Ezra uponjo dhanu ku Cik pa Mungu

Oro ma romo 70 ukadhu niai ma nyithindho mir Israel ma dupa gidok i Yeruzalem, ento fodi asu jumoko m’i kindgi ubino kwo i kabedo ma tung’ tung’ mi bimobim mi Persi. Ng’atu acel m’i kindgi ubino jalam ma nyinge Ezra, m’ubed uponjo dhanu ku Cik pa Mungu. Ezra uwinjo nia dhanu mi Yeruzalem gibino woro ngo Cik, pieno emito ecidhi kuca wek kara ekonygi. Artacasta m’ubimo mi Persi uyero ire kumae: ‘Mungu udwoki riek kara iponj Cik pare ni dhanu. Cidhi man icok dhanu ceke ma gibemito gicidh kudi.’ Ezra ugam ucoko dhu dhanu ceke ma gibemito gidok i Yeruzalem. Gikwayu Yehova ugwokgi ma ber i woth ma bor ma gibiwotho, e gigam gicoko woth.

I ng’ey dwi ang’wen, gigam gitundo i Yeruzalem. Judongo ma wijo giwok giwacu ni Ezra kumae: ‘Nyithindho mir Israel giworo ngo Yehova; gigamu mon ma woro mungu m’araga.’ Ezra utimo ang’o? I wang’ dhanu keca, erum man erwo kumae: ‘Yehova, itimo iwa lembe dupa dit, ento wadubo iri.’ Dhanu giyewo dubo migi, re fodi asu gibino mediri ku timo lembe m’atira ngo. Ezra ung’iyo judongo man jupoklembe kara giyik lembe maeno. Kinde ma dwi adek ukadhu, juriemo cen dhanu ma woro ngo Yehova.

E oro apar ario udok ukadhu. I kind oro maeno, jugiero gang’kidi mi Yeruzalem kendo. Pieno, Ezra ucoko dhu dhanu i lela ma dhanu becokiri lee i iye pi nisomo igi Cik pa Mungu. Kinde ma Ezra uyabu buku, dhanu uai malu. Emiyo pak ni Yehova, e dhanu gicoyo cing’gi malu pi ninyutho nia gijolo. I ng’eye, Ezra usomo Cik man ekoro iye, e dhanu giciko ithgi giwinjo cuu mandha. Giyiyo nia gidaru kier kendo kud i kum Yehova, e giwak. Urwonde, Ezra usomo igi Cik mange. Ginyang’ nia nindo ma gicikiri nitimo i iye Foc mi otbak udhingo. E ndhu ndhu nica, gicaku yikiri pi focne.

I kind nindo abiro mi foc maeno, dhanu gibedo ku mutoro man gifoyo Yehova pi cam m’ucek igi lee i podho man ma gikayu. Nwang’u niai i rundi pa Yocuwa, Foc mi otbak m’utimere kumeca ubino mbe. I ng’ey foc maeno dhanu ucokiri man girwo kumae: ‘Yehova, ibodhowa kud i ng’eca, imiyo iwa cam i langa man imiyo iwa ng’om maeni ma leng’. Ento wajai iri kendo kendo. Ibed ioro jubila de pi nimiyo iwa cimowang’, ento wawinjogi ngo. Re asu inyutho iwa cirocir. Igwoko lembang’ola peri m’itimo ni Abraham. Kawoni dong’ wabeng’olo nia wabiworo ndhu in.’ Gigam gigoro lembang’ola migine agora ku cing’gi, e judongo ma wijo ku Julawi man julam giketho cing’gi i there.