Yesu ucamu cam yo pa Jafarisayo

Kinde ma fodi Yesu utie i Yahudi, Jafarisayo moko ulwong’e ni cam i bang’e. Ecicopere nia elwong’e ni cam mi dieceng’. (Luka 11:37, 38; pore ku Luka 14:12.) Ma fodi gicaku ngo nicamu, Jufarisayo gicaku nilwoko cing’gi nitundo i ujonj botgi kunoke the botgi. Ento Yesu utimo ngo calu gin. (Matayo 15:1, 2) Cik pa Mungu ukwero ngo nilwoko cing’jo kumeca, bende Cikne ung’olo ngo nia jubed julwok cing’ kumeca.

I Jufarisayo wang’ lii ikum Yesu pilembe elubo ngo lemsuru maeca. Kinde ma Yesu uneno lembuno, eyero kumae: “Wun wu Jufarisayo wulwoko kikombe ku atangla; ento kud i iwu wupong’ ku kuvuga kud akece de. Wu jukusegu, ng’atu m’utimo yo woko etimo yor i ie bende ngo?”​—Luka 11:39, 40.

Nilwoko cing’jo iwang’ nicamu cam tie rac ungo, ento lembe utie ikum umbili mi jurudini. Jufarisayo ku jumange gitie ku lemsuru mi lwoko cing’gi, re nilwoko lembe marac ma ni i adundegi uvoyogi. Lembuno uketho Yesu umio igi juk ma e: “Wumi gin ma ni i iwu ni giramia; e ka gin ceke bibedo leng’ iwu.” (Luka 11:41) Eno tie lemandha! Mer mir adunde re m’ukwayu ucwal ng’atini nimio giramia, ento ungo pi nitelo nen mi dhanu.

Eno ubenyutho ngo nia dhanu maeno gibed gimio ngo giramia. Yesu uyero kumae: “Wumio apaje mir ukuju kud usiga man uboko ceke, e wuweko ng’olo lembe ma pwe ku mer pa Mungu: ento [ukwayu] wutim maeni, man kud wuwek timo wagi maeno.” (Luka 11:42) Cik pa Mungu ugam ukwayu nia jumii apaj piny mi mwoka. (Poi mi Cik 14:22) Gibed gimio apaj piny mir ukuju, usiga, kud uboko mange ma ng’wice ng’ar ma jucamu. Jufarisayo gicego migi nimio apaj piny mir uboko maeno, ento giweko gin ma pire tek ma Cik ubekwayu ya gitim, calu ve nitimo bedopwe man nibedo mol i wang’ Mungu?​—Mika 6:8.

Yesu umedere niyero igi kumae: “Can i wiwu wu Jufarisayo! Kum wumaru kom ma sagu ceke i kacokiri, ku moth de i katali. Can i wiwu! Kum wubedo calu odliel ma nen ungo, ma jum’ukadhu kud i wigi ging’eyo ngo.” (Luka 11:43, 44) I saa maeca, ka ng’atini ukier iwi liel, ebedo m’ecido nimakere ku kura migi. Yesu utio ku wec maeno pi ninyutho nia cilo mi Jufarisayo ubenen ungo ngbeng’ kamaleng’.​—Matayo 23:27.

Ng’atu moko m’i kindgi m’ung’eyo cik lee ugamu dhoge kumae: “Japonji, ku yero maeni ijuko wan bende.” Dhanu maeno ginyang’ nia karaman gibekonyo dhanu mange cu ngo. Yesu uwacu igi kumae: “Can i wiwu bende wu jueuthecik! Kum wuketho ter ma yeyo tek wi dhanu, wun giwu de wumulo terne ku lwetwu acel de ngo. Can i wiwu! Kum wugomo odliel mi jubila, man wegwu negogi.”​—Luka 11:45-47.

Ter ma Yesu ubeweco i wie utie cik mi suru ma Jufarisayo githungo gin gigi. Dhanu maeno giketho kwo udoko tek ni jumange. Gidiyo dhanu ceke nia giwor cik maeno m’udoko ni ter ma pek. Niai ikum Abel, kwaru migi ubed unego jubila pa Mungu. Kawoni gin ma gibetimiri nia gimio yung ni jubila ma gibegiero ko liel migi, karaman gibekwanyu kit kura ku timo pa kwaru migi. Gimito bende gineg Jabila pa Mungu ma pire tek akeca. Yesu uyero nia Mungu bipoko lembe i wigi. Lembuno ubin unen kamaleng’ ing’ei oro ma romo 38, i oro mi 70 R.M.

Yesu umedere niwacu igi nia, “Can i wiwu jueuthecik! Kum wukabu kifungula mi ng’eyong’ec: wun giwu wumondo ngo, man wucero jum’ubemondo!” (Luka 11:52) Dhanu maeni re ma nwang’u copo niponjo Lembe pa Mungu ni jumange, kawoni gin re ma gibecero dhanu mange ninyang’ i lembene.

Jufarisayo ku Jugorcik giwinjo lembuno nenedi? Kinde ma Yesu ubeai ku keca, kwinyo umakugi, man gicaku nidhule ku penji dupa. Gipenje ngo pi ninyang’ i lembe moko. Ento giyenyo gicike ku wec kara eyer lembe moko ma gimake ko.