoyic ma pire tek ma wan de watie ko nikadhu kud i bedopwe pa Mungu mwa man pa Jalar mwa Yesu Kristu:

2 Bero ma yawe mbe man kwiyocwiny umedere ameda iwu ni kum ng’eyong’ec ma tap pa Mungu man pa Yesu ma Rwoth mwa; 3 kum tego pa Mungu umiyo iwa* piny ceke m’uketho wabekwo, man uketho wamoko kikiki i kum Mungu nikadhu kud i ng’eyong’ec ma tap pa Ng’atu m’ulwong’owa ni kum dwong’ pare man bero pare. 4 Nikadhu kud i piny maeno, eng’olo iwa lembe ma dongo man ma pigi tek kara ni kumgi wubin wunwang’ dwong’ ma Mungu utie ko, pilembe wudaru weko timo ma reco m’i ng’om m’awanya ma rac cwalujo i iye.

5 Pi thelembe maeno, wutim kero mwu ceke kara wumed i kum yiyoyic mwu bero, i kum bero mwu ke ng’eyong’ec, 6 i kum ng’eyong’ec mwu kweriri gijo, i kum kweriri gijo mwu ke cirocir, i kum cirocir mwu moko kikiki i kum Mungu, 7 i kum moko kikiki i kum Mungu ke mer mir umego, man i kum mer mwu mir umego mer. 8 Pilembe ka piny maeno gitie i iwu man gipong’ perere, gibicerowu kara kud wukwii kunoke kud wubed ma wubecego ngo nyingwu pi lembe m’uneno ng’eyong’ec ma tap pa Rwoth mwa Yesu Kristu.

9 Kum ng’atu m’ukoso piny maeno etie abinga, emiyo wang’e ni der,* man wiye wil nia judwoke leng’ ni dubo pare ma yang’ con. 10 Pieno umego, wuii ku tego mwu zoo kara wuketh lwong’o ma julwong’o kowu man ng’ic ma jung’iyo kowu ubed iwu kubang’e, kum tek wumeduru nitimo lembe maeni, wubipodho ki ngo. 11 Kum i ayi maeno re ma jubiyabu iwu yo mi dwong’ pi nimondo i Ker ma rondo ku rondo pa Rwoth mwa man Jalar mwa ma Yesu Kristu.

12 Pi thelembe maeno, atie ayika saa ceke nipoyo wiwu i kum lembe maeni kadok nwang’u wung’eyogi man wucungo ma tek i lemandha ma n’i iwu. 13 Ento abenwang’u nia etie lembe m’atira nia saa ceke ma fodi an’i hema* maeni, ayaw kumwu ku poyowic, 14 pilembe ang’eyo nia kago eni judhingo kabu hema parane, tap calu ma Rwoth mwa Yesu Kristu de unyutho ira kamaleng’. 15 Pieno, saa ceke abitimo kero para zoo kara i ng’ei m’acidho wubed ku copo mi poi pi giki maeni wun giwu.

16 Wajengara ngo iwi lembatada mi ndra ma juthungo ku bodho pi niketho wung’ey tego man bedonuti pa Rwoth mwa Yesu Kristu, ento wajengara iwi dwong’ pare ma waneno ku wang’wa. 17 Kum enwang’u yung man dwong’ i bang’ Mungu ma Wego kinde ma wec m’ulubo e uyerere ire ku dwong’ ma dit: “Eni tie Woda m’amaru, m’anyong’a nega i kume.” 18 Eyo, wawinjo wec maeno m’uai kud i polo kinde ma wabino karacelo kude iwi got ma leng’.

19 Pieno, genogen ma watie ko iwi lembila udoko tek nisagu, man wubetimo ber niketho wiwu zoo i kume calu i kum der m’uberieny i mudho (nitundo ma piny uru ko man cero mi kugweno uwok ko) i adundewu. 20 Kum ku kwong’a wung’eyo nia lembila moko mbe m’i Lembagora ma ai kud i paru pa ng’atini en gire. 21 Kum lembila moko acel de mbe m’uwok ni kum yeny pa dhanu gin gigi, ento dhanu uyero lembe m’uai i bang’ Mungu pilembe tipo ma leng’ re m’ubino cwalugi.

2 Ento jubila mi ndra bende ubedo nuti i kind dhanu, tap calu ma juponji mi ndra bende biwok i kindwu. Dhanu maeno gibiroyo nyalwe yic ma tung’ tung’ man mi nyoth, man gibikwero kadok ng’atu* m’ung’iewogi; i ayi maeno re ma gibikelo nyoth pio pio i wigi gigi. 2 M’umedo maeno, dhanu dupa bilubo tok timo migi mir acidi man mi thwon,* man ni kumgi jubiweco rac i kum yo mi lemandha. 3 Bende, ni kum kethocwiny hai i kum piny, gibicamu kudwu ku wec mi vupo. Ento pokolembe migi ma judaru ng’olo con ubegalu ngo, man nyoth migi de ubenindo ngo.

4 Kum Mungu utimo ngo kisa ni jumalaika m’udubo, ento ebologi i Tharthar* m’etwiyogi ku nyoro* mi mudho ma col bii man egwokogi pi pokolembe. 5 Man kisa unege ngo i kum ng’om mi rundi ma con, ento egwoko Noa ma jarwey mi bedopwe ku juabiro mange kinde m’ekelo pii ma dit m’uumo ng’om iwi dhanu ma giworo ngo Mungu. 6 Man kinde m’ewang’u adhura mi Sodoma ku Gomora udong’ ni vuru, epoko lembe i wigi man eketho gibedo ni lapor mi gin ma bibino ni dhanu ma giworo ngo Mungu. 7 Bende, ebodho Lot ma won bedopwe, ma timo mir acidi man mi thwon* mi dhanu ma woro ngo cik ubed unyayu can lee i iye; 8 kum ng’atu maeno ma won bedopwe ubed uneno man ubed uwinjo pi timo mi turocik mi dhanu m’ebedo i kindgi, man lembene ubed unyayu can lee i iye* kubang’ rupiny kubang’ rupiny. 9 Pieno, Yehova ung’eyo ayi mi bodho kud i amulaic ju ma gimoko kikiki i kume, man eng’eyo bende ayi mi gwoko ju ma gi weg bedopwe ngo pi nyoth i ceng’ mi pokolembe, 10 asagane dhanu ma giyenyo nicido kum jumange man ma gicayu dito.

Dhanu maeno ma wigi tek man ma gin udhuko gilworo ngo niweco rac ku nying’ ju ma gitie ku dwong’, 11 ma ke jumalaika, kadok nwang’u gitie ku tego man kero ma lee de, re gikelo ngo adote iwi juponji mi ndra ku dhoggi ma rac ni kum woro ma giworo ko Yehova. 12 Ento dhanu maeno, ma gi calu lei ma rieko migi mbe ma junyologi kara jumakgi man junyothgi, giweco rac i kum lembe ma ging’eyo kathere de ngo. Pieno lembe ma reco ma gibetimo bikelo nyoth i wigi, 13 gibinwang’iri ku masendi ma rac mandha calu sukulia mi lembe ma reco ma gitimo.

Ginene ni lembe mi mutoro nipong’o awanya mi kumgi ku tego migi zoo kadok ku dieceng’. Gitie calu cilo man poyo i cokiri, man anyong’a negogi i kum ponji migi mi vupo kinde ma gibetimo foc karacelo kudwu. 14 Wang’gi udhir kud abor,* gicopo weko timo dubo ngo man gibidho wang’ dhanu* m’ucungo ngo ma tek. Adundegi zoo ni kum kethocwiny hai i kum piny. Gi nyithindho ma julamu. 15 Giweko gengi m’atira man gidaru rwinyo. Gilubo ba tiend Balam ma wod Beor m’ugam umaru cul mi timo lembe ma rac, 16 ento jujuke pi kier pare. Lei ma weco ngo ma yeyo ter ugam uweco ku dwand dhanu pi nicero jabila maeno i abelu pare.

17 Dhanu maeni gitie kulo m’udwono man afuru ma yamu ma tek ubeleko, man jukanu igi mudho ma col bii. 18 Gibeponjo ponji ma dongo ma ke iye nanu. Kud awanya ma reco m’i kum man timo mir acidi man mi thwon,* gibebidho wang’ dhanu m’uai uvuth avutha kud i the cing’ ju m’ubetimo lembe ma reco. 19 Gibeng’olo igi nia gibinwang’u bedagonya ma ke gin gigi de gitie ng’eca mi dubo; kum tek ng’atu moko uvoyo wadi, e ng’atune doko ng’eca pare.* 20 I andha, tekene i ng’ei ma giboth kud i cilo m’i ng’om ni kum ng’eyong’ec ma tap pa Rwoth Yesu Kristu ma Jalar, ento gidong’ gidok kendo i lembe ma rom eno man ebimo wigi, ajiki migi doko rac magwei nisagu ma kwong’a. 21 Nwang’u ecibedo ber magwei igi nia kud ging’ei yo mi bedopwe tap tap, kakare ma nia i ng’ei ma ging’eye, gilund gikier bor kud i kum cik ma leng’ ma ginwang’u. 22 Gin ma lembabola mandha ma e uyero utimere i kumgi: “Gwok udok i bang’ ng’ok pare gire, man kul ma jujomo udok ninyamere kendo i usabu.”

3 Jumer, eni tie barua mir arionde m’abegoro iwu, man calu i baruane mi kwong’o, abeyawu kumwu nikadhu kud i poyowic kara wupar i lembe cuu mandha, 2 wek kara wupoi i kum lembe ma jubila ma leng’ gigam giyero* con man i kum lembang’ola pa Rwoth man Jalar ma wunwang’u nikadhu kud i bang’ jukwenda.* 3 Ku kwong’a wung’ey lembe ma e, nia i kajik ceng’ jucac gibitundo ku cac migi man gibitimo calkud awanya migi ma reco, 4 ma gibeyero kumae: “Bedonuti pare m’eng’olo pirene ni kani? Kum niai i nindo ma kwaruwa githo i iye, piny ceke ubemedere nibedo tap calu ma gibedo ko niai i acaki mi cwic.”

5 Kum wigi ubewil akakaka i kum lembe ma e, nia polo ubedo nuti niai yang’ con man nia ni kum lembe ma Mungu uyero, ng’om uwok kud i pii man ucungo ma tek i kind pii, 6 man ni kumgi ng’om mi rundi maeca ugam unyothere kinde ma pii ma dit uume. 7 Ento ni kum lembe ma rom eno, polo ku ng’om ma gitie kawoni jugwokogi ni mac man gibedo agwoka cil i ceng’ mi pokolembe man mi nyoth mi dhanu ma woro ngo Mungu.

8 Re kadok kumeno de, wiwu kud uwil i kum lembe ma e jumer, nia i wang’ Yehova nindo acel utie ve oro elufu acel (1 000) man oro elufu acel utie ve nindo acel. 9 Yehova galu ngo ku pong’o lembang’ola pare calu ma jumoko giparu nia ebegalu, ento ebemwonyo lembe hai iwu pilembe ebeyenyo ngo nia ng’atu moko acel de unyothere, enre ebeyenyo dhanu ceke gilok cwinygi. 10 Ento ceng’ pa Yehova bibino calu jakwo; i ceng’ maeno polo bikadhu woko ku morpiny ma dit, enre piny m’i polo ku m’i ng’om gibiloi ni kum lietho ma wanga wanga, man ng’om ku giki m’i iye biwang’ pet.

11 Calu piny maeno ceke biloi kumeno, wupar cuu nia wucikuru nibedo kit dhanu ma nenedi. Wubed dhanu ma kura migi leng’ man ma timo migi ubenyutho nia gimoko kikiki i kum Mungu, 12 ma wubekuro man saa ceke wubepoi* pi bino mi ceng’ pa Yehova, ma i iye polo biwang’ ku mac man piny m’i polo ku m’i ng’om biloi ni kum lietho ma wanga wanga! 13 Ento nimakere ku lembang’ola pare, wabekuro polo ma nyen ku ng’om ma nyen ma i igi bedopwe bibedo nuti.

14 Pieno jumer, calu wubekuro giki maeni, wutim kero mwu ceke kara ebin enwang’wu ma poyo kadi cilo de mbe i kumwu man i kwiyocwiny. 15 M’umedo maeno, wunen nia mwonyo lembe hai pa Rwoth mwa utie both, tap calu ma Paulo m’umegwa ma jamer bende ugoro iwu calku rieko m’umiyere ire, 16 kum eweco pi giki maeni i barua pare ceke. Ento lembe moko tie i baruane ma nyang’ i igi tek, ma dhanu m’umbe ku ng’eyong’ec* man ma lingo lingo gikoro there rac calu ma gibetimo bende i kum Lembagora mange, ke pi nyoth migi gigi.

17 Pieno jumerna, calu wular wung’eyo lembe maeni i wang’e, wubed ku weng’wu kara kud wukier karacelo kugi i lembe ma reco ma dhanu ma giworo ngo cik gibetimo, wumaru podho ku kaka ma wucungo i iye ma tek. 18 Ento wumeduru nidongo i bero ma yawe mbe man i ng’eyong’ec pa Rwoth mwa man Jalar mwa Yesu Kristu. Dwong’ ubed ire dok ebed kawoni man pi rondo ku rondo. Amen.