“Marchons par la foi, non par la vue” (“Wawoth ku yioyic, ento ku neno re ngo”)
Nindo ma nok iwang’ mak ma jumaku ko adhura mi Yerusalem man iwang’ nyoth ma junyothe ko pi magwei, jakwenda Paulo ular ukiewo nia Jukristu gitie calu asikari ma ber pa Kristu, pieno gicikiri ning’eyo nia masendi bibedo nuti, man gicikiri ngo niketho jamcing’gi kud anyong’a migi gigi, i kabedo ma kwong’a. (2 Tim. 2:3, 4) Calu nyoth mi ng’om maeni ma rac udhingo ceng’ni, wacikara nibedo ku yioyic ma tek, yioyic ma copo konyowa kara waketh wiwa kilili iwi lembe mi tipo. (2 Kor. 4:18; 5:7) Nen video ma thiwie tie, “Marchons par la foi, non par la vue” (“Wawoth ku yioyic, ento ku neno re ngo”), (Yab jw.org, mi français, i the thiwiwec, PUBLICATIONS > VIDÉOS). Kepim nineno kite ma Naham giku min ot pare Abital gimaru ko giki mi kum nikadhu mukero, man kite ma maru maeno udoko ko igi ni awic mi tho. Ing’eye, sai dwokowang’ penji mae.
(1) I rundi ma kwong’a, ‘gin mir adegi . . . m’ucungo i kamaleng’’ ubino ang’o, man ugam ukwayere nia Jukristu ma gikwo i Yerusalem gitim ang’o m’umbe nigalu? (Mat. 24:15, 16) (2) Pirang’o ugam ukwayu nibedo ku yioyic ma tek, kara ng’atini utund niringo kud i Yerusalem? (3) Ugam ukwayere nia giwek ang’o ma tung’ tung’? (4) Pirang’o Naham giku min ot pare Abital gibino nigalu? (Mat. 24:17, 18) (5) Amulaic mange ma kani m’unwang’u yioyic pa Rachel kinde m’ebino niweko adhura mi Yerusalem? (Mat. 10:34-37; Mk. 10:29, 30) (6) Ethan uweko iwa nenedi lapor ma ber mi yioyic man mi geno Yehova? (7) Jukristu gigam ginwang’iri ku peko ma kani i Pela? (8) Yioyic pa Naham giku min ot pare Abital ujwik nok nok nenedi? (9) Yehova upong’o nenedi yeny mi Jukristu m’ubino nikwo i Pela? (Mat. 6:33; 1 Tim. 6:6-8) (10) Wacopo lubo lapor pa Abraham giku Sara nenedi saa maeni ma wabekwo i nindo ma tokcen mi ng’om ma rac pa Sitani? (Ebr. 11:8-10) (11) Paru ma kani m’uketho Naham giku min ot pare Abital gimaku yub mi dok ku ng’eigi i Yerusalem, man pirang’o paru migine ubino paru ma rac? (Luka 21:21) (12) Kwo ubino nenedi i Yerusalem kinde ma Naham giku min ot pare Abital gidok ku ng’eigi i Yerusalem? (13) Pirang’o wacikara niketho yioyic mwa udok tek kawoni ma fodi ajiki mi ng’om maeni ma rac k’utundo ngo?—Lk. 17:31, 32; 21:34-36.
Niwotho ku yioyic thelembene tie (1) nigeno telowic pa Yehova, (2) niweko telowic pare utel wi dagu tielo mwa, man (3) ninyutho nia waneno lembe mi tipo ni giki ma pigi tek nikadhu giki ceke mi kum. Dong’ wamak yub mi wotho nja ku nja ku yioyic, ma wabed ko ma wang’eyo nia, “ng’om ubekadhu woko kud awanya ma racne de: ento ng’atu m’utimo yeny ma Mungu yenyo bedo rondo ku rondo.”—1 Yoh. 2:17.