PONJI MIR 8

Niponjo ku lapor

Matayo 13:34, 35

LEMBE M’ICOPO TIMO: Kinde m’ibemio ponji peri, mak lapor ma yot ma copo telo nen mi juwinj, man ma copo ketho ginyang’ i lembe ma pigi tek.

Ng’ii lapor ma lalu ngo wi dhanu. Calu Yesu, tii ku lembe ma dhanu ng’eyo ma ber, man piny ma gitio ko nja, pi nikoro lemandha ma pigi tek. Kud inur lapor ku ng’ili lembe ma tijgi mbe. Ubekwayu nia lembe ceke mi lapor m’ibemio uromb ku ponji m’ibemito dhanu ginwang’, kan ungo, ibinyotho wi dhanu anyotha.

Bed janen lembe. Nen lembe mi ng’eti, ponj girasoma mi Jukristu, man winj juponji ma gitie ku bodho. Saa ma kan inwang’u lapor moko m’icopo tio ko pi nimio kero i ponji peri, kiewe kaka moko.
Par pi juwinj peri. Ng’ii lapor m’ugwaku kum lembe ma juwinj gitimo nja man m’urombo ku yeny migi. Re kud imii lapor ma copo nyayu ng’ecwiny i dhanu, kunoke ma copo ketho gibedo ku lewic.
Ponj lembe ma pire tek. Mii lapor pi niketho nwoc iwi lembe ma pigi tek, ento iwi lembe ma thindho thindho ngo. Tim kero nikonyo juwinj gipoi i kum ponji ma ginwang’u niai kud i lapor, ento ungo kende kende i kum laporne.