Wec mir acaki

JUKIEWO Biblia ku kony mi tipo ma leng’ pa Mungu i dhok mi Juebrania, Juaramea man Jugiriki. Kara dhanu mi “thek ceke” ginwang’ bero mi Lembe pa Mungu, ukwayu juloke i dhok ma tung’ tung’. (Matayo 24:14) Julwong’o buku pier ario wi abiro (27) ma niai i Matayo nitundo i Lembanyutha nia “Lembagora mi Jugiriki mi Jukristu” pilembe Jukristu moko ma tipo uyuyo i wigi re ma gikiewe ku kwong’a i dhok mi Jugiriki i rundi dage ma kwong’a m’i N.N.Y.

Biblia—Lok mi ng’om ma nyen (Matayo-Lembayutha) ular uwok ku kwong’a i dhok mir Anglais i oro 1950. Juloke asagane niai kud i gor ma pire ng’eyere lee mi dhu Jugiriki ma Westcott giku Hort re ma giwodho, m’urombo ku lembe m’i gor mi dhu Jugiriki ma con mandha. Biblia—Lok mi ng’om ma nyen uii niloko lembe ma jukiewo i dhu Jugiriki kubang’e kubang’e. Biblia maeni ma juloko i dhu Alur, ujengere iwi Biblia m’uwok i dhok mir Anglais i oro 2013, man jutimo kero bende niloko lembe m’i iye tap tap.

Yehova ma tie nying’ ma segi pa Mungu, nwang’ere i Biblia—Lok mi ng’om ma nyen (Matayo-Lembayutha) wang’ dak ario ku pier adek wi abiro (237). Nying’ Mungu ma Yehova utie leng’, man ukwayu nia dhanu ceke gilwong’e kara gibothi. Pieno, lok maeni udwoko nying’ne kaka ma tap m’enwang’ere i iye i Biblia.—Matayo 6:9; Jurumi 10:13.

Nying’ ma nia Lok mi ng’om ma nyen, ucungo iwi lembe ma Mungu ung’olo nia ebiketho ng’om ma nyen ma bedopwe bibedo i iye pi bero mi dhanu ceke. (2 Pethro 3:13) Ju ma giloko buku maeni, ma gimaru Mungu ma tie Won Biblia, ginwang’u nia gicikiri niloko paru pare man lembe m’eyero kubang’e kubang’e. Waberwo nia lok maeni umii kony lee mandha ni dhanu ceke ma gibeii ku kero migi zoo pi nitundo “i bang’ ng’eyong’ec ma tap mi lemandha.”—1 Timoteo 2:4.