Yehova ung’iyo Yocuwa

Musa utelo wi nyithidho mir Israel pi oro ma dupa, ento kawoni dong’ ewok i ajiki mi kwo pare. Yehova uyero ire kumae: ‘Ng’atu ma bitelo wi nyithindho mir Israel nitundo i Ng’om mi lembang’ola utie in ungo. Re abiketho ibineno ng’ombe.’ Musa ukwayu Yehova nia eng’ii jatelwic ma nyen pi nitelo wi dhanu. Yehova udwoko ire kumae: ‘Cidh i bang’ Yocuwa, man wac ire nia en re m’ebitelo wi dhanu.’

Musa ugam unyutho ni dhanu nia tho pare udhingo man nia Yehova ung’iyo Yocuwa re m’utel wigi nitundo i Ng’om mi lembang’ola. Musa uyero ni Yocuwa kumae: ‘Lworo kud unegi. Yehova bikonyi.’ I ng’eye nyanok, Musa uidho iwi got Nebo, e Yehova unyutho ire ng’om m’eng’olo ni Abraham, Isak man Yakobo. I ng’eye Musa ugam utho, nwang’u etie ku oro 120.

Yehova uyero ni Yocuwa kumae: ‘Kadh loka Kulo Yordan, man cidh i ng’om Kanan. Abikonyi tap calu m’agam akonyo ko Musa. Som cik para kubang’ ceng’. Lworo kud unegi. Bed tek. Cidhi man tim lembe m’ang’olo iri.’

Yocuwa ugam uoro julib ario i adhura mi Yeriko. I ponji m’ulubo, wabineno lembe m’utimere kuca. Kinde ma gidwogo, giyero nia saa maeca re m’utie saa ma ber mi maku adhura mi Kanan. Urwonde, Yocuwa ung’olo ni dhanu nia gicok woth. Eyero ni julam ma giyeyo sanduku mi lembariba nia gitel yo man gilor i dhu Kulo Yordan. I saa maeno nwang’u kulone upong’ lee. Ento kinde ma tiend julam umulo pii tap ci, pii ucungo man ethwo kaw! Julam gicidho nitundo i diere man giwok gicungo keca nitundo ma nyithindho mir Israel ceke gikadhu lokaca. M’umbe jiji, udu maeno upoyo wi Juisrael i kum lembe ma Yehova utimo i Nam ma kwar!

I ng’ey oro ma dupa, nyithindho mir Israel gigam gimondo i Ng’om mi lembang’ola. Kawoni dong’ gicopo giero udi, adhura, gicopo yabu podho, gicopo pidho ulok man yen mange ma cego nyinge.