Wamed bodho mwa i tic mi rweyo lembanyong’a—Nitendo dhanu ma waponjo kugi Biblia gibed ku ng’iyo ma ber mi ponji

Pirang’o pire tie tek nitimo kumeno: Kara dhanu ma waponjo kugi Biblia giteng’ni i tipo, gicikiri nipong’o rieko migi man adundegi ku ponji mir ukungu mi Lembe pa Mungu, re eno kende uromo ngo. (Ebr. 5:12–6:1) Pi niponjo Biblia, ukwayu kero ma lee. Etie bende niribo kind lembe ma waponjo ma nyen, ku lembe ma wadaru ning’eyo, man nineno nia lembene copo nikonyowa nenedi. (Rie. 2:1-6) Ka dhanu ma waponjo kugi Biblia gitundo ning’eyo sayu lembe gin gigi i buku mwa ma tung’ tung’, gibibedo ayika nidwoko wang’ penji ma tung’ tung’ mi Biblia nikadhu kud i bukunegi. Kero ma lee ma gibetimo pi nitio ku lembe ma gibeponjo biketho gibibedo ayika nicungo matek saa mir amulaic ma gibinwang’u i kwo migi mi Jukristu.—Lk. 6:47, 48.

Kite ma juromo timo ko:

Keth peko nia pire tie tek niyenyo kony pa Yehova nikadhu kud i rwo iwang’ nicaku ponjiman.—Yoh. 14:26; 1 Kor. 2:10.
Niai i acaki, keth cwiny ng’atu m’iponjo kude Biblia nia ebed eyikere iwang’ ponji. Nyuth ire buku peri m’iponjo ko kude, man nyuth ire kite ma juriedo ko kende kende the wec ma pigi tek.
Keth etii ku wec pare gire pi nidwoko wang’ penji. Kud iketh ponjine ukadhi ni penji ku dwokowang’e kende kende, ma nia ng’atu m’ibeponjo kude usom dwokowang’ penjine asoma niai kud i buku.
Keth cwiny ng’atu m’iponjo kude Biblia nia ebed esom ng’et Lembe pa Mungu moko kokoro kubang’ ceng’. Nyuth ire program mi somo Biblia ma nwang’ere i jw.org; program maeno unyutho kite ma cuu m’ecopo nisomo ko Bibliane. Bikwayu etim kero lee kara ebed ku ng’iyo mi somo Biblia kubang’ ceng’, re kero maeno bibedo ku matoke ma ber.—Zab. 1:2, 3.
Nyuth ni ng’atu m’iponjo kude Biblia kite m’ecopo nitio ko ku Watchtower Library kunoke BIBLIOTHÈQUE EN LIGNE Watchtower pi nidwokowang’ penji mi Biblia. Konye ning’eyo nyiguta ma jubed jukiewo ko i adundo nying’ buku ma tung’ tung’ ma jubed jutio ko wang’ mapol i coko.

I dwi maeni kepim nitimo kumae:

Kan imbe ku ng’atu moko m’iponjo kude Biblia, tim kumae: Som verse moko i Biblia, kunoke som udukuwec acel mi Gazeti Ot Kur ma Wiw (La Tour de Garde), ing’eye, dok ikor i adundo lembe ceke m’iai isomo, pi nikelo alokaloka ma ber i kite mi nyang’ i lembe m’ibesomo.