Kite ma wacopo nimulo ko adunde dhanu ma wabeponjo
1. Ponji pa Yesu ubino ku matoke ma nenedi iwi adunde juwinj pare?
1 Ponji pa Yesu Kristu ubed umulo adunde juwinj pare. Nindo moko, adunde mi julub pare ‘uwang’ lii’ yo ng’ei m’egam ekoro igi Lembagora i kite ma ginyang’ i ie ma ber. (Lk. 24:32) Woro mandha ni Mungu ucikere niai i adunde ng’atini. Pieno, wacopo nenedi nimulo adunde dhanu ma wabeponjo kara wacwalgi nitimo alokaloka i kwo migi?—Rum. 6:17.
2. Riekowang’ man ng’eyothelembe copo konyowa nenedi kara ponji mwa umul adunde ng’atini?
2 Tii ku riekowang’ man ng’eyothelembe: Yero kende kende nia gin mae tie ber kunoke rac, copo ngo nicwalu dhanu ma dupa i timo. I andha, tio ku giragora dupa akeca pi nicayu yioyic mi dini migi copo niketho gikwer ponji mwa akwera. Pi nicwalu ng’atini i timo, wacikara mi kwong’o ning’eyo thelembe mi yioyic man mi timo pare. Penji mi riekowang’, ma walondo cuu, man ma copo ketho jawinj mwa uwodh paru pare gire, bimio ire amora mi koro lembe m’upondo i ie. (Rie. 20:5) Ing’eye, wacopo ning’iyo paru moko ma copo mulo adundene niai kud i Lembe pa Mungu. Pieno, wacikara nidieng’ cuu mandha kude man nibedo ku cirocir. (Rie. 25:15) Poi nia dhanu ceke timo ngo mediri mi tipo rom rom, jumoko mediri pio pio, ju mange ke yo yo. Wek kaka ni tipo maleng’ pa Yehova utel wi paru man timo pare.—Mk. 4:26-29.
3. Wacopo konyo nenedi dhanu ma wabeponjo kara gibed ku kite kunoke kurayung ma beco?
3 Konygi gitim kero nibedo ku kite kunoke kurayung ma beco: Verse ma tung’ tung’ mi Biblia, m’unyutho bero man mer pa Yehova copo nikonyo dhanu ma wabeponjo gibed ku kite kunoke kurayung ma beco. Wacopo tio ku giragora ma tung’ tung’, ku lapor, Zaburi 139:1-4 kunoke Luka 12:6, 7 pi ninyutho kite ma Mungu ubedieng’ ko akeca piwa acel acel. Ka dhanu ma wabeponjo kugi gitimo kero nibedo ku foyofoc lee ni Yehova pi bero pare ma nwang’u waromo ko ngo, mer migi bimedere ibang’e man gibimediri nimoko i kume. (Rum. 5:6-8; 1 Yoh. 4:19) Bende, ka gitundo ning’eyo nia timo migi copo nifoyo kunoke ninyayu can i Yehova, lembuno copo cwalugi gibed ku timo ma binyayu mutoro i ie man ma bimio ire yung.—Zab. 78:40, 41; Rie. 23:15.
4. Ka wabeponjo ng’atini, wacopo nyutho nenedi nia wabeworo bedagonya pare mi timo ng’iyong’ic pare en gire?
4 Yehova diyo ngo ng’atu moko acel de nia uwor cik pare. Ento, ekwayu dhanu akwaya, m’enyutho ko igi bero mi tio ku juk parene. (Isa. 48:17, 18) Wan de, wanyutho nia wabelubo lapor pa Yehova nwang’u wabeponjo dhanu i ayi ma copo konyogi nimaku yub migi gigi. Ka dhanu ma wabeponjo utundo gin gigi ning’eyo nia pire tek nitimo alokaloka i kwo migi, eno kelo matoke mi nja. (Rum. 12:2) Eno konyogi bende nicoro ceng’ni akeca ku Yehova, ma en e ng’atu ma “ponjo [kunoke, ng’iyo i] adunde.”—Rie. 17:3.