PONJI MIR 6
Dhanu abora giboth
Noa, juruot pare man lei gimondo i avur. Yehova ugam uciko dhug avur, e koth uloy. Koth ucwii lee mandha, man avur ucaku lierere iwi pii. Piine upong’o wi ng’om zoo. Dhanu ceke ma gibino ngo i avur githo. Ento Noa ku juruot pare gibedo ma ber i avur. Kepar pi mutoro ma gibino ko pilembe giworo dwand Yehova!
Koth ucwii pi ceng’ 40 man diewor de 40, kan ecok. E nok nok, pii ucaku dwono. I ng’eye avur ucungo iwi got moko. Ento nwang’u fodi pii upong’ asu kakare ceke, e Noa ku juruot pare giwok ungo ndhu ndhu kud i avur.
Nok nok, pii ugam udwono. Noa ku juruot pare gitimo oro ma kadhu acel i avur. I ng’eye, Yehova uyero igi nia giwoki kud i avur. Gidwoko foyofoc lee dit ni Yehova pilembe ebodhogi, man pi ninyutho foyofocne githiero ire lam.
Yehova ujolo lam maeno ma githiero ire. Pieno etimo lembariba kugi nia ebinyotho ngo ng’om ku pii kendo. Man eketho danyu i kor polo ubed ni giranyutha mi lembaribane. Nyo idaru neno danyu?
I ng’eye, Yehova ung’olo ni Noa kud awiya pare nia ginyol awiya man gipong’ ng’om.
“Noa umondo i avur, e [dhanu] giketho ngo wigi i kum lembe m’ubino timere, cil ma pii ma dit m’uumo ng’om ucoro ko man uterogi ceke cen.”—Matayo 24:38, 39