BARUA MI KWONG’O PA YOHANA

1 Wabekiewo iwu pi ng’atu m’ubedo nuti niai i acaki, ma wawinje, wanene de ku wang’wa, waneno bang’e tel man wamule ku cingwa, eyo, wabekiewo iwu pi wec mi kwo 2 (andha, kwo unyuthere iwa man wanene, watuco pire man wanyutho iwu pi kwo ma rondo ku rondo m’ubino karacelo ku Wego man m’unyuthere iwa). 3 Wayero iwu lembe ma waneno man ma wawinjo, kara wun de wubed i acel kudwa, calu ma wan de watie i acel karacelo ku Mungu man ku Wode ma Yesu Kristu. 4 Man wabekiewo iwu lembe maeni kara anyong’a mwa upong’ bik.

5 Maeni en e lembe ma wawinjo i bang’e man wabeyere iwu: Mungu en e der, man i iye mudho mbe nyanok de. 6 Ka wabeyero nia, “Watie i acel kude,” ento walund wamedara niwotho i mudho, nwang’u wa juvupo man wabekwo ngo nimakere ku lemandha. 7 Enre tekene wabewotho i der calu ma en gire de en’i der, nwang’u wan ceke wan’i acel, man rimb Yesu ma Wode ulonyowa kud i dubo ceke.

8 Ka wabeyero nia, “Wambe ku dubo,” nwang’u wabewondara giwa man lemandha de mbe i iwa. 9 Ento tek watuco dubo mwa, Mungu en e mandha man e pwe; pieno ebiweko iwa dubo mwa man ebilonyowa kud i kum gondiri ceke. 10 Tekene wabeyero nia, “Wadubo ngo,” nwang’u wabedwoke javupo, man lembe pare de umbe i iwa.

2 Awiya para ma thindho, abekiewo iwu lembe maeni kara kud wutim dubo. Ento tekene ng’atu moko udubo, watie ku jakony* ma n’i karacelo ku Wego, niwacu Yesu Kristu ma won bedopwe. 2 Man etie lam mi ripo kindjo* pi dubo mwa, re pi dubo mwa kende ngo ento pi dubo mi ng’om zoo bende. 3 Tekene wabemedara niworo cik pare, e ebinen kamaleng’ nia wang’eye. 4 Ng’atu m’ubeyero nia, “Adaru ng’eye,” ma ke elund ebeworo ngo cik pare nwang’u etie javupo man lemandha umbe i ng’atu maeno. 5 Ento tekene ng’atu moko ubeworo lembe pare, eno nyutho kamaleng’ nia ng’atuno umaru Mungu andha. Ka wabetimo kumeno, ebinen kamaleng’ nia wan’i acel kude. 6 Ng’atu m’ubeyero nia etie i acel kude, ucikere nimedere niwotho tap calu ma ng’atu maeno de uwotho ko.

7 Jumer, abekiewo iwu, ungo cik ma nyen ento cik ma con ma wubedo ko niai i acaki. Cik ma con maeni utie lembe ma wudaru winjo. 8 Kendo, abekiewo iwu pi cik ma nyen, cik ma Kristu ulubo man ma wun de wulubo pilembe mudho ubekadhu woko man der dong’ uberieny.

9 Ng’atu m’ubeyero nia en’i der ma ke lundo edagu umin, nwang’u fodi asu en’i mudho. 10 Ng’atu m’umaru umin bedo asu i der, man gin moko mbe ma ketho ekier.* 11 Ento ng’atu m’udagu umin, nwang’u en’i mudho man ebewotho de i mudho; bende eng’eyo ngo kaka m’ebecidho i iye, pilembe mudho uumo wang’e.

12 Abekiewo iwu awiya ma thindho, pilembe ni kum nyinge judaru weko dubo mwu. 13 Abekiewo iwu wu wego, pilembe wudaru ng’eyo ng’atu m’unuti niai i acaki. Abekiewo iwu wun awobi, pilembe wuvoyo ng’atu ma rac. Abekiewo iwu wun awiya ma thindho, pilembe wudaru ng’eyo Wego. 14 Abekiewo iwu wu wego, pilembe wudaru ng’eyo ng’atu m’unuti niai i acaki. Abekiewo iwu wun awobi, pilembe wu tek man lembe pa Mungu ubedo i iwu man bende wudaru voyo ng’atu ma rac.

15 Kud wumar ng’om kadi piny ma n’i ng’om. Tek ng’atu moko umaru ng’om, nwang’u mer pa Wego mbe i iye; 16 kum piny ceke m’i ng’om, awanya ma rac mi kum kud awanya ma rac mi wang’ man niyungiri* pi jamcing’ mi kwo maeni, uai ungo i bang’ Wego, ento i ng’om. 17 M’umedo maeno, ng’om ubekadhu woko man awanya ma racne de, ento ng’atu m’ubetimo yeny pa Mungu bikwo rondo ku rondo.

18 Awiya ma thindho, eni tie saa ma tokcen man tap calu ma wular wuwinjo nia japiem Kristu ubebino, kadok kawoni de dong’ jupiem Kristu dupa gidaru wok; eno uketho wang’eyo nia eni tie saa ma tokcen. 19 Giwok kud i kindwa, ento gibino ngo jukindwa;* kum ka nwang’u gibino jukindwa, nwang’u gimediri asu nibedo kudwa. Ento giwok kara enyuthere kamaleng’ nia tie dhanu zoo ngo ma gi jukindwa. 20 Wunwang’u wir m’uai i bang’ ng’atu ma leng’, man wun ceke wutie ku ng’eyong’ec. 21 Abekiewo iwu, ungo pilembe nia wung’eyo ngo lemandha, ento pilembe wung’eye man pilembe vupo moko mbe ma ai kud i lemandha.

22 Ng’a ma tie jandra, nyo utie ngo ng’atu m’ubekwero nia Yesu tie ngo Kristu? Eno tie japiem Kristu, ng’atu m’ubekwero Wego man Wod. 23 Ng’atu moko ci m’ubekwero Wod nwang’u etie ngo i acel ku Wego de. Ento ng’atu moko ci m’ubetuco nia eyiyo Wod nwang’u etie bende i acel ku Wego. 24 Enre wun, lembe ma wuwinjo niai i acaki ucikere nibedo i iwu. Tekene lembe ma wuwinjo niai i acaki ubedo i iwu, wubibedo bende i acel ku Wod man i acel ku Wego. 25 M’umedo maeno, gin m’eng’olo iwa utie kwo ma rondo ku rondo.

26 Abekiewo iwu lembe maeni pi dhanu ma gibemito giwond weng’wu. 27 Ento wun, wir ma wunwang’u niai kud i bang’e ubedo i iwu, man wumbe ku yeny ma nia ng’atu moko uponjwu; ento wir ma wunwang’u niai kud i bang’e re m’ubeponjowu iwi lembe ceke man etie andha, etie ngo vupo. Tap calu m’elar eponjowu, wubed i acel kude. 28 Dong’ kawoni awiya ma thindho, wubed i acel kude kara kinde m’ebinyuthere, wabin wawec ma cwinywa tek man kud wakier bor kud i kume ma lewic ubenegowa i saa mi bedonuti pare. 29 Tekene wung’eyo nia etie pwe, wung’eyo bende nia ng’atu moko ci m’ubetimo bedopwe enyolo en.

3 Wukenen kit mer ma Wego unyutho iwa, nia julwong’wa nyithindho pa Mungu! Man de watie nyithindho pare andha. Pi thelembe maeno ng’om ung’eyowa ngo, kum ng’om utuc ungo ning’eyo Mungu. 2 Jumer, kawoni watie nyithindho pa Mungu, re kite ma wabibedo ko i nindo m’ubino fodi unyuthere ngo. Ento wang’eyo nia kinde ma Mungu binyuthere wabibedo calu en, pilembe wabinene tap calu m’etie ko. 3 Man ng’atu moko ci m’utie ku genogen i wiye dwokere en gire leng’, tap calu ma en de e leng’.

4 Ng’atu moko ci m’ubemedere nitimo dubo nwang’u ebeturo bende cik, kum dubo utie turocik. 5 Wung’eyo bende nia Yesu unyuthere pi nikabu dubo mwa cen, man dubo moko acel de mbe i iye. 6 Ng’atu moko ci m’utie i acel kude medere ngo nitimo dubo; ento ng’atu m’ubemedere nitimo dubo nwang’u enene ngo, kadok ang’eya de eng’eye ngo. 7 Awiya ma thindho, kud wuwek ng’atu moko uwondwu; ng’atu m’utimo bedopwe nwang’u e pwe, tap calu ma en de e pwe. 8 Ng’atu m’ubemedere nitimo dubo uai i bang’ Wonabali, pilembe Wonabali ucaku dubo niai i acaki.* Pi thelembe maeno re ma Wod Mungu unyuthere pi nirungo* tic pa Wonabali.

9 Ng’atu moko ci ma Mungu unyolo medere ngo nitimo dubo, kum kodhi pa Mungu bedo i ng’atu ma kumeno, man ecopo medere ngo nitimo dubo pilembe Mungu unyole en. 10 Tung’ tung’ i kind awiya pa Mungu man awiya pa Wonabali nen kamaleng’ ni kum lembe ma e: Ng’atu moko ci m’ubetimo ngo bedopwe uai ungo i bang’ Mungu, kadok ng’atu m’umaru ngo umin bende. 11 Kum eni tie lembe ma wuwinjo niai i acaki, nia wacikara nimarara i kindwa; 12 ento wacikara ngo nibedo calu Kain m’uai i bang’ ng’atu ma rac man egam enego umin. Enego umin ne ke pirang’o? Pilembe tic pare ubino rac, p’umin ke lundo ubino pwe.

13 Umego, iwu kud uwang’ pilembe nia ng’om udaguwu. 14 Wang’eyo nia waai kud i tho wamondo i kwo, pilembe wamaru umego mwa. Ng’atu m’umaru ngo nwang’u fodi etho asu. 15 Ng’atu moko ci m’udagu umin utie janek, man wung’eyo nia janek moko mbe ma bedo ku kwo ma rondo ku rondo i iye. 16 Ni kum lembe maeni wang’eyo mer, pilembe Yesu Kristu umiyo kwo pare piwa, pieno wan bende wacikara nimiyo kwo mwa pir umego mwa. 17 Ento tek ng’atu moko m’utie ku jamcing’ m’i ng’om maeni ubeneno umin utie ku yeny, re kisa ulund ubenege ngo i kume, ecopo wacu nenedi nia emaru Mungu? 18 Awiya ma thindho, wacikara nimaru ku wec kadi ku dhok* kende ngo, ento ku timo man lemandha.

19 Ni kum lembe maeni wabing’eyo nia wa dhanu mi lemandha, man wabikwiyo adundewa i wang’e 20 pi gin moko ci m’adundewa copo poko lembe i wiwa pire, pilembe Mungu dwong’ ma sagu adundewa man eng’eyo lembe ceke. 21 Jumer, kan adundewa ubepoko ngo lembe i wiwa, wacopo weco i bang’ Mungu ma cwinywa tek; 22 man gin moko ci ma tek wabekwayu, wanwang’e niai kud i bang’e, pilembe wabeworo cik pare man wabetimo gin ma nyayu mutoro i iye. 23 Eyo, cik parene ni eni: Nia wabed ku yiyoyic i nying’ Wode ma Yesu Kristu man wamarara i kindwa tap calu m’eng’olo iwa. 24 M’umedo maeno, ng’atu m’ubeworo cik pare bedo i acel kude, man en de ebedo i acel ku ng’atune. Man ni kum tipo m’emiyo iwa, wang’eyo nia en’i acel kudwa.

4 Jumer, kud wuyii wec ceke ma tipo yuyo i wiye,* enre wutem wec ma tipo yuyo i wiye pi nineno ka nyo andha giai i bang’ Mungu, kum jubila mi ndra dupa gidaru wok i ng’om.

2 Wucopo ng’eyo nia wec moko ma tipo yuyo i wiye uai i bang’ Mungu i ayi ma e: Wec ceke ma tipo yuyo i wiye m’uyiyo nia Yesu Kristu ubino i kum, uai i bang’ Mungu. 3 Ento wec ceke ma tipo yuyo i wiye m’ubeyiyo ngo Yesu, uai ungo i bang’ Mungu. Eno tie wec ma tipo yuyo i wiye m’uai i bang’ japiem Kristu ma wuwinjo nia ubebino man ma kawoni dong’ utie i ng’om.

4 Awiya ma thindho, wuai i bang’ Mungu man wuvoyo jubila mi ndra, pilembe ng’atu m’utie i acel kudwu e dwong’ nisagu ng’atu m’utie i acel ku ng’om. 5 Giai kud i ng’om, pieno re ma gibeyero lembe m’uai i ng’om man ng’om ubewinjogi. 6 Ento wan, waai i bang’ Mungu. Ng’atu moko ci m’ung’eyo Mungu winjowa; enre ng’atu m’uai ungo i bang’ Mungu winjowa ngo. I ayi maeni wakoyo kind wec ma tipo yuyo i wiye ma tie lemandha, ku wec ma tipo yuyo i wiye ma tie vupo.

7 Jumer, dong’ wamedara nimarara i kindwa, pilembe mer uai i bang’ Mungu man ng’atu moko ci m’umaru jumange, Mungu unyole en man eng’eyo Mungu. 8 Ng’atu ma maru ngo jumange nwang’u eng’eyo Mungu ngo, pilembe Mungu en e mer. 9 Mer pa Mungu unyuthere iwa i ayi ma e: Mungu uoro Wode m’acel kulong’ iwi ng’om kara wanwang’ kwo nikadhu kud i bang’e. 10 Mer maeni utie ngo nia pilembe wan re ma wamaru Mungu, ento en re m’emaruwa man eoro Wode ni lam mi ripo kindjo* pi dubo mwa.

11 Jumer, tekene i ayi maeni re ma Mungu umaruwa, e wan de wacikara nimarara i kindwa. 12 Ng’atu moko mbe m’uneno Mungu kadok nyanok de. Tekene wamedara nimarara i kindwa, nwang’u Mungu ubedo i iwa man mer pare de upong’ thur i iwa. 13 I ayi maeni wang’eyo nia wan’i acel kude man nia en de en’i acel kudwa, pilembe emiyo iwa tipo pare. 14 M’umedo maeno, wan giwa de waneno man wabetuco nia Wego uoro Wode ni jalar mi ng’om. 15 Ng’atu moko ci m’uyiyo nia Yesu utie Wod Mungu, Mungu bedo i acel kude man en de ebedo i acel ku Mungu. 16 Man watuc ning’eyo mer ma Mungu umaru kowa man wayiye.

Mungu en e mer, man ng’atu m’ubedo i mer bedo i acel ku Mungu man Mungu de bedo i acel ku ng’atune. 17 I ayi maeni re ma mer upong’ bik i iwa, kara wabin wawec ma cwinywa tek i nindo mi pokolembe, kum i ng’om maeni wan giwa wa calu Kristu. 18 Lworo mbe i mer, ento mer m’upong’ bik kabu lworo cen pilembe lworo cerowa. I andha, ng’atu m’utie ku lworo nwang’u mer upong’ ungo bik i iye. 19 Wamaru pilembe ku kwong’a en re m’elar emaruwa.

20 Tek ng’atu moko ubeyero kumae: “Amaru Mungu,” ma ke lundo edagu umin, nwang’u e javupo. Kum ng’atu m’umaru ngo umin m’ebeneno copo maru ngo Mungu m’eneno ngo. 21 Man emiyo iwa cik ma e: Ng’atu moko ci m’umaru Mungu ucikere nimaru bende umin.

5 Ng’atu moko ci m’uyiyo nia Yesu utie Kristu nwang’u Mungu unyole en, man ng’atu moko ci m’umaru Mungu m’umiyo kwo, nwang’u emaru bende awiya pare. 2 I ayi maeni re ma wang’eyo nia wamaru awiya pa Mungu, nwang’u wamaru Mungu man wabeworo cik pare. 3 Kum wanyutho nia wamaru Mungu i ayi ma e: Nwang’u wabeworo cik pare, man cik parene ke gi pek ungo, 4 pilembe ng’atu moko ci* ma Mungu unyolo en voyo ng’om. Man wavoyo ng’om ni kum yiyoyic mwa.

5 Ng’a ma copo voyo ng’omi? Nyo utie ngo ng’atu m’uyiyo nia Yesu tie Wod Mungu? 6 Maeni tie ng’atu m’ubino nikadhu kud i pii man rimo, niwacu Yesu Kristu; ebino ku pii kende ngo, ento ku pii man rimo. Man tipo ubetuco lembene pilembe tipo tuco lemandha. 7 Kum piny adek unuti m’ubetuco lembe: 8 Tipo, pii man rimo; man gin adek zoo dhoggi rombo acel.

9 Tekene wayiyo lembatuca mi dhanu, lembatuca pa Mungu lundo utie dwong’. Kum lembatuca ma Mungu ubemiyo utie lembatuca m’emiyo iwi Wode. 10 Ng’atu m’uyiyo Wod Mungu nwang’u etie ku lembatuca i iye gire. Ng’atu m’umbe ku yiyoyic i Mungu udwoko Mungu javupo, pilembe eyiyo ngo lembatuca m’emiyo iwi Wode. 11 Maeni en e lembatuca ma Mungu umiyo: Mungu umiyo iwa kwo ma rondo ku rondo man kwone ni i Wode. 12 Ng’atu m’uyiyo Wod utie ku kwo maeno; ento ng’atu m’uyiyo ngo Wod Mungu umbe ku kwone.

13 Abekiewo iwu lembe maeni kara wung’ey nia wutie ku kwo ma rondo ku rondo, wun ma wutie ku yiyoyic i nying’ Wod Mungu. 14 Man cwinywa tek i wiye i lembe ma e: Nia gin moko ci ma tek wabekwayu i bang’e nimakere ku yeny pare, ewinjowa. 15 Man tekene wang’eyo nia ewinjowa pi gin moko ci ma wabekwayu, wang’eyo nia wabinwang’u gin ma wakwayu, pilembe wakwayugi i bang’e.

16 Tekene ng’atu moko uneno umin ubetimo dubo m’uromo ngo ku tho, ekway Mungu pire man Mungu bimiyo ire kwo, eyo, ebimiyo kwo ni dhanu m’ubetimo dubo m’uromo ngo ku tho. Ento dubo moko tie m’uromo ku tho. Utie ngo pi dubo maeno re m’abeyero ire nia ekway pire. 17 Timo ceke m’uturo cik utie dubo, ento re dubo moko nuti m’uromo ngo ku tho.

18 Wang’eyo nia ng’atu moko ci ma Mungu unyolo medere ngo nitimo dubo, ento ng’atu ma Mungu unyolo* gwoko ng’atune, man ng’atu ma rac* umbe ku copo i wiye. 19 Wang’eyo nia waai i bang’ Mungu, ento ng’om zoo uvuto i tego pa ng’atu ma rac. 20 Enre wang’eyo nia Wod Mungu ubino, man emiyo iwa rieko kara watuc ning’eyo ng’atu ma en e mandha. Man watie i acel ku ng’atu ma en e mandha nikadhu kud i bang’ Wode ma Yesu Kristu. Maeni Mungu mandha man kwo ma rondo ku rondo. 21 Awiya ma thindho, wugwokuru i kum ayi gin m’acwiya.