Agam amaru tuko mi Baseball nisagu lembe mange ceke!

I WANG’E

Adongo i ng’et Puerto Limón, ma tie adhura moko ma nwang’ere i dhu nam i tung Costa Rica ku yo nyangu. Junyodo para ubino kud awiya abora, ma an ke abino nyathin ne mir abiro. Baba ugam utho nwang’u atie ku oro abora. I ng’ey tho parene mama udog utungowa en kende.

Tuko mi Baseball ubino gin m’amaru lee i kwo para. Agam amaru timo sport lee mandha kinde ma fodi abino nyathin. Kinde ma gong’ adongo, adog acaku tuko i kind ungu moko ma tuko kwaya mi baseball. E kinde m’adoko ku oro 20 ku wiye, jalwo moko ma ng’iyo jurutuko ma beco ukwayu nia adok acak tuko i kind ungu ma dit mi Nicaragua. Re, calu ma leng’kum pa mama ubino cuu ngo i saa maeno man an re m’abed aneno wiye, agam amaru ngo nicikwo i Nicaragua. Pieno, agam akwero lwong’one cen. I ng’eye ng’atu mange de ulwong’a nia adok atuk i kind ungu ma dit mi ng’om mi Costa Rica, ma ju ma tuko i ungune tie jurutuko ma dongo ma julondo alonda. Lwong’o maeno re agam ayiyo. E acaku tuko i kind ungu mi ng’om mi Costa Rica niai i oro 1949 nitundo i oro 1952, man atuko matchs i Cuba i Mexique man i Nicaragua. Abino jagol ma tek mandha i baseball. I ng’ey maeno, atuko matchs mange 17 m’umbe nitimo kosa acel de. Agam amaru lee dit niwinjo ka dhanu ubekok ku nyinga i ng’et bar!

Ku lemarac, abino ku kit kwo mi tarwang’. Kadok nwang’u abino ku dhaku acel, re abed awok ku mon mange de. Bende abed amadhu kong’o i ayi ma larere de ngo. Nindo acel agam amer lee mandha ma urwonde ku gweno kinde m’abeai kud i wi kavuto, ang’eyo ngo nia atundo i pacu nenedi! Abed atuko bende tuko mi sente, calu ve: Domino man loterie.

Tap i saa m’abino ku kit kwo maeno re ma mama udoko Jamulembe pa Yehova. Kukwong’a, eii kara an de adok jayic calu en, re lembe larere ngo ire kum nwang’u dong’ tuko para udaru mwonya. Bende, dok ebed nia cam ucek en de, acopo camu ngo kum awinjo ngo kec kan abetuko! Wiya ubed ucungo kwa i kum tukone. Agam amaru tuko mi baseball nisagu lembe mange ceke!

Ento kinde m’adoko ku oro 29, agam anwang’ara ku ret ma lee kinde m’abemito nia amak mupira i saa pa kwaya. I ng’ey ma kuma ukey ci, aweko nituko calu jaratuko ma jabodho. Re asu abed aponjo jurutuko mange ma gimaru tuko mi baseball kaka moko ceng’ini ku pacu para.

KITE MA BIBLIA ULOKO KO KWO PARA

I oro 1957, agam ayiyo lwong’o mi Jumulembe pa Yehova pi coko moko ma gibitimo i bar ma dit kaka m’abed atuko i iye baseball. Kinde m’abedo i kind dhanu, aneno piyo piyo mandha nia kite ma Jumulembene gibedo ko migi yoo ukoc bor ku kit yakini mi lwak m’abed aneno kinde ma wabetuko baseball. Lembe m’aneno i cokone ucwala nicaku ponjo Biblia ku Jumulembe man nicaku cidho i coko migi ceke.

Ponji ma pol mi Biblia m’agam aponjo uwang’u iya lii. Ku lapor, Yesu uyero nia i nindo mi kajik ceng’, julub pare gibirweyo lembanyong’a mi ker pa Mungu iwi ng’om zoo. (Matayo 24:14) Aponjo bende nia Jukristu mandha girweyo ngo lembanyong’a pi ninwang’u sente. Yesu yero kumae: “Wunwang’u mananu, wun de wumii mananu.”​—Matayo 10:8.

Kinde m’abino ponjo Biblia, abed aporo lembe m’eyero ku lembe m’abed aneno i kind Jumulembe pa Yehova. Abed afoyo lee dit kero ma gibetimo pi nimewo lembanyong’a mi Ker pa Mungu i wang’ ng’om zoo. Agam aneno nia gibenyutho berocwiny ma Yesu uponjo nia Jukristu gibed ginyuthi. Pieno kinde m’asomo Marko 10:21, aneno lwong’o pa Yesu ma e: ‘Bin ilub toka,’ e agam amaru nidoko Jamulembe.

Re pi nitundo i kum yub maeno uting’o kare. Pilembe, niai con abed atuko tuko mi sente ku numero moko m’abed apimo ko “bati” kubang’ yenga i loterie mi ng’om mwa. Ento, agam aponjo niai kud i Biblia nia Mungu ng’olo lembe iwi dhanu ma woro mungu mi “mierolembe” niwacu mi bati, man kethocwiny hai i kum piny. (Isaya 65:11; Jukolosai 3:5) Pieno, amaku yub mi weko goyo loterie. Ceng’yenga mi yenga ma rom m’aweko i iye goyo loterie, numero para mi pimo “bati” re m’unwang’u! Dhanu ugam unywara hai pilembe atuko ngo yenga maeca, man gidiya lee dit nia acidh atuki kendo, re acidho ngo. Man adok de ngo kendo i loterie.

Nia nindo m’alimo i iye batizo i coko ma dit mi Jumulembe pa Yehova ci, alokaloka m’atimo i kwo uketho acaku nwang’ara kud amulaic. (Juefeso 4:24) Uthieno ma cing’ nica, kinde m’adok i hôtel m’abino i iye, awog anwang’u nyaku moko m’abed aweco ko con ucungo woko ubekura i wang’ dhugola mi kusika para. Eyero ira kumae: “Kwi kumi Sammy. Wek wakebil mido kwo!” Ento adwoko ire ndhu nia, “Ungo!” man apoyo wiye nia, kawoni dong’ kit kwo para ucungo nimakere ku cik mir ukungu mi Biblia. (1 Jukorinto 6:18) E egam ekok nia, “Ang’o nya?”. E ecayu cik mir ukungu mi Biblia iwi lembsasa mi tarwang’ man ecaku rido lembe nia wadog wacak kwo kendo kude. Ento, amondo nya yoo i kusika, man atwiyo dhugola i bang’a. Tin, atie kud anyong’a niwacu nia, niai nindo m’alimo i iye batizo man adoko Jamulembe pa Yehova i oro 1958, amoko kii i kum alokaloka m’atimo i kit kwo para.

MUGISA M’ANWANG’U

Awinjara nia, etie ber dit nikiewo akiewa buu mugisa ma tung’ tung’ m’anwang’u ni kum woro telowic mi Biblia! Kud i kind mugisane, moko tie jurimo mandha dupa m’atie ko, kwo m’utie ku telembene, man mutoro mandha.

Amaru asu baseball, re alar ang’iyo nia ang’o ma kwayu ukadh i kabedo ma kwong’a. I tuko mi baseball, agam anwang’u dwong’ man sente; re piny maeno ceke gigalu ngo. Ento winjiri para ku Mungu man utumego ku nyimego ma an de atie acel mi kindgi bigalu rondo ku rondo. Biblia uwacu kumae: “Ng’om ubekadhu woko man awanya ma racne de, ento ng’atu m’ubetimo yeny pa Mungu bikwo rondo ku rondo.” (1 Yohana 2:17) Kawoni dong’ amaru Yehova man dhanu pare nisagu lembe mange ceke!