Junyolo Yesu kakani man awene?

Kaisari Augusto, ma tie ubimo mi Roma, uketho cik nia dhanu ceke mi ng’om pare gikiewiri. Pieno ukwayu Yosefu ku Maria de gicidh i Bethlehem adhura pagi Yosefu, ma nwang’ere yo piny mi Yerusalem.

Dhanu dupa gicidho i Bethlehem pi nikiewiri. Kaka m’udong’ kuca ma Yosefu giku Maria gicopo nivogiri i ie utie dwol kende, ka ma jugwoko ie kana ku lei mange. Kakeca re ma Yesu unyolere i ie. Maria uboye ku bongu man epiele i wer, ka ma jumio ie cam ni lei.

Ecicopere nia Mungu re m’uketho ubimo Kaisari Augusto uwodh cik mi kiewo dhanu. Pirang’o? Pilembe eno uketho Yesu unyolere i Bethlehem, adhura pa kwaru mire, Rwoth Daudi. Lembagora ular uyero yang’con nia i adhura maeno re ma Rwoth ma jung’olo pire bibino ninyolere i ie.​—Mika 5:2.

Eno ubino uthieno ma pire tek mandha! Yo woko ke, der ucaru piny kaka ma jukwac ni ie. Derne tie dwong’ pa Yehova! E acel m’ikind jumalaika pa Mungu uwacu ni jukwac kumae: “Lworo kud unegwu; kum nen, akelo iwu rwonglembe ma ber mir anyong’a ma dit ma bibedo ni dhanu ceke: Kum tinuni junyolo iwu i adhura pa Daudi Jalar, ma en e Kristu ma Rwoth. Maeni en e giranyutha iwu: Wubinwang’u mukere ma juboyo ku bongu mi mukere, man evuto i ka ma juketho ie cam mi dhiang’.” E ngbang’ kumeni udul malaika m’i polo uwok man giwacu kumae: “Dwong’ ni Mungu ma malu ngbir, Kwiocwiny de wi ng’om kind dhanu ma mutoro nege i kumgi.”​—Luka 2:10-14.

Kinde ma jumalaika giai ku keca, jukwac giweciri i kindgi kumae: “Dong’ wacidhu kawono i Bethlehem, wanenu gin maeni m’utimbre ma [Yehova] uketho wang’eyo.” (Luka 2:15) Gicidho pio pio kuca man ginwang’u Yesu ma nyamukere, tap kaka ma malaika uyero igi nia gibinwang’e i ie. Kinde ma jukwac gikoro lembe maeno ma malaika uyero igi, dhanu ceke ma giwinjo lembuno igi wang’ lii. Maria uneno lembe maeno ceke ni lembe ma pire tek, man ekanu lembenegi i adundene.

Tin dhanu dupa giyio nia junyolo Yesu nindo 25 dwi mir 12. Ento i ng’om mi Bethlehem, dwi mir 12 bebedo dwi mi koth man mi koyo. Dwine moko bebedo dwi ma pei bedo nuti ie. Etie lembe ma tek ni jukwac nibedo woko diewor traka ku lei migi saa maeno. Bende, ecicopere nia jabim mi Roma copo ngo niketho dhanu ma saa ceke gibeyenyo nijai ire, gibin nikiewiri i saa mi koyo. M’umbe jiji, ecicopere nia Yesu unyolere i dwi mir apar.