Lembe ma nwang’ere i thenge mir 7

Thenge maeni ukoro pi kwo p’ubimo Saul man p’ubimo Daudi. Lembe ma jukoro i iye utimere pi oro 80. I acaki, Saul ubino ng’atu ma mol man ebed elworo Mungu, re i ng’ey nindo ma nok kende elokere man ekwero nilubo telowic pa Yehova. E Yehova ukwere man i ng’ey nindo moko, eoro Samwel ucidh uwir Daudi ma bidoko ubimo mir Israel kaka Saul. Kumira umondo i Saul, pieno wang’ dupa emito eneg Daudi, ento Daudi uculo ngo kwor. Wod Saul ma nyinge Yonathan ung’eyo nia Yehova re m’ung’iyo Daudi, eno uketho egwoko bedoleng’ pare ni Daudi. Daudi utimo dubo dupa ma pek, ento saa ceke ebed ejolo twiny m’uai i bang’ Yehova. Kan itie janyodo, kony nyathin peri ung’ey nia pire tie tek niworo Yehova man nigwoko bedoleng’ mwa ire man niworo bende dhanu m’eketho utel wiwa.