Penji Mi Jusom

Ka ng’atu ma nico ku ng’atu ma dhaku ma gigamiri ngo, givuto karacelo traka ma thelembe mandha mbe, nyo eca nyutho nia gitimo dubo m’ukwayu juketh komite mi pokolembe?

Ka nico ku dhaku moko givuto kendgi traka karacelo ma thelembe mandha mbe, eno copo nyutho nia gitimo lembsasa mi tarwang’. Pieno, jucikiri niketho komite mi pokolembe.​—1 Kor. 6:18.

Judong cokiri gibing’io i lembeman cuu mandha pi nineno ka nyo ukwayu juketh komite mi pokolembe kunoke ngo. Ku lapor, nyo nwang’u gitie ku lembakeca mi gamiri i kindgi? Nyo i wang’e judong cokiri ular umio igi juk pilembe gibino ku timo m’umaku piny ungo i kindgi? Pirang’o givuto karacelo? Nyo etie lembe ma gilar gipangu apanga? Nyo nwang’u gicopo uro nivuto karacelo? Nyo lembe moko ma rek kunoke ariti ma tek uwok, m’ukwayu givuti karacelo pilembe katimo nedi ubino mbe igi? (Ekl. 9:11) Givuto kani? Calu ma lembeman ukoc ku wadi, lembe mange de copo bedo nuti ma judong cokiri gicikiri ning’io ie i wang’ nimaku yub.

I ng’ei ma guriri mi judong cokiri udaru ng’io i lembe ceke, gibineno ka nyo ubekwayu juketh komite mi pokolembe kunoke ngo.