Lemb’akeca Pa Mungu Tie Ang’o pi Ng’om?

1. Pirang’o Mungu ucwio ng’om?

Yehova umio ng’om ni dhanu. Ng’om utie kabedo mwa. Mungu ucwio Adamu giku Eva, ungo kara gipong’ polo, kum nang’u dong’ Mungu udaru nicwio Malaika dupa pi nikwo i polo. (Yob 38:4, 7) Ento, Mungu ucwio ng’atu ma nico ma kwong’a man ekethe i paradiso maber akeca ma julwong’o podho mir Eden. (Thangambere 2:15-17) Yehova umio ire man ni nyikwaye ma ebinwang’u, genogen mi kwo nja ku nja kud anyong’a iwi ng’om.​—Som Zaburi 37:29; 115:16.

Ku kwong’a, podho mir Eden kende re m’ubino Paradiso. Adamu ku min ot pare ma Eva gibino ku tic mi pong’o ng’om zoo ku nyikwaigi man noknok nibimo wie man kendo niyike en zoo edok ni paradiso. (Thangambere 1:28) Ng’om bithum ungo kadok nyanok de. Ebibedo nja ku nja kabedo mi dhanu.​—Som Zaburi 104:5.

2. Pirang’o ng’om utie ngo paradiso Kawono?

Adamu giku Eva giworo ngo dwand Mungu, e Yehova uriemogi kud i podho mir Eden. Paradiso ugam urwinyo man ng’atu moko acel de mbe m’ubedo kucopo mi dwoke kakare. Biblia yerokumae: “Jumio ng’om i cing’judubo.​—Yob 9:24.​—Som Thangambere 3:23, 24.

Nyo wi Yehova uwil ku lemb’akeca pare ma kwong’a pi dhanu? ungo! Etie jategokpo. Lembe copo voye ngo. (Isaya 45:18) Ebidwoko dhanu i kwo ma con ma egam epangu pigi.​—Som Zaburi 37:11, 34.

3. Paradiso bidok kakare nenedi?

Paradiso bidwogo kendo iwi ng’om i saa mi bimobim pa Yesu, Rwoth ma Mungu uketho en. I lwiny ma julwong’o Armagedon, Yesu bitelo wi jumalaika pa Mungu pi ninyotho ju ceke m’ubepiemiri ku Mungu kunoke m’utie judhoge. I ng’eye, Yesu bitwio Jok i kol pi oro 1 000. Jum’uworo Mungu biboth kud i nyoth maeno pi lembe Yesu bitelo wigi man bigwokogi. Gibikwo rondo ku rondo kud anyong’a i paradiso iwi ng’om.​—Som Lembanyutha 20:1-3; 21:3, 4.

4. Can bithum awene?

Mungu bidaru lembe ma reco kud i ng’om awene? Yesu ukoro pi “lanyuth” ma binyutho iwa nia kajik udhingo. Lembe m’ubetimere kawono iwi ng’om, ubesendo kwo mi dhanu man ubenyutho nia wakwo i ‘ajiki mi kit lembe.’​—Som Matayo 24:3, 7-14, 21, 22.

Yesu bidaru can ceke pi oro 1 000 ma ebibimo ng’om niai kud i polo. (Isaya 9:6, 7; 11:9) M’uweko nibedo Rwoth, Yesu bibedo bende Jalam ma dit, pieno ebiwodho cen dubo mi dhanu ceke m’umaru Mungu. E nikadhu kud i bang’ Yesu, Mungu bikabu remokum, tio man tho.​—Som Isaya 25:8; 33:24.

5. Ng’a ma bikwo i Paradiso mi nindo m’ubino?

Dhanu m’uworo Mungu re ma bikwo i paradiso. (1 Yohana 2:17) Yesu oro julubne gicidh nisayu dhanu ma mol man niponjogi ku gin m’ukwayu gitim kara Mungu ujolgi. Tin eni, Yehova ubeyiko milioni mi dhanu pi kwo i Paradiso m’ubino iwi ng’om. (Zefania 2:3) I Ot Ker ma tung’ tung’ mi Jumulembe pa Yehova, jubed juponjo kite mi bedo nico kunoke dhaku maber man wego kunoke mego maber. Junyodo kud Awiya gitimo thier ni Mungu karacelo man giponjo kite ma lembanyong’a copo konyogi i kwo migi.​—Som Mika 4:1-4.