Dhaker moko ma cwinye rac unwang’u matira

Ubimo Ahab ubed ukwo i adhura mi Yezreel. Niai kud i wang’ madhirisa mi ot pare, ebed eneno podho mir ulok pa ng’atu moko ma nyinge Naboth. Ahab ubed umito nia podho maeno ubed pare, pieno eyenyo eng’iew podhone i bang’ Naboth. Ento Naboth ukwero nilworo ire podho maeno, pilembe Cik pa Yehova ukwero nilworo ng’om ma junyodo giweko ni awiya. Nyo Ahab uwinjo dwand Naboth pilembe ebino timo lembe m’atira? Ungo. Lembe ma Naboth utimo unyayu ng’eicwiny lee i iye. Ng’eicwinyne uketho ecidh ecerere i kusika pare man ekwero nicamu kadok cam de.

Yezabel ma dhaku p’Ahab uyero ire kumae: ‘Itie ubimo mir Israel. Icopo bedo ku gin moko ci m’imaru; abimiyo iri podho maeca.’ Egam ekiewo barua ni judongo mir adhura, ewacu igi nia gidot Naboth nia elamu Mungu man ging’ure ku kidi nitundo etho. Judongone gigam gitimo lembe ma Yezabel ung’olo igi; e i ng’eye Yezabel uyero ni Ahab kumae: ‘Naboth udaru tho. Kawoni dong’ podho mir ulok pare tie peri.’

Naboth kende ngo re m’ubino ng’atu m’ukoso ngo ma Yezabel unego. Enego bende dhanu dupa m’umaru Yehova. Ebed erwo ni ayi gin m’acwiya man ebed etimo lembe mange bende dupa ma reco. Yehova uneno lembe ceke ma reco ma Yezabel utimo. E etime nenedi?

I ng’ey m’Ahab utho, Yoram ma wode re m’udoko ubimo. Yehova uoro ng’atu moko ma nyinge Yehu ucidh umii matira ni Yezabel man ni juruot pare.

Yehu uidho iwi kana pare man ecidho nitundo i Yezreel kaka ma Yezabel kwo i iye. Yoram ubino ku magali pare pi nirombo ku Yehu man ewok epenjo Yehu kumae: ‘Nyo kwiyocwiny unuti de i kindwa?’ Yehu udwoko ire kumae: ‘Kwiyocwiny bibedo mbe i kindwa ka fodi meru ma Yezabel ubemedere asu ku timo lembe ma reco.’ Yoram ugam uwiro wi kana pare kara eringi cen. Ento kinde m’eberingo, Yehu ukile kud athero, e etho.

I ng’eye, Yehu ucidho i kal kaka ma Yezabel n’i iye. Saa ma Yezabel uwinjo nia Yehu ubebino, erukere, eyiko yuk wiye man ebino kure ku wang’ madhirisa mi ot ma malu. Kinde ma Yehu utundo, Yezabel uweco i bang’e ku dhoge ma rac mandha. Yehu ukok ni jutic pa Yezabel ma gibedo i ng’ete kumae: ‘Wubole piny!’ Gibolo Yezabel ku wang’ madhirisa, e epodho i ng’om man etho.

Yehu udok unego bende awiya ma co 70 p’Ahab, man ekabu thier ma jubed jutimo ni Baal kud i ng’ombe ceke. M’umbe jiji, ponji maeni ukonyi ninyang’ nia Yehova ung’eyo lembe ceke man nia emiyo matira tap i saane ni ju ma gibetimo lembe ma reco.