Kana pa Balam uweco

Nyithindho mir Israel gitimo oro ma kadhu 40 i langa. I ng’eye, giloyo adhura ma tek dupa i lwiny. I ng’ey ma gitimo nindo ma lee i pambu mi Moab yo nyangu mi Kulo Yordan, saa ma gimond ko i Ng’om mi lembang’ola ugam uromo. Ndiri ubino nego Balak m’ubimo mi Moab nia gibecimaye ku ng’om pare. Pieno, elwong’o ng’atu moko ma nyinge Balam ubin i bang’e i Moab pi nilamu nyithindho mir Israel.

Ento Yehova uyero ni Balam kumae: ‘Icikiri ngo nilamu nyithindho mir Israel.’ E Balam ukwero nia ecidho ngo. Re ubimo Balak uoro kwenda kendo i bang’e man eng’olo nia ebimiyo ire piny moko ci m’emaru. Ento wang’uni de ekwero. E Mungu uwacu ire kumae: ‘Icopo cidho, ento ibiyero kende kende gin m’abiwacu iyer.’

Balam uidho iwi kana pare man eloro i Moab. Epangu nia ebiwok lamu nyithindho mir Israel kadok nwang’u Yehova ular ukwere nia kud elamgi de. I gengi, malaika pa Yehova uwok ire wang’ adek. Balam ubino neno ngo malaikane, ento kana pare re m’unene. Wang’ mi kwong’o, kanane uweko gengi emondo i lum. Wang’ mir ario, kana ucorere i kum gang’kidi man erudo cong Balam i kum kidi. Wang’ ma tokcen, kana ugam uvuto i wang’ gengi. Wang’ adek maeno zoo Balam uwotho goyo kanane kud uluth.

I ng’ey m’egoye wang’ mir adege, Yehova ugam uyabu dhu kanane, e eweco. Kana upenjo Balam kumae: ‘Igoya wang’ adek kumeni pirang’o?’ Balam udwoko ire kumae: ‘Agoyi kum icaya. Ka nwang’u pala utie i cinga nwang’u anegi cen.’ Man kana uwacu ire kumae: ‘Iringo kuda pi oro ma lee, nyo adaru timi kumeni de?’

E Yehova uyabu wang’ Balam man eneno malaika ucungo i yo. Malaikane uyero ni Balam kumae: ‘Yehova ung’olo iri nia kud ilam nyithindho mir Israel.’ Balam uyero kumae: ‘Adubo andha. Dong’ aloko adok.’ Ento malaika uyero ire kumae: ‘Icopo cidho i Moab, ento ibiwok yero kende kende gin ma Yehova ung’olo iri.’

Nyo Balam unwang’u ponji i kum lembe maeno? Ungo. I ng’eye, Balam upimo nilamu nyithindho mir Israel wang’ adek, ento Yehova uketho emiyo igi mugisa, kakare nilamugi alama. Kinde ma Juisrael gikiedo ku dhanu mi Moab, giwok ginego Balam. Nwang’u ecopo bedo lembe ma ber dit ka nwang’u Balam uwinjo dwand Yehova wang’ ma kwong’a.