Mungu ucwiyo polo ku ng’om

Yehova Mungu tie Jacwic mwa. En re m’ecwiyo piny ceke; piny ma waneno ku ma waneno ngo de. I wang’ nicwiyo piny ma wabed waneno, elar ecwiyo jumalaika dupa. Nyo ing’eyo nia jumalaika gitie jukani? Jumalaika gitie jutic pa Yehova. Ecwiyogi ku kum mi tipo calu en. Wacopo nenogi ngo, tap calu ma wacopo neno ngo Mungu. Malaika ma kwong’a ma Yehova ular ucwiyo udok ukonye i tic ma tung’ tung’. Malaikane ukonyo Yehova kinde m’ebecwiyo nyikaluku man piny mange; pinyne moko tie ng’om ma tie kabedo mwa ma leng’ akeca.

I ng’eye, Yehova uyiko ng’om kara lei man dhanu gikwo i wiye. Eketho ceng’ ucaku rieny iwi ng’om. Ecwiyo gudi, nam man kulo.

Lembang’o m’udok utimere? Yehova uyero kumae: ‘Abiketho ng’om utwii lum, uboko, man yen.’ E yen ma tung’ tung’ ma cego nying’gi ucaku twii, man dek ma col ku thiwe de. I ng’eye, Yehova ucwiyo lei ma tung’ tung’: moko tie ma kwang’ i pii, ma wotho awotha, ma wol ku korgi man winyo ma tuk i kor polo. Leine moko thindho, calu ve afoyo, mange ke dongo, calu ve liec. In imaru lei ma kani nisagu?

I ng’eye Yehova uyero ni malaika m’ecwiyo ma kwong’a kumae: “Dong’ wacwii dhanu.” Mungu ucwiyo dhanu i ayi m’ukoc ku lei. Ecwiyogi ku copo mi yiko piny, mi weco, mi ng’iero man mi rwo. Bende, emiyo igi tic mi gwoko ng’om man lei. Nyo ing’eyo nia jukani ma gibino dhanu ma kwong’a? Wabineno i ponji m’ulubo.