Wamedara niketho wiwa kilili i tic mi ketho dhanu gidok julub
1. Wacikara nitimo ang’o kara dhanu gibin gibothi?
1 Adwogi mi tic mi oro 2014 unyutho amora mi dhanu pa Mungu man wodhiri migi i tic mi rweyo lembanyong’a mi Ker. (Mat. 24:14) Nikadhu kud i tic mi rweyo lembanyong’a ot kubang’ ot, kampany ma segi mi poko trakt ku karatasi mi lwong’o, man nikadhu kud i yub ma wamaku pi tuco lembe kaka ma dhanu pong’ i ie, wabetundo nirweyo lembe mi Biblia ni dhanu dupa akeca nikadhu iwang’e. Ento, kara dhanu gibin gibothi, wacikara niponjo kugi Biblia pi nikonyogi gidok julub pa Yesu.—1 Tim. 2:4.
2. Ukwayu wapenjara penji ma kani pi nikonyowa wabed ayika saa ceke nicaku ponji mi Biblia?
2 Bed ayika saa ceke nicaku ponji mi Biblia: Saa ma lembe ma waberweyo ni dhanu utelo nen pa ng’atu moko, nyo ibed itimo kero nipenje enyuth kabedo ku namba mi telefon pare man nidok pio pio nicaku kude ponji mi Biblia? Nindo udaru kadhu adi niai m’ipimo ninyutho i ie wang’ mi kwong’o m’irombo ku ng’atini kite ma wabed waponjo ko Biblia ku dhanu? Nindo udaru kadhu adi niai m’ipenjo i ie dhanu m’ibed itero igi gazeti njaa nia nyo gicopo maru niponjo Biblia? Nyo idaru ninyutho video Pirang’o Ukwayu Niponjo Biblia? man video Jutimo Ponji mi Biblia Nenedi? ni jurutic wedwu, awiya wedwu mi somo, judhugola peri, man dhanu mange m’ing’eiri kugi? Saa m’ibetio ku meza kunoke nyathipiny ma jucwalu acwala man ma jukpero buku mwa ma tung’ tung’ i wie, nyo ibed itimo kero ninyutho ni dhanu ma gibeting’o buku mi ponji nia jubed jutio ko pi ponjo Biblia mi mananu?
3. Kara waponj lemandha cuu ni dhanu, ang’o m’ukwayere?
3 Kony m’uai ibang’ Yehova giku Yesu: Kinde ma Yesu ucaku lembang’ola pare mi ‘ketho dhanu gidok julub’ ku wec “wucidhi,” ebino ninyutho nia wacikara nitimo kero man nimaku yub m’umbe galu. Re, ewekowa ngo, eng’olo nia ebibedo karacelo kudwa. (Mat. 28:19, 20) M’umedo maeno, Yehova umio iwa tipo pare maleng’ karacelo ku jamtic ma tung’ tung’ man bende ponji m’uromo pire kara waponj lemandha ni dhanu. (Zek. 4:6; 2 Kor. 4:7) Wacopo nirwo nia Mungu umi iwa ava man bende copo mi timo tic maeni ma pire tek.—Flp. 2:13.
4. Pirang’o wacikara niketho wiwa kilili i tic mi ketho dhanu gidok julub?
4 Rweyo lembanyong’a kelo iwa mutoro lee mandha. Re, anyong’a mwa medere ka waponjo ng’atu moko ku lemandha man wakonye edikere kudwa i ‘yo ma tundo i kwo.’ (Mat. 7:14; 1 Tes. 2:19, 20) M’usagu zoo ke, ka wabemedara niketho wiwa kilili i tic mi ketho dhanu gidok julub, wanyayu anyong’a i Yehova ‘m’uyenyo ngo nia ng’atu moko rwiny, ento nia dhanu ceke gitund ba lokocwiny.’—2 Pet. 3:9.