Ot ma wiw mi Babel

I ng’ey pii ma dit m’uumo ng’om zoo, wot Noa ku mon migi ginyolo awiya dupa. Wendgi umedere lee mandha, uketho gipokiri i kabedo ma tung’ tung’ i wang’ ng’om calu ma Yehova ular ung’olo igi.

Ento dhanune moko gibed giworo ngo Yehova. Giyero kumae: ‘Wubin wagieru adhura iwa man wabedu i iye. Wabigiero bende ot ma tek ma wiw ma wiye copo tundo i polo, kara piwa uyiki.’

Lembe ma gibino timo ufoyo ngo i Yehova, uketho eng’iyo nia ejig tic migine cen. Nyo ing’eyo kite m’ejigo ko tije? Mbwang’ kumeni ci eketho gicaku weco dhok ma tung’ tung’. E gicaku winjiri ngo i kindgi, pieno giweko nigiero ode. Julwong’o nying’ ot ma gibino gierone nia Babel, wec ma thelembene tie “jebo wic.” E dhanu gicaku lal i kabedo ma tung’ tung’ i wang’ ng’om. Ento gimediri asu nitimo lembe ma reco kaka ma gidok nikwo i iye. Nyo ng’atu moko nuti de m’umedere nimaru Yehova? Ponji m’ulubo binyutho.