Jumalaika gitwong’o pi nyoliri pa Yesu

Jabim mi Roma ma nyinge Kaisari Ogusto ugam ung’olo nia Juyahudi ceke gicidh i adhura ma thuggi pi nikiewiri. E Yozefu giku Maria de gicidho i Bethlehem, kaka ma jupagi Yozefu ular uai kud i iye. Ubino tap saa ma nwang’u Maria romo nyolo i iye nyathin pare.

Kinde ma gitundo i Bethlehem, giwok ginwang’u kabedo udaru pong’o man kaka ma giromo bedo i iye utie dwol kende. Kakeca re ma Maria unyolo i iye wode ma Yesu. Eumo kume ku bongu ma nwenwe man epiele yoo ma ber i wer mi dhiang’.

Nwang’u jukwac moko gibino woko pi nikuro kum leya migi ceng’ini ku Bethlehem. Mbwang’ kumeni, malaika acel uwok man rcungo i wang’gi, e der mi dwong’ pa Yehova ucarugi. Lworo umaku jukwac lee mandha, ento malaika uyero igi kumae: ‘Lworo kud unegwu. Atie ku rwonglembe ma ber mandha. Tin eni Masiya unyolere i Bethlehem.’ E ndhu ndhu nica, jumalaika dupa giwok i kor polo man giyero kumae: ‘Dwong’ ni Mungu i polo, man kwiyocwiny iwi ng’om.’ I ng’eye, jumalaikane gigam girwinyo. Jukwac gitimo ang’o?

Jukwac gicaku weco i kindgi kumae: ‘Wacidhu ndhu ndhu eni i Bethlehem.’ Gicidho pio pio man ginwang’u Yozefu giku Maria i dwol karacelo ku mukere migi.

Dhanu ceke ma giwinjo lembe ma malaika uyero ni jukwac igi uwang’ lii. Maria uparu cuu i wec pa malaika man wiye uwil ungo nyanok de i kum wecne. Jukwac gidok ku ng’eygi i bang’ udul leya migi ma gibepaku Yehova pi lembe ceke ma gineno man ma giwinjo.