BARUA MIR ARIO PA YOHANA

1 Niai kud i bang’ jadwong’, ni dhaku ma jung’iyo man ni awiya pare m’amaru akeca, re an kenda ngo, ento bende dhanu ceke ma gituc ning’eyo lemandha. 2 Wamaruwu ni kum lemandha ma n’i iwa man ma bibedo i iwa rondo ku rondo. 3 Bero ma yawe mbe, kisa man kwiyocwiny pa Mungu ma Wego man pa Yesu Kristu ma Wod Wego bibedo kudwa karacelo ku lemandha man mer.

4 Anyong’a ubenega lee dit pilembe awinjo nia awiya peri moko ubewotho i lemandha tap calu ma Wego ung’olo iwa. 5 Dong’ kawoni abekweyi, dhaku ma jung’iyo, nia wamarara i kindwa man ku wadi man ku wadi. (Abekiewo iri, ungo cik ma nyen ento cik ma wabedo ko niai i acaki.) 6 Man merne thelembene ni eni, nia wamedara niwotho nimakere ku cik pare. Cikne e eni, tap calu ma wuwinjo niai i acaki, nia wumeduru niwotho i mer. 7 Kum jundra dupa giwok i ng’om, gin ma gibeyiyo ngo nia Yesu ubino i kum. Ng’atu m’ubetimo kumeni utie jandra man japiem Kristu.

8 Wubed ku weng’wu i kumwu giwu kara kud wukos gin ma watimo pire ma tek, ento kara wubin wunwang’ sukuliane ma zoo. 9 Ng’atu moko ci m’ukier bor man m’ubemedere ngo nibedo i ponji pa Kristu, nwang’u eworo ngo Mungu. Ento ng’atu m’ubemedere nibedo i ponji maeni nwang’u ebeworo Wego man etie bende jalub pa Wode. 10 Tekene ng’atu moko utundo i beng’wu m’ekelo ngo ponji maeni, kud wujole i ot mwu kadi amotha de kud wumothe. 11 Kum ng’atu m’umothe udikere bende karacelo kude i tic pare ma reco.

12 Kadok nwang’u atie ku lembe dupa m’akiew iwu de, abemito ngo akiewgi iwi karathasi man ku vino, ento atie ku genogen nia abibino i beng’wu man wabiweco kudwu wang’ ku wang’, kara anyong’a mwu upong’ bik.

13 Awiya pa nyameru ma tie ng’atu ma jung’iyo gimothi.