Yesu uponjo julub pare kud ayi ma girwo ko

Jufarisayo gibed gitimo lembe ceke pi nitelo nen mi dhanu i wigi gigi. Ka gitimo lembe moko ma ber, gitime kara dhanu unen. Gibed girwo kaka ma dhanu bepong’ lee i iye kara junen gi. Jufarisayo gibed gimaku rwo ma boco man gibed gitere ku wigi i sinagog kud i akara yo kaka ma dhanu copo winjogi i iye. Pieno, i dhanu uwang’ lii kinde ma Yesu uyero igi kumae: ‘Kud wurwo calu Jufarisayo. Gibed giparu nia gibinyayu anyong’a i Mungu pilembe ya gibeweco lee, kun ke ungo. Rwo utie lembe m’i kindwu ku Yehova. Kud ibed iyer lembe ma rom wang’ dupa dupa. Yehova ubemito ikor ire tap ayi m’ibewinjiri ko i adundeni.’

‘Wubed wurwo kumae: Wegwa ma n’i polo, nyingi bed leng’. Ker peri bin, Yeny peri utimere bende i ng’om, calu m’ebetimere i polo.’ Yesu uyero igi bende nia gibed girwo pi cam ma kubang’ ceng’, pi wek mi dubo migi, man pi peko ma ng’atuman ubenwang’ere ko.

Yesu uyero bende kumae: ‘Kud wuwek nirwo. Wumeduru nikwayu lembe ma beco i bang’ Wegwu ma Yehova. Wego ceke bemito emii piny ma beco ni nyathin pare. Tek wodi ukwayu mukathi i beng’i, nyo ibimiyo ire kidi? Kunoke tek ekweyi ku rec, nyo ibimiyo ire thwoli?’

I ng’eye, Yesu ukoro i ponjine kumae: ‘Ka wun de wung’eyo nimiyo giramiya ma beco ni awiya mwu, dong’ Wegwu ma Yehova ke bimiyo ngo iwu tipo ma leng’ nisagu? Gin m’ukwayu wutim utie nipenjo.’ Nyo ibed itiyo ku juk maeno ma Yesu umiyo? Ibed irwo pi lembang’o?