6. Tic mi rweyo lembanyong’a i ng’om zoo — KAPANG BUKU I YAMU Watchtower

6. Tic mi rweyo lembanyong’a i ng’om zoo

“Lembanyong’a maeni mi Ker jubirweyo i ng’om zoo ni lembatuca ni thek ceke.”—MATAYO 24:14.

● Vaiatea kwo i Tuamotu ma tie cula mi Pacifique. Kadok nwang’u ungu mi cula mi Tuamotu utie ku nyithi cula ma thindho thindho 80 ma gimaku ngulungulu mi kilometre 802 900, ento etie kende kende ku dhanu 16 000. Re Jumulembe pa Yehova gigam gitundo i bang’ Vaiatea man judhugula pare. Pirang’o? Pilembe Jumulembe pa Yehova gimaru rweyo lembanyong’a mi Ker pa Mungu ni dhanu ceke kadok nwang’u gibekwo kakani.

LEMBE M’UBETIMERE UBENYUTHO ANG’O? Rwonglembe mi Ker ubetundo i bang’ dhanu mi gund ng’om zoo. I oro 2010 kende ci, Jumulembe pa Yehova girweyo lembanyong’a pi saa ma kadhu bilioni 1.6 i ng’om 236. Ka jutimo kwan, etie ve nia Jamulembe pa Yehova acel acel uberweyo lembanyong’a pi dakika 30 kubang’ ceng’. I kind oro moko m’ukadhu, giwodho man gipoko jamtic ma tung’ tung’ mi ponjo Biblia ma kadhu bilioni 20.

PARU MOKO MI JAI Jucaku rweyo rwonglembe mi Biblia niai con.

NYO ENO TIE PARU MANDHA? I andha, dhanu dupa gigam girweyo rwonglembe moko mi Biblia. Enre ju ma pol gitime pi saa ma nyanok kende man i kabedo moko kende. Tung’ kugi, Jumulembe pa Yehova giberweyo lembanyong’a i ayi m’upangere ma ber i ng’om zoo man ticne ubemulo kum dhanu milioni dak swaa. Gimediri asu ku tic maeno kadok nwang’u dikiri moko ma gitek lee man ma kisa mbe i igi gibenyayu ragedo ma rac mandha i kumgi; kit ragedo ma fodi junyayu ngo i kumjo niai ma jubekwo iwi ng’om.a (Marko 13:13) Bende, juculo ngo Jumulembe pa Yehova pi tic mi rweyo lembanyong’a. Ento gimiyo saa migi pi nitimo tije man gipoko girasoma migi ni dhanu de mi manamu. Tic migine zoo ujengere iwi giramiya ma ku berocwiny.

IPARU ANG’O? Nyo juberweyo ‘lembanyong’a mi Ker’ i ng’om zoo? Nyo lembila maeno m’ubepong’o unyutho nia lembe moko ma ber udhingo timere?

[Korolembe mi there]

a Kara inyang’ lee, nen video ma thiwigi tie “Les Témoins de Jéhovah, fidèles dans les épreuves,” “Les triangles violets,” man “La fermeté des Témoins de Jéhovah face à la persécution nazie,” ma Jumulembe pa Yehova re ma giwodho.

[Paru ma nwang’ere]

“Tekene fodi Yehova uyiyo ci, wabimedara nirweyo lembanyong’a mi Ker kud amora, wabitiyo ku bodho moko ci pi nirweye ni dhanu.”—BUKU MI ORO MI JUMULEMBE PA YEHOVA MI 2010.