Icopo Timo Ang’o Kara Kwo Mi Juruot Peri Ubed ku Mutoro?

1. Pirang’o kiewo nyom i bang’ leta pire tie tek akeca kara mutoro bed unuti i ot?

Lembanyong’a uai i bang’ Yehova, Mungu ma jamutoro man m’umito juruot bende ukwo ku mutoro. (1 Timoteo 1:11) En re ma ecaku the nyom kunoke gamiri. Nyomo iwang’ leta pire tie tek akeca kara juruot ukwo ku mutoro, pilembe ka jutimo kumeno, jutungo awiya i kwiocwiny man ma cwinyjo tek, awiyane de bedo i kwiocwiny man ma cwinygi tek. Jukristo ucikri niworo cik mi ng’om migi iwi kiewo nyom i bang’ leta.​—Som Luka 2:1, 4, 5

Nen pa Mungu tie ang’o iwi gamiri? Mungu mito nia gamiri ubed ni dikiri ma nja i kind nico ku dhaku. Yehova mito nia nico ku dhaku, ng’atuman uribre ku jadhoge mi nyom kende ento ku ng’atu mange ma woko ngo. (Juebrania 13:4) Edagu lalu nyom. (Malaki 2:16) Ento eyio nia jukristo gilal nyom migi man gidok ginyom ku ng’atu mange nang’u ndhu jadhog’gi mi nyom utimo gier, niwacu uribre ku ng’atu mange.​—Som Matayo 19:3-6, 9.

2. Lemb’ang’o m’ukwayu ng’atuman i kind nico ku dhaku utim ni wadi?

Yehova ucwio ng’atu ma nico man ng’atu ma dhaku kara ng’atuman ubed ku yeny pa wadi i lembe ma tung’tung’ mi gamiri. (Thangambere 2:18) Calu nico re m’utie jawiot, en re m’ukwayu ebed makwong’a ikum pong’o yeny mi kum mi juruot pare man niponjogi ku lembe pa Mungu. Ecikre ni nyutho mer ma jutwoniri kudo gijo ni dhaku pare. Nico ku dhaku, ukwayu ng’atuman umar man uwor jadoge mi nyom. Calu co zoo ku mon de zoo gitie leng’ ungo, ponjo niwekolembe kunoke nitimo kisa tie gin ma pire tek akeca kara mutoro ubed nuti i gamiri.​—Som Juefeso 4:31, 32; 5:22-25, 33; 1 Petro 3:7.

3. Nyo itie agonya ni weko cen gamiri ma mutoro mbe i ie?

Kan wunwang’u peko i nyom mwu, ukwayu wun ario ceke ng’atuman utim kero ni nyutho mer ni jadhoge mi nyom. (1 Jukorinto 13:4, 5) Lembe pa Mungu uyero ngo nia pokiri re m’utie yo mi daru lembe mabewok wang’ mapol i gamiri.​—Som 1 Jukorinto 7:10-13.

4. Awiya: Mungu ubemito wutim ang’o?

Yehova mito wubed ku mutoro. Pieno, emio iwu juk ma ber iwi kite ma wucopo kwo ko ku mutoro i aradu mwu. Emito wunwang’ kony ni kadhu kud i rieko mi junyodo mwu man lembe ma gidaru neno i kwo migi. (Jukolosai 3:20) Yehova tie Jacwic mwu, pieno emito bende wutim gin ma en ku wode gibekwayu i beng’wu kara wukwo ku mutoro.​—Som Eklizia 11:9–12:1; Matayo 19:13-15; 21:15-16.

5. Junyodo: wucopo timo ang’o kara awiya mwu ukwo ku mutoro?

Ukwayu wutim tic matek kara awiya mwu unwang’ cam, kabedo, man kendi. (1 Timoteo 5:8) Ento, kara awiya mwu ukwo ku mutoro, ukwayu bende wuponjgi nimaru Mungu man niyenyo ning’eyo cu i wiye. (Juefeso 6:4) Lapor mwu ma wubenyutho kudo mer ni Mungu copo telo awiya mwu akeca kara gilub batiendwu. Kan wubeponjogi ni kadhu kud i Lembe pa Mungu, ponjine copo konyo gin bende gibed ku paru mi timo ni Yehova.​—Som Poi mi Cik 6:4-7; Lembrieko 22:6.

Awiya nwang’u kony lee ka jubefoyogi man jubeketho cwinygi. Ento gitie bende ku yeny mi matira man mi teloith. Ng’iyo awiya ku lembe maeno gwokogi i kum kura ma copo ketho gikos nibedo ku mutoro i kwo migi. (Lembrieko 22:15) Ento, ukwayu ngo matira ubed ku kwinyo lee man ku kero i ie.​—Som Jukolosai 3:21.

Jumulembe pa Yehova bewodho buku ma tung’ tung’ ma jugoro akeca pi nikonyo junyodo man awiya. Buku maeno zoo ucungo iwi Biblia.​—Som Zaburi 19:7, 11.