Nyo ibetio cuu ku kart ma terojo i JW.ORG?

Ceng’ni eni, can madit bitundo. Pieno, tic mwa mi rweyo lembanyong’a ucikere nitimere pio pio. (Rie 24:11, 12, 20) Kara wakony dhanu, wacopo nitio ku kart ma terojo i JW.ORG pi nitelo nen migi ikum Lembe pa Mungu man ikum kusika mwa mir Internet. kart maeno utie kud ayi moko, ma ka jumaku cal mir ayine, eterojo ninwang’u video Pirang’o ukwayu niponjo Biblia? man bende ekwayu ng’atini unwang’ lembe mange dupa, kunoke ukwai ponji mi Biblia. Dhanu moko giyio ngo girasoma mi cing’, ento gitie ayika niyabu kusika mwa mir Internet. Kud ibed ku jiji nimio igi kart maeno. Re kud iwek kart ne ni dhanu ma lembene utelo ngo nen migi.

Kinde m’ibecidho i tic peri, icopo telo nen pa ng’atini ku wec mae: “Atie ku gin moko m’amito nimio iri. Kart maeni biteri i kusika moko mir Internet m’ibinwang’u lembe dupa i ie mi mananu man video m’uweco iwi lembe ma tung’ tung’.” (Yoh 4:7) Calu ma kart ne gitie thindho thindho, icopo nibewotho ku moko nyanok m’ibimio ni dhanu saa ceke ma kaka unen iri.